Premiers recueils. 1549-1553

Joachim Du Bellay

A Tres illustre Princesse Madame Marguerite 

Au lecteur 
Auratus in olivam 
I 
II 
III 
IV 
V 
VI 
VII 
VIII 
IX 
X 
XI 
XII 
XIII 
XIV 
XV 
XVI 
XVII 
XVIII 
XIX 
XX 
XXI 
XXII 
XXIII 
XXIV 
XXV 
XXVI 
XXVII 
XXVIII 
XXIX 
XXX 
XXXI 
XXXII 
XXXIII 
XXXIV 
XXXV 
XXXVI 
XXXVII 
XXXVIII 
XXXIX 
XL 
XLI 
XLII 
XLIII 
XLIV 
XLV 
XLVI 
XLVII 
XLVIII 
XLIX 
L 
LI 
LII 
LIII 
LIV 
LV 
LVI 
LVII 
LVIII 
LIX 
LX 
LXI 
LXII 
LXIII 
LXIV 
LXV 
LXVI 
LXVII 
LXVIII 
LXIX 
LXX 
LXXI 
LXXII 
LXXIII 
LXXIV 
LXXV 
LXXVI 
LXXVII 
LXXVIII 
LXXIX 
LXXX 
LXXXI 
LXXXII 
LXXXIII 
LXXXIV 
LXXXV 
LXXXVI 
LXXXVII 
LXXXVIII 
LXXXIX 
XC 
XCI 
XCII 
XCIII 
XCIV 
XCV 
XCVI 
XCVII 
XCVIII 
XCIX 
C 
CI 
CII 
CIII 
CIV 
CV 
CVI 
CVII 
CVIII 
CIX 
CX 
CXI 
CXII 
CXIII 
CXIV 
CXV 
L'antérotique de la vieille et de la jeune amye 
Vers lyriques 
Au lecteur 
I. Les louanges d'Anjou au fleuve de Loyre 
II. Des misères et fortunes humaines au seigneur Jan Proust 
III. Les louanges d'amour au seigneur René d'Urvoy 
IV. De l'inconstance des choses au Seigneur Pierre de Ronsard 
V. A deux Damoyzelles 
VI. Du premier jour de l'an au Seigneur Bertran Bergier 
VII. Du jour des bacchanales au Seigneur Rabestan 
VIII. Du retour du printens à Jan d'Orat 
IX. Chant du desesperé 
X. Au Seigneur Pierre de Ronsard 
XI. A une dame cruelle et inexorable 
XII. De porter les miseres et la calumnie au seigneur Christofle du Breil 
XIII. De l'immortalité des poëtes au seigneur Bouju 
XIV. Epitaphe de Clement Marot 
Recueil de poésie 
A Tresillustre Princesse Madame Marguerite Seur unique du Roy 
A Sa Lyre 
Prosphonematique 
Chant triumphal sur le voyage de Boulongne 
Vers liriques 
I. A la Royne 
II. A Tresillustre Princesse Madame Marguerite seur unique du Roy 
III. A Mellin de Sainct Gelais 
IV. A Madame Marguerite d'escrire en sa langue 
V. A Tresillustre Prince Monseigneur Reverendiss. Cardinal de Guyse 
VI. A Monseigneur Reverendiss. Cardinal de Chastillon 
VII. L'avantretour en France de Monseigneur Reverendiss. Cardinal du Bellay 
VIII. Contre les Avaritieux 
IX. A Bouju. Les conditions du vray poëte 
X. De l'innocence et de n'attenter contre la magesté divine 
XI. Au Seigneur du Boysdaulphin Maistre d'hostel du Roy 
XII. A Carles 
XIII. A Heroet 
XIV. A Mercure et à sa lyre pour adoucir la cruauté de sa dame 
XV. La louange du feu Roy François et du Treschrestien Roy Henry 
XVI. A Madame la Contesse de Tonnerre 
XVII. Dialogue d'un amoureux et d'écho 
XVIII. A une dame 
XIX. La mort de Palinure du cinquiesme de Virgile 
XX. Elégie 
XXI. Chanson 
Oeuvres de l'invention de l'autheur 
I. La complainte du desesperé 
II. Hymne Chrestien 
III. La monomachie de David et de Goliath 
IV. Ode au Reverendiss. Cardinal du Bellay 
V. La Lyre Chrestienne 
VI. Discours sur la louange de la vertu et sur les divers erreurs des hommes à 
Salm. Macrin 
VII. Les deux Marguerites 
VIII. Ode au Seigneur des Essars sur le discours de son Amadis 
IX. Au Seign. Rob. de la Haye pour Estrene 
X. Estrène à D. M. de la Haye 
XI. Ode Pastorale à Ung Sien Amy 
XII. A Salm. Macrin 
XIII. Sonnetz de l'honneste amour 
XIV. L'adieu aux muses pris du latin de Buccanan



A Tres illustre Princesse Madame Marguerite 
Seur unique du Roy Luy presentant ce livre 

Sonnet 
Par un sentier inconneu à mes yeux 
Vostre grandeur sur ses ailes me porte 
Où de Phebus la main sçavante et forte 
Guide le frein du chariot des cieulx. 
Là elevé au cercle radieux 
Par un Demon heureux, qui me conforte, 
Celle fureur tant doulce j'en rapporte, 
Dont vostre nom j'egalle aux plus haulx dieux. 
O Vierge donc, sous qui la Vierge Astrée 
A faict encor' en nostre siecle entrée! 
Prenez en gré ces poëtiques fleurs. 
Ce sont mes vers, que les chastes Carites 
Ont emaillez de plus de cent couleurs 
Pour aler voir la fleur des Marguerites. 
COELO MUSA BEAT 



Au lecteur 

Combien que j'aye passé l'aage de mon enfance et la meilleure part de mon 
adolescence assez inutilement, lecteur, si est-ce que par je ne sçay quelle 
naturelle inclination j'ay tousjours aimé les bonnes lettres: singulierement 
nostre poësie françoise, pour m'estre plus familiere, qui vivoy' entre ignorans 
des langues estrangeres. Depuis, la raison m'a confirmé en cete opinion: 
considerant que si je vouloy' gaingner quelque nom entre les Grecz, et Latins, 
il y fauldroit employer le reste de ma vie, et (peult estre) en vain, etant jà 
coulé de mon aage le temps le plus apte à l'etude: et me trouvant chargé 
d'affaires domestiques, dont le soing est assez suffisant pour dégouter un homme 
beaucoup plus studieux que moy. Au moyen de quoy, n'ayant où passer le temps, et 
ne voulant du tout le perdre, je me suis volontiers appliqué à nostre poësie: 
excité et de mon propre naturel, et par l'exemple de plusieurs gentiz espritz 
françois, mesmes de ma profession, qui ne dedaignent point manier et l'epée et 
la plume, contre la faulse persuasion de ceux qui pensent tel exercice de 
lettres deroger à l'estat de noblesse. Certainement, lecteur, je ne pouroy' et 
ne voudroy' nier, que si j'eusse ecrit en grec ou en latin, ce ne m'eust esté un 
moyen plus expedié pour aquerir quelque degré entre les doctes hommes de ce 
royaume: mais il fault que je confesse ce que dict Ciceron en l'oraison pour 
Murene, Qui cùm cytharoedi esse non possent, et ce qui s'ensuit. Considerant 
encores nostre langue estre bien loing de sa perfection, qui me donnoit espoir 
de pouvoir avecques mediocre labeur y gaingner quelque ranc, si non entre les 
premiers, pour le moins entre les seconds, je voulu bien y faire quelque essay 
de ce peu d'esprit que la Nature m'a donné. Voulant donques enrichir nostre 
vulgaire d'une nouvelle, ou plustost ancienne renouvelée poësie, je m'adonnay à 
l'immitation des anciens Latins, et des poëtes Italiens, dont j'ay entendu ce 
que m'en a peu apprendre la communication familiere de mes amis. Ce fut 
pourquoy, à la persuasion de Jaques Peletier, je choisi le Sonnet et l'Ode, deux 
poëmes de ce temps là (c'est depuis quatre ans) encores peu usitez entre les 
nostres: étant le Sonnet d'italien devenu françois, comme je croy, par Mellin de 
Sainct Gelais, et l'Ode, quand à son vray et naturel stile, representée en 
nostre langue par Pierre de Ronsard. Ce que je vien de dire, je l'ay dict 
encores en quelque autre lieu, s'il m'en souvient: et te l'ay bien voulu 
ramentevoir, lecteur, afin que tu ne penses que je me vueille attribuer les 
inventions d'autruy. Or, afin que je retourne à mon premier propos, voulant 
satisfaire à l'instante requeste de mes plus familiers amis, je m'osay bien 
avanturer de mettre en lumiere mes petites poësies: après toutesfois les avoir 
communiquées à ceux que je pensoy' bien estre clervoyans en telles choses, 
singulierement à Pierre de Ronsard, qui m'y donna plus grande hardiesse que tous 
les autres, pour la bonne opinion que j'ay tousjours eue de son vif esprit, 
exact sçavoir, et solide jugement en nostre poësie françoise. Je n'ay pas icy 
entrepris de respondre à ceux qui me voudroient blasmer d'avoir precipité 
l'edition de mes oeuvres, et, comme on dict, avoir trop tost mis la plume au 
vent. Car si mes ecriz sont bons, ma jeunesse ne leur doibt oster leur louange 
meritée. S'ilz ne sont tels, elle doibt pour le moins leur servir d'excuse: 
d'aultant que si j'ay faict en cet endroit quelque acte de jeunesse, je n'ay 
faict si non ce que je devoy'. Pour le moins, ce m'est une faulte commune 
avecques beaucoup d'autres meilleurs espriz que le mien. Je ne suis tel, que je 
vueille blâmer le conseil d'Horace, quand à l'edition des poëmes: mais aussi ne 
suis-je de l'opinion de ceux qui gardent religieusement leurs ecriz, comme 
sainctes reliques, pour estre publiez apres leur mort: sçachant bien que tout 
ainsi que les mors ne mordent point, aussi se sentent-ilz les morsures. Cete 
conscientieuse difficulté, lecteur, n'estoit ce qui me retardoit le plus en la 
premiere edition de mes ecriz. Je craignoy' un autre inconvenient, qui me 
sembloit avoir beaucoup plus apparente raison de future reprehension. C'est que 
telle nouveauté de poësie pour le commencement seroit trouvée fort etrange, et 
rude. Au moyen de quoy, voulant prevenir cete mauvaise opinion, et quasi comme 
applanir le chemin à ceux qui, excitez par mon petit labeur, voudroient enrichir 
nostre vulgaire de figures et locutions estrangeres, je mis en lumiere ma 
Deffence et illustration de la langue françoise: ne pensant toutefois au 
commencement faire plus grand oeuvre qu'une epistre et petit advertissement au 
lecteur. Or ay-je depuis experimenté ce qu'au paravant j'avoy assez preveu, 
c'est que d'un tel oeuvre je ne rapporteroy jamais favorable jugement de noz 
rethoriqueurs françoys, tant pour les raisons assez nouvelles, et paradoxes 
introduites par moy en nostre vulgaire, que pour avoir (ce semble) hurté un peu 
trop rudement à la porte de noz ineptes rimasseurs. Ce que j'ay faict, lecteur, 
non pour aultre raison que pour eveiller le trop long sillence des cignes et 
endormir l'importun croassement des corbeaux. Ne t'esbahis donques si je ne 
respons à ceulx qui m'ont apellé hardy repreneur: car mon intention ne feut 
onques d'auctorizer mes petiz oeuvres par la reprehension de telz gallans. Si 
j'ay particularizé quelques ecriz, sans toutefois toucher aux noms de leurs 
aucteurs, la juste douleur m'y a contrainct, voyant nostre langue, quand à sa 
nayfve proprieté si copieuse, et belle, estre souillée de tant de barbares 
poësies, qui par je ne scay quel nostre malheur plaisent communement plus aux 
oreilles françoises que les ecritz d'antique, et solide erudition. Les gentilz 
espris, mesmes ceulx qui suyvent la court, seule escolle ou voluntiers on 
apprent à bien proprement parler, devroient vouloir pour l'enrichissement de 
nostre langue, et pour l'honneur des espriz françois, que telz poëtes barbares, 
ou feussent fouettez à la cuysine, juste punition de ceulx qui abusent de la 
pacience des Princes, et grands Seigneurs par la lecture de leurs ineptes 
oeuvres: ou (si on les vouloit plus doucement traicter) qu'on leur donnast 
argent pour se taire; suyvant l'exemple du grand Alexandre, qui usa de semblable 
liberalité en l'endroict de Cherille, poëte ignorant. Certes j'ay grand'honte, 
quand je voy' le peu d'estime que font les Italiens de nostre poësie en 
comparaison de la leur: et ne le treuve beaucoup etrange, quand je considere que 
voluntiers ceulx qui ecrivent en la langue Toscane sont tous personnaiges de 
grand' erudition: voire jusques aux Cardinaux mesmes et aultres seigneurs de 
renom, qui daignent bien prendre la peine d'enrichir leur vulgaire par infinité 
de beaux ecriz: usant en cela de la diligence et discretion familiere à ceulx 
qui legerement n'exposent leurs conceptions au publique jugement des hommes. 
Pense donques, je te prie, Lecteur, quel prix doivent avoir, en l'endroict de 
celle tant docte et ingenieuse nation Italienne, les ecriz d'ung petit Magister, 
d'un Conard, d'un Badault, et aultres mignons de telle farine, dont les oreilles 
de nostre peuple sont si abbreuvées, qu'elles ne veulent aujourd'huy recevoir 
aultre chose. Je suis certain que tous lecteurs de bon jugement prendront ce que 
je dy en bonne part, veu que je ne parle du tout sans raison. Au fort, si nos 
petiz Rimeurs s'en trouvoint un peu fachez, je leur conseilleroy' de prendre 
pacience: considerant que je ne suis ung Aristarque ou Aristophane, dont la 
grave censure doive oster leurs ecriz du rôle de noz poësies, ou retarder leurs 
aucteurs de mieux faire à l'advenir. Aussi leur mescontentement ne me doit 
rompre ma deliberation, qui par veu solennel me suis obligé aux Muses de ne 
mentir jamais (que je le puisse entendre) ni en vin ni en poësie. Toutefois je 
ne veux pas du tout estre juge si severe, et incorruptible en matiere de poësie, 
que je suyve l'heresie de celuy qui disoit Mitte me in lapicidinas. Quelques uns 
se plaignent de quoy je blâme les traductions poëtiques en nostre langue, dont 
ilz ne sont (disent-ilz) illustrateurs ny gaigez ny renommez. Aussi ne suis-je. 
Mais s'ilz n'alleguent aultre raison, je n'y feray point de response. Encores 
moins à ce qu'ilz disent, que j'ay reservé la lecture de mes ecriz à une 
affectée demy-douzaine des plus renommez poëtes de nostre langue. Car je n'avoy' 
entrepris de faire un catalogue de tous les autres, mesmes de ceulx qui ne 
m'etoient conneuz ny à leurs noms ny à leurs oeuvres. Ceux dont je ne cherche 
point les applaudissements ont occasion de gronder. Aussi me plaisent leurs 
aboys: car je n'en crain' gueres les morsures. Je fonde encor' (disent-ilz) 
l'immortalité de mon nom sur moindre chose que leurs escritz, dont toutefois ilz 
ne pretendent aucune louange. Ce n'est à eulx ny à moy à juger de nostre cause: 
qui (Dieu mercy) n'est de telle importance, que la court y doibve estre 
longuement embesongnée. Aussi n'ay-je pas fondé mon advancement sur telles 
magnifiques comparaisons. Si en mes poësies je me loüe quelques fois, ce n'est 
sans l'imitation des anciens: et en cela je ne pense avoir encor' esté si 
excessif, que j'aye, pour illustrer le mien, offensé l'honneur de personne. Et 
puis je me vante d'avoir inventé ce que j'ay mot à mot traduit les aultres. A 
peu que je ne leur fay la responce que fist Virgile à un quiddam Zoile, qui le 
reprenoit d'emprunter les vers d'Homere. J'ay (ce me semble) ailleurs assez 
deffendu l'immitation. C'est pourquoy je ne feray longue response à cet article. 
Qui vouldroit à ceste ballance examiner les escritz des anciens Romains et des 
modernes Italiens, leurs arrachant toutes ces belles plumes empruntées dont ilz 
volent si haultement, ilz seroint en hazard d'estre accoutrez en corneille 
Horacienne. Si, par la lecture des bons livres, je me suis imprimé quelques 
traictz en la fantaisie, qui après, venant à exposer mes petites conceptions 
selon les occasions qui m'en sont données, me coulent beaucoup plus facilement 
en la plume qu'ilz ne me reviennent en la memoire, doibt-on pour ceste raison 
les appeller pieces rapportées? Encor' diray-je bien que ceulx qui ont leu les 
oeuvres de Virgile, d'Ovide, d'Horace, de Petrarque, et beaucoup d'aultres, que 
j'ay leuz quelquefois assez negligemment, trouverront qu'en mes escriptz y a 
beaucoup plus de naturelle invention que d'artificelle ou supersticieuse 
immitation. Quelques ungs voyans que je finissoy' ou m'efforçoy' de finir mes 
sonnetz par ceste grace qu'entre les aultres langues s'est faict propre 
l'epigramme françois, diligence qu'on peult facilement recongnoistre aux oeuvres 
de Cassola Italien, disent pour ceste raison que je l'ay immité, bien que de ce 
temps là il ne me feust congneu seulement de nom, ou Apollon jamais ne me soit 
en ayde. Je ne me suis beaucoup travaillé en mes ecriz de ressembler aultre que 
moymesmes: et si en quelque endroict j'ay usurpé quelques figures et façons de 
parler à l'imitation des estrangers, aussi n'avoit aucun loy ou privilege de le 
me deffendre. Je dy encores cecy, Lecteur, affin que tu ne penses que j'aye rien 
emprunté des nostres, si d'avanture tu venois à rencontrer quelques epithetes, 
quelques phrases et figures prises des anciens, et appropriées à l'usaige de 
nostre vulgaire. Si deux peintres s'efforcent de representer au naturel quelque 
vyf protraict, il est impossible qu'ilz ne se rencontrent en mesmes traictz et 
lineamens, ayans mesme exemplaire devant eulx. Combien voit-on entre les Latins 
immitateurs des Grecz, entre les modernes Italiens immitateurs des Latins, de 
commencemens et de fins de vers, de couleurs, et figures poëtiques quasi 
semblables? Je ne parle poinct des orateurs. Ceulx qui voudront considerer le 
stile des Ciceroniens, ou aultres, ne trouverront estrange la ressemblance 
qu'ont ou pourront avoir les poëmes françois, si chacun s'efforce d'escrire par 
immitation des estrangers. Tous arts et sciences ont leurs termes naturelz. Tous 
mestiers ont leurs propres outilz. Toutes langues ont leurs motz et loqutions 
usitées: et qui n'en voudroit user, il se faudroit forger à part nouveaux artz, 
nouveaulx mestiers et nouvelles langues. Ce que j'ay dict, cetuy ci l'a dict 
encor', et cetuy là: aussi les Muses n'ont restrainct, et enfermé en l'esprit de 
deux ou trois tout ce qui se peut dire de bonne grace en nostre poësie. S'il y a 
quelques faultes en mes escritz, aussi ne sont tous les aultres parfaictz. Ceulx 
qui avecques raison me voudront faire ce bien de me reprendre, je mettray peine 
d'en faire mon profit. Car je ne suis du nombre de ceulx qui ayment myeux 
deffendre leurs faultes que les corriger. Mais si quelques ungs directement ou 
indirectement (comme on dict) me vouloient taxer, non point avecques la raison 
et modestie accoutumée en toutes honnestes controversies de lettres, mais 
seulement avecques une petite maniere d'irrision et contournement de nez, je les 
adverty' qu'ilz n'attendent aulcune response de moy: car je ne veux pas faire 
tant d'honneur à telles bestes masquées, que je les estime seulement dignes de 
ma cholere. Si quelques uns vouloient renouveler la farce de Marot et de Sagon, 
je ne suis pour les en empescher: mais il fault qu'ilz cherchent aultre badin 
pour jouer ce rôle avecques eux. Voylà ung petit desseing lecteur, de ce que je 
pouroy' bien respondre à mes calomniateurs, si je vouloy' prendre la peine de 
leur tenir plus long propoz. Quand à ceux qui blasment en moy cet etude 
poëtique, comme totalement inutile, s'ilz veulent combatre contre la poësie, 
elle a des armes pour se deffendre: s'ilz plaignent l'empeschement de ma 
promotion, je les remercie de leur bonne volunté. Ceux qui ayment le jeu, les 
banquetz et aultres menuz plaisirs, qu'ilz y passent et le jour; et la nuict si 
bon leur semble. Quand à moy, n'ayant aultre passetems de plus grand plaisir, je 
donneray vouluntiers quelques heures à la poësie. Et combien ce m'est un labeur 
peu laborieux, et coutumier, si ce n'est ou faisant quelque voiage ou en lieu 
qui n'ait aultre plus joyeuse occupation, bien l'entendent ceux qui me hantent 
de familiarité. J'ayme la poësie, me tire bien souvent la Muse (comme dict 
quelqu'un) furtivement en son oeuvre: mais je n'y suis tant affecté, que 
facilement je ne m'en retire, si la fortune me veult presenter quelque chose, ou 
avecques plus grand fruict je puisse occuper mon esprit. Je te prie donques, amy 
Lecteur, me faire ce bien de penser que ma petite muse, telle qu'elle est, n'est 
toutefois esclave ou mercenaire, comme d'ung tas de rymeurs à gaiges: elle est 
serve tant seulement de mon plaisir. Je te prie encores ne trouver mauvais cet 
advertissement, ou t'ennuyer de sa longueur, comme oultrepassant les bornes 
d'une epistre. En recompence de quoy, je te fay' present de mon Olive augmentée 
de plus de la moitié, et d'une Musagnoeomachie, c'est à dire la Guerre des Muses 
et de l'Ignorance. Ceux qui ne treuvent rien bon, si non ce qui sort de leur 
main, y trouverront à mordre en beaucoup de lieux: mesme en cet endroict ou je 
fay mention de quelques sçavans hommes de nostre France. Les uns diront que j'en 
ay laissé que je ne devoy' pas oublier: les aultres, que je n'ay pas gardé 
l'ordre, nommant quelques ungs les derniers, qui meritoient bien estre au 
premier ranc. Je n'ay qu'une petite response à toutes ces objections frivoles: 
c'est que mon intention n'estoit alors d'ecrire une hystoire, mais une poësie. 
Et combien ce genre d'escrire est peu consciencieux en telles choses, je m'en 
rapporte seulement à ceux qui l'entendent. Mais pourquoy pren-je tant de peine, 
lecteur, à preoccuper l'excuse de ce qui sera trouvé (peult estre) la moindre 
faulte de mes oeuvres? J'ay tousjours estimé la poësie comme ung somptueux 
banquet, ou chacun est le bien venu, et n'y force lon personne de manger d'une 
viande ou boire d'un vin, s'il n'est à son goust, qui le sera (possible) à celuy 
d'un aultre. C'est encor' la raison pourquoy j'ay si peu curieusement regardé à 
l'orthographie, la voyant au jourdhuy aussi diverse qu'il y a de sortes 
d'ecrivains. J'appreuve et loue grandement les raisons de ceux qui l'ont voulu 
reformer, mais voyant que telle nouveaulté desplaist autant aux doctes comme aux 
indoctes, j'ayme beaucoup mieulx louer leur invention que de la suyvre: pource 
que je ne fay pas imprimer mes oeuvres en intention qu'ilz servent de cornetz 
aux apothequaires, ou qu'on les employe à quelque aultre plus vil mestier. Si tu 
treuves quelques faultes en l'impression, tu ne t'en dois prendre à moy, qui 
m'en suis rapporté à la foy d'autruy. Puis le labeur de la correction est tel, 
singulierement en un oeuvre nouveau, que tous les yeux d'Argus ne fourniroient à 
voir les faultes qui s'i treuvent. 







  
Auratus in olivam 
Sola virûm nuper volitabat docta per ora 
Laura, tibi Thuscis dicta, Petrarcha, sonis: 
Tantaque vulgaris fuerat facundia linguas, 
Ut premeret fastu scripta vetusta suo. 
At nunc Thuscanam Lauram comitatur Oliva 
Gallica, Bellaii cura laborque sui. 
Phoebus amat Laurum, glaucam sua Pallas Olivam: 
Ille suum vatem, nec minus ista suum. 
SALMONII MACRINI IULIODUNENSIS ODE IN OLIVAM IOACHIMI BELLAII ANDENSIS 
Supreme vatum hîc postera quos feret, 
Exacta et astas quos tulit hactenus, 
Facunde Bellaï, coruscum 
Andegavis Ligerique lumen: 
Me bellicoso condita Julio, 
Illustre cujus nomen habet, tulit 
Urbs anserem rauce strepentem 
Inter Apollineos olores. 
Dulci tuo effers carmine me tamen, 
Inter poestas atque aliquem facis, 
De musca avens barrhum videri: 
Metior at modulo meo me, 
Dixere multi Pictona quem prius: 
Malim sed Andes sint mihi patria, 
Urbs urbium quòd nostra prorsus 
In medio sita sit duarum. 
De judicatum sic et Horatio: 
Lucanus, anceps, esset an Appulus, 
Utrumque sub finem colonus 
Cum Venusinus agros araret. 
Te propter atqui hinc Andegavus ferar, 
Excîtus auras flatibus ut tuas 
Sublime cantem, prosperoque 
Sydera celsa petam volatu. 
Felix Olivas carminibus, tuas, 
An vate felix illa suo magis, 
Lauram secutura hinc Petrarchas, 
Quintiliam, Nemesin, Corinnam? 
Conjungeretur his utinam mea 
Olim Gelonis! mortua sit licet, 
Tristemque decedens Macrinum 
Liquerit heu! saturumque vitas. 
Sic illa vixit cum unanimi viro, 
Laude ut perenni digna sit evehi: 
At solus argutis valeres 
Tu facere id, Joachime, rythmis. 
  
I 
Je ne quiers pas la fameuse couronne, 
Sainct ornement du Dieu au chef doré, 
Ou que du Dieu aux Indes adoré 
Le gay chapeau la teste m'environne. 
Encores moins veulx-je que l'on me donne 
Le mol rameau en Cypre decoré: 
Celuy qui est d'Athenes honoré, 
Seul je le veulx, et le Ciel me l'ordonne. 
O tige heureux, que la sage Déesse 
En sa tutelle, et garde a voulu prendre, 
Pour faire honneur à son sacré autel! 
Orne mon chef, donne moy hardiesse 
De te chanter, qui espere te rendre 
Egal un jour au laurier immortel. 
  
II 
D'amour, de grace, et de haulte valeur 
Les feux divins estoient ceinctz, et les cieulx 
S'estoient vestuz d'un manteau precieux 
A raiz ardens, de diverse couleur. 
Tout estoit plein de beauté, de bonheur, 
La mer tranquille, et le vent gracieulx, 
Quand celle là naquit en ces bas lieux 
Qui a pillé du monde tout l'honneur. 
Ell' prist son teint des beaux lyz blanchissans, 
Son chef de l'or, ses deux levres des rozes, 
Et du soleil ses yeux resplandissans. 
Le ciel usant de liberalité 
Mist en l'esprit ses semences encloses, 
Son nom des Dieux prist l'immortalité. 
  
III 
Loyre fameux, qui ta petite source 
Enfles de maintz gros fleuves et ruysseaux, 
Et qui de loing coules tes cleres eaux 
En l'Ocean d'une assez vive course: 
Ton chef royal hardiment bien hault pousse 
Et apparoy entre tous les plus beaux 
Comme un thaureau sur les menuz troupeaux 
Quoy que le Pau envieux s'en courrousse. 
Commande doncq' aux gentiles Naiades 
Sortir dehors leurs beaux palais humides 
Avecques toy, leur fleuve paternel, 
Pour saluer de joyeuses aubades. 
Celle qui t'a, et tes filles liquides, 
Deifié de ce bruyt eternel. 
  
IV 
L'heureuse branche à Pallas consacrée, 
Branche de paix, porte le nom de celle 
Qui le sens m'oste, et soubz grand' beauté cele 
La cruaulté, qui à Mars tant agrée. 
Delaisse donq' ô cruelle obstinée! 
Ce tant doulx nom, ou bien te monstre telle, 
Qu'ainsi qu'en tout sembles estre immortelle, 
Sembles le nom avoir par destinée. 
Que du hault ciel il t'ait eté donné, 
Je ne suis point de le croire etonné, 
Veu qu'en esprit tu es la souveraine: 
Et que tes yeux, à ceulx qui te contemplent, 
Coeur, corps, esprit, sens, ame, et vouloir emblent 
Par leur doulceur angelique, et seraine. 
  
V 
C'etoit la nuyt que la Divinité 
Du plus hault ciel en terre se rendit 
Quand dessus moy Amour son arc tendit 
Et me fist serf de sa grand' deité. 
Ny le sainct lieu de telle cruaulté, 
Ny le tens mesme assez me deffendit: 
Le coup au coeur par les yeux descendit 
Trop ententifz à ceste grand' beauté. 
Je pensoy' bien que l'archer eust visé 
A tous les deux, et qu'un mesme lien 
Nous deust ensemble egalement conjoindre. 
Mais comme aveugle, enfant, mal avisé, 
Vous a laissée (helas) qui eties bien 
La plus grand' proye, et a choisi la moindre. 
  
VI 
Comme on ne peult d'oeil constant soustenir 
Du beau Soleil la clarté violente, 
Aussi qui void vostre face excellente 
Ne peult les yeulx assez fermes tenir. 
Et si de près il cuyde parvenir 
A contempler vostre beauté luysante, 
Telle clarté à voir luy est nuysante, 
Et si le faict aveugle devenir. 
Regardez doncq' si suffisant je suys 
A vous louer, qui seulement ne puys 
Voz grands beautez contempler à mon gré. 
Que si mes yeulx avoient un tel pouvoir, 
J'estimeroy' plus fermes les avoir, 
Que n'a l'oyseau à Jupiter sacré. 
  
VII 
De grand' beauté ma Déesse est si pleine, 
Que je ne voy' chose au monde plus belle. 
Soit que le front je voye, ou les yeulx d'elle, 
Dont la clarté saincte me guyde, et meine: 
Soit ceste bouche, ou souspire une halaine 
Qui les odeurs des Arabes excelle: 
Soit ce chef d'or, qui rendroit l'estincelle 
Du beau Soleil honteuse, obscure et vaine: 
Soient ces coustaux d'albastre, et main polie, 
Qui mon coeur serre, enferme, estreinct, et lie, 
Bref, ce que d'elle on peult ou voir, ou croyre. 
Tout est divin, celeste, incomparable: 
Mais j'ose bien me donner ceste gloyre, 
Que ma constance est trop plus admirable. 
  
VIII 
Auray'-je bien de louer le pouvoir 
Ceste beauté, qui decore le monde? 
Quand pour orner sa chevelure blonde 
Je sens ma langue ineptement mouvoir? 
Ny le romain, ny l'atique sçavoir, 
Quoy que là fust l'ecolle de faconde, 
Aux cheveulx mesme, où le fin or abonde, 
Eussent bien faict à demy leur devoir. 
Quand je les voy' si reluysans et blons, 
Entrenouez, crespes, egaulx et longs, 
Je m'esmerveille, et fay' telle complaincte: 
Puis que pour vous (cheveulx) j'ay tel martyre, 
Que n'ay-je beu à la fontaine saincte? 
Je mourroy' cygne, ou je meurs sans mot dire. 
  
IX 
Garde toy bien ô gracieux Zephire! 
D'empestrer l'esle en ces beaulx noeuds epars, 
Que çà, et là, doulcement tu depars 
Sur ce beau col de marbre, et de porphire. 
Si tu t'y prens, plus ne vouldras nous ryre 
Le verd printemps: ainçoys de toutes pars 
Flore voyant que d'autre amour tu ards, 
Fera ses fleurs dessecher par grand' ire. 
Que dy-je las! Zephire n'est-ce point, 
C'est toy, Amour, qui voles en ce point, 
Tout à l'entour, et par dedans ces retz. 
Que tu as faictz d'art plus laborieux 
Que ceulx, ausquelz jadis feurent serrez 
Ta doulce mere, et le Dieu furieux. 
  
X 
Ces cheveux d'or sont les liens Madame, 
Dont fut premier ma liberté surprise, 
Amour la flamme autour du coeur eprise, 
Ces yeux le traict, qui me transperse l'ame, 
Fors sont les neudz, apre, et vive la flamme, 
Le coup, de main à tyrer bien apprise, 
Et toutesfois j'ayme, j'adore, et prise 
Ce qui m'etraint, qui me brusle, et entame. 
Pour briser donq', pour eteindre, et guerir 
Ce dur lien, ceste ardeur, ceste playe, 
Je ne quier fer, liqueur ny medecine, 
L'heur, et plaisir, que ce m'est de perir 
De telle main, ne permect que j'essaye 
Glayve trenchant, ny froydeur, ny racine. 
  
XI 
Des ventz emeuz la raige impetueuse 
Un voyle noir etendoit par les cieux, 
Qui l'orizon jusqu'aux extremes lieux 
Rendoit obscur, et la mer fluctueuse. 
De mon soleil la clarté radieuse 
Ne daignoit plus aparoitre à mes yeulx, 
Ains m'annonçoient les flotz audacieux 
De tous costez une mort odieuse. 
Une peur froide avoit saisi mon ame 
Voyant ma nef en ce mortel danger, 
Quand de la mer la fille je reclame, 
Lors tout soudain je voy' le ciel changer, 
Et sortir hors de leurs nubileux voyles 
Ces feux jumeaux, mes fatales etoiles. 
  
XII 
O de ma vie à peu pres expirée 
Le seul filet! yeux, dont l'aveugle archer 
A bien sceu mil',et mil' fleches lascher, 
Sans qu'il en ait oncq' une en vain tirée. 
Toute ma force est en vous retirée, 
Vers vous je vien' ma guerison chercher, 
Qui pouvez seulz la playe dessecher, 
Que j'ay par vous (ô beaux yeux!) endurée. 
Vous estes seulz mon etoile amyable, 
Vous pouvez seulz tout l'ennuy terminer, 
Ennuy mortel de mon ame offensée. 
Vostre clarté me soit doncq' pitoyable, 
Et d'un beau jour vous plaise illuminer 
L'obscure nuyt de ma triste pensée. 
  
XIII 
La belle main, dont la forte foiblesse 
D'un joug captif domte les plus puissans, 
La main, qui rend les plus sains languissans, 
Debendant l'arc meurtrier qui les coeurs blesse, 
La belle main, qui gouverne, et radresse 
Les freinz dorez des oiseaux blanchissans, 
Quand sur les champs de pourpre rougissans 
Guydent en l'air le char de leur maistresse, 
Si bien en moy a gravé le protraict 
De voz beautez au plus beau du ciel nées, 
Que ny la fleur, qui le sommeil attraict, 
Ny toute l'eau d'oubly, qui en est ceinte, 
Effaceroient en mil' et mil' années 
Vostre figure en un jour en moy peinte. 
  
XIV 
Le fort sommeil, que celeste on doibt croyre, 
Plus doulx que miel, couloit aux yeulx lassez, 
Lors que d'amour les plaisirs amassez 
Entrent en moy par la porte d'ivoyre. 
J'avoy' lié ce col de marbre: voyre 
Ce sein d'albastre, en mes bras enlassez 
Non moins qu'on void les ormes embrassez 
Du sep lascif, au fecond bord de Loyre. 
Amour avoit en mes lasses mouëlles 
Dardé le traict de ses flammes cruelles, 
Et l'ame erroit par ces levres de roses, 
Preste d'aller au fleuve oblivieux, 
Quand le reveil de mon ayse envieux 
Du doulx sommeil a les portes decloses. 
  
XV 
Pié, que Thétis pour sien eust avoué, 
Pié, qui au bout monstres cinq pierres telles, 
Que l'Orient seroit enrichi d'elles, 
Cil Orient en perles tant loué. 
Pié albastrin, sur qui est appuyé 
Le beau sejour des graces immortelles, 
Qui feut baty sur deux coulonnes belles 
De marbre blanc, poly, et essuyé. 
Si l'oeil n'a plus de me nourir esmoy, 
Si ses thesors la bouche ne m'octroye, 
Si les mains sont en mes playes si fortes, 
Au moins (ô pié) n'esloingne point de moy 
Mon triste coeur, dont Amour a faict proye, 
L'emprisonnant en ce corps que tu portes. 
  
XVI 
Qui a peu voir celle que Déle adore 
Se devaler de son cercle congneu, 
Vers le pasteur d'un long sommeil tenu 
Dessus le mont, qui la Carie honore: 
Et qui a veu sortir la belle Aurore 
Du jaulne lict de son espoux chenu 
Lors que le ciel encor' tout pur et nu 
De mainte rose indique se colore: 
Celuy a veu encores (ce me semble) 
Non point les lyz et les roses ensemble, 
Non ce, que peult le printemps concevoir: 
Mais il a veu la beauté nompareille 
De ma Déesse, ou reluyre on peult voir 
La clere Lune, et l'Aurore vermeille. 
  
XVII 
J'ay veu, Amour (et tes beaulx traictz dorez 
M'en soient tesmoings) suyvant ma souvereine, 
Naistre les fleurs de l'infertile arene 
Après ses pas dignes d'estre adorez. 
Phebus honteux ses cheveulx honorez 
Cacher alors que les vents par la plaine 
Eparpilloient de leur souëfve halaine 
Ceulx là, qui sont de fin or colorez. 
Puis s'en voler de chascun oeil d'icelle 
Jusques au ciel une vive etincelle, 
Dont furent faictz deux astres clers, et beaux. 
Favorisans d'influences heureuses 
(O feux divins! ô bienheureux flambeaulx!) 
Tous coeurs bruslans aux flammes amoureuses. 
  
XVIII 
Le chef doré cestuy blasonnera, 
Cestuy le corps, l'autre le blanc ivoire 
De l'estommac, l'autre eternelle gloire 
Aux yeux archers par ses vers donnera. 
Comme une fleur tout cela perira: 
Mais en esprit, en faconde, et memoire, 
Quand l'aage aura sur la beauté victoire, 
Mieux que devant Madame florira. 
Que si en moy le souverain donneur 
Pour tel subject heureusement poursuyvre 
Eust mis tant d'art, tant de grace, et bonheur, 
Mieux qu'en tableau, en bronze, en marbre, en cuyvre, 
Je luy feroy', et à moy un honneur, 
Qui elle et moy feroit vivre et revivre. 
  
XIX 
Face le ciel (quand il vouldra) revivre 
Lisippe, Apelle, Homere, qui le pris 
Ont emporté sur tous humains espris 
En la statue, au tableau, et au livre. 
Pour engraver, tirer, decrire, en cuyvre, 
Peinture, et vers, ce qu'en vous est compris, 
Si ne pouroient leur ouvraige entrepris 
Cyzeau, pinceau, ou la plume bien suyvre. 
Voilà pourquoy ne fault, que je souhete 
De l'engraveur, du peintre, ou du poëte, 
Marteau, couleur ny encre, ô ma Déesse! 
L'art peult errer, la main fault, l'oeil s'ecarte. 
De voz beautez mon coeur soit doncq' sans cesse 
Le marbre seul, et la table, et la charte. 
  
XX 
Puis que les cieux m'avoient predestiné 
A vous aymer, digne object de celuy, 
Par qui Achille est encor' aujourdhuy 
Contre les Grecz pour s'amye obstiné, 
Pourquoy aussi n'avoient-ilz ordonné 
Renaitre en moy l'ame, et l'esprit de luy? 
Par maintz beaux vers tesmoings de mon ennuy 
Je leur rendroy', ce qu'ilz vous ont donné. 
Helas Nature, au moins puis que les cieux 
M'ont denié leurs liberalitez, 
Tu me devois cent langues, et cent yeux, 
Pour admirer, et louer cete là, 
Dont le renom (pour cent graces, qu'elle a) 
Merite bien cent immortalitez. 
  
XXI 
Les bois fueilleuz, et les herbeuses rives 
N'admirent tant parmy sa troupe saincte 
Dyane, alors que le chault l'a contrainte 
De pardonner aux bestes fugitives, 
Que tes beautez, dont les autres tu prives 
De leurs honneurs, non sans envie mainte 
Veu que tu rends toute lumiere etainte 
Par la clarté de deux etoiles vives. 
Les demydieux, et les nymphes des bois 
Par l'epesseur des forestz chevelues 
Te regardant, s'etonnent maintesfois, 
Et pour à Loire eternité donner 
Contre leurs bords ses filles impolues 
Font ton hault bruit sans cesse resonner. 
  
XXII 
O doulce ardeur, que des yeulx de ma Dame 
Amour avecq' sa torche acoustumée 
Dedans mon coeur a si bien allumée, 
Que je la sen au plus profond de l'ame! 
Combien le ciel favorable je clame, 
Combien Amour, combien ma destinée, 
Qui en ce point ma vie ont terminée 
Par le torment d'une si doulce flamme! 
Qu'en moy (Amour) ne durent tes doulx feux, 
Je ne le puys et pouvoir ne le veulx 
Bien que la chair soit caducque, et mortelle. 
Car ceste ardeur, dont mon ame est ravie, 
Prendra aussi immortalité d'elle, 
Vivant par mort d'une eternelle vie. 
  
XXIII 
Si des beaux yeux, où la beaulté se mire, 
Voire le ciel, et la nature, et l'art, 
Depent le frein, qui en plus d'une part 
A son plaisir et m'arreste et me vire, 
Pourquoy sont-ilz armez d'orgueil et d'ire? 
Pourquoy s'esteint ce doulx feu, qui en part? 
Pourquoy la main, qui le coeur me depart, 
Cache ces retz, liens de mon martire? 
O belle main! ô beaux cheveux dorez! 
O clers flambeaux dignes d'estre adorez! 
Par qui je crain', j'espere, je lamente. 
Mon fier destin et vostre force extreme, 
En vous aimant, me commandent, que j'aime 
L'heureux object du bien, qui me tormente. 
  
XXIV 
Piteuse voix, qui ecoutes mes pleurs, 
Et qui errant entre rochiers et bois 
Avecques moy, m'as semblé maintesfoys 
Avoir pitié de mes tristes douleurs. 
Voix qui tes plainz mesles à mes clameurs, 
Mon dueil au tien, si appeller tu m'oys 
Olive Olive: et Olive est ta voix, 
Et m'est avis qu'avecques moy tu meurs. 
Seule je t'ay pitoyable trouvée. 
O noble Nymphe! en qui (peult estre) encores 
L'antique feu de nouveau s'evertue. 
Pareille amour nous avons eprouvée, 
Pareille peine aussi nous souffrons ores. 
Mais plus grande est la beaulté, qui me tue. 
  
XXV 
Je ne croy point, veu le dueil que je meine 
Pour l'apre ardeur d'une flamme subtile, 
Que mon oeil feust en larmes si fertile, 
Si n'eusse au chef d'eau vive une fonteine. 
Larmes ne sont, qu'avecq' si large vene 
Hors de mes yeux maintenant je distile, 
Tout pleur seroit à finir inutile 
Mon dueil, qui n'est qu'au meillieu de sa peine. 
L'humeur vitale en soy toute reduite 
Devant mon feu craintive prent la fuyte 
Par le sentier qui meine droict aux yeux. 
C'est cete ardeur, dont mon ame ravie 
Fuyra bien tost la lumiere des cieux, 
Tirant à soy et ma peine et ma vie. 
  
XXVI 
La nuit m'est courte, et le jour trop me dure, 
Je fuy l'amour, et le suy' à la trace, 
Cruel me suis, et requier' vostre grace, 
Je pren' plaisir au torment, que j'endure. 
Je voy' mon bien, et mon mal je procure, 
Desir m'enflamme, et crainte me rend glace, 
Je veux courir, et jamais ne deplace, 
L'obscur m'est cler, et la lumiere obscure. 
Votre je suis, et ne puis estre mien, 
Mon corps est libre, et d'un etroit lien 
Je sen' mon coeur en prison retenu. 
Obtenir veux, et ne puis requerir, 
Ainsi me blesse, et ne me veult guerir 
Ce vieil enfant, aveugle archer, et nu. 
  
XXVII 
Quand le Soleil lave sa teste blonde 
En l'Ocean, l'humide, et noire nuit 
Un coy sommeil, un doulx repos sans bruit 
Epant en l'air, sur la terre et soubz l'onde. 
Mais ce repos, qui soulaige le monde 
De ses travaux, est ce qui plus me nuist, 
Et d'astres lors si grand nombre ne luist, 
Que j'ay d'ennuiz et d'angoisse profonde. 
Puis quand le ciel de rougeur se colore, 
Ce que je puis de plaisir concevoir 
Semble renaître avec la belle Aurore. 
Mais qui me fait tant de bien recevoir? 
Le doulx espoir, que j'ay de bien tost voir 
L'autre Soleil, qui la terre decore. 
  
XXVIII 
Ce que je sen', la langue ne refuse 
Vous decouvrir, quand suis de vous absent, 
Mais tout soudain que près de moy vous sent, 
Elle devient et muette, et confuse. 
Ainsi, l'espoir me promect, et m'abuse: 
Moins près je suis quand plus je suis present: 
Ce qui me nuist, c'est ce qui m'est plaisent, 
Je quier' cela, que trouver je recuse. 
Joyeux la nuit, le jour triste je suis. 
J'ay en dormant ce qu'en veillant poursuis. 
Mon bien est faulx, mon mal est veritable. 
D'une me plain', et deffault n'est en elle, 
Fay doncq', Amour, pour m'estre charitable, 
Breve ma vie, ou ma nuit eternelle. 
  
XXIX 
Les cieux, l'amour, la mort, et la nature, 
Honneur, credit, faveur, envie, ou crainte, 
De ceste forme en moy si bien emprainte 
N'effaceront la vive protraiture. 
Ivoire, gemme, et toute pierre dure 
Se peut briser, si du fer est attainte, 
Mais bien qu'ell' soit de se rompre contrainte, 
De se changer jamais elle n'endure. 
Mon coeur est tel: et me le fist prouver 
Amour, alors que pour vous y graver, 
A coups de trait me livra la bataille. 
Je sçay combien son arc y travailla, 
Plus de cent coups, non un seul, me bailla 
Premier qu'il peust en lever une ecaille. 
  
XXX 
Bien que le mal, que pour vous je supporte, 
Soit violent, toutesfois je ne l'ose 
Appeller mal, pour ce qu'aucune chose 
Ne vient de vous, qui plaisir ne m'apporte. 
Mais ce m'est bien une douleur plus forte, 
Que je ne puys de ma tristesse enclose 
Tourner la clef, lors que je me dispose 
A vous ouvrir de mes pensers la porte. 
Si donc mes pleurs, et mes soupirs cuysans, 
Si mes ennuiz ne vous sont suffisans 
Temoings d'amour, quele plus seure preuve, 
Quele autre foy, si non mourir, me reste? 
Mais le remede (helas) trop tard se treuve 
A la douleur, que la Mort manifeste. 
  
XXXI 
Le grand flambeau gouverneur de l'année, 
Par la vertu de l'enflammée corne 
Du blanc thaureau, prez, montz, rivaiges orne 
De mainte fleur du sang des princes née. 
Puis de son char la roüe estant tournée 
Vers le cartier prochain du Capricorne, 
Froid est le vent, la saison nue et morne, 
Et toute fleur devient seiche et fenée. 
Ainsi, alors que sur moy tu etens, 
O mon Soleil! tes clers rayons epars, 
Sentir me fais un gracieux printens. 
Mais tout soudain que de moy tu depars, 
Je sens en moy venir de toutes pars 
Plus d'un hyver, tout en un mesme tens. 
  
XXXII 
Tout ce, qu'icy la Nature environne, 
Plus tost il naist, moins longuement il dure. 
Le gay printemps s'enrichist de verdure, 
Mais peu fleurist l'honneur de sa couronne. 
L'ire du ciel facilement etonne 
Les fruicts d'esté, qui craignent la froidure; 
Contre l'hiver ont l'ecorce plus dure 
Les fruicts tardifs, ornement de l'automne. 
De ton printemps les fleurettes seichées 
Seront un jour de leur tige arrachées, 
Non la vertu, l'esprit, et la raison. 
A ces doulx fruicts, en toy meurs devant l'aage, 
Ne faict l'esté ny l'autonne dommage, 
Ny la rigueur de la froide saison. 
  
XXXIII 
O prison doulce, où captif je demeure 
Non par dedaing, force, ou inimitié, 
Mais par les yeulx de ma doulce moitié, 
Qui m'y tiendra jusq'à tant que je meure. 
O l'an heureux, le mois, le jour, et l'heure, 
Que mon coeur fut avecq'elle allié! 
O l'heureux noeu, par qui j'y fu' lié, 
Bien que souvent je plain', souspire, et pleure! 
Tous prisonniers, vous etes en soucy, 
Craignant la loy, et le juge severe: 
Moy plus heureux, je ne suis pas ainsi. 
Mile doulx motz, doulcement exprimez, 
Mil' doulx baisers, doulcement imprimez, 
Sont les tormens où ma foy persevere. 
  
XXXIV 
Après avoir d'un bras victorieux 
Domté l'effort des superbes courages, 
Aucuns jadis bastirent haulx ouvrages, 
Pour se venger du temps injurieux. 
Autres craignans leurs actes glorieux 
Assujetir à flammes, et orages, 
Firent ecriz, qui malgré telz outrages 
Ont faict leurs noms voler jusques aux cieulx. 
Maintz au jourdhuy en signe de victoire 
Pendent au temple armes bien etophées, 
Mais je ne veulx acquerir telle gloire. 
Avoir esté par vous vaincu et pris, 
C'est mon laurier, mon triomphe, et mon prix, 
Qui ma depouille egale à leurs trophées. 
  
XXXV 
Me soit amour ou rude, ou favorable, 
Ou hault, ou bas me pousse la fortune, 
Tout ce, qu'au coeur je sen' pour l'amour d'une, 
Jusq'à la mort, et plus, sera durable. 
Je suis le roc de foy non variable, 
Que vent, que mer, que le ciel importune, 
Et toutesfois adverse, ou oportune 
Soit la saison; il demeure imployable. 
Plus tost voudra le diamant apprendre 
A s'amolir de son bon gré, ou prendre 
Soubz un burin de plom diverse forme, 
Que par nouveau ou bonheur, ou malheur, 
Mon coeur, où est de vostre grand' valeur 
Le vray protraict, en autre se transforme. 
  
XXXVI 
L'unic oiseau (miracle emerveillable) 
Par feu se tue, ennuyé de sa vie: 
Puis quand son ame est par flammes ravie, 
Des cendres naist un autre à luy semblable. 
Et moy qui suis l'unique miserable, 
Faché de vivre une flamme ay suyvie, 
Dont conviendra bien tost, que je devie, 
Si par pitié ne m'etes secourable. 
O grand' doulceur! ô bonté souveraine! 
Si tu ne veulx dure, et inhumaine estre 
Soubz ceste face angelique et seraine, 
Puis qu'ay pour toy du Phenix le semblant, 
Fay qu'en tous poinctz je luy soy' resemblant, 
Tu me feras de moymesme renaistre. 
  
XXXVII 
Celle qui tient par sa fiere beauté. 
Les Dieux en feu, en glace, aise, et martire, 
L'oeil impiteux soudain de moy retire, 
Quand je me plain' à sa grand' cruauté. 
Si je la suy', ell' fuit d'autre couté; 
Si je me deulx, mes larmes la font rire, 
Et si je veulx ou parler ou ecrire, 
D'elle jamais ne puis estre ecouté. 
Mais (ô moy sot!) de quoy me doy-je plaindre, 
Fors du desir, qui par trop hault ataindre, 
Me porte au lieu, où il brusle ses aesles? 
Puis moy tumbé, Amour, qui ne permet 
Finir mon dueil, soudain les luy remet, 
Renouvelant mes cheutes eternelles. 
  
XXXVIII 
Sacrée, saincte et celeste figure, 
Pour qui du ciel l'admirable, et hault temple 
Semble courbé, afin qu'en toy contemple 
Tout ce, que peult son industrie et cure: 
Si de tes yeulx les beaux raiz d'avanture 
Daignent mon coeur echaufer, il me semble 
Qu'en moy soudain un feu divin s'assemble, 
Qui mue, altere, et ravist ma nature. 
Et si mon oeil ose se hazarder 
A contempler une beauté si grande, 
Un Ange adonq' me semble regarder. 
Lors te faisant d'ame et de corps offrande 
Ne puis le coeur idolatre garder, 
Qu'il ne t'adore, et ses veux ne te rande. 
  
XXXIX 
Plus ferme foy ne fut onques jurée 
A nouveau prince, ô ma seule princesse! 
Que mon amour, qui vous sera sans cesse 
Contre le temps et la mort asseurée. 
De fosse creuse, ou de tour bien murée 
N'a point besoing de ma foy la fortresse, 
Dont je vous fy' dame, roine, et maistresse, 
Pour ce qu'ell' est d'eternelle durée. 
Thesor ne peult sur elle estre vainqueur, 
Un si vil prix n'aquiert un gentil coeur: 
Non point faveur, ou grandeur de lignage, 
Qui eblouist les yeulx du populaire, 
Non la beauté, qui un leger courage 
Peult emouvoir, tant que vous, me peult plaire. 
  
XL 
Si des saincts yeulx que je vois adorant, 
Vient mon ardeur, si les miens d'heure en heure, 
Par le degout des larmes, que je pleure, 
Donnent vigueur à mon feu devorant, 
Si mon esprit vif dehors, et mourant 
Dedans le cloz de sa propre demeure, 
Vous contemplant, permet bien que je meure, 
Pour estre en vous; plus qu'en moy, demeurant, 
Bien est le mal et violent, et fort, 
Dont la doulceur coulpable de ma mort 
Me faict aveugle à mon prochain dommage. 
Cruel tyran de la serve pensée, 
De ce loyer est donq' recompensée 
L'ame qui faict à son seigneur hommage. 
  
XLI 
Je suis semblable au marinier timide; 
Qui voyant l'air çà et là se troubler, 
La mer ses flotz ecumeux redoubler, 
Sa nef gemir soubz ceste force humide, 
D'art, d'industrie, et d'esperance vide, 
Pense le ciel, et la mer s'assembler, 
Se met à plaindre, à crier, à trembler, 
Et de ses voeux les Dieux enrichir cuyde. 
Le nocher suis, mes pensers sont la mer, 
Soupirs, et pleurs sont les ventz et l'orage, 
Vous ma Déesse etes ma clere etoile, 
Que seule doy', veux, et puis reclamer, 
Pour asseurer la nef de mon courage, 
Et eclersir tout ce tenebreux voile. 
  
XLII 
Les chaulx soupirs de ma flamme incongnue 
Ne sont soupirs, et telz ne les veulx dire, 
Mais bien un vent: car tant plus je soupire, 
Moins de mon feu la chaleur diminue. 
Ma vie en est toutesfois soutenue, 
Lors que par eulx de l'ardeur je respire, 
Ma peine aussi par eulx mesmes empire, 
Veu que ma flamme en est entretenue. 
Tout cela vient de l'Amour, qui enflamme 
Mon estommac d'une eternelle flamme, 
Et puis l'evente au tour de luy volant. 
O petit Dieu, qui terre, et ciel allumes! 
Par quel miracle en feu si violant 
Tiens-tu mon coeur, et point ne le consumes? 
  
XLIII 
Penser volage, et leger comme vent, 
Qui or' au ciel, or' en mer, or' en terre 
En un moment cours, et recours grand erre, 
Voire au sejour des ombres bien souvent. 
Et quelque part que voises t'eslevant, 
Ou rabaissant, celle qui me faict guerre, 
Celle beauté tousjours devant toy erre, 
Et tu la vas d'un leger pié suyvant. 
Pourquoy suis-tu (ô penser trop peu sage!) 
Ce qui te nuist? pourquoy vas-tu sans guide, 
Par ce chemin plein d'erreur variable? 
Si de parler au moins eusses l'usage, 
Tu me rendrois de tant de peines vide, 
Toy en repos, et elle pitoyable. 
  
XLIV 
Au goust de l'eau la fievre se rappaise, 
Puis s'evertue au cours, qui sembloit lent: 
Amour aussi m'est humble, et violent, 
Quand le coral de voz levres je baise. 
L'eau goute à goute anime la fournaize 
D'un feu couvert le plus etincelant: 
L'ardent desir, que mon coeur va celant, 
Par voz baisers se faict plus chault que braize. 
D'un grand traict d'eau, qui freschement distile, 
Souvent la fievre est etainte, Madame. 
L'onde à grand flot rent la flamme inutile. 
Mais, ô baisers, delices de mon ame! 
Vous ne pouriez, et fussiez vous cent mile, 
Guerir ma fievre, ou eteindre ma flamme. 
  
XLV 
Ores qu'en l'air le grand Dieu du tonnerre 
Se rue au seing de son epouse amée, 
Et que de fleurs la nature semée 
A faict le ciel amoureux de la terre. 
Or' que des ventz le gouverneur desserre 
Le doux Zephire, et la forest armée 
Voit par l'épaiz de sa neuve ramée 
Maint libre oiseau, qui de tous coutez erre: 
Je vois faisant un cry non entendu 
Entre les fleurs du sang amoureux nées, 
Pasle, dessoubz l'arbre pasle etendu: 
Et de son fruict amer me repaissant, 
Aux plus beaux jours de mes verdes années 
Un triste hiver sen' en moy renaissant. 
  
XLVI 
Lequel des Dieux fera que je ne sente 
L'heureux malheur de l'espoir qui m'attire, 
Si le plaisir, suject de mon martire, 
Fuyant mes yeulx à mon coeur se presente? 
Quel est le fruict de l'incertaine attente, 
Ou sans profit si longuement j'aspire? 
Quel est le bien, pour qui tant je soupire? 
Quel est le gaing du mal qui me contente? 
Qui guerira la playe de mon coeur? 
Qui tarira de mes larmes la source? 
Qui abatra le vent de mes soupirs? 
Montre le moy, ô celeste vainqueur! 
Qui a finy le terme de ma course 
Au ciel, où est le but de mes desirs. 
  
XLVII 
Le doulx sommeil paix, et plaisir m'ordonne, 
Et le reveil guerre, et douleur m'aporte: 
Le faulx me plaist, le vray me deconforte: 
Le jour tout mal, la nuit tout bien me donne. 
S'il est ainsi, soit en toute personne 
La verité ensevelie, et morte. 
O animaulx de plus heureuse sorte, 
Dont l'oeil six mois le dormir n'abandonne! 
Que le sommeil à la mort soit semblant, 
Qu le veiller de vie ait le semblant, 
Je ne le dy, et le croy' moins encores. 
Ou s'il est vray, puis que le jour me nuist 
Plus que la mort, ô mort, veilles donq' ores 
Clore mes yeulx d'une eternelle nuit. 
  
XLVIII 
Pere Ocean, commencement des choses, 
Des Dieux marins le sceptre vertueux, 
Qui maint ruisseau, et fleuve impetueux 
En ton seing large enfermes, et composes: 
Tu ne sens point, quand moins tu te reposes, 
Plus s'irriter de flotz tempestueux 
Contre tes bords; qu'en mon coeur fluctueux 
Je sen' de ventz, et tempestes encloses. 
Helas reçoy mes chaudes larmes donques 
En ton liquide: eteins leur feu, si onques 
Tu as senty d'amour quelque scintile, 
Et si tes eaux peuvent le feu eteindre, 
Qui rend la foudre, et trident inutile, 
Et qui se faict jusques aux enfers creindre. 
  
XLIX 
Sacré rameau, de celeste presage, 
Rameau, par qui la colombe envoyée, 
Au demeurant de la terre noyée 
Porta jadis un si joyeux message. 
Heureux rameau, soubz qui gist à l'ombrage 
La doulce paix icy tant desirée, 
Alors que Mars, et la Discorde irée 
Ont tout remply de feu, de sang, de rage: 
S'il est ainsi que par les sainctz escriptz 
Sois tant loué, helas! reçoy mes criz, 
O mon seul bien! ô mon espoir en terre! 
Qui seulement ne me temoignes ores 
Paix, et beautemps: mais toymesmes encores 
Me peulx sauver de naufrage et de guerre. 
  
L 
Si mes pensers vous estoient tous ouvers, 
Si de parler mon coeur avoit l'usaige, 
Si ma constance estoit peinte au visaige, 
Si mes ennuiz vous estoient decouvers, 
Si les soupirs, si les pleurs, si les vers 
Montroient au vif une amoureuse raige, 
Lors je pourroy' flechir vostre couraige, 
Voire à pitié mouvoir tout l'univers. 
Adoncq' Amour seul tesmoing de ma peine 
Vous pouroit estre une preuve certaine 
De ma fidele, et serve loyaulté, 
Qui d'aussi loing devant les autres passe, 
Que le parfaict de vostre belle face 
Hausse le chef sur toute aultre beaulté. 
  
LI 
O toy, à qui a été ottroyé 
Voir cete flamme ardent, qui s'entretient 
En l'estommac du Geant, qui soutient 
Un mont de feu sur son doz foudroyé. 
Et cetuy là, qui l'oyzeau dedié 
Au Dieu vangeur, qui la foudre en main tient, 
Paist d'un poumon, qui tousjours luy revient, 
Au froid sommet de Caucase lié: 
Je te supply' imaginer encore 
Ce qui mon coeur brusle, englace, et devore, 
Sans me donner loysir de respirer. 
Lors me diras, voyant ma peine telle, 
Tu sera d'exemple, à qui ose aspirer 
Trop hardiment à chose non mortelle. 
  
LII 
Mere d'Amour, et fille de la mer, 
Du cercle tiers lumiere souverene, 
Qui ciel, et terre, et champs semez d'arene 
Peuz jusq'au fond des ondes enflammer. 
Toy, qui le doulx mesles avec l'amer, 
Quand ce beau riz, qui le ciel rasserene, 
De tous les Dieux le plus cruel refrene, 
Et le contrainct ton aide reclamer, 
Dont luy tout plein de ce tant doulx venin 
Entre tes bras paist son oeil jà benin 
En ta divine, et celeste beauté: 
Te plaise (helas) Déesse, à ma priere, 
Flechir un peu ceste mienne guerriere, 
Qui a trop plus, que Mars, de cruauté. 
  
LIII 
Voyant au ciel tant de flambeaux ardens, 
Je dy souvent, ô beauté non pareille! 
Si le dehors est si plain de merveille, 
Combien parfaict doit estre le dedens? 
Si tes beaux yeulx traictz, et flammes dardans 
Luysent sur moy, mon ame se reveille 
Au paradis, que ta bouche vermeille 
Ouvre aux espritz, qui te sont regardans. 
Mais quand je sen' soubz ta doulce beauté 
L'horrible enfer de ta grand' cruauté, 
Ce qui est beau me semble estre cruel. 
Mesme le ciel, qui tant me souloit rire, 
Me faict douter si plaisant je doy' dire 
Son beau sejour, qui est perpetuel. 
  
LIV 
Or' que la nuit son char etoilé guide 
Qui le silence et le sommeil rameine, 
Me plaist lascher, pour desaigrir ma peine, 
Aux pleurs, aux criz et aux soupirs la bride. 
O ciel! ô terre! ô element liquide! 
O ventz! ô bois! rochiers, monteigne et plaine, 
Tout lieu desert, tout rivage et fonteine, 
Tout lieu remply et tout espace vide! 
O demyz Dieux! ô vous, nymphes des bois! 
Nymphes des eaux, tous animaux divers, 
Si onq' avez senty quelque amitié, 
Veillez piteux ouyr ma triste voix, 
Puis que ma foy, mon amour, et mes vers 
N'ont sceu trouver en Madame pitié. 
  
LV 
O foible esprit, chargé de tant de peines, 
Que ne veulx-tu soubz la terre descendre? 
O coeur ardent; que n'es-tu mis en cendre? 
O tristes yeulx, que n'estes-vous fonteines? 
O bien douteux! ô peines trop certaines! 
O doulx sçavoir, trop amer à comprendre 
O Dieu qui fais que tant j'ose entreprendre, 
Pourquoy rends-tu mes entreprises vaines? 
O jeune archer, archer qui n'as point d'yeulx, 
Pourquoy si droict as-tu pris ta visée? 
O vif flambeau; qui embrases les Dieux, 
Pourquoy as-tu ma froideur attisée? 
O face d'ange! ô coeur de pierre dure! 
Regarde au moins le torment, que j'endure. 
  
LVI 
Amour voulant hausser le chef vainqueur 
Dessus la crainte à la noire sequelle, 
Mist l'esperance, et sa bande avec' elle, 
Sa bande blanche au plus fort de mon coeur. 
Amour est fort, mais foible est la vigueur 
De l'esperance, et la tourbe cruelle 
A ceinct le lieu d'horreur perpetuelle, 
Le foudroyant du canon de rigueur. 
Mais repoussez l'effort de la gent noire, 
Vous, qui tenez le sort de la victoire, 
N'avez-vous point de voz subjects emoy? 
Si vous souffrez que cete prise advienne, 
Vous y aurez plus grand' perte, que moy, 
Veu que la place est plus vostre, que mienne. 
  
LVII 
Qui a nombré, quand l'astre, qui plus luit, 
Jà le milieu du bas cercle environne, 
Tous ces beaux feux, qui font une couronne 
Aux noirs cheveux de la plus clere nuit, 
Et qui a sceu combien de fleurs produit 
Le verd printemps, combien de fruictz l'autonne, 
Et les thesors, que l'Inde riche donne 
Au marinier, qu'avarice conduit. 
Qui a conté les etincelles vives 
D'Aetne, ou Vesuve, et les flotz qui en mer 
Hurtent le front des ecumeuses rives: 
Celuy encor' d'une, qui tout excelle, 
Peult les vertuz, et beautez estimer, 
Et les tormens que j'ay pour l'amour d'elle. 
  
LVIII 
Cet' humeur vient de mon oeil, qui adore 
Ton sainct protraict, seul Dieu de mon soucy, 
De mon cueur part maint soupir adoucy, 
De tes yeulx sort le feu qui me devore. 
Donques le prix de celuy qui t'honnore, 
Est-ce la mort, et le marbre endurcy? 
O pleurs ingratz! ingratz soupirs aussi, 
Mon feu, ma mort, et ta rigueur encore. 
De mon esprit les aesles sont guidées 
Jusques au seing des plus haultes Idées 
Idolatrant ta celeste beaulté. 
O doulx pleurer! ô doulx soupirs cuisans! 
O doulce ardeur de deux soleilz luisans! 
O doulce mort! ô doulce cruaulté! 
  
LIX 
Moy, que l'amour a faict plus d'un Lëandre, 
De cest oyseau prendray le blanc pennaige, 
Qui en chantant plaingt la fin de son aage 
Aux bordz herbuz du recourbé Mëandre. 
Dessoubz mes chantz voudront (possible) apprendre 
Maint bois sacré, et maint antre sauvage, 
Non gueres loin de ce fameux rivage, 
Où Meine va dedans Loyre se rendre. 
Puis descendant en la saincte forest, 
Où maint amant à l'umbrage encor' est, 
Iray chanter au bord oblivieux, 
D'où arrachant vostre bruit non pareil, 
De revoler icy hault envieux, 
Luy feray voir l'un et l'autre soleil. 
  
LX 
Divin Ronsard, qui de l'arc à sept cordes 
Tiras premier au but de la memoire 
Les traictz aelez de la Françoise gloire, 
Que sur ton luc haultement tu accordes. 
Fameux harpeur, et prince de noz odes, 
Laisse ton Loir haultain de ta victoire, 
Et vien sonner au rivage de Loire 
De tes chansons les plus nouvelles modes. 
Enfonce l'arc du vieil Thebain archer, 
Où nul que toy ne sceut onq' encocher 
Des doctes Soeurs les sajettes divines. 
Porte pour moy parmy le ciel des Gaulles 
Le sainct honneur des nymphes Angevines, 
Trop pesant faix pour mes foibles epaules. 
  
LXI 
Allez, mes vers, portez dessus vos aeles 
Les sainctz rameaux de ma plante divine, 
Seul ornement de la terre Angevine, 
Et de mon coeur les vives etincelles. 
De vostre vol les bornes seront telles, 
Que dès l'aurore, où le Soleil decline, 
Je voy desjà le monde, qui s'incline 
A la beauté des beautez immortelles. 
Si quelqu'un né soubs amoureuse etoile 
Daigne eclersir l'obscur de vostre voile, 
Priez, qu'Amour luy soit moins rigoreux: 
Mais s'il ne veult ou ne peult concevoir 
Ce que je sen', souhaitez luy de voir 
L'heureux object, qui m'a faict malheureux. 
  
LXII 
Qui voudra voir le plus precieux arbre, 
Que l'orient ou le midy avoüe, 
Vienne, où mon fleuve en ses ondes se joüe: 
Il y verra l'or, l'ivoire, et le marbre. 
Il y verra les perles, le cinabre 
Et le cristal: et dira que je loüe 
Un digne object de Florence, et Mantoue, 
De Smyrne encor', de Thebes, et Calabre. 
Encor' dira que la Touvre, et la Seine, 
Avec' la Saone arriveroient à peine 
A la moitié d'un si divin ouvrage: 
Ne cetuy là qui naguere a faict lire 
En lettres d'or gravé sur son rivage 
Le vieil honneur de l'une et l'autre lire. 
  
LXIII 
Ma plus grand' force estoit retraicte au coeur, 
Et contre Amour faisoit plus de deffence, 
Quand ce cruel, pour venger telle offence, 
Feut par mes yeulx de ma vertu vainqueur. 
Lors de ses traictz ne sentoy' la rigueur, 
Lors je n'avoy' de son feu congnoissance, 
Lors ne cuidoy' que sa haulte puissance 
Sur ma foiblesse eust aucune vigueur. 
Mais, ô le fruict de ma belle entreprise! 
Il a choisi pour gaing de ma victoire 
Au plus hault ciel la beauté, qui me tue: 
Là, fault chercher le bien que tant je prise, 
Faisant à tous par mon malheur notoire 
Que l'homme en vain contre Dieu s'evertue. 
  
LXIV 
Comme jadis l'ame de l'univers 
Enamourée en sa beaulté profonde, 
Pour façonner cete grand' forme ronde, 
Et l'enrichir de ses thesors divers, 
Courbant sur nous son temple aux yeulx ouvers, 
Separa l'air, le feu, la terre, et l'onde, 
Et pour tirer les semences du monde 
Sonda le creux des abismes couvers: 
Non autrement ô l'ame de ma vie! 
Tu feus à toy par toymesme ravie, 
Te voyant peinte en mon affection. 
Lors ton regard d'un accord plus humain 
Lia mes sens, où Amour de sa main 
Forma le rond de ta perfection. 
  
LXV 
Ces cheveux d'or, ce front de marbre, et celle 
Bouche d'oeillez, et de liz toute pleine, 
Ces doulx soupirs, cet' odorante haleine, 
Et de ces yeulx l'une et l'autre etincelle, 
Ce chant divin, qui les ames rapelle, 
Ce chaste ris, enchanteur de ma peine, 
Ce corps, ce tout, bref, cete plus qu'humeine 
Doulce beauté si cruellement belle, 
Ce port humain, cete grace gentile, 
Ce vif esprit, et ce doulx grave stile, 
Ce hault penser, cet' honneste silence, 
Ce sont les haims, les appaz, et l'amorse, 
Les traictz, les rez, qui ma debile force 
Ont captivé d'une humble violence. 
  
LXVI 
Pour mettre en vous sa plus grande beauté, 
Le ciel ouvrit ses plus riches thesors: 
Amour choisit de ses traictz les plus fors, 
Pour me tirer sa plus grand' cruauté. 
Les Astres n'ont de luire liberté, 
Quand le Soleil ses rayons met dehors: 
Où apparoist votre celeste corps, 
La beauté mesme y perdroit sa clerté. 
Si le torment de mes affections 
Croist à l'égal de voz perfections, 
Et si en vous plus qu'en moy je demeure, 
Pourquoy n'as-tu, ô fiere destinée! 
Rompu le fil de ma vie obstinée? 
Je ne croy point que de douleur on meure. 
  
LXVII 
Sus, chaulx soupirs, allez à ce froid coeur, 
Rompez ce glaz, qui ma poitrine enflamme: 
Et vous, mes yeulx, deux tesmoings de ma flamme, 
Faictes pluvoir une triste liqueur. 
Allez pensers, flechir cete rigueur, 
Engravez moy au marbre de cete ame: 
Et vous, mes vers, criez devant Madame, 
Mort, ou mercy soit fin de ma langueur. 
Dictes comment ces tenailles d'yvoire 
Pour animer l'immortel de sa gloire 
Ont arraché mon esprit de sa place, 
Et que mon coeur rien qu'elle ne respire. 
O bien heureux qui void sa belle face! 
O plus heureux qui pour elle soupire! 
  
LXVIII 
Que n'es-tu las (mon desir) de tant suyvre 
Celle qui est tant gaillarde à la fuite? 
Ne la vois-tu devant ma lente suite 
Des laqs d'amour voler franche, et delivre? 
Ce faulx espoir, dont la doulceur m'enyvre, 
Tout en un poinct m'arreste, et puis m'incite, 
Me pousse en hault, et puis me precipite, 
Me faict mourir, et puis me faict revivre. 
Ainsi courant de sommez en sommez 
Avec' Amour, je ne pense jamais, 
Fol desir mien, à te haulser la bride. 
Bien m'as-tu donq' mis en proye au danger, 
Si je ne puis à mon gré te ranger, 
Et si j'ay pris un aveugle pour guide. 
  
LXIX 
L'enfant cruel de sa main la plus forte 
M'ouvrit le flanc, qui est le plus debile, 
Plantant au roc de mon coeur immobile 
Le sainct rameau, qu'en mon ame je porte. 
Toute vertu, tout honneur, toute sorte 
De bonne grace, et de façon gentile 
Sont pour racine à la plante fertile 
Dont la haulteur jusq'au ciel me transporte. 
L'eau de mes yeulx, et la vive chaleur 
De mes soupirs en vigueur la maintiennent: 
Son pasle teinct ressemble à ma couleur. 
La, mes ecriz fueille seiche deviennent: 
Mon vain espoir y est tousjours en fleur, 
Et mes ennuiz sont les fruictz, qui en viennent. 
  
LXX 
Cent mile fois, et en cent mile lieux 
Vous rencontrant, ô ma doulce guerriere! 
Le pié tremblant me retire en arriere 
Pour avoir paix avecques voz beaulx yeulx. 
Mais je ne puis, et ne pouroient les Dieux 
Frener le cours de ma volonté fiere. 
Si je le puis, la superbe riviere 
Fera le sien monter jusques aux cieulx. 
Que te sert donq' eloingner le vainqueur, 
O toy mon oeil! si au milieu du coeur 
Je sen' le fer, dont il fault que je meure? 
Ainsi le cerf par la plaine elancé 
Evite l'arce meurtrier, qui l'a blessé, 
Mais non le traict, qui tousjours luy demeure. 
  
LXXI 
Le crespe honneur de cet or blondissant 
Sur cet argent uny de tous coutez, 
Sur deux soleilz deux petiz arcz voutez, 
Deux petiz brins de coral rougissant, 
Ce cler vermeil, ce vermeil unissant 
Oeillez et lyz freschement enfantez, 
Ces deux beaux rancz de perles, bien plantez, 
Et tout ce rond en deux pars finissant, 
Ce val d'albastre, et ces coutaux d'ivoire, 
Qui vont ainsi comme les flotz de Loire 
Au lent soupir d'un Zephire adoulci, 
C'est le moins beau des beautez de Madame, 
Mieulx engravée au marbre de mon ame, 
Que sur mon front n'en est peinct le soucy. 
  
LXXII 
Ce voile blanc, que vous m'avez donné, 
Je le compare à ma foy nette, et franche: 
L'antique foy portoit la robe blanche, 
Mon coeur tout blanc est pour vous ordonné. 
Son beau caré d'ouvrage environné, 
Seul ornement et thesor de ma manche, 
Pour vostre nom, porte l'heureuse branche 
De l'arbre sainct dont je suis couronné. 
Mile couleurs par l'aiguille y sont jointes, 
Amour a faict en mon coeur mile pointes. 
Là, sont encor' sans fruict bien mile fleurs. 
O voile heureux, combien tu es utile 
Pour essuyer l'oeil, qui en vain distile 
Du fond du coeur mile ruisseaux de pleurs! 
  
LXXIII 
Le beau cristal des sainctz yeulx de Madame 
Entre les lyz et roses degoutoit, 
Et ce pendant Amour, qui le goutoit, 
En arrousa le jardin de mon ame. 
Au soupirer, qui les marbres entame, 
Le ciel pleurant, et triste se voûtoit, 
Et le Soleil, qui pleindre l'ecoutoit, 
S'osta du chef les rayons de sa flâme. 
Les ventz brusloient d'une chaste amitié, 
L'air, qui au tour s'enflammoit de pitié, 
En fist pluvoir une triste rousée, 
Mes yeulx estoient deux fonteines de pleurs, 
La terre adonq' qui en fut arrousée, 
En fist sortir mile amoureuses fleurs. 
  
LXXIV 
Si le pinceau pouvoit montrer aux yeulx 
Ce que le ciel, les Dieux, et la Nature 
Ont peint en vous, plus vivante peinture 
Ne virent onq' de Grece les ayeulx. 
Toy donq' amant, dont l'oeil trop curieux 
Prent seulement des beautez nouriture, 
Fiche ta veue en cete protraiture, 
Dont la beauté plairoit aux plus beaux Dieux. 
Mais si la vive, et immortelle image 
Ne te deplaist, seule qui le dommage 
De maladie ou du temps ne doit craindre: 
Voy ses ecriz, oy son divin sçavoir, 
Qui mieulx au vif l'esprit te fera voir, 
Que le visage Appelle n'eust sçeu peindre. 
  
LXXV 
Nimphes, meslez vos plus vermeilles roses 
Parmy les lyz qui sont plus blanchissans, 
Et les oeillez qui sont plus rougissans, 
Parmy les fleurs plus freschement decloses. 
De tout cela, et des plus belles choses 
Que vous ayez en voz prez verdissans, 
Faictes bouquez, et chappeaux florissans, 
Or' que des champs les beautez sont encloses. 
Et toy, qui fais du monde le grand tour, 
Bien que tu n'ay's au taureau faict retour, 
En mile fleurs et mil', et mil' encore 
Peins mes ennuiz, et qu'on y puisse lire 
Le nom qu'Anjou doit sur tout autre elire, 
Pour decorer celle qui le decore. 
  
LXXVI 
Quand la fureur, qui bat les grandz coupeaux, 
Hors de mon coeur l'Olive arachera, 
Avec le chien le loup se couchera, 
Fidele garde aux timides troupeaux. 
Le ciel, qui void avec tant de flambeaux, 
Le violent de son cours cessera, 
Le feu sans chault et sans clerté sera, 
Obscur le ront des deux astres plus beaux. 
Tous animaulx changeront de sejour 
L'un avec' l'autre, et au plus cler du jour 
Ressemblera la nuit humide et sombre, 
Des prez seront semblables les couleurs, 
La mer sans eau, et les forestz sans ombre, 
Et sans odeur les roses, et les fleurs. 
  
LXXVII 
O fleuve heureux, qui as sur ton rivage 
De mon amer la tant doulce racine, 
De ma douleur la seule medicine, 
Et de ma soif le desiré bruvage! 
O roc feutré d'un verd tapy sauvage! 
O de mes vers la source cabaline! 
O belles fleurs! ô liqueur cristaline! 
Plaisirs de l'oeil, qui me tient en servage. 
Je ne suis pas sur vostre aise envieux, 
Mais si j'avoy' pitoyables les Dieux, 
Puis que le ciel de mon bien vous honnore, 
Vous sentiriez aussi ma flamme vive, 
Ou comme vous, je seroy' fleuve et rive, 
Roc, source, fleur, et ruisselet encore. 
  
LXXVIII 
La Canicule, au plus chault de sa rage 
Ne faict trouver la fresche onde si belle, 
Ny l'arbrisseau si doulcement appelle 
Le voyageur au fraiz de son ombrage: 
La santé n'est de si joyeulx presage 
Au lent retour de sa clerté nouvelle, 
Que le plaisir en moy se renouvelle, 
Quand j'apperçoy l'angelique visage. 
Soit qu'en riant ses levres coralines 
Montrent deux rancz de perles cristalines, 
Soit qu'elle parle, ou danse, ou bâle, ou chante, 
Soit que sa voix divinement accorde 
Avec' le son de la parlante chorde, 
Tous mes ennuiz doulcement elle enchante. 
  
LXXIX 
Du ciel descend tout celeste pouvoir, 
Pour decorer cet'ame bien heureuse, 
Qui dessus toy ma terre plantureuse, 
Comme un Phenix faict ses aesles mouvoir. 
Le Dieu de Loire enflammé de la voir 
Ard jusq'au fond de son oncle plus creuse. 
O grand' beauté, ô puissance amoureuse, 
Qui faict aux eaux nouveau feu concevoir! 
S'elle est à rive, il semble que les fleuves 
Tardent leurs cours: s'elle erre par les bois, 
Les chesnes vieulx en prennent robes neufves. 
Le ciel courbé se mire dans ses yeulx: 
Echo respond à sa divine voix, 
Qui faict mourir les hommes, et les Dieux. 
  
LXXX 
Toy, qui courant à voile haulte, et pleine, 
Sage, ruzé, et bienheureux nocher, 
Loing du destroict, du pyrate, et rocher, 
Voles hardy où le desir te meine, 
Ne crain pourtant, oyant ma souveréne, 
Caler la voile, ou les ancres lâcher. 
Sa doulce voix ne te poura fâcher, 
Voix angelique, et non d'une Seréne. 
Si tu la vois, tu verras le soleil 
Du beau visage, à cetuy là pareil, 
Que l'Ocëan de ses longs braz enserre. 
O mile fois le bien aimé des Dieux! 
Qui sans mourir, et sans voler aux cieulx, 
Peult contempler le paradis en terre! 
  
LXXXI 
Celle qui tient l'aele de mon desir, 
Par un seul ris achemine ma trace 
Au paradis de sa divine grace, 
Divin sejour du Dieu de mon plaisir. 
Là les amours volent tout à loisir, 
Là est l'honneur, engravé sus sa face, 
Là les vertus, ornement de sa race, 
Là les beautez, qu'au ciel on peult choisir. 
Mais si d'un oeil foudroyant elle tire 
Dessus mon chef quelque traict de son ire, 
J'abisme au fond de l'eternelle nuit. 
Là n'est ma soif aux ondes perissante, 
Là mon espoir et se fuit et se suit, 
Là meurt sans fin ma peine renaissante. 
  
LXXXII 
Vous, qui aux bois, aux fleuves, aux campaignes, 
A cri, à cor, et à course hative 
Suyvez des cerfz la trace fugitive, 
Avec' Diane, et les Nymphes compaignes, 
Et toy ô Dieu! qui mon rivage baignes, 
As-tu point veu une Nymphe craintive, 
Qui va menant ma liberté captive 
Par les sommez des plus haultes montaignes? 
Helas enfans! si le sort malheureux 
Vous monstre à nu sa cruelle beauté, 
Que telle ardeur longuement ne vous tienne. 
Trop fut celuy chasseur avantureux, 
Qui de ses chiens sentit la cruauté, 
Pour avoir veu la chaste Cyntienne. 
  
LXXXIII 
Déjà la nuit en son parc amassoit 
Un grand troupeau d'etoiles vagabondes, 
Et pour entrer aux cavernes profondes 
Fuyant le jour, ses noirs chevaulx chassoit. 
Dejà le ciel aux Indes rougissoit, 
Et l'Aulbe encor' de ses tresses tant blondes 
Faisant gresler mile perlettes rondes, 
De ses thesors les prez enrichissoit. 
Quand d'occident, comme une etoile vive, 
Je vy sortir dessus ta verde rive 
O fleuve mien! une Nymphe en rient. 
Alors voyant cete nouvelle Aurore, 
Le jour honteux d'un double teint colore 
Et l'Angevin, et l'Indique orient. 
  
LXXXIV 
Seul, et pensif par la deserte plaine 
Resvant au bien qui me faict doloreux, 
Les longs baisers des collombs amoureux 
Par leur plaisir firent croitre ma peine. 
Heureux oiseaux, que vostre vie est pleine 
De grand' doulceur! ô baisers savoureux! 
O moy deux fois, et trois fois malheureux, 
Qui n'ay plaisir que d'esperance vaine! 
Voyant encor' sur les bords de mon fleuve 
Du sep lascif les longs embrassements, 
De mes vieulx maulx je fy' nouvelle epreuve. 
Suis-je donq' veuf de mes sacrez rameaux? 
O vigne heureuse! heureux enlacements! 
O bord heureux! ô bien heureux ormeaux! 
  
LXXXV 
Parmy les fleurs ce faulx Amour tendit 
Une ré d'or legerement coulante, 
Soubs les rameaux d'une divine Plante, 
Où de pié coy ce cruel m'atendit. 
Bien me sembla, que quelque voix me dît, 
Haste les paz de ta course trop lente: 
Quand une main doulcement violente 
Serrant la corde à terre m'etendit. 
Lors je fu' pris: et ne me prenoy' garde 
Qu'en mile noeuds lié je me regarde 
En la prison d'une beauté celeste. 
Là est ma foy, gëolier nuit et jour. 
O doulce chartre! ô bienheureux sejour! 
Qui m'a rendu la liberté moleste. 
  
LXXXVI 
Pres d'un boccage, au milieu d'un beau pré, 
Où d'un ruisseau la frescheur tousjours dure, 
Je te feray un autel de verdure 
De miles fleurs tout au tour diapré. 
Là je pendray en un tableau sacré 
A ton sainct nom, une riche peincture, 
Où je feray de vers une ceinture, 
De mile vers, s'ilz te viennent à gré. 
Soupire donq' de ta plus doulce haleine, 
Me decouvrant sur ce col de porphire 
Ces laqs dorez coupables de ma peine. 
Ainsi, des vens te soit donné l'empire, 
Ainsi ta Flore, ô bienheureux Zephire! 
Te soit tousjours, et tousjours plus humaine. 
  
LXXXVII 
Vent doulx souflant, vent des vens souverain, 
Qui voletant d'aeles bien empanées 
Fais respirer de souëves halenées 
Ta doulce Flore au visage serain, 
Pren de mes mains ce vase, qui est plein 
De mile fleurs avec' l'Aurore nées, 
Et mil' encor' à toy seul destinées, 
Pour t'en couvrir et le front, et le seing. 
Encependant, au thesor de ces rives 
Je pilleray ces emeraudes vives, 
Ces beaux rubiz, ces perles, et saphirs, 
Pour mettre en l'or des tresses vagabondes, 
Qui çà et là folastrent en leurs ondes, 
Grosses du vent de tes plus doulx soupirs. 
  
LXXXVIII 
Si longue foy peult meriter merci, 
J'auray le gaing de ma perte passée, 
Si mon destin toute ardeur n'a chassée 
Du beau Soleil, dont je suis eclerci. 
Amour, qui fut longuement endurci, 
Ores piteux à mon ame offensée, 
A mis les yeulx au creux de ma pensée, 
Cler à luy seul, à tout autre obscurci. 
La forest prent sa verde robe neufve, 
La terre aussi, qui naguere etoit veufve, 
Promet de fruictz une accroissance pleine. 
Or cesse donq' l'hiver de mes douleurs, 
Et vous plaisirs, naissez avec' les fleurs 
Au beau Soleil, qui mon printemps rameine. 
  
LXXXIX 
Zephire soufle, et sa Dame raméne 
Les belles fleurs, dont la terre est couverte. 
La forest neufve oit sur sa teste verte 
Progne gemir, et pleindre Philomene. 
Le ciel trompeur, qui le front rasserene, 
De ses thesors nous tient la porte ouverte, 
Et pour tirer un gaing de nostre perte, 
De nouveaux fruictz la Nature a faict pleine. 
Tous animaulx, qui cheminent et noüent, 
Qui vont glissant, et qui par l'air se joüent, 
Sentent le feu, et je suis le feu mesme. 
Vous seulement osez faire la guerre 
Contre celuy dont la puissance extreme 
Domte le ciel, l'air, la mer, et la terre. 
  
XC 
Toy, qui fis voir la lumiere incongnue 
Au chaste filz du jaloux inhumain, 
Quand tu pillas d'une trop docte main 
La proye en vain de Pluton retenue: 
L'horrible Dieu, qui tonne sur la nue, 
Meu justement pour son frere germain, 
Darda les traictz vangeurs du sort humain, 
Te foudroyant, de sa flamme congneue. 
La moy chetif! qui l'oblivieux bord, 
Malgré l'Enfer, Acheron, et son port, 
Ay depouillé de sa plus riche proye! 
Celle que j'ay faict compaigne des Dieux, 
Me bat, me poingt, me brusle, me foudroye 
Par les doulx traictz qui sortent de ses yeulx. 
  
XCI 
Rendez à l'or cete couleur, qui dore 
Ces blonds cheveux, rendez mil' autres choses: 
A l'orient tant de perles encloses, 
Et au Soleil ces beaux yeulx, que j'adore. 
Rendez ces mains au blanc yvoire encore, 
Ce seing au marbre, et ces levres aux roses, 
Ces doulx soupirs aux fleurettes decloses, 
Et ce beau teint à la vermeille Aurore. 
Rendez aussi à l'Amour tous ses traictz, 
Et à Venus ses graces, et attraictz: 
Rendez aux cieulx leur celeste harmonie. 
Rendez encor' ce doulx nom à son arbre, 
Ou aux rochers rendez ce coeur de marbre, 
Et aux lions cet' humble felonnie. 
  
XCII 
Ce bref espoir, qui ma tristesse alonge, 
Traitre à moy seul, et fidele à Madame, 
Bien mile fois a promis à mon ame 
L'heureuse fin du soucy qui la ronge. 
Mais quand je voy' sa promesse estre un songe, 
Je le maudy', je le hay', je le blâme: 
Puis tout soudain je l'invoque et reclame, 
Me repaissant de sa doulce mensonge. 
Plus d'une fois de moy je l'ay chassé: 
Mais ce cruel, qui n'est jamais lassé 
De mon malheur, à voz yeulx se va rendre. 
Là faict sa plainte: et vous, qui jours et nuitz 
Avecques luy riez de mes ennuiz, 
D'un seul regard le me faictes reprendre. 
  
XCIII 
Ores je chante, et ores je lamente, 
Si l'un me plaist, l'autre me plaist aussi, 
Qui ne m'areste à l'effect du souci, 
Mais à l'object de ce qui me tormente. 
Soit bien, ou mal, desespoir ou attente, 
Soit que je brusle ou que je soy' transi, 
Ce m'est plaisir de demeurer ainsi: 
Egalement de tout je me contente. 
Madame donc, Amour, ma destinée, 
Ne changent point de rigueur obstinée, 
Ou hault, ou bas la Fortune me pousse. 
Soit que je vive, ou bien soit que je meure, 
Le plus heureux des hommes je demeure, 
Tant mon amer a la racine doulce. 
  
XCIV 
Quand vos beaux yeulx Amour en terre incline, 
Et voz espriz en un soupir assemble 
Avec ses mains, et puis les desassemble 
D'une voix clere, angelique, et divine, 
Alors de moy une doulce rapine 
Se faict en moy: je me pers, il me semble 
Que le penser, et le vouloir on m'emble 
Avec le coeur, du fond de la poitrine. 
Mais ce doulx bruit, dont les divins accens 
Ont occupé la porte de mes sens, 
Retient le cours de mon ame ravie. 
Voila comment sur le mestier humain 
Non les trois Soeurs, mais Amour de sa main 
Tist, et retist la toile de ma vie. 
  
XCV 
Dieu qui reçois en ton giron humide 
Les deux ruisseaux de mes yeulx larmoyans, 
Qui en tes eaux sans cesse tournoyans 
Enflent le cours de ta course liquide, 
Quand fut-ce, ô Dieu! qu'en la carriere vide 
De ton beau ciel, ces cheveux ondoyans, 
Comme tes flotz au vent s'ebanoyans, 
Deçà delà voguoient à pleine bride? 
Ce fut alors, que cent Nymphes captives 
Entre tes braz, sortirent sur leurs rives, 
Laissant le creux de ta blonde maison. 
Ce fut alors que les Dieux et l'année 
Firent sur toy, ma terre fortunée, 
Renaistre l'or de l'antique saison. 
  
XCVI 
Ny par les bois les Driades courantes, 
Ny par les champs les fiers scadrons armez, 
Ny par les flotz les grands vaisseaux ramez, 
Ny sur les fleurs les abeilles errantes, 
Ny des forestz les tresses verdoyantes, 
Ny des oiseaux les corps bien emplumez, 
Ny de la nuit les flambeaux allumez, 
Ny des rochers les traces ondoyantes, 
Ny les piliers des sainctz temples dorez, 
Ny les palais de marbre elabourez, 
Ny l'or encor', ny la perle tant clere, 
Ny tout le beau que possedent les cieulx, 
Ny le plaisir pouroit plaire à mes yeulx, 
Ne voyant point le Soleil, qui m'eclere. 
  
XCVII 
Qui a peu voir la matinale rose 
D'une liqueur celeste emmïellée, 
Quand sa rougeur de blanc entremeslée 
Sur le naïf de sa branche repose: 
Il aura veu incliner toute chose 
A sa faveur: le pié ne l'a foulée, 
La main encor' ne l'a point violée, 
Et le troupeau aprocher d'elle n'ose. 
Mais si elle est de sa tige arrachée, 
De son beau teint la frescheur dessechée 
Pert la faveur des hommes et des Dieux. 
Helas! on veult la mienne devorer: 
Et je ne puis, que de loing, l'adorer 
Par humbles vers (sans fruit) ingenieux. 
  
XCVIII 
S'il a dict vray, seiche pour moy l'ombrage 
De l'arbre sainct, ornement de mes vers, 
Mon nom sans bruit erre par l'univers, 
Pleuve sur moy du ciel toute la rage. 
S'il a dict vray, de mes soupirs l'orage, 
De cruauté les durs rochers couvers, 
De desespoir les abismes ouvers, 
Et tout peril conspire en mon naufrage. 
S'il a menti, la blanche main d'yvoire 
Ceigne mon front des fueilles que j'honnore: 
Les astres soient les bornes de ma gloire: 
Le ciel bening me decouvre sa trace: 
Voz deux beaux yeux, deux flambeaux que j'adore, 
Guident ma nef au port de vostre grace. 
  
XCIX 
O faulse vieille! ô fille de l'Envie, 
Et de l'Amour, fille qui à ton pere 
As enfanté dommage, et vitupere, 
En corrompant le miel de nostre vie! 
O gehinne! ô fleau de nostre fantasie, 
Qui jusqu'en l'ame as ton cruel' repere! 
O le seul mal du bien, que l'on espere! 
Faulse aveuglée, inique Jalousie! 
Vent pestilent, air infect qui apportes 
La mort au coeur par plus de mile portes, 
Sale harpie, oiseau de triste augure! 
Tu es le mal, qui ne craint, ô superbe! 
Emplastre, unguent, just de racine ou d'herbe, 
Vers enchanté, ou magique figure. 
  
C 
Vieille, qui prens de crainte nouriture, 
De faulx rapport et de legere foy, 
Pourquoy fais-tu, soudain que je te voy, 
Geler mon feu d'une triste froidure? 
Si tu es donq' à mes plaisirs si dure, 
Pourquoy viens-tu loger avecques moy? 
Va te noyer en ce fleuve d'emoy, 
Fleuve infernal, où le froid tousjours dure. 
Au fond d'enfer va pleurer tes ennuiz, 
Parmy l'obscur des eternelles nuitz: 
Pourquoy te plaist d'Amour le beau sejour? 
Si la clerté les ombres épouante, 
Ose-tu bien ô charongne puante! 
Empoisonner le serain de mon jour! 
  
CI 
O que l'enfer etroitement enserre 
Cet ennemy du doulx repos humain, 
De qui premier la sacrilege main 
Arracha l'or du ventre de la Terre! 
Cetuy vraiment mena premier la guerre 
Contre le ciel, ce fier, cet inhumain 
Tua son pere, et son frere germain, 
Et fut puni justement du tonnerre. 
O peste! ô monstre! ô Dieu des malefices! 
Par toy premier la cohorte des vices 
Sortit du creux de la nuit plus profonde. 
Par toy encor' s'en revola d'icy 
L'antique foy, et la justice aussi 
Avec' l'Amour, l'autre Soleil du monde. 
  
CII 
Des chiens veillants le long cry doloreux, 
Le soing du guet, et la ferrée porte 
La tour d'airein pouvoient rendre assez forte 
Contre l'assault du nocturne amoureux. 
Trop en etoit le sort avantureux 
Mesm' à celuy qui la vengence porte, 
S'il ne se fust de sa divine sorte 
Changé en or, ce metal malheureux. 
C'est ce fier là, qui egale aux campaignes 
Les durs sommez des plus haultes montaignes, 
Plus foudroyant, que n'est le traict des cieulx. 
Le fer, le feu, les grand's citez fermées, 
Les haultz ramparts, et les bandes armées 
Donnent passage à l'or audacieux. 
  
CIII 
Mais quel hiver seiche la verde souche 
Des sainctz rameaux, ombrage de ma vie? 
Quel marbre encor', marbre pasle d'envie, 
Blesmist le teint de la vermeille bouche? 
Mais quele main, quele pillarde moûche 
Ravist ses fleurs? c'est toy, fievre hardie, 
Qui fais languir par une maladie 
Moy en mon ame, et Madame en sa couche. 
O toy, que mere et maratre on appelle! 
As-tu donc faict une chose si belle 
Pour la deffaire? ô Dieu qui n'as point d'yeulx! 
Si contre moy la Nature conspire, 
Voire le ciel, la fortune, et les Dieux, 
Deffen au moins l'honneur de ton empire. 
  
CIV 
O Citherée! ô gloire paphienne! 
Mere d'Amour, vien' piteuse à la belle, 
Qui le secours de tes Graces appelle, 
Saincte, pudique, et chaste Cyprienne. 
Soutien aussi, vierge Tritonienne, 
De ton vieulx tige une branche nouvelle: 
Toy, qui sortis de la saincte cervelle, 
Sage Pallas, Minerve Athenienne. 
Oyez encor' vous les deux yeulx du monde, 
L'honneur jumeau de l'isle vagabonde, 
Le juste dueil de ce coeur gemissant. 
Ainsi la nuit tes baisers favorise, 
Chaste Diane: ainsi Parnaze prise, 
Docte Phebus, ton laurier verdissant. 
  
CV 
Esprit divin, que la troupe honnorée, 
Du double mont admire, en t'écoutant, 
Cigne nouveau, qui voles en chantant 
Du chault rivage au froid hiperborée: 
Si de ton bruit ma Lire enamourée 
Ta gloire encor' ne va point racontant, 
J'aime, j'admire, et adore pourtant 
Le hault voler de ta plume dorée. 
L'Arne superbe adore sur sa rive 
Du sainct Laurier la branche tousjours vive, 
Et ta Delie enfle ta Saone lente. 
Mon Loire aussi, demydieu par mes vers, 
Bruslé d'amour etent les braz ouvers 
Au tige heureux, qu'à ses rives je plante. 
  
CVI 
O noble esprit, des Graces allié, 
Que ta vertu, la Muse, et la Nature 
Ont par destin, et non par avanture, 
Avec le mien etroitement lié! 
O de mon coeur la seconde moitié! 
Si de ton feu quelque scintile dure, 
Soulage un peu le torment que j'endure, 
Me consolant d'excuse, ou de pitié. 
Inspire moy les tant doulces fureurs, 
Dont tu chantas celle fiere beauté, 
Qui t'aveugla à semblables erreurs. 
Ainsi d'Amour le feu puisse descendre, 
Pour amolir cet' humble cruauté, 
En l'estommac de ta froide Cassendre. 
  
CVII 
Sus, sus mon ame, ouvre l'oeil, et contemple 
L'arc triomphal de l'amour supernel, 
Qui pour laver ton peché paternel 
Porta le faix de ta perte si ample. 
Là, de pitié est le parfaict exemple: 
Sus donc mes vers, d'un vol sempiternel 
Portez mes voeux en son temple eternel, 
Le coeur fidele est de Dieu le sainct temple. 
S'il a servi pour rendre l'homme franc, 
S'il a purgé mes pechez de son sang, 
Et s'il est mort pour ma vie asseurer, 
S'il a goûté l'amer de mes douleurs, 
Prodigues yeulx, ne devez-vous pleurer 
D'avoir sans fruit dependu tant de pleurs? 
  
CVIII 
O seigneur Dieu, qui pour l'humaine race 
As esté seul de ton pere envoyé! 
Guide les pas de ce coeur devoyé; 
L'acheminant au sentier de ta grace. 
Tu as premier du ciel ouvert la trace, 
Par toy la mort a son dard etuyé: 
Console donq' cet esprit ennuyé, 
Que la douleur de mes pechez embrasse. 
Vien, et le braz de ton secours apporte 
A ma raison, qui n'est pas assez forte, 
Vien eveiller ce mien esprit dormant. 
D'un nouveau feu brusle moy jusq'à l'ame, 
Tant que l'ardeur de ta celeste flamme 
Face oublier de l'autre le torment. 
  
CIX 
Pere du ciel, si mil' et mile fois 
Au gré du corps, qui mon desir convie, 
Or que je suis au printemps de ma vie, 
J'ay asservi et la plume, et la voix, 
Toy, qui du coeur les abismes congnois, 
Ains que l'hiver ait ma force ravie, 
Fay moy brusler d'une celeste envie, 
Pour mieux goûter la douceur de tes loix. 
Las! si tu fais comparoitre ma faulte 
Au jugement de ta majesté haulte, 
Où mes fortaictz me viendront accuser, 
Qui me pourra deffendre de ton ire? 
Mon grand peché me veult condamner, Sire, 
Mais ta bonté me peult bien excuser. 
  
CX 
Dieu, qui changeant avec' obscure mort 
Ta bienheureuse, et immortelle vie, 
Fus aux pecheurs prodigue de ta vie, 
Pour les tirer de l'eternelle mort: 
Celle pitié coupable de ta mort 
Guide les paz de ma facheuse vie, 
Tant, que par toy à plus joyeuse vie 
Je soy' conduit du travail de la mort. 
N'avise point, ô Seigneur! que ma vie 
Se soit noyée aux ondes de la mort, 
Qui me distrait d'une si doulce vie. 
Oste la palme à cet' injuste mort, 
Qui jà s'en va superbe de ma vie, 
Et morte soit tousjours pour moy la mort. 
  
CXI 
Voicy le jour, que l'eternel amant 
Fist par sa mort vivre sa bien aimée: 
Qui telle mort au coeur n'a imprimée, 
O seigneur Dieu! est plus que dyamant. 
Mais qui poura sentir ce doulx torment, 
Si l'ame n'est par l'amour enflammée? 
Soufle luy donc, pour la rendre allumée, 
L'esprit divin de ton feu vehement. 
Pleurez mes yeulx, de sa mort la memoire, 
Chantez mes vers, l'honneur de sa victoire, 
Et toy, mon coeur, fay luy son deu hommage. 
O que mon Roy est invincible, et fort! 
O qu'il a faict grand gaing de son dommage! 
Qui en mourant triomphe de la mort. 
  
CXII 
Dedans le clos des occultes Idées, 
Au grand troupeau des ames immortelles 
Le Prevoyant a choisi les plus belles, 
Pour estre à luy par luymesme guidées. 
Lors peu à peu devers le ciel guindées 
Dessus l'engin de leurs divines aeles 
Vollent au seing des beautez eternelles, 
Où elle' sont de tout vice emondées. 
Le Juste seul ses eleuz justifie, 
Les reanime en leur premiere vie, 
Et à son filz les faict quasi egaulx. 
Si donq' le ciel est leur propre heritage, 
Qui les poura frauder de leur partage 
Au poinct, qui est l'extreme de tous maulx? 
  
CXIII 
Si nostre vie est moins qu'une journée 
En l'eternel, si l'an qui faict le tour 
Chasse noz jours sans espoir de retour, 
Si perissable est toute chose née, 
Que songes-tu mon ame emprisonnée? 
Pourquoy te plaist l'obscur de nostre jour, 
Si pour voler en un plus cler sejour, 
Tu as au dos l'aele bien empanée? 
Là, est le bien que tout esprit desire, 
Là, le repos où tout le monde aspire, 
Là, est l'amour, là, le plaisir encore. 
Là, ô mon ame au plus hault ciel guidée! 
Tu y pouras recongnoistre l'Idée 
De la beauté, qu'en ce monde j'adore. 
  
CXIV 
Arriere, arriere, ô mechant Populaire! 
O que je hay ce faulx peuple ignorant! 
Doctes espris, favorisez les vers 
Que veult chanter l'humble prestre des Muses. 
Te plaise donc, ma Roine, ma Déesse, 
De ton sainct nom les immortalizer, 
Avec' celuy qui au temple d'Amour 
Baize les piez de ta divine image. 
O toy, qui tiens le vol de mon esprit, 
Aveugle oiseau, dessile un peu tes yeux, 
Pour mieulx tracer l'obscur chemin des nues. 
Et vous, mes vers, delivres et legers, 
Pour mieulx atteindre aux celestes beautez, 
Courez par l'air d'une aele inusitée. 
  
CXV 
De quel soleil, de quel divin flambeau 
Vint ton ardeur? lequel des plus haulx Dieux, 
Pour te combler du parfaict de son mieulx, 
Du Vandomois te fist l'astre nouveau? 
Quel cigne encor' des cignes le plus beau 
Te prêta l'aele? et quel vent jusq'aux cieulx 
Te balança le vol audacieux, 
Sans que la mer te fust large tombeau? 
De quel rocher vint l'eternelle source, 
De quel torrent vint la superbe course, 
De quele fleur vint le miel de tes vers? 
Montre le moy, qui te prise, et honnore, 
Pour mieulx haulser la Plante que j'adore 
Jusq'à l'egal des Lauriers tousjours verds. 
COELO MUSA BEAT 
L'antérotique de la vieille et de la jeune amye 
  
L'antérotique de la vieille et de la jeune amye 
Vieille, aussi vieille comme celle, 
Qui apres l'Unde universelle 
Du ject de la pierre fecunde 
Engendra la moitié du Monde. 
Vieille, plus sale qu'Avarice, 
Vieille, qui serois bien nourice 
A celle de Nestor le Saige. 
Vieille, qui portes au visaige 
Et aux moins laids endroictz de toy 
Des sillons à coucher le doy. 
Vieille, qui as, ô vieille Beste! 
Plus d'yeux, que de cheveux en teste. 
Vieille, à trois petiz bouz de dentz 
Tous rouillez dehors, et dedens. 
Vieille, qui as joüe, et narine 
Bordées de crasse, et farine, 
De bave la bouche, et gensive, 
Et les yeux d'ecarlate vive. 
Vieille, qui as telle couleur 
Que celle, qui par grand' douleur 
Du bien d'autruy se lamentant, 
Se va soymesmes tormentant, 
Et couchée à plat sur le ventre 
En lieu, où point le Soleil n'entre, 
Pour nourrissement de ses oeuvres 
Se paist de Serpens, et Couleuvres. 
Vieille, horrible plus que Meduse, 
Vieille, au ventre, hola ma Muse, 
Veux-tu toucher les membres ords, 
Qui point ne se montrent dehors? 
Veu que ce qui au jour se montre 
Est de si hydeuse rencontre, 
Que mesmes le Soleil se cache 
De peur d'y prendre quelque tache: 
Je te pry, ne t'y souille point, 
De peur que venant sur le point 
De la Beaulté, pour qui j'endure, 
Tu n'y aportes quelque ordure. 
Vieille doncq' plus que toy vilaine, 
Vieille, qui rends semblable halaine 
A celle du stigieux Gouphre 
Ou d'une miniere de souphre: 
Et si à ryre tu te boutes, 
Semble à ceux qui sont aux ecoutes 
Ouyr l'epoventable voix 
Du Chien Portier à trois aboyx. 
Vieille, Peur des chastes familles, 
Vieille, peste des jeunes filles, 
Que tout pere avare et antique 
Et tout matrone pudique 
Craignent trop plus, que le berger 
Du loup ne doute le danger. 
Bien infortuné devoit estre 
L'Astre, soubz qui tu vins à naitre, 
Et bien etoint fachez les Dieux, 
Quand tu naquis en ces bas lieux, 
Qui des maulx y semes encore, 
Plus que la fatale Pandore. 
O que n'ay-je de vehemence 
Autant que tu as de semence 
D'etranges vices, et divers! 
Ma Plume vomiroit un vers 
Teint au sang de ce malheureux, 
Qui de peur du Traict dangereux, 
Que la Muse alloit debendant, 
Sauva sa vie en se pendant. 
Vieille, que tous Oyzeaux funebres, 
Chaz huans, amys des tenebres, 
Avecq' maint charoingneux corbeau 
Ont ja condamnée au tumbeau. 
Que dy-je? tu ne mouras point. 
Pource que la Mort, qui tout poingt, 
Quoy qu'elle soit fiere et terrible, 
Te voyant encor'plus horrible, 
De toy approcher n'osera, 
Mais de peur tremblente sera. 
Comment? ell' cuydera ainçoys 
Que la Mort de la Mort tu soys. 
Ou bien si le Ciel pitoyable 
De ce Monstre tant incroyable 
Purge la Terre, qui tel fruict 
Voudroit onques n'avoir produit, 
Ton Ame sale, et depiteuse, 
Sortant de sa prison hydeuse, 
S'en ira blaphemer là bas, 
Prenant (comme icy) ses ebas, 
A donner peines, et encombres. 
Malheur à vous (ô pauvres Umbres!) 
Qui d'endurer serez contraintes 
Les foüetz, torches, et attaintes, 
Et la cruelle Seigneurie 
De cette quatrieme Furie. 
Quand tu vois (ô Vieille et immunde, 
Vieille, Deshonneur de ce Monde) 
Celle qui (si bien m'en souvient) 
Sur l'an quinzieme à peine vient: 
Qui envoye jusq'aux talons 
Des cheveux si crespes, et blonds, 
Qu'ilz font honte au beau Soleil mesme: 
Cheveulx dignes d'un diadesme, 
Cheveux, qui d'un fil delïé 
M'ont à eux si tresfort lïé, 
Que la Mort le seul fer sera, 
Qui ce doulx lyen brisera: 
Cheveux, dont ce petit Enfant, 
Qui sur les Dieux est triumphant, 
A faict la chorde, dont il tyre 
Traictz empennez de doulx martyre. 
Ces traictz, sont les beaux yeux ryans 
Qui ont (tant me semblent frians) 
Ce croy-je, depuis ma naissance, 
Ma mort, ma vie en leur puissance. 
L'arc, sont ces beaux sourcilz voutilz: 
Ainsi, d'Amour tous les outilz 
(Quoy qu'il s'en fache ou qu'il en hongne) 
Sont empruntez de ma Mignonne, 
Qui a bien d'avantaige encores. 
Et quoy? Ce front, qui or' et ores 
Semble le Ciel, quand il decoeuvre 
Le plus luysant de son chef d'oeuvre, 
Ou quand quelque petite nue 
Nous rend sa clarté moins congnue. 
Ce beau teint, qui notre sejour 
Embellist encor' d'un beau jour, 
Et tel, qu'on voit, lors que l'Aurore 
L'Orient de pourpre colore: 
Teint, qui fait le Ciel amoureux 
De la Terre, et moy langoureux. 
Ce nez, ce menton, cete joue, 
Ces levres, où souvent se joue 
Amour, quand il montre en rient 
Tous les Thesors de l'Orient: 
D'où sort une halaine fleurante 
Mieux qu'Arabie l'Odorante: 
D'où sort l'Angelique Parler, 
A qui ne pouroit s'egaler 
La plus ravissante douceur 
Du Luc, des ennuiz effaceur, 
Encores qu'Albert le manie: 
Mais bien ressemble l'harmonie 
Et les accords melodieux, 
Qu'on oit à la table de Dieux. 
Bref (et de peur que d'avanture 
Mon oeil, ma main, mon ecriture 
Ne s'egarent, ou perdent voyre 
Par cete valée d'ivoyre, 
Et ces petiz coutaux d'albastre) 
M'amye est un beau petit astre 
Si clair, si net, que je crain' bien, 
Que le Ciel ne l'avoue sien. 
Bien etoit l'influence heureuse 
De la belle Etoile amoureuse 
Soubz qui m'amye prist naissance, 
Et les Dieux, qui ont congnoissance 
De tout, nous feurent bien amys, 
Veu que celle au Monde ilz ont mis, 
Qui seule y a plus aporté 
D'amour, de grace, et de beauté, 
Que d'odeurs l'Arabie heureuse, 
De perles d'Inde planteureuse, 
Ou le verd Printens de fleurettes, 
Fideles temoings d'amourettes. 
Que plus aux Muses, et Charites 
M'honnorer selon les merites 
De la belle, que j'ayme tant! 
Sans cesse je l'iroy' chantant, 
Et par des vers, qui seroient telz, 
Qu'elle et moy serions immortelz. 
Quand tu vois (ô Vieille edentée!) 
Que la Beauté que j'ay chantée, 
D'un oeil folastre me sourit, 
Et notz coeurs ensemble nourit 
D'humides baysers, qui ressemblent 
Ceux qui les columbes assemblent, 
Remordant, la vindicative, 
Ma levre de sa dent lascive, 
Et d'un long soupir adoucy 
M'embrasse, et serre, tout ainsi 
Que la vigne aux cent braz epars 
Etreint l'ormeau de toutes pars: 
Lors de moy aprocher tu oses 
Pour me faire semblables choses. 
Je suy' ton Dieu plus qu'à demy, 
Tu m'appelles ton doulx amy. 
Motz qui aux oreilles me sonnent 
Si doucement, que plus m'etonnent 
Que les grenouilles, ou cygales; 
Ou que l'enroüé des cymbales 
De tous les ecouillez ensemble 
De la Vieille, qui te ressemble, 
Et court par la Montaigne idée, 
De Lyons indomptez guydée 
Pour l'amour, qui par tout le Monde, 
Comme toy, la rend furibonde: 
Si que mes moüelles, qui ardent 
Aux douces flammes que leur dardent 
Les yeux archers de ma Maitresse, 
Te voyant, vieille Enchanteresse, 
Deviennent, je ne sçay comment, 
Toutes froydes en un moment. 
Or fais-tu maintenant bien voir 
Quel est (ô Amour!) ton pouvoir. 
Certes vanter tu te peux bien 
Qu'en ciel, et terre n'y a rien 
Qui plus fort que ton feu se treuve. 
Tu en as, Vieille, fait l'epreuve, 
Qui en ta plus chaulde partie 
Es plus froyde que la Scythie, 
Ou les hautes Alpes cornues, 
De nege comme toy chenues. 
Toutefois ces regards meslez 
Aux doulx baysers emmiellez 
De deux ensemble perissans 
Echaufent tes oz languissants. 
  
Vers lyriques 
  
Au lecteur 
Je n'ay (Lecteur) entremellé fort supersticieusement les vers masculins avecques 
Les feminins, comme on use en ces Vaudevilles et Chansons qui se chantent d'un 
Mesme chant, par tous les coupletz, craignant de contreindre et gehinner ma 
Diction pour l'observation de telles choses. Toutesfois affin que tu ne penses 
Que j'aye dedaigné ceste diligence, tu trouveras quelques Odes, dont les vers 
Sont disposez avecques telle religion: comme la Louange de deux Damoizelles; des 
Miseres et Calamitez humaines; le Chant du Desesperé, et les Louanges de 
Bacchus. 
  
I. Les louanges d'Anjou au fleuve de Loyre 
Ode I 
O de qui la vive course 
Prent sa bienheureuse source 
D'une argentine fonteine, 
Qui d'une fuyte loingtaine 
Te rens au seing fluctueux 
De l'Occean monstrueux, 
Loyre, hausse ton chef ores 
Bien haut, et bien haut encores, 
Et jete ton oeil divin 
Sur ce païs Angevin, 
Le plus heureux, et fertile 
Qu'autre, où ton unde distile. 
Bien d'autres Dieux que toy, Pere, 
Daignent aymer ce repaire 
A qui le Ciel feut donneur 
De toute grace, et bonheur. 
Ceres, lors que vagabunde 
Aloit querant par le monde 
Sa fille, dont possesseur 
Feut l'infernal ravisseur, 
De ses pas sacrez toucha 
Cete terre, et se coucha 
Lasse sur ton verd ryvaige, 
Qui luy donna doulx bruvaige. 
Et cetuy là, qui pour mere 
Eut la cuisse de son pere, 
Le Dieu des Indes vainqueur 
Arrousa de sa liqueur 
Les montz, les vaulx, et campaignes 
De ce terroir que tu baignes. 
Regarde, mon Fleuve, aussi 
Dedans ces forestz ici, 
Qui leurs chevelures vives 
Haussent au tour de tes ryves, 
Les Faunes aux piez soudains, 
Qui apres bisches et dains 
Et cerfz aux testes ramées 
Ont leurs forces animées. 
Regarde tes Nymphes belles 
A ces Demydieux rebelles, 
Qui à grand'course les suyvent, 
Et si près d'elles arrivent, 
Qu'elles sentent bien souvent 
De leurs haleines le vent. 
Je voy' dejà hors d'haleine 
Les pauvrettes, qui à peine 
Pouront atteindre ton cours, 
Si tu ne leur fais secours. 
Combien (pour les secourir) 
De foys t'a-lon veu courir 
Tout furieux en la plene? 
Trompant l'espoir, et la peine 
De l'avare laboureur, 
Helas! qui n'eut point d'horreur 
Blesser du soc sacrilege 
De tes Nymphes le college, 
College qui se recrée 
Dessus ta rive sacrée. 
Nymphes des jardins fertiles, 
Hamadryades gentiles, 
Toy Pryape, qui tant vaulx 
Avecq' ta lascive faulx, 
Pales, qui sur ces rivaiges 
Possedes tant beaux herbaiges, 
Que Flore va tapissant 
De mainte fleur d'eux yssant, 
Toy pasteur Amphrisien, 
Chacun de vous garde bien 
Ses richesses de l'injure 
Du chault, et de la froidure. 
Ces masses laborieuses, 
Que les mains industrieuses 
Quasi egalent aux cieux, 
Ne sont-elles pas aux Dieux? 
Qui vouldra doncq' loue, et chante 
Tout ce dont l'Inde se vante, 
Sicile la fabuleuse, 
Ou bien l'Arabie heureuse. 
Quand à moy, tant que ma Lyre 
Voudra les chansons elire 
Que je luy commenderay, 
Mon Anjou je chanteray. 
O mon Fleuve paternel, 
Quand le dormir eternel 
Fera tumber à l'envers 
Celuy qui chante ces vers, 
Et que par les braz amys 
Mon cors bien pres sera mis 
De quelque fontaine vive, 
Non gueres loing de ta rive, 
Au moins sur ma froyde cendre 
Fay quelques larmes descendre, 
Et sonne mon bruyt fameux 
A ton rivaige ecumeux. 
N'oublie le Nom de celle 
Qui toutes beautez excelle, 
Et ce qu'ay pour elle aussi 
Chanté sur ce bord icy. 
  
II. Des misères et fortunes humaines au seigneur Jan Proust 
Ode II 
Bellonne seme sang et raige 
Parmy les peuples çà et là, 
Et chasse à la Mort maint couraige 
De ce fouët tortu qu'ell' a. 
Son ame cetuy cy ottroye 
A un venin froid, et amer: 
Cetuy là est donné en proye 
Aux flotz avares de la Mer. 
Aucuns d'une main vengeresse 
Veulent par la Mort eprouver 
Si du mal, qui tant les oppresse, 
Pouront la guerison trouver. 
Quelques autres venans de naitre, 
Avant qu'ilz aillent rencontrant 
Ce qui malheureux nous fait estre, 
Sortent du monde en y entrant. 
Mercure des mains de la Parque 
Prent notz Umbres, et les conduyt 
Au bord, ou la fatale Barque 
Nous passe en l'eternelle Nuyt: 
Où Minos juge inexorable, 
Toutes excuses deboutant, 
La langue autresfois secourable 
De l'orateur n'est ecoutant. 
Le chemin est large, et facile 
Pour descendre en l'obscur sejour: 
Pluton tient de son domicile 
La porte ouverte nuyt et jour. 
Là gist l'oeuvre, là gist la peine, 
Ses pas de l'Orque retirer 
A l'etroit sentier, qui nous meine 
Où tout mortel doit aspirer. 
Le nombre est petit de ceux ores 
Qui sont les bien aymez des Dieux, 
Et ceux que la Vertu encores 
Ardente a elevez aux Cieux. 
Jupiter tient devant sa porte 
Deux tonneaux, dont il fait pluvoir 
Tout ce qui aux humains aporte 
De quoy ayse, ou tristesse avoir. 
Qui a veu en ce vieil poëte 
(Et le voyant, ne pleure lors) 
La trop tost ouverte boëte, 
Et les vertuz volants dehors? 
L'Esperance au bord arrestée 
Outre son gré demeure icy: 
Puis que seule nous est prestée, 
Gardon' qu'ell' ne s'en vole aussi. 
  
III. Les louanges d'amour au seigneur René d'Urvoy 
Ode III 
Le cler ruysselet courant, 
Murmurant 
Auprès de l'hospitale umbre, 
Plaist à ceux qui sont lassez, 
Et pressez 
De chault, de soif et d'encombre. 
Et ceux qu'Amour vient saisir, 
Leur plaisir, 
C'est parler de luy souvent. 
D'Amour soyez doncq', mes chantz, 
Par ces champs, 
Dessoubz la frescheur' du vent. 
Ces eaux cleres, et bruyantes, 
Eaux fuyantes 
D'un cours assez doulx et lent, 
Donneront quelque froideur 
A l'ardeur 
De mon feu trop violent. 
Erato, à ma chanson 
Donne son, 
Et me permetz approcher 
Pres de toy pour m'esjouyr, 
Et t'ouyr 
Du hault de ce creux rocher. 
Le Roy, le Pere des Dieux 
Tient les Cieux 
Dessoubz son obeïssance, 
Neptune la mer tempere, 
Et son frere 
Sur les enfers a puissance. 
Mais ce petit Dieu d'aymer, 
Ciel, et mer, 
Et le plus bas de la terre, 
D'un sceptre victorieux, 
Glorieux, 
Soubz son pouvoir tient, et serre. 
Sans luy, du ciel le haut temple, 
Large, et ample, 
En ruyne tumberoit, 
Avecq' chacun element, 
Tellement 
Discorde par tout seroit. 
Amour, gouverneur des villes, 
Loix civiles 
Et juste police ordonne, 
Et l'heur de Paix, qu'on va tant 
Souhaitant, 
C'est luy seul qui le nous donne. 
Les richesses de Ceres, 
Les forestz, 
Les sepz, les plantes, et fleurs 
Prennent d'Amour origine, 
Goust, racine, 
Vertu, formes, et couleurs. 
Par luy tout genre d'oyzeaux 
Sur les eaux 
Et par les boys s'entretient. 
Tout animal de servaige 
Et sauvaige 
De luy son essence tient. 
Par ce petit Dieu puissant, 
Delaissant 
Le doulx gyron de la mere, 
La vierge femme se treuve, 
Et fait preuve 
De la flamme doulce-amere. 
Que me chaut si on le blasme, 
Et sa flamme? 
Amour ne sçait abuser: 
Et ceux qui mal en reçoyvent, 
Ne le doyvent, 
Mais eux mesmes, accuser. 
Amour est tout bon et beau, 
Son flambeau 
N'enflamme les vicieux: 
Juste est, et de simple foy, 
C'est pourquoy 
Il est tout nu et sans yeux. 
Leurs victorieux charroys 
Ducz, et Roys 
Doyvent à ses sainctz autelz, 
Le poëtique ouvrïer 
Son laurier, 
Et les Dames leurs beautez. 
Puis doncq' qu'il est notre autheur, 
Sa haulteur 
Bien adorer nous devons, 
Dessus son autel sacré, 
Saichant gré 
A luy, de quoy nous vivons. 
La jeunesse (helas) nous fuyt, 
Et la suyt 
Le froid aage languissant: 
Adonques sont inutiles 
Les scintiles 
Du feu d'Amour perissant. 
  
IV. De l'inconstance des choses au Seigneur Pierre de Ronsard 
Ode IV 
Nul, tant qu'il ne meure, 
Heureux ne demeure: 
Le Sort inconstant 
Or' se hausse, et ores 
S'abaisse, et encores 
Au ciel va montant. 
La Nuyt froyde et sombre 
Couvrant d'obscure umbre 
La terre, et les cieux, 
Aussi doulx que miel 
Fait couler du ciel 
Le someil aux yeux. 
Puis le Jour luysant 
Au labeur duysant 
Sa lueur expose, 
Et d'un teint divers 
Ce grand univers 
Tapisse et compose. 
Quand l'Hyver tremblant 
Les eaux assemblant 
De glace polie, 
Des austres puissans 
De dueil gemissans 
La rage delie, 
La Terre couverte 
De sa robe verte 
Devient triste, et nue, 
Le vent furieux 
Vulturne en tous lieux 
Les forestz denue. 
Puis la saison gaye. 
A la terre essaye 
Rendre sa verdure, 
Qui ne doit durer, 
Las! mais endurer 
Une autre froidure. 
Ainsi font retour 
D'un successif tour 
Le Jour, et la Nuyt: 
Par mesme raison 
Chacune saison 
L'une l'autre suyt. 
Le pueril' aage 
Lubric, et volaige 
Au printens ressemble: 
L'été vient après, 
Puis l'autonne est près, 
Puis l'hyver qui tremble. 
O que peu durable 
(Chose miserable) 
Est l'humaine vie, 
Qui sans voyr le jour 
De ce cler sejour 
Est souvent ravie. 
Soubz le grand espace 
Du ciel, le Tens passe 
Par course subite: 
Thëatres, Colosses 
En ruines grosses 
Le tens precipite. 
Que sont devenuz 
Les murs tant congnuz 
De Troye superbe? 
Ilion est comme 
Maint palais de Romme 
Caché, dessoubz l'herbe. 
Torrentz, et ryvieres 
Bruyantes et fieres 
Courent en maintz lieux, 
Où rochers, et bois 
Sembloient autresfois 
Menasser les cieux. 
Les fieres montaignes 
Aux humbles campaignes 
On voit egalées, 
Maintz lieux foudroyez, 
Les autres noyez 
Des undes salées. 
Regnes, et empires 
En meilleurs et pires 
On a veu changer, 
Maint peuple puissant 
Ses loix delaissant 
Suyvre l'etranger. 
Superbe couraige, 
Qui ne crains oraige, 
Foudre, ny tempeste, 
A ton fier marcher 
Tu sembles toucher 
Les cieux de la teste. 
Mais ta voyle enflée 
De faveur souflée 
Metz hardiment bas: 
Le ciel variable 
Tousjours amyable 
Ne te sera pas. 
Quoy doncq'? ne sçais-tu 
Qu'un buysson batu 
Moins est du tonnerre, 
Qu'un haut chesne, ou tremble, 
Ou qu'un mont qui semble 
Depriser la terre? 
Amy, qui pour vivre 
Des ennuiz delivre, 
Que la court procure, 
T'es venu ranger 
Comme un etranger, 
En la tourbe obscure: 
Ne regrete point 
L'ambicieux poinct 
De cete faveur. 
Le ciel favorable 
D'un plus honorable 
T'a fait receveur. 
De Ronsard le nom 
Ne soit en renom 
Par le populaire: 
Amy, tu es tel, 
Que rien, qu'immortel, 
Ne te pouroit plaire. 
Laisse aux courtizants 
Les souciz cuyzans: 
Ne soys curieux 
Des biens aquerir, 
Ou de t'enquerir 
Du secret des Dieux. 
  
V. A deux Damoyzelles 
Ode V 
Il faut maintenant, ô ma Lyre! 
Sur ta meilleure corde elire 
Un chant, qui penetre les Cieux, 
Par une aussi etrange voye 
Que celles à qui je t'envoye 
Sont dignes du plus grand des Dieux. 
Dy leur que je n'ay l'artifice 
D'un peintre, ou engraveur, qui puisse 
Au vray le semblable egaler. 
Mais bien je les puy' faire vivre 
Mieux qu'en tableau, en marbre ou cuyvre, 
Qui n'ont l'usaige de parler. 
Mes vers, qui portent sur leurs esles 
Les louanges des Damoyzelles, 
Se vantent de voler un jour 
Parmy la region des nues, 
Et les beautez du ciel venues 
Sacrer au celeste sejour. 
Les beautez jusques aux Dieux montent, 
Celles que les Muses racontent. 
Les autres, qui n'ont ce bon heur, 
Les umbres solitaires suyvent: 
Mais les votres (si mes vers vivent) 
N'iront soubz terre sans honneur. 
Je chanteray que votz merites 
Vous egalent aux trois Charites, 
Qui font des chapeaux florissans 
A la joyeuse Cyprienne, 
Dansant avecq' la trope sienne 
Par les prez de loing rougissans. 
Telles sont les chastes compaignes, 
Qui parmy forestz, et campaignes, 
Fleuves, et ruysseaux murmurans, 
Suyvent la Vierge chasseresse, 
Quand d'un pié leger elle presse 
Le doz des cerfz legercourans. 
Qui a veu les lyz, et les rozes 
Avecq' la belle aube decloses, 
Celuy a veu votre beau teint: 
Dont le blanc, et vermeil ensemble 
Le pourpre coloré ressemble, 
Et du laict la blancheur eteint. 
Qui a conté les fleurs sacrées 
Des rives, campaignes, et prées, 
Dont l'air, quand il est plus rient, 
Orne les cheveux de la terre, 
Et les pierres que lon va querre 
Par tant de flotz en Orient: 
Celuy a nombré (ce me semble) 
Vos graces, et vertuz ensemble 
Avecques les traictz de votz yeux, 
Dont mil', et mile fleches darde 
Contre celuy qui vous regarde 
L'enfant qui surmonte les Dieux. 
Qui de la harpe Thracienne 
A ouy la voix ancienne, 
Des foretz l'ebahissement, 
Les votres luy fera pareilles, 
Qui font des plus rudes oreilles, 
Voyre des coeurs, ravissement. 
Voulez-vous que ma plume ecrive 
Comment dessus la verde ryve 
De Cadme la peu fine seur, 
Eloingnant sa fidele trope, 
Osa presser la blanche crope 
Du divin Thaureau ravisseur? 
Jadis soubz plume blanchissante 
Du Ciel la majesté puissante 
Remplit celle qui enfanta 
Les fors jumeaux, avecques celle 
Qu'en Ide des troys la plus belle 
Au juge bergier tant vanta. 
De la pluye jaune coulante 
Au seing d'une vierge excellente 
Naquit le chevalier volant. 
Telles sont les flammes subtiles 
Du feu, dont les vives scintiles 
Vont Dieux et hommes affolant. 
Qui est celuy qui voudroit taire 
Le filz du mari adultere? 
Le monde de monstres purgé 
De ses faictz la gloire conserve, 
Des enfers la depouille serve, 
Et le ciel sur son doz chargé. 
Qui ne congnoist bien les deux Ourses 
Fuyantes de Thetis les sourses? 
Ou qui est celuy que n'attaint 
La plainte de la belle vache, 
Qui aux tristes rives d'Inache 
De l'amy cruel se complaint? 
Fuyez doncq' les facons cruelles 
Que beauté couve soubz ses esles. 
Faites à l'Amour humbles voeutz 
Qu'à Jupiter ne vous otroye, 
Pour croistre (ô bienheureuse proye!) 
Le nombre des celestes feux. 
Par les mains du chaste Hymenée 
Chacune de vous soit menée 
Au lieu, où l'ennemy humain 
Soubz une agréable lumière 
De votz jardins la fleur premiere 
Pille d'audacieuse main. 
Ces petites undes enflées 
Des plus doulx zephires souflées 
Sans fin vont disant à leur bord: 
Heureuse la nef arrestée 
Par le mors de l'anchre jetée 
Dedans le seing d'un si beau port. 
  
VI. Du premier jour de l'an au Seigneur Bertran Bergier 
Ode VI 
Voicy le Pere au double front, 
Le bon Janus, qui renouvelle 
Le cours de l'An, qui en un rond. 
Ameine la saison nouvelle. 
Renouvelons aussi 
Toute vieille pensée, 
Et tuons le soucy 
De Fortune insensée. 
Sus doncq', que tardons-nous encore? 
Avant que vieillars devenir, 
Chassons le soing, qui nous devore 
Trop curieux de l'advenir. 
Ce qui viendra demain 
Ja pensif ne te tienne: 
Les Dieux ont en leur main 
Ta fortune, et la mienne. 
Tu voy de nege tous couvers 
Les sommetz de la forest nue, 
Qui quasi envoye à l'envers 
Le faiz de sa teste chenue. 
La froide bize ferme 
Le gosier des oyzeaux, 
Et les poissons enferme 
Soubz le cristal des eaux. 
Veux-tu attendre les frimaz 
De l'hyver, qui dejà s'appreste, 
Pour faire de nege un amaz 
Sur ton menton, et sur ta teste? 
Que tes membres transiz 
Privez de leur verdeur, 
Et les nerfz endurciz 
Tremblent tous de froideur? 
Quand la saison amolira 
Tes braz autresfois durs et roydes, 
Adoncq' malgré toy perira 
Le feu de tes moüelles froydes, 
Que toute herbe, ou etuve, 
Tout genial repas, 
Mais tout l'Aethne et Vesuve 
Ne rechaufferoint pas. 
Mon filz, c'est assez combatu, 
(Disoit la mere au fort Gregeois,) 
Pourquoy ne te rejouys-tu 
Avecq' ces filles quelques fois? 
Les vins, l'amour consolent 
Le triste coeur de l'homme: 
Les ans legiers s'en volent, 
Et la mort nous assomme. 
Je te souhaite pour t'ebatre 
Durant ceste morte saison, 
Un plaisir, voyre trois, ou quatre, 
Que donne l'amye maison: 
Bon vin en ton celier, 
Beau feu, nuyt sans soucy, 
Un amy familier, 
Et belle amye aussi, 
Qui de son luc, qui de sa voix 
Endorme souvent tes ennuiz, 
Qui de son babil quelquesfois 
Te face moins durer les nuitz, 
Au lict follastre autant 
Que ces chevres lascives, 
Lors qu'elles vont broutant 
Sur les herbeuses rives 
  
VII. Du jour des bacchanales au Seigneur Rabestan 
Ode VII 
Quel bruyt inusité 
A mes oreilles tonne? 
Je suy' tout excité 
De l'horreur qui m'etonne: 
Mon coeur fremist, et tremble, 
Evoé, Evoé. 
J'oy' la voix (ce me semble) 
D'un cornet enroué. 
Je voy' le deux fois né, 
L'Indique Dieu, qui erre 
Le chef environné 
De verdoyant lyerre: 
Les fiers tygres soupirent 
Soubz le joug odieux, 
Et tous paisibles tirent 
Son char victorieux. 
Maint Satyre lascif 
Ryant soutient à peine 
Sur ung asne tardif 
Le chancelant Sylene. 
Triumphe à la bonne heure, 
Dieu, dont feut le butin 
Ce peuple qui demeure 
Le plus près du matin. 
Mon ame eprise au feu 
De ta liqueur tant bonne, 
Ce poëtique voeu 
Te consacre et ordonne. 
Je te salue Pere, 
Qui tout soucy deffens, 
Soubz ton regne prospere 
Fay vivre tes enfans. 
Celuy qui sceut les boys 
Et les rochers attraire, 
Qui fist les trois aboys 
Tous ebahiz se taire, 
Sceut au prix de sa teste 
Combien est perilleux 
Blamer la saincte feste 
De ton nom merveilleux. 
Sans jarretz se trouva 
Le brave roy de Thrace, 
Et ta force eprouva 
L'Echionnée race: 
Bien que tu sembles estre 
Au ryz, banquetz, et jeuz 
Plus idoyne, qu'adextre 
Aux combatz outraigeux; 
D'une horrible machoire 
Renversé par ta main, 
Feut temoing de ta gloire: 
Quand les filz de la Terre 
Ozerent s'avancer 
Pour au Ciel faire guerre, 
Et ton Pere offenser. 
Sans toy, n'ard qu'à demy 
La furieuse flamme 
De Venus, ô l'amy 
Et du cors, et de l'ame! 
Donq' à force de boyre, 
Noye, ou brusle au dedans 
La facheuse memoire 
De noz souciz mordans. 
Amy, ceste rigueur 
Au vieil Caton delaisse: 
Mais où est la vigueur 
De ta verde vieillesse? 
Le soing de tout affaire 
Que n'est-il endormy? 
Quelquesfois il faut faire 
Le fol pour son amy. 
  
VIII. Du retour du printens à Jan d'Orat 
Ode VIII 
De l'hyver la triste froydure 
Va sa rigueur adoucissant, 
Et des eaux l'ecorce tant dure 
Au doulx Zephire amolissant. 
Les oyzeaux par les boys 
Ouvrent à cete foys 
Leurs gosiers etreciz, 
Et plus soubz durs glassons 
Ne sentent les poissons 
Leurs manoirs racourciz. 
La froide humeur des montz chenuz 
Enfle deja le cours des fleuves, 
Deja les cheveux sont venuz 
Aux forestz si longuement veufves. 
La Terre au Ciel riant 
Va son teint variant 
De mainte couleur vive: 
Le Ciel (pour luy complaire) 
Orne sa face claire 
De grand' beauté nayve. 
Venus ose jà sur la brune 
Mener danses gayes, et cointes 
Aux pasles rayons de la lune, 
Ses Graces aux Nymphes bien jointes. 
Maint Satyre outraigeux, 
Par les boys umbraigeux, 
Ou du haut d'un rocher, 
(Quoy que tout brusle, et arde) 
Etonné les regarde, 
Et n'en ose approcher. 
Or' est tens que lon se couronne 
De l'arbre à Venus consacré, 
Ou que sa teste on environne 
Des fleurs qui viennent de leur gré. 
Qu'on donne au vent aussi 
Cest importun soucy, 
Qui tant nous fait la guerre: 
Que lon voyse sautant, 
Que lon voyse hurtant 
D'un pié libre la terre. 
Voicy, dejà l'eté, qui tonne, 
Chasse le peu durable ver, 
L'eté le fructueux autonne, 
L'autonne le frilleux hyver. 
Mais les lunes volaiges 
Ces celestes dommaiges 
Reparent: et nous hommes, 
Quand descendons aux lieux 
De noz ancestres vieux, 
Umbre, et poudre nous sommes. 
Pourquoy doncq' avons-nous envie 
Du soing qui les coeurs ronge, et fend? 
Le terme bref de notre vie 
Long espoir nous deffent. 
Ce que les Destinées 
Nous donnent de journées, 
Estimons que c'est gaing. 
Que scais-tu si les Dieux 
Ottroyront à tes yeux 
De voir un lendemain? 
Dy à ta lyre qu'elle enfante 
Quelque vers, dont le bruyt soit tel, 
Que ta Vienne à jamais se vante 
Du nom de Dorat immortel. 
Ce grand tour violant 
De l'an leger-volant 
Ravist et jours, et moys: 
Non les doctes ecriz, 
Qui sont de noz espris 
Les perdurables voix. 
  
IX. Chant du desesperé 
Ode IX 
La Parque si terrible 
A tous les animaulx 
Plus ne me semble horrible, 
Car le moindre des maulx, 
Qui m'ont fait si dolent, 
Est bien plus violent. 
Comme d'une fonteine 
Mes yeux sont degoutens, 
Ma face est d'eau si pleine 
Que bien tost je m'attens 
Mon coeur tant soucieux 
Distiler par les yeux. 
De mortelles tenebres 
Ilz sont déjà noirciz, 
Mes plaintes sont funebres, 
Et mes membres transiz: 
Mais je ne puy' mourir, 
Et si ne puy' guerir. 
La Fortune amyable 
Est-ce pas moins que rien? 
O que tout est muable 
En ce val terrien! 
Helas, je le congnoy', 
Qui rien tel ne craignoy'. 
Langueur me tient en lesse, 
Douleur me suyt de près, 
Regret point ne me laisse, 
Et crainte vient après: 
Bref, de jour, et de nuyt 
Toute chose me nuit. 
La verdoyant' campaigne, 
Le flory arbrisseau, 
Tumbant de la montaigne 
Le murmurant ruysseau, 
De ces plaisirs jouyr 
Ne me peut rejouyr. 
La musique sauvaige 
Du rossignol au boys 
Contriste mon couraige, 
Et me deplait la voix 
De tous joyeux oyzeaux 
Qui sont au bord des eaux. 
Le Cygne poëtique 
Lors qu'il est myeux chantant, 
Sur la ryve aquatique 
Va sa mort lamentant. 
Las! tel chant me plait bien 
Comme semblable au mien. 
La voix repercussive 
En m'oyant lamenter, 
De ma plainte excessive 
Semble se tormenter, 
Car cela que j'ay dit 
Tousjours elle redit. 
Ainsi la joye et l'ayse 
Me vient de dueil saisir, 
Et n'est, qui tant me plaise 
Comme le deplaisir, 
De la mort en effect 
L'espoir vivre me fait. 
Dieu tonnant, de ta foudre 
Viens ma mort avencer, 
Afin que soye en poudre 
Premier que de penser 
Au plaisir, que j'auroy' 
Quand ma mort je scauroy'. 
  
X. Au Seigneur Pierre de Ronsard 
Ode X 
Chante l'emprise furieuse 
Des fiers Gëans trop devoyez, 
Et par la main victorieuse 
Du Pere tonnant foudroyez: 
Ou bien les labeurs envoyez 
Par Junon Déesse inhuméne 
A l'invincible enfant d'Alcméne. 
Chante les martiaux alarmes 
D'un son heroic, et haut style: 
Chante les amoureuses larmes, 
Ou bien le champ graz et fertile, 
Ou le cler ruysseau qui distile 
Du mont pierreux, ruysseau qui baigne 
Prez, et spacieuse campaigne. 
Chante doncq' les biens de Cerés 
Et de Bacchus les jeuz mystiques: 
Chante les sacrées forés, 
Sejour des Demydieux rustiques: 
Chante tous les Dieux des antiques, 
Pluton, Neptune impetueux. 
Et les austres tempetueux. 
Bref, chante tout ce qu'ont chanté 
Homere, et Maron tant fameux, 
Pyndare, Horace tant vanté, 
Afin d'estre immortel comme eux 
En depit du dard venimeux 
De celle qui ne peut deffaire 
Ce qu'un esprit divin sçait faire. 
Ton oeuvre sera plus durable 
Qu'un Thëatre, ou un Colisée, 
Ou qu'un Mausëole admirable, 
Dont l'etophe si fort prisée 
Par le tens a été brisée, 
Ou que tout autre oeuvre excellant 
De la main de l'ouvrier volant. 
Quand à moy, puis que je n'ay beu, 
Comme toy, de l'unde sacrée, 
Et puis que songer je n'ay peu 
Sur le mont double, comme Ascrée, 
C'est bien force que me recrée 
Avec Pan, qui soubz les ormeaux 
Fait resonner les challumeaux. 
Mais toy, si desires pour vivre 
Delaisser quelque monument, 
Pourquoy aussi ne veux-tu suyvre 
Quelque haut et brave argument? 
Amy, vole plus hautement, 
Et en lieu si humble n'amuse, 
Qu'à me louër, ta docte Muse. 
Si tu m'eusses, facund Mercure, 
Volu etre un peu favorable, 
Et toy Phebus, j'eusse pris cure 
De rendre mon bruyt honorable, 
Voyre par ecrit memorable 
Un jour avec triumphe et gloire 
Marier Loyr avecques Loyre. 
  
XI. A une dame cruelle et inexorable 
Ode XI 
Muse, que tant je voys cherchant, 
Inspire moy encor' un chant, 
Un chant, qui entre en l'obstinée oreille 
De la beauté, qui n'a point sa pareille. 
Le feu en la fournaize etreint 
Ard plus que cil, qui non contreint 
Par le ciel libre en çà et là epars 
Donne sa flamme au vent de toutes pars. 
Amour jusqu'au profund de l'ame 
A dardé la cruelle flamme 
Que suy' contreint de vomir en mes vers 
D'un son tragic tout etrange et divers. 
Cruelle, tu voys de bien loing 
Ce feu, dont tu n'as point de soing, 
Comme celuy qu'on voit voler parmy 
La ville prise ou le camp ennemy. 
Tu m'as ouvert le manque flanc 
Avecques cet ivoyre blanc, 
Qui montre au bout cinq perles plus exquises 
Que d'Orient les pierres tant requises. 
Pourquoy arraches-tu le coeur 
Dont Amour par toy feut vainqueur? 
Pourquoy fais-tu, ainsi que deux tenailles, 
Sentir tes mains en mes vives entrailles? 
Les tygres (ô fiere beauté!) 
N'ont tant que toy de cruauté: 
Ny le serpent, qui se trayne soubz l'herbe, 
Ny des lyons la semence superbe. 
Pas n'avoit si grande rudesse 
La cruelle vierge Déesse, 
Qui fist aux chiens devorer le veneur 
Criant en vain: Je suy' votre seigneur. 
Qui est celuy, qui ne s'etonne 
Quand le Pere courroussé tonne? 
Dardant çà bas de foudroyante main 
Le traict vangeur de tout acte inhumain. 
Amour pourtant dedans les cieux 
Enflamme le plus grand des Dieux, 
Hommes en terre, et en l'air les oyzeaux, 
Et les poyssons jusqu'au fond de leurs eaux. 
O repaire moins souhaitable 
Que le Caucase inhospitable, 
Où le rapteur du saint feu va paissant 
L'aigle sacré d'un poumon renaissant! 
Tu me fais par ta grand' froydeur 
Sentir plus violente ardeur 
Que cetuy là, dont le doz grand et large 
Soutient d'un mont la trop pesante charge. 
Qui d'Amour blame les edictz, 
Semble ces Geans, qui jadis 
Des plus hauts montz une echelle erigerent 
Et les manoirs celestes assiegerent. 
Ne crains-tu point qu'il se courrousse? 
Ne crains-tu point que de sa trousse 
Te darde un traict enpenné de fureur, 
Pour se vanger d'un si cruel erreur? 
Ou vas-tu, Muse? si grand' ire 
Ne convient à la douce Lyre. 
Tu es trop humble, et de trop petit son, 
Pour accorder si tragique chanson. 
  
XII. De porter les miseres et la calumnie au seigneur Christofle du Breil 
Ode XII 
Rien n'est heureux de tous poinctz en ce monde. 
L'air, et le feu, le ciel, la terre, et l'unde 
Nous font la guerre, et les justes Dieux mesmes 
N'ont pardonné à leurs palaiz supremes. 
Ne voy-tu pas que les Signes des Cieux 
Sont mutilez de piez, de braz, ou d'yeux? 
N'as-tu jamais d'eclypse coutumiere 
Veu obscursir l'une et l'autre lumiere? 
O que d'ennuy sans repos nous tormente! 
Les uns par faim ont peine vehemente, 
Autres on voit en la prison mourir, 
Plusieurs aussi à la guerre courir, 
Joyeux spectacle à ce furieux Dieu 
Qui maintenant obtient le premier lieu 
Entre les Roys, les Empereurs, et Princes, 
Au grand dommaige (hélas) de leurs provinces. 
Le flot, le vent, le pyrate, et rocher 
Sont les perilz de l'avare nocher, 
Qui de son ayse, et repos s'ennuyant, 
Aux Indes court, la pauvreté fuyant. 
Cetuy par fer, par cordeau, ou poyson 
Cherche de mort voluntaire achoyson, 
Et pour trouver de ses maulx allegence, 
A pris de soy luymesmes la vengence: 
Et cetuy là, qui est myeux fortuné 
Que les premiers, avant que d'estre né 
Ensevely d'un sommeil eternel, 
Fait son tumbeau du ventre maternel. 
D'un egal pié la Mort, qui tout attrape, 
Et des petiz les humbles manoirs frape, 
Et des plus grands les tours hautes et fortes. 
Une Mort seule en mile, et mile sortes 
De maulx soudains, nouveaux, et incurables, 
Va tormentant les humains miserables. 
Le cours des ans, des siecles, et saisons, 
Les grands citez et superbes maisons 
Mises par terre, et les ruines grosses 
Des vieux Palaiz, Thëatres, et Collosses, 
Montrent à l'oeil tout ce qui est çà bas 
Etre caduq' et subject à trepas. 
O malheureux, qui batist esperance 
Sur fondement d'incertaine assurance! 
De tous etaz, de tout sexe, et tout aage 
Solicitude est le propre heritaige. 
Ell' suyt des Roys les palaiz sumptueux, 
Conventz secrez, parquetz tumultueux: 
Le laboureur la porte en sa charrue, 
Et du pasteur aux toictz elle se rue: 
L'homme de guerre aussi la porte en croupe, 
Et le marchant avare dans la poupe. 
Rien, que vertu, ne domte la fortune. 
Comme le roc, quand la mer importune 
En çà et là contre luy se courrousse, 
Rompt les gros flotz, et de soy les repousse. 
O bienheureux, qui de rien ne s'etonne, 
Et ne palist, quand le ciel iré tonne! 
O bienheureux, que les torches ardentes 
Et des troys Seurs les couleuvres pendentes 
N'excitent point! qui n'entrerompt le fruict 
De son repos, pour quelque petit bruict. 
Cet homme là pour vray jamais ne tremble, 
Bien que le ciel à la terre s'assemble: 
Et ont les Dieux sa fortresse munie 
Contre fortune, et contre calumnie. 
Le Ciel vangeur, protecteur d'Innocence, 
Donne aux pervers souvent longue licence 
De nuyre aux bons: puis contre eux irrité 
Commende au Tens, pere de verité, 
Decouvrir tout; lors la cause plus forte 
Devient soudain la plus foyble, de sorte 
Que la grandeur de la peine compense 
La tardité de la juste vengence. 
Espere, Amy, espere, dure, attens 
Cette faveur et du Ciel, et du Tens. 
Et quand le Ciel n'auroit aucun soucy 
De tout cela que nous faisons ici, 
Mais bien seroint toutes humaines choses 
Soubz le pouvoir de la fortune encloses, 
Ne vault-il myeux (veu qu'elle fait son tour) 
Avoir espoir de son heureux retour, 
Qu'estre tousjours en peur de la ruyne? 
Cet air couvert d'une obscure bruyne 
S'eclersira, ces undes courroussées 
Jusques au ciel par l'aquilon poussées 
S'apaiseront, et par l'anchre jetée 
Au port sera la navire arrestée. 
O combien doulx sera le souvenir 
Des maulx passez! Pour doncq' là parvenir, 
Endure, Amy, ces peines doloreuses, 
Et te reserve aux choses plus heureuses. 
  
XIII. De l'immortalité des poëtes au seigneur Bouju 
Ode XIII 
Sus, Muse, il faut que l'on s'eveille, 
Je veux sonner un chant divin. 
Ouvre donques ta docte oreille, 
O Bouju, l'honneur Angevin! 
Pour ecouter ce que ma Lyre accorde 
Sur sa plus haute, et mieux parlante chorde. 
Cetuy quiert par divers dangers 
L'honneur du fer victorieux: 
Cetuy là par flotz etrangers 
Le soing de l'or laborieux. 
L'un aux clameurs du palaiz s'etudie, 
L'autre le vent de la faveur mandie. 
Mais moy, que les Graces cherissent, 
Je hay' les biens, que l'on adore, 
Je hay' les honneurs, qui perissent, 
Et le soing, qui les coeurs devore: 
Rien ne me plaist, fors ce qui peut deplaire 
Au jugement du rude populaire. 
Les lauriers, prix des frontz scavans, 
M'ont ja fait compaignon des Dieux: 
Les lascifz Satyres suyvans 
Les Nymphes des rustiques lieux 
Me font aymer loing des congnuz rivaiges 
La sainte horreur de leurs antres sauvaiges. 
Par le ciel errer je m'attens 
D'une esle encor' non usitée, 
Et ne sera gueres long tens 
La terre par moy habitée. 
Plus grand qu'Envie, à ces superbes viles 
Je laisseray leurs tempestes civiles. 
Je voleray depuis l'Aurore 
Jusq'à la grand' mere des eaux, 
Et de l'Ourse à l'epaule more, 
Le plus blanc de tous les oyzeaux. 
Je ne craindray, sortant de ce beau jour, 
L'epesse nuyt du tenebreux sejour. 
De mourir ne suys en emoy 
Selon la loy du sort humain, 
Car la meilleure part de moy 
Ne craint point la fatale main: 
Craingne la Mort, la Fortune, et l'Envie, 
A qui les Dieux n'ont donné qu'une vie. 
Arriere tout funebre chant, 
Arriere tout marbre et peinture, 
Mes cendres ne vont point cherchant 
Les vains honneurs de sepulture: 
Pour n'estre errant cent ans à l'environ 
Des triestes bords de l'avare Acheron. 
Mon nom du vil peuple incongnu 
N'ira soubz terre inhonoré, 
Les Seurs du mont deux fois cornu 
M'ont de sepulchre decoré, 
Qui ne craint point les aquilons puissans, 
Ny le long cours des siecles renaissans. 
  
XIV. Epitaphe de Clement Marot 
Si de celuy le tumbeau veux sçavoir 
Qui de Maro avoit plus que le nom, 
Il te convient tous les lieux aller voir 
Ou France a mis le but de son renom: 
Qu'en terre soit, je te respons que non, 
Au moins de luy c'est la moindre partie. 
L'Ame est au lieu d'où elle etoit sortie, 
Et de ses vers, qui ont domté la mort, 
Les Seurs luy ont sepulture batie 
Jusques au ciel. Ainsi, La mort n'y mord. 
CAELO MUSA BEAT 
  
Recueil de poésie 
  
A Tresillustre Princesse Madame Marguerite Seur unique du Roy 
Madame, après avoir depuis peu de temps mis en lumière quelques petiz ouvraiges 
Poëtiques, plus pour satisfaire à l'instante priere d'aucuns miens amis, que 
Pour espoir que j'eusse d'acquerir aucune reputation entre les doctes, j'avoy 
Deliberé me retirer entierement de ce labeur, aussi peu maintenant favorizé, 
Comme il estoit anciennement entre les meilleurs espriz singulierement 
Recommandé. Je ne scay si l'infelicité de nostre siecle en est cause, ayant 
L'ambition, l'avarice, et l'ocieuse volupté, pestes des bons espris, chassé 
D'entre nous ce tant honneste desir de l'immortalité: ou la trop grande et 
Indocte multitude des escrivains, qui de jour en jour s'eleve en France, au 
Grand deshonneur et abatardissement de nostre langue. J'avoy (dy-je) proposé 
M'addonner à quelque autre estude, si non tant louable, pour le moins plus 
Favorable que cestui cy, lors que dernierement estant le Roy à Paris, apres 
Avoir pris la hardiesse de me presenter devant vostre excellence, il vout pleut 
De vostre benigne grace me recevoir avecques tel visaige, que je congneu mes 
Petiz labeurs vous avoir esté agreables. Cela, Madame, a depuis si vivement 
Incité mon couraige, que mettant en arriere ma premiere deliberation, je me suis 
Remis aux choses que j'ay pensé vous pouvoir donner quelque plaisir: sans que 
Maladie ou autre empeschement ait peu retirer mon esprit de ceste non jamais 
Assez louée entreprise, jadis tant favorizée de ce grand Roy François vostre 
Pere, et maintenant du treschrestien Roy, et de vous, comme seuls et vrais 
Heritiers de sa vertu. Vous ayant donques ces derniers jours fait present de ce 
Petit livre, non seulement vous l'avez eu aggreable (comme est vostre bonté 
Coustumiere de recevoir toutes choses, qui d'humble vouloir sont presentées à 
Vostre grandeur) mais encor vous a pleu me commander de le mettre en lumière, et 
Soubs vostre nom. Avecques lequel je me sen si fort et bien armé contre toutes 
Les difficultez qui de jour en jour se treuvent ez haultes entreprises, que je 
Pouray combattre l'envie, et la mort, et celuy temps mesmes qui abat les grands 
Palaiz, et superbes Pyramides. Je ne me veulx amuser ici à respondre aux 
Calumniateurs (comme est la façon ordinaire des ecrivains) puis que mes escriz 
Ont desja esté si heureux de rencontrer la faveur de vostre jugement, et par 
Vostre moyen celuy du Roy, et de la Royne, auxquels ayant satisfaict, tant s'en 
Fault que je me soucie du mescontentement d'autruy, que j'estimeray de là avoir 
Receu toute la gloire, et le fruict de mes labeurs. Madame, je supplie à nostre 
Seigneur vous conserver en heureuse, et longue vie, et augmenter de plus en plus 
En vous les souveraines graces et vertuz qu'il vous a si liberalement departies. 
A Paris, ce XXIII. d'Octobre M.D. XLIX. 
De vostre excellance 
Le treshumble et tresobeissant serviteur, 
I.D.B.A. 
  
A Sa Lyre 
Va donques maintenant, ma Lyre, 
Ma Princesse te veult ouir. 
Il fault sa table docte elire: 
Là, quelque amy voudra bien lire 
Tes chansons, pour la resjouir 
Ta voix encores basse et tendre 
Apren à hausser dès ici, 
Et fay tes chordes si bien tendre, 
Que mon grand Roy te puisse entendre, 
Et sa royale epouze aussi. 
Il ne fault que l'envieux die 
Que trop hault tu as entrepris: 
Ce qui te fait ainsi hardie, 
C'est que les choses qu'on dedie 
Au temple, sont de plus grand pris. 
CAELO MUSA BEAT 
  
Prosphonematique 
Au Roy Treschrestien Henry II 
Vous, qui tenez les sources de Pegaze, 
(Celestes Seurs) bandez vostre arc divin 
Tout au plus hault de vostre sainct Parnaze 
Et permettez que ce bras Angevin 
Par l'air François desserre un traict, qui vole 
Mieulx que jamais de l'un à l'autre pole. 
Ce traict puissant dessus ses ailes porte 
L'horrible nom qui fait mouvoir les cieux, 
Le fer, la flamme, et la non jamais morte 
Gloire des Roys, enfans aisnez des Dieux: 
Dont le protraict Henry, celeste race, 
A peint au vif en sa divine grace. 
La majesté de son front tant illustre 
Entre les Roys apparoist tout ainsi 
Que l'or aupres de l'argent: et son lustre 
Ard tout l'obscur de ce beau siecle ici, 
Comme la Lune aux etoiles eclaire. 
Par le serain de quelque nuict bien claire 
En quelque part que son bel oeil se montre, 
Comme un printemps il serene le jour: 
Et semble bien qu'à si haulte rencontre 
Renaisse au monde un plus joyeux sejour. 
Le Ciel en rid, et le Soleil encore 
De nouveaux raiz ses blons cheveux decore. 
Vien, Prince, vien: rends aux tiens la lumiere 
Qu'obscurcissoit ce tien long demeurer, 
Et la vigueur de leur vertu premiere, 
Qui ne se peult, qu'en ta force, asseurer. 
Ton seul regard inspire en leurs couraiges 
L'ardent desir des martiaux ouvraiges. 
Comme la mere au rivaige lamente, 
Prie, et fait voeux pour son desiré filz, 
Qu'un vent contraire en haulte mer tormente 
Outre le terme à son retour prefix: 
Paris ainsi languissoit avant l'heure 
Qui a mis fin à ta longue demeure. 
La grand Ceres, qui ces murs environne, 
A ton passer, de beaux epiz dorez 
Enceinct le tour de sa riche couronne, 
Et par les champs de jaune colorez 
Fait ondoyer sa chevelure blonde, 
Pour honnorer le mesme honneur du monde. 
Bacchus aussi orne teste et visaige 
De nouveau pampre et d'odorantes fleurs: 
Prez, montz, et plains à ton heureux passaige 
Vestent habits de diverses couleurs: 
Et la forest branlant sa teste armée 
Donne le fraiz de sa neufve ramee. 
Les Demidieux, et Nymphes se retirent 
Aux plus haulx lieux, pour à l'aise te voir: 
Les plus doulx vents tant seulement souspirent: 
Les ruysselets ne font moins leur devoir: 
Et les oizeaux à l'envy te saluent 
Sur les sommets qui un peu se remuent. 
Tout animal domestic ou champestre 
Fiche sur toy son regard etonné: 
Les baz tropeaux en ont laissé le paistre: 
Et les taureaux en ont abandonné 
Leurs fiers combaz: les plus cruelles bestes 
Devers le ciel ont élevé leurs testes. 
Qui a peu veoir les mousches menageres 
Sur le printemps de leurs manoirs saillir, 
Faire un grand bruit, et s'en voler legeres, 
Puis ça et là l'honneur des champs cueillir: 
Celuy a veu les miliers, qui se rendent 
Dessus les murs et portes, qui t'attendent. 
Paris, qui void son Prince à la campaigne, 
A mis au vent tout importun souci: 
Toute maison en tout plaisir se baigne: 
Veuf de procez est le Palaiz aussi 
Et par les feuz, qui aux temples s'allument, 
Pour toy, HENRY, mil' autels aux Dieux fument. 
Enfans bien nez, les plus heureuses bandes, 
Vostre beau chant soit l'IO triumphal: 
Vous saincts vieillars, chargez les Dieux d'offrandes: 
Vierges aussi au visaige Nymphal, 
Faites couler une pluye de roses, 
Des propres mains de l'Aurore decloses. 
Ecoute, Roy, le plus grand de la terre, 
L'horrible voix du foudroyant canon, 
Qui par le ciel fait un nouveau tonnerre, 
Moindre pourtant que le bruit de ton nom. 
Seine en fremist, les rivieres craintives 
Heurtent en vain leurs opposees rives. 
Jupiter mesme, oyant l'air ainsi fendre, 
Change couleur pour un tel foudroyer: 
Et craint encor' que la Terre n'engendre 
Nouveaux enfans, pour le Ciel guerroyer. 
La nuict qui sort de l'epesse fumiere 
Avant le soir fait faillir la lumiere. 
Seine dormoit au plus creux de ses ondes, 
Mais te sentant de sa rive approcher, 
A mis dehors ses belles tresses blondes, 
Et s'est assize au coupeau d'un rocher. 
Ses filles lors, qui à my-corps y nouent, 
Diversement à l'entour d'elle jouent. 
Marne peignoit ses beaux cheveux liquides, 
Qui luy armoint et l'un et l'autre flanc: 
Oyze au soleil seichoit les siens humides, 
Les separant sur son col net et blanc: 
Et de ces jongz, Yonne, que tu portes, 
Tu en tissois chapeaux de mile sorte. 
Lors se tirant sur le rocher sauvaige, 
L'une apres l'autre ont fait plus d'une fois 
Hault rechanter tout le courbé rivaige, 
Soubz l'argentin de leurs celestes voix. 
Quelqu'une ainsi consacre à la Memoire 
(S'il m'en souvient) de sa mere la gloire: 
Tage, e Pactol' à l'arene doree 
N'ont merité l'honneur qui t'appartient, 
O fleuve heureux! de qui l'onde azuree 
Dessus son dos plus grans thesors soutient. 
Ton cours tortu, qui lentement distile, 
D'un gras limon rend la terre fertile. 
En mile tours par la Province heureuse 
Tes cleres eaux s'en vont ebanoyant: 
Tes braz y font mainte isle plantureuse 
De tous cotez: et ainsi tournoyant, 
Entre hauls murs ton onde etroitte et forte 
Le riche honneur de l'abondance porte. 
Les grans cyprez poussent bien hault sur l'herbe 
Leurs fiers sommetz à croistre exercitez: 
Le grand Paris d'un tel fleuve superbe 
Leve son chef sur les autres citez, 
Non autrement qu'on void parmy les nues 
Les haulx sourcils des grands Alpes chenues. 
Quelqu'un loura (dit la Nymphe seconde) 
Lyon, Rouan, Bordeaux, Orleans, Tours: 
Et je diray la richesse feconde 
Du grand Paris, et ses superbes tours: 
Ses temples sainctz, et son Palaiz, qui semble 
Non un Palaiz, mais deux citez ensemble. 
Mere des ars, ta haulteur je salue, 
Je vous salue aussi, vous tous les Dieux, 
Qui avez là vostre demeure elue 
Pour y semer les grans thesors des cieux: 
Pallas y est, et les Muses sacrees 
Sur Seine ont fait leurs rivaiges ascrees. 
Comment te peut assez chanter la France, 
O grand FRANCOYS, des neuf Seurs adoré? 
Tu as defaict ce vil monstre Ignorance, 
Tu as refaict le bel aage, doré: 
Par toy premier au monde est revenue 
La belle Vierge au vieux siecle cogneue. 
Les vertueux (dist la troizieme) viennent 
Des vertueux: les fiers taureaux ainsi 
La braveté de leur source retiennent: 
Des bons chevaux les bons naissent aussi: 
L'aigle haultain ne degenere, et tombe 
Au naturel de la simple columbe. 
De ton FRANCOYS, qu'un autre n'eust peu suyvre, 
En ton Henry à mesme vertu né, 
France, tu vois l'exellence revivre, 
Dont les haulx Dieux rien meilleur n'ont donné. 
N'y donneront, bien qu'ils facent renaitre 
Sept et sept fois le temps du premier estre. 
Vy, Prince, vy: et de cent ans encores 
Pour enrichir le sejour eternel 
De nostre bien, ne vole ou reluit ores 
Au plus beau lieu ton Astre paternel: 
Qui d'oeil benin ton franc peuple regarde, 
Te favorize, et ta place te garde. 
Ainsi chantoint les trois Nymphes Senoizes 
Comme à l'envy, quand Seine en se levant 
Entrerompit leurs tant doulcettes noizes: 
Et d'une voix, qui persoit bien avant, 
Fist resonner aux oreilles royales 
L'heureux decret des trois vierges fatales. 
Tu es venu finablement, ô Prince! 
Et je t'avoy' si long temps attendu. 
Tu es au seing de ma belle Province 
Entre mes braz heureusement rendu. 
Ecoute donq' de quoy m'ont asseurée 
Les non menteurs oracles de Nerée. 
Estce pas toy, à qui les Dieux promettent 
Tout le bon heur du monarque Romain? 
Les Dieux, qui jà par leurs arests soumettent 
Tout l'univers à ta puissante main? 
J'en voy desja les depouilles captives 
Mises par toy pour trophee à mes rives. 
Je voy tomber soubz les fleches Françoises 
Le Leopard, ton antiq' ennemy, 
Qui souloit bruire aux forests Ecossoizes 
Le feu vangeur desjà vole parmy 
La nef captive: au sang Anglois encore 
L'azur marin de pourpre se colore. 
Je vois desjà la columne elevee 
De ta victoire: et ta gloire qui luit 
Est si avant dans les cieulx engravee, 
Qu'on la peult lire en l'obscur de la nuit. 
Le beau Croissant, qui le ciel François orne, 
Ameine en rond et l'une et l'autre corne. 
Un lieu se treuve hors le cours de l'annee, 
Loing de la voye au chariot luisant, 
Là où Atlas tient l'epaule inclinee 
Dessoubs l'esseul aux etoiles duisant. 
Là, tu feras ta renommee entendre, 
Et jusqu'aux bords de la terre s'etendre. 
Bien tost après Discorde furieuse 
Soubs un frein serf prise tu meneras: 
Lors regnera la paix victorieuse: 
Lors de Janus le temple fermeras: 
Et de laurier ta teste couronnee 
Adonq' sera d'olive environnee. 
Ce nouveau siecle, à l'antique semblable, 
Verra fleurir le sceptre de Valois. 
La Foy chenue, alors non violable, 
Tiendra le lieu des punissantes loix. 
Vice mourra: et les nopces pollues 
Ne seront lors par amours dissolues. 
A Dieu donq' Roy, mon destin me rapelle. 
Ainsi disant, le genoil avança: 
Puis tout à coup, avec sa troupe belle 
D'un sault leger en l'onde se lança: 
L'eau jette un son, et en tournoyant toute, 
Fait bouillonner mainte ecumeuse goutte. 
FIN 
CAELO MUSA BEAT 
I.D.B.A. 
  
Chant triumphal sur le voyage de Boulongne 
M.D. XLIX. au Moys d'Aoust 
Voici le temps, si long temps desiré, 
Où noz ayeulx en vain ont aspiré, 
Qui sur l'Angloys finablement rameine 
La juste (helas) mais trop tardive peine. 
Les Dieux vangeurs par toy mis à mepris, 
Superbe Angloys, veulent rendre le pris 
A leurs autels, et temples, que tu souilles, 
Ornez jadis de noz serves depouilles. 
Du grand Henry le bras puissant et fort 
Avec les Deux desja fait son effort 
De regaigner par ses fouldres belliques 
Le vieil butin des grand's pertes Galliques. 
Si Mars nous a regardé quelquefois 
D'un oeil felon, onques nul toutefois 
S'est peu vanter de voir par luy dontée 
Nostre vertu non jamais surmontée: 
Qui a tousjours coeur et force repris 
De son malheur, comme le chesne, appris 
A reverdir sa perruque nouvelle, 
Apres le fer sa teste renouvelle. 
Non autrement que des dents, que planta 
Le fort Jason, la terre en enfanta 
Hommes armez, France durant la guerre 
Nouveaux enfants de son ventre desserre. 
Hydre jadis en ce point combatoit 
(Dit l'ennemy) quand Hercule abbatoit 
L'un de ses chefs, avec peine inutile, 
Qui la rendoit par ses playes fertile. 
Craindras-tu donq', ô bon peuple de Mars, 
Craindras-tu donq' les flesches et les arcs 
Du rouge Angloys ton antiq' aversaire, 
Vivant HENRY, seul né pour le deffaire? 
Maint Roy Françoys a tenté le danger 
Des fiers combats, pour la France vanger: 
Mais à HENRY, enfant de la Victoire, 
Le Ciel amy reservoit ceste gloire. 
Son nom fatal à l'Angloys familier, 
Et le discours des astres regulier 
Luy peuvent bien donner ferme assurance 
De joindre en bref l'Angleterre à la France. 
Alors sera des Roys plus orgueilleux 
Presqu'adoré son sceptre merveilleux: 
Et sera dict en la Françoise terre 
Second du nom, neufieme en Angleterre. 
Là Françoys, là, aidez vostre bon heur, 
Favorisez d'un tel Prince l'honneur, 
Et avancez par vostre diligence 
De voz ayeulx la boyteuse vengence. 
Une Boulongne, ou Calaiz ne sont pas 
Puissans assez pour vous clore le pas, 
Non l'Ocean, qui de vous aura crainte, 
De sang Angloys voyant son onde teinte. 
Jà d'un costé des nostres le grand coeur 
A triumphé du souldard belliqueur, 
Qui soubs le coup de la hache Françoise, 
En gemissant, mord la terre Ecossoise. 
De l'autre donq' ne soyez endormis, 
A fouldroyer voz mortelz ennemis, 
Afin que d'eulx la dépouille soit mise 
Tout à l'entour des bords de la Tamise. 
C'est chose doulce, et belle, que mourir 
Pour son pais et son Roy secourir. 
De quoy te sert, ô personne craintive! 
Fuïr la mort d'une course hastive? 
Elle te suit, qui n'a point pardonné 
Au doz craintif à la fuite adonné, 
Ny au jaret trop peu ferme et debile 
De la jeunesse à la guerre inhabile. 
La vertu seule, à qui a merité 
Avoir le pris de l'immortalité 
Ouvre le ciel, et d'une aile courante 
Laisse la terre à la tourbe ignorante. 
Hercule ainsi par cet art glorieux 
Jadis s'assist à la table des Dieux, 
Et des Jumeaux le signe heureux aux voiles 
Ainsi accreut le nombre des estoilles. 
Ainsi Auguste, ainsi le grand François, 
Et toy HENRY, quelque part ou tu sois 
Jà destiné, ta belle estoille ardente 
Sera du ciel au plus hault evidente. 
Comme l'on void par la fureur des vents 
En l'Ocean les flots s'entresuyvans, 
Tous argentez d'ecumes blanchissantes, 
Heurter le front des rives gemissantes: 
Ou les epiz jà non plus verdoyans, 
D'un ordre egal jusqu'à terre ondoyans, 
Faire une mer de la blonde Champaigne, 
Ou de la Beauce à la large campaigne: 
Ainsi seront noz souldars par les champs 
Contre l'Angloys à la guerre marchans, 
Comme un torrent debordé, qui emmeine 
Tects, et troupeaux contreval par la pleine. 
Là des premiers le hardy Vandomoys, 
Guyse, et son fort Aumale, mile fois 
Par les scadrons feront la presse moindre, 
Pour aux plus fors des ennemis se joindre. 
Avecques eulx on pourra voir aussi 
Nostre Nestor, le grand Mommorancy, 
Un Sainct André le bien voulu du Prince, 
Et un Sedan monarque en sa province, 
Le grand HENRY sur tous apparoissant, 
Comme un sapin aux montaignes croissant 
Passe le fresne, aimant la fresche rive, 
Ou l'olivier à la perruque vive, 
Souillé du sang des souldars estrangers 
Rendra les siens aveugles aux dangers, 
Sans que son bras en vain descendre face 
L'horrible coup de sa pesante masse. 
Tu n'as sans plus, ô des tiens le rampart! 
Des plus haulx Dieux la faveur pour ta part. 
Du noir Pluton le triste domicile 
Mesmes te rend la victoire facile. 
Ja long temps a, les filles d'Acheron, 
Que maints serpens arment à l'environ, 
Qui pour cheveux en mile neuds leur pendent, 
Et noir venin leur distilent, et rendent, 
Des coeurs Angloys inspirent au dedens 
Et leurs poisons, et leurs flambeaux ardens, 
Qui font bruler par discordes civiles 
Les fors chasteaux, et les superbes viles. 
Du peuple serf l'effort seditieux 
S'est opposé au noble ambitieux. 
Mars les anime, et Discorde qui gronde 
Espend par tout sa semence feconde. 
Io Paris, il te fault recevoir 
Ton Prince heureux, lequel te vient revoir, 
Te promettant d'armes bien etophées 
L'esté prochain mile et mile trophées. 
Sus, que je joye on face nouveaux feuz, 
Qu'on rende à Dieu graces en lieu de veutz, 
Qu'on s'esjouisse, et que chacun s'appreste, 
Pour dedier de ce retour la feste. 
La froide peur, France, a couru souvent 
Parmy tes oz: donne la donq' au vent, 
Puis que tu vois la magesté sacrée 
De ton Seigneur, où ton oeil se recrée. 
O quantesfois Royne, et royale Seur, 
Vous avez craint, qu'en quelque lieu mal seur, 
Ou trop avant aux assaulx et alarmes 
Il ne tentast la fortune des armes! 
Maintenant donq', que ce mordant souci 
Voz tristes coeurs ne ronge plus ainsi, 
Laissez les veuts aux mariniers timides, 
Et d'un beau riz seichez ces yeulx humides. 
Aux nouveaux raiz du matinal soleil 
Les fleurs ainsi reprennent leur vermeil, 
Dont les beautez se montroint effacées 
Presqu'à demy par les pluyes passées. 
N'avous encor', vous celestes espriz 
De nostre court; quelque ouvraige entrepris 
Digne du nom, dont la France vous prise, 
Et de ce Roy, qui tant vous favorise? 
Les vers sucrez du luc melodieux, 
Qui rejouist les hommes et les Dieux, 
Auront le pris, si la Muse heroique 
Ne fait sonner sa trompette bellique. 
Ronsard premier osa bien attenter 
De faire Horace en France rechanter, 
Et le Thebain (ô gloire souhaitable!) 
Qu'à grand labeur il a fait imitable. 
Ainsi me fault quelque voye eprouver 
Pour Apollon, et les Muses trouver, 
Qui me feront en la terre où nous sommes 
Voler vainqueur par les bouches des hommes. 
J'ameneray le premier, si je puis, 
A mon retour au paix d'où je suis, 
Les sainctes Soeurs, qui me feront revivre 
Mieulx que la main qui anime le cuyvre. 
De marbre noir au milieu d'un beau pré 
J'edifiray un temple dyapré 
Tout au plus près, où Loyre plus profonde 
En l'Ocean fait couler sa clere onde. 
De marbre aussi les coulonnes seront, 
Qui en blancheur la neige passeront, 
Avec l'autel construict de mesme pierre 
Encourtiné de laurier et de l'hyerre. 
De ce beau lieu la superbe grandeur 
Imitera du Croissant la rondeur, 
Où seront peints de Diane honorée 
Les arcs, les traicts, et la trousse dorée. 
On ne verra par le fer demolir, 
Ny par l'orage, ou la flamme abolir 
Cet oeuvre faict de matiere si dure, 
Que la rigueur des siecles il endure. 
Là mon grand Roy sera mis au milieu 
Sur piliers d'or, qui tout au tour du lieu 
Tesmoingneront sa louange notoire: 
Et sera dict le temple de Victoire. 
Là je peindray comme il aura donté 
Calaiz, Boulongne et l'Anglois surmonté, 
Puis l'Hibernie, et tout ce qui attouche 
L'humide lict où le soleil se couche. 
Tu y seras, de Florence l'honneur, 
Royne en qui gist le comble de bon heur, 
Que la vertu digne epouze a fait estre 
Du plus grand Roy que ce siecle ait veu naistre. 
Toy Vierge aussi, miracle de ton temps, 
Qui rends le ciel, et nature contens, 
Alors qu'en toy l'un et l'autre contemple 
De son sçauoir le plus parfaict exemple. 
De voz grandeurs le prestre je seray, 
Et devant vous maint hymne chanteray, 
Duquel pourront les nations estranges 
Et noz nepveuz apprendre voz louanges. 
Ce doulx labeur la Muse me donnoit, 
Lors que Henry à Boulongne tonnoit, 
Luy faisant ja de son bras la vaillance 
Chemin au ciel par le fer de sa lance. 
  
Vers liriques 
  
I. A la Royne 
Ode I 
La louange bien sucrée 
Les oreilles nous recrée, 
Louange qui va foulant 
L'honneur de l'arene blonde, 
Qu'Herme tourne dans son onde 
Tout trouble de l'or coulant. 
La vertu est meprisée, 
Qui n'est point favorisée 
Des Graces, contre ces trois, 
Le Temps, la Mort et l'Envye, 
Desquels souvent est ravye 
La gloire mesme des Roys. 
Royne donques, ne refuse 
De l'humble, et petite Muse 
Les vers que j'ay mariez 
A ma Lyre, qui accorde 
Leurs sons divers sur sa chorde 
A ta grandeur dediez. 
Par eulx n'agueres fut dicte 
Ceste belle Marguerite, 
Qui enclose en mes ecriz, 
Ainsi que la pierre honnore 
Son anneau, elle decore 
Mes vers d'assez petit priz. 
Pourtant si tu es chantée 
Par la Muse tant vantée 
Du tien Bouju bien souvent, 
Ne dedaigne point d'entendre 
La mienne encor' jeune et tendre, 
Qui met ses ailes au vent. 
De Phebus la saincte bande 
A chacun, qui le demande, 
N'a faict liberalité 
De pouvoir ainsi aux hommes, 
Mesme en la terre où nous sommes, 
Donner immortalité. 
Sur la rive oblivieuse 
La noire tourbe envieuse 
Des corbeaux, fait devaler 
Les noms, que de l'eau profonde 
Les cygnes tirant sur l'onde, 
Font par le monde voler. 
Jadis Romme faisoit naistre 
Aux disciplines adestre 
Maint bon esprit feminin: 
Mais ton Italie encores, 
Dont la gloire tu es ores, 
A eu le ciel plus benin. 
Celle où Ferrare se mire, 
Qu'ores nostre France admire, 
Seconde entre les siens luit, 
Comme aux mariniers eclaire 
Celle Tramontane claire, 
Qui tant decore la nuit. 
Royne à nulle autre seconde, 
Le ciel t'a rendu feconde, 
Afin de perpetuer 
La race en France eternelle, 
Qu'à la vertu paternelle 
On verra s'evertuer. 
Morte est donq' la maladie, 
Qui fut bien assez hardie 
De montrer quasi la nuit 
A ce petit second Prince, 
Qui jà en nostre province, 
Comme un nouvel astre, luit. 
Sus donq', qu'on chante, qu'on bale, 
Puisque la main triste et pale 
A caché ses dards hydeux. 
Roy, en qui l'honneur se baigne, 
Et toy, sa chere compaigne, 
Resjouissez vous tous deux. 
O Dieux, combien est heureuse 
La belle etoille amoureuse 
Qui plus fort que les ormeaux 
La vigne n'estreinct, et lie, 
Vous tient, et que ne s'alie 
L'hyerre à ses prochains rameaux. 
Romme doncq', chante Lucrece, 
Et ta Penelope, ô Grece, 
Toy Pont, celle de grand coeur 
Qui suyvit par maintes terres 
Son mary parmy les guerres, 
Comme un souldard belliqueur. 
Et toy Carie honnorable 
Par ton sepulchre admirable, 
Prens de ta gloire le fruit 
En la louange qui vole 
De celle qui son Mausole 
Eterniza d'un hault bruit. 
La France dira sans cesse 
Les vertus de sa Princesse: 
Mais moy, je les vanteray, 
Et tant les feray s'estendre, 
Qu'Arne poura bien entendre 
Les vers que j'en chanteray. 
  
II. A Tresillustre Princesse Madame Marguerite seur unique du Roy 
Ode II 
La saincte horreur, que sentent 
Tous ceulx qui se presentent 
Craintifs devant les dieux, 
Rendoit ma muse lente, 
Bien qu'elle fust bruslente 
De s'offrir à voz yeulx. 
J'admiroy bien la grace 
Qui montre en vostre face 
Des cieux le plus grand soing: 
Mais si grande hautesse 
Mon humble petitesse 
Regardoit de bien loing. 
Ores, ores le temple 
Des Graces je contemple 
Desjà plus d'une fois, 
Et la coulonne seure 
Où humblement s'asseure 
Mon couraige, et ma voix. 
Là, mon ame incitée, 
Là, mon ame agitée 
D'une divine ardeur, 
Comme toute ecstatique, 
Pend ce veu poëtique 
Devant vostre grandeur. 
De Dieu la bonté haulte, 
Bien qu'il n'ait de rien faulte, 
Reçoit pourtant à gré 
Une volunté grande, 
Qui fait petite offrande 
A son autel sacré. 
Si vostre bruit, qui touche 
Le ciel, vole en la bouche 
De l'Immortalité, 
Pourtant il ne refuse 
De ma petite muse 
La liberalité. 
Chante, ma lyre, donques 
Plus hault que ne feiz onques, 
Et parmy l'univers 
Fay resonner sans cesse 
Le nom de ma Princesse, 
Seul honneur de mes vers. 
  
III. A Mellin de Sainct Gelais 
Ode III 
Mellin, que cherist, et honnore 
La court du Roy plein de bon heur: 
Mellin, que France avoue encore 
Des Muses le premier honneur: 
Mes vers, qui souloint resonner 
De Venus les ardentes larmes, 
Audacieux vouloint tonner 
De Mars les foudroiantes armes: 
Quand le Dieu qui regne en la Lyre, 
Ceinct du laurier victorieux, 
Me reprist, de vouloir elire 
Un oeuvre tant laborieux: 
Ne souille point le luc doré 
Au sang, qui coule en la campaigne, 
Où le Dieu en Thrace adoré 
Plein de pouldre et sueur se baigne: 
Qui dira d'assez bonne grace 
Les trophées de Marignan? 
Ou l'Espaignol fuyant la face 
Du jeune Prince à Carignan? 
La Parque sur noz ennemis 
Esbranlant son urne fatale, 
Et l'heur que les Dieux ont promis 
Au grand Henry, qui les egale? 
Que ceux là les batailles chantent 
Plus hault que le Grec ou Romain, 
Qui la bonne fortune sentent, 
Et l'heur de la royale main. 
Des Indes le premier vainqueur, 
Le soing, qui la jeunesse amuse, 
Et l'archer qui blesse le coeur, 
Seront les labeurs de la Muse. 
Labeur est en petite chose, 
Mais non petit honneur attent 
Celuy qui heureusement ose, 
Et Phebus invoqué l'entend. 
Si Homere, et Virgile ont pris 
L'honneur de la premiere place, 
Pourtant n'est demeuré sans pris 
Le nom de Pindare et d'Horace. 
Celuy à qui le ciel n'ottroye 
Le plus fort des Grecz ressembler, 
Qui les superbes murs de Troye 
Fist mile, et mile fois trembler, 
Desdaigner il ne doibt pourtant 
La vertu d'Ajax ancienne, 
Ou celuy qui en combatant 
Blessa Mars, et la Cyprienne. 
Comme la Saone doulce et lente 
Dedans son sein non fluctueux 
Coule beaucoup moins violente 
Que le fort Rhosne impetueux: 
Mellin, tes vers emmielez 
Qui aussi doulx que ton nom coulent, 
Au nectar des Muses meslez 
L'honneur de tous les autres foulent. 
Celuy qui n'a eu favorable 
La Muse lente à son secours, 
D'un artifice miserable 
Enfante les siens durs et lours. 
Pourquoy donques si longue nuit 
Veulx-tu sur tes labeurs estendre, 
Opprimant la voix de ton bruit, 
Qui malgré toy se fait entendre? 
Telle est la vertu qu'on palie, 
Estant à soymesmes cruel, 
Que la paresse ensevelie 
D'un silence perpetuel. 
Sus, mon luc, va toy reposer 
En la royale Marguerite, 
Que le ciel voulut composer 
Sur le protraict d'une Charite. 
  
IV. A Madame Marguerite d'escrire en sa langue 
Ode IV 
Quicunque soit, qui s'estudie 
En leur langue imiter les vieulx, 
D'une entreprise trop hardie 
Il tente la voye des cieulx, 
Croyant en des ailes de cire, 
Dont Phebus le peult déplumer, 
Et semble, à le voir, qu'il desire 
Nouveaux noms donner à la mer. 
Il y met de l'eau, ce me semble, 
Et pareil (peut estre) encor' est 
A celuy qui du bois assemble, 
Pour le porter en la forest. 
Qui suyvra la divine Muse, 
Qui tant sceut Achille extoller? 
Où est celuy qui tant s'abuse 
De cuider encores voler 
Où, par regions incongnues, 
Le cygne Thebain si souvent 
Dessoubs luy regarde les nues, 
Porté sur les ailes du vent? 
Qui aura l'haleine assez forte 
Et l'estommac, pour entonner 
Jusqu'au bout la buccine torte, 
Que le Mantuan fist sonner? 
Mais où est celuy qui se vante 
De ce Calabrois approcher, 
Duquel jadis la main sçavante 
Sceut la lyre tant bien toucher? 
Princesse, je ne veulx point suyvre 
D'une telle mer les dangers, 
Aymant mieulx entre les miens vivre 
Que mourir chez les estrangers. 
Mieulx vault que les siens on precede, 
Le nom d'Achille poursuyvant, 
Que d'estre ailleurs un Diomede, 
Voire un Thersite bien souvant. 
Quel siecle esteindra ta memoire, 
O Boccace? et quels durs hyvers 
Pouront jamais seicher la gloire, 
Petrarque, de tes lauriers verds? 
Qui verra la vostre muëtte, 
Dante, et Bembe à l'esprit hautain? 
Qui fera taire la musette 
Du pasteur Nëapolitain? 
Le Lot, le Loyr, Touvre, et Garonne, 
A vos bords vous direz le nom 
De ceulx que la docte couronne 
Eternize d'un hault renom 
Et moy (si la doulce folie 
Ne me deçoit) je te promés, 
Loyre, que ta lyre abolie, 
Si je vy, ne sera jamais. 
Marguerite peut donner celle 
Qui rendoit les enfers contens, 
Et qui bien souvent apres elle 
Tiroit les chesnes escoutans. 
  
V. A Tresillustre Prince Monseigneur Reverendiss. Cardinal de Guyse 
Ode V 
Le sentier de la vertu 
N'est un grand chemin batu, 
Où tous viateurs arrivent. 
C'est un sommet hault et droict, 
Epineux, et fort estroict: 
Aussi peu de gens le suyvent. 
Heureux, qui pour y monter 
Tout labeur peut surmonter, 
Quelque danger qu'il y voye. 
Celuy qui jadis naquit 
D'Alcmene, le ciel aquit, 
Ayant esleu cete voye. 
O Prince bien fortuné! 
Le ciel prodigue a donné 
Ce bon heur à ta jeunesse. 
Je dy ce mesme bon heur 
Dont à peine a eu l'honneur 
La plus constante vieillesse. 
Le printemps dessus les fleurs 
En mile et mile couleurs 
Peint la premiere apparence 
Des fruicts de l'esté suyvant: 
Mais les tiens sont nez avant 
Que d'en donner l'esperence. 
De leurs mains les mesmes Dieux 
Se sont peints dedans tes yeulx, 
Et en ton esprit encore: 
Ton grand Roy le congnoist bien, 
Et sa France voit combien 
Il te cherist, et honnore. 
Et qui n'y est invité 
Par ta doulce gravité? 
A qui n'est desja congneue, 
A voir tes gestes duisans, 
Mesme en ces tant jeunes ans 
Ceste vertu tant chenue? 
Quel ennemy du François, 
Quelle ville, mais ainçois 
Quelle mer ou quelle terre 
N'a congneu jusques ici 
Ton pere et freres aussi, 
Ces trois foudres de la guerre? 
Qui n'oit encores le nom, 
Qui fait bruire le renom 
Du grand Prelat de Loraine? 
Dont le tige antiq' et beau 
Est planté sur le tombeau 
De la fameuse Sereine. 
Le mont, qui fut envoyé 
Dessus le doz foudroyé, 
N'esclaire d'un plus grand lustre 
Que ton sang dessus les lieux 
Où tes couronnez ayeux 
Ont haussé le chef illustre. 
  
VI. A Monseigneur Reverendiss. Cardinal de Chastillon 
Ode VI 
Quelle grande vertu 
Maintenant ose-tu 
Celebrer, ô ma Muse? 
Cet oeuvre humain n'est pas, 
Et ton pouvoir trop bas 
Si grand'charge refuse. 
Le luc melodieux 
A bien chanté les Dieux, 
Et leurs enfans encore 
Chanton' les donq' aussi, 
Et entre eux cestuy ci, 
Qui Chastillon decore. 
Je sens desjà combien 
Mes vers luy plaisent bien: 
Je scay qu'il favorise 
Cet honneste labeur, 
Que retardoit la peur 
De ma jeune entreprise. 
Que diray-je premier 
De luy, tant coustumier 
D'aymer ceux qui escrivent 
Les vers laborieux, 
Par qui victorieux 
Les noms au ciel arivent? 
Heureux qui sçait gouster 
Ce qui le peut ouster 
Des mains de la mort blesme. 
Vrayment il ne mourra, 
Mais vivant se pourra 
Tirer du tumbeau mesme. 
Maint Prince, dont le nom 
Se taist, a eu renom 
Devant Charles en guerre. 
D'un seul Roland si fort, 
D'un seul Regnaud l'effort 
N'a fait trembler la terre. 
Maints vivans ont eu bruit, 
D'ont or' la longue nuit 
Ensevelist la gloire: 
Pour ce qu'ils n'ont point eu, 
Qui leur morte vertu 
Feist vivre en la memoire 
Mais je vouë, et promés 
De n'endurer jamais 
Que l'oubly sacrilege 
Morde sur mon grand Roy, 
Sur ton oncle, et sur toy, 
L'honneur du sainct College. 
Jadis le grand Atlas, 
Quand son dos estoit las 
Soubs le faiz tant moleste, 
Se tenoit bien plus seur, 
Ayant un successeur 
A sa charge celeste. 
Hercule sceut combien 
Le secoururent bien 
Les flammes punissantes, 
O d'Egée le filz! 
Quand steriles tu feiz 
Les testes renaissantes. 
Et ta nef bien souvent 
Fut maistresse du vent, 
Ayant Typhis pour guide: 
Quand tu alois, Jason, 
Voir la riche toison 
En la terre Colchide. 
O grand Mommoranci, 
Tu seras donq' ainsi 
A ce Roy nostre Prince 
Le plus grand des Chrestiens, 
Qui dessoubs luy soustiens 
Le faiz de sa province 
Angloys, reprenez coeur 
Contre Henry vainqueur, 
Boulongne estant reprise: 
Osez encor' armer 
Et la terre, et la mer: 
Vaine est vostre entreprise. 
Prelat, les fors Jumaux 
Dessus les grandes eaux 
Leurs estoiles font luire: 
Tes deux freres vaillans 
Pour France bataillans 
Leurs noms y feront bruyre. 
  
VII. L'avantretour en France de Monseigneur Reverendiss. Cardinal du Bellay 
Ode VII 
Tu viendras donq' finablement, 
Heureux Prelat, et à ta suite 
Retourneront semblablement 
L'esprit, la vertu, la conduite, 
Qui te suyvent ou que tu voises, 
Veillant aux affaires Françoises. 
Les Dieux, et les astres aussi 
Favoriserent bien la France, 
Qui en toy feirent naistre ainsi 
La mesme mort de l'ignorance. 
Le ciel, qui ton esprit admire, 
Dedans son ouvraige se mire. 
Où est le lieu, qui n'a congneu 
Ce grand Langé inimitable? 
Dont le renom est parvenu 
Aux fins de la terre habitable. 
Qui est celuy nostre aversaire; 
Qui n'a veu ce qu'il sçavoit faire? 
Caesar a senty mile fois 
Que pouvoit la sage entreprise, 
La vertu, la plume, la voix, 
Qu'encores tout le monde prise, 
De celuy qui n'a, ce me semble, 
Laissé que toy qui luy ressemble. 
Le ciel cruel, à qui sembla 
France par vous deux trop puissante 
Las, par mort vous desassembla, 
Dont mon ame en est gemissante: 
Saichant bien qu'elle telle perte 
Jamais ne sera recouverte. 
Ce grand Roy gueres n'admiroit 
Celuy dont Troye se lamente, 
Qui dix Nestors se desiroit, 
Non une force vehemente. 
Le miel, qui les oreilles touche, 
A Nestor couloit de la bouche. 
Le saige Grec, dont le parler 
Sembloit aux neiges hyvernales, 
Que le printemps fait devaler 
Par les montaignes inegales, 
Congneut par cent mile traverses 
Et hommes, et citez diverses. 
Sa chaste epouze ce pendant 
De poursuyvans sollicitée 
Fut bien vingt hyvers attendant 
L'heure heureuse tant souhaitée, 
Qui apres la rendit contente 
Par le fruit de sa longue attente. 
La France, qui bien aperçoit 
Combien vault un esprit si saige, 
Après longs travaulx te reçoit 
Avecques un joyeux visaige: 
Si fait ton Roy, bien heureux Prince, 
D'avoir tel homme en sa province. 
Haste toy donq, et n'atten pas 
Que la grand' epaule chenue 
Des Alpes deçoive tes pas. 
Paris, joyeux de ta venue, 
Jà de loing venir te regarde: 
Mon Dieu, que l'arriver me tarde! 
Io ma lyre, io je veulx 
Qu'un tel jour me soit tousjours feste, 
Pour payer tous les ans mes veutz. 
Sus donq', qu'un autel on m'appreste 
D'hierre à la racine velue, 
Et de vervene chevelue 
Celuy Macrin, que tu cognois, 
Aux Latins sacra ta memoire: 
Et moy, après ce Loudunoys, 
Aux Françoys je chante ta gloire. 
Tant j'ay desir de voir en France 
Les Muses faire demourance. 
Le Lesbien ses vers sonnoit 
Parmy les armes non timide, 
Ou quand à sa nef il donnoit 
Repos sur le rivaige humide 
Prelat, te plaise temps elire 
Pour mes vers ecouter ou lire. 
Des vents encores soutenu, 
Sortant du maternel boccaige 
L'oyseau par sentier incongnu 
Tente le premier navigaige 
Des ailes, que sa mere guyde, 
L'asseurant parmy l'air liquide. 
Moy jeune, et encores peu fier, 
Laissant la maison paternelle, 
Au ciel je m'oseray fier 
Dessoubs la faveur de ton aile: 
Aile dont la plume dorée 
De tout le monde est adorée. 
O la grand' ardeur que j'avoys 
D'appaiser ma soif en cete onde, 
Qui veit à son bord quelquefois 
Les dépouilles de tout le monde! 
Et la grand' cité, qui encore 
Ainsi qu'un demy-dieu t'adore. 
Je bruloy' tous les jours après, 
Alors que les fievres cruelles 
Mes oz vont ronger de si près, 
Qu'ilz n'ont quasi plus de mouëlles. 
Jà-desjà me montroit la Parque 
De Charon la fatale barque. 
Mais les Dieux n'ont voulu chasser 
De moy cet heur tant souhaitable 
Que d'estre tien, feust pour passer 
Le froid Caucase inhospitable, 
Ou parmy les ondes avares 
Le destroit des Syrtes barbares. 
  
VIII. Contre les Avaritieux 
Ode VIII 
Toy, de qui la richesse excede 
Celle que l'Afrique possede, 
Et les grands thesors non touchez 
Qui sont en la terre cachez, 
Combien que desjà soint comprises 
En ce Palaiz, que tant tu prises, 
Plus de deux pars de la Cité, 
Si la dure necessité, 
Qui à toutes les loix renonce, 
Ses cloux de dyamant enfonce 
Dessus toy jusqu'au dernier point, 
Ton serf esprit ne sera point 
De peur delivre, ny ta teste 
Des liens que la mort t'appreste. 
Le Scyte a plus grande raison 
Qui sa vagabunde maison 
Par tout ou bon luy semble, meine: 
Et les Getes durs à la peine 
Nature a trop myeux contentez, 
Qui ont leurs champs non arpentez, 
Et ou la culture annuelle 
A chacun n'est perpetuelle. 
Venus et la forte liqueur 
Qui arrache le soing du cueur, 
Les viandes elabourées. 
Avec sauces bien savourées, 
Le son du luc, et sur les eaux 
Le doulx ramaige des oyseaux 
N'ostent de l'or la faim sacrée 
Au cueur ambicieux ancrée, 
Qui jamais ne sent en son oeil. 
Couler l'emmiëllé sommeil. 
Le doulx sommeil plus tost habite 
La maisonnette humble et petite 
Du berger ou du laboureur, 
Que le Palaiz d'un Empereur 
La mer, qui est tempetueuse 
Par la descente impetueuse 
De l'Arcture, ou par le lever 
Du Bouq, ne sceurent onq' grever 
Celuy qui d'assez se contente. 
La gresle, qui deçoit l'attente 
Du vigneron, le champ trompeur, 
L'arbre sans fruict, ne luy font peur: 
Soit que la terre soit bruslée 
Du chault, ou par l'hyver gelée, 
Pourquoy en auroit il ennuy, 
Puis qu'immortelz ainsi que luy 
Sont les biens, où son cueur il fiche? 
O l'homme heureux! ô l'homme riche! 
Si les honneurs ambicieux, 
Les Palaiz elevez aux cieux, 
Le doulx nectar et l'ambrosie 
Ne contentent la fantaisie 
De celuy qui nourist le soing 
D'un coeur à soymesmes tesmoing, 
Pourquoy hausseray-je les voiles 
Dessoubz la faveur des etoiles? 
Par mile et par mile dangers 
Suyvant les thesors etrangers, 
Et la pauvreté renaissante 
Avec la richesse croissante. 
Vole donq', avare marchant, 
Des Indes au soleil couchant, 
Et du Septentrion encore 
Jusq'au bord de la terre More 
Cerne le tour continuel, 
Si tu veux, de l'astre annuel 
Avecques un labeur extreme, 
Et te fuy, si tu peux, toymesme: 
Pourtant si ne fuiras-tu pas 
Le soing, qui te suit pas à pas, 
Et la crainte, qui tourne et vire 
Le gouvernail de ta navire 
Moy, que la Muse veult aimer, 
Par les vents je feray semer, 
Tout le soucy qui me fait guerre 
Dessus l'ennemie Angleterre, 
Où regne l'horrible fureur 
D'Erynnis avec' la terreur 
Des armes, et de l'entreprise 
De Henry, que Mars favorise. 
  
IX. A Bouju. Les conditions du vray poëte 
Ode IX 
Bouju, celuy que la Muse 
D'un bon oeil a veu naissant, 
De l'espoir, qui nous abuse 
Son coeur ne va repaissant. 
La faveur ambitieuse 
Des grands, voluntiers ne suit, 
Ny la voix contencieuse 
Du Palaiz, qui tousjours bruyt. 
Sa vertu n'est incitée 
Aux biens que nous admirons, 
Et la mer sollicitée 
N'est point de ses avirons. 
La vieille au visaige blesme 
Jamais grever ne le peult, 
Qui se tormente elle mesme, 
Quand tormenter elle veult. 
Son etoile veult qu'il vive 
Tousjours de l'amour amy, 
Mais la volupté oysive 
Ne l'a oncques endormy. 
Il fuit voluntiers la vile, 
Il hait en toute saison 
La faulse tourbe civile 
Ennemye de raison. 
Les superbes Collisées, 
Les Palaiz ambicieux, 
Et les maisons tant prisées 
Ne retiennent point ses yeux. 
Mais bien les fontaines vives 
Meres des petits ruisseaux 
Au tour de leus verdes rives 
Encourtinez d'arbrisseaux, 
Dont la frescheur, qui contente, 
Les beufz venans du labeur, 
De la Canicule ardente 
Ne sentit onques la peur. 
Il tarde le cours des ondes, 
Il donne oreilles aux boys, 
Et les cavernes profundes 
Fait rechanter soubs sa voix. 
Voix, qui ne feront point taire 
Les siecles s'entresuivans: 
Voix, qui les hommes peult faire, 
A eulx mesmes survivans. 
Ainsi ton bruyt qui s'ecarte, 
Bouju, tu feras parler, 
Ainsi ta petite Sarte 
Au mesme Pau s'esgaler. 
O que ma Muse a d'envye 
D'ouyr (te suyvant de près) 
La tienne des boys suyvie 
Commander à ces forestz! 
En leur apprenant sans cesse, 
Et à ces rochers ici, 
Le nom de nostre Princesse, 
Pendant que ma lyre aussi 
Cete belle Marguerite 
Sacre à la posterité, 
Et la vertu, qui merite 
Plus d'une immortalité. 
O l'ornement delectable 
De Phebus! ô le plaisir, 
Que Jupiter à la table 
Sur tous a voulu choysir! 
Luc, qui eteins la memoire 
De mes ennuitz, si ces doigtz 
Ont rencontré quelque gloire, 
Tienne estimer tu la doibz. 
Où me guidez vous, Pucelles, 
Race du Pere des Dieux? 
Où me guidez vous, les belles, 
Et vous Nymphes aux beaux yeux? 
Fuyez l'ennemy rivaige, 
Gaignez le voisin rocher: 
Je voy de ce boys sauvaige 
Les Satyres approcher. 
  
X. De l'innocence et de n'attenter contre la magesté divine 
Ode X 
Qui vers le ciel les mains renversera, 
L'oeil, et le coeur, et la doulce faconde, 
Des bienheureux le plus heureux sera, 
Et la fureur de l'air ne blessera 
Ses blez joyeux, ny sa vigne feconde. 
Il ne craindra le bras du fier Angloys, 
Qui sa vertu porte enclose en sa trousse. 
Besoing n'aura du fidele carquoys 
Plein de ces traicts, que souvent l'arc turquoys 
Envenimez contre l'ennemy pousse. 
D'un mur d'airain son coeur environné 
La froide peur ne peindra dans sa face, 
Soit que le Pere ait en fureur tonné, 
Ou que le vent soubs la terre entonné 
Les fondements du monde trembler face. 
Celuy qui a engravé bien avant 
Dedans son coeur la coulpe vengeresse, 
Son peché palle il voit courir devant 
Les pieds aislez de la peine suyvant, 
Qui jà-desjà les deux talons luy presse. 
Il sent encor' les furieux serpens, 
Avec' l'oiseau qui te ronge et moleste, 
Toy, dont le corps couvre bien neuf arpens: 
Et toy aussi, qui en vain te repens 
Du larecin de la flamme celeste. 
Ce fut au temps que ce languissant corps 
Sentit premier les fievres tant cruelles. 
Mile malheurs, mile sortes de morts 
Le ciel vengeur feist descendre, et alors 
La mort boyteuse à ses piedz mist des aisles. 
Que n'ont osé les hommes attenter 
Contre les Dieux? cet audacieux feuvre 
De l'air jadis le vyde osa tenter: 
Mais bien l'enfer ne se peult exempter, 
Que son obscur mesmes on ne descoeuvre. 
Celuy vrayment contre Dieu s'esleva, 
Qui feist premier le tonnerre imitable: 
Ce feut celuy qui le canon trouva, 
Et Salmonée encores eprouva 
De Juppiter la foudre veritable. 
A son dommaige Orion quelquefois 
Tenta la Vierge aux forests tant congnue, 
Troys cens liens enchainent Pirithoys, 
En mesme erreur, Ixion, tu estoys, 
Quand tu aimas la tromperesse nue. 
Et qui ne sçait comment le Roy des Dieux, 
Dont le sourcil fait trembler ciel et terre, 
Brisa jadis l'escadron furieux, 
Qui pour monter au ciel victorieux 
Osa dresser la sacrilege guerre? 
  
XI. Au Seigneur du Boysdaulphin Maistre d'hostel du Roy 
Ode XI 
Les Roys sont enfans des Dieux, 
Les Dieux les Roys favorizent, 
Et bien sont vouluz des cieux, 
Qui les honnorent et prisent. 
Ceux qui les Roys ont la grace, 
N'ont pas un petit bonheur, 
Et qui honnore leur face, 
Aux Roys mesmes fait honneur. 
Ton Prince, qui bien entend 
La grandeur de ton merite, 
Sur toy sa faveur estend, 
Faveur qui n'est pas petite. 
Mais qui bien te congnoist ores, 
Et n'est aussi congnoissant 
L'esprit, qui est plus encores 
Que son corps, apparoissant? 
Ma lyre, qui sceut chanter 
N'agueres des Roys la gloire, 
S'ose encores bien vanter 
D'eternizer ta memoire. 
La nature me feist naistre. 
De ton sang non gueres loing, 
Et ta vertu me fait estre 
De tes honneurs le tesmoing. 
Celuy qu'amour de soy poingt, 
Sa figure ait contrefaicte: 
Le tableau ne parle point, 
Et la statue est muette. 
Les vers jamais ne se taisent: 
De vers pauvre je ne suis. 
Les vers (Boysdaulphin) te plaisent: 
Des vers donner je te puis. 
  
XII. A Carles 
Ode XII 
Laisse de celuy les dangers, 
Qui veit maintz peuples estrangers, 
Apres avoir donné en proye 
Les murs de la fatale Troye. 
Il fault plus grand oeuvre mouvoir, 
Et tu en as bien le pouvoir, 
Carles, dont la Muse prisée 
Est du Roy tant favorisée. 
Là donc' fay ta plume voler 
Pour France, et son Prince extoler: 
Et avec une voix hardie 
Sonne l'Angloyse tragedie. 
Tu pouras bien tout à loisir 
Le vent, et la saison choisir, 
Pour ramener au port d'Itaque 
Le pere au saige Telemaque. 
Le grand vainqueur de l'univers 
Dist le Grec gisant à l'envers 
Bien heureux, dont sa gloire insigne 
Trouva d'Homere la buccine. 
O Prince heureux, où que tu soys, 
Ton siecle, et ton peuple Françoys, 
Et heureux tous ceulx dont tu parles, 
O la docte Muse de Carles! 
Qui eust congneu les longs erreurs, 
Et les belliqueuses terreurs, 
Ou la vertu presqu' incroyable 
De ce grand Troyen pitoyable: 
Qui eust sceu de Mars les enfans, 
Leurs lauriers, leurs chars triumphans, 
Si ores l'envieux silence 
A leurs noms faisoit violence? 
Les sepulchres laborieux, 
Collosses, arcz victorieux, 
Et les batailles engravées 
Sur les columnes elevées: 
La main du peintre, et la faveur 
De l'ingenieux engraveur, 
Le tableau, le marbre et le cuyvre, 
Qui font les hommes deux fois vivre, 
Ne sçauroint si bien exprimer 
Ce qui Henry fait estimer 
Comme le sonnent en leur onde 
Les flots de la docte Gyronde. 
J'oy la buccine à cete fois, 
Avec l'épovantable voix 
Du canon, qui l'oreille étonne, 
Et le hault phyfre qui resonne. 
Ja le harnois resplendissant 
Fait peur au cheval hanissant, 
Et aux yeulx du souldard timide, 
Qui fait de sang la terre humide. 
Je voy les vainqueurs chevaliers 
Ardents au milieu des miliers, 
Souillez des pieds jusqu'à la teste 
D'une pouldre non deshonneste. 
Quel champ par la main de Valoys 
N'est engressé du sang Angloys? 
Qui n'oit le bruit que fait la terre 
Soubs la ruine d'Angleterre? 
Quel destroict, quel havre, et rocher 
Ne voit les nefz s'entreacrocher? 
Sur l'onde le flotant bagaige, 
Et le feu qui la mer sacaige? 
Mais affin, luc trop couraigeux, 
Que tu ne delaisses tes jeux, 
Cesse ton chant, ou bien accorde 
Un plus doulx son dessus ta chorde. 
  
XIII. A Heroet 
Ode XIII 
Les Thraces chantent leur Orphée, 
La Grece encores se debat 
De cil qui du Troyen combat 
Dressa le superbe trophée. 
Thebes encor' est glorieuse 
Du luc sur tous les mieulx appris, 
Qui donne en Olympe le pris 
De la palme victorieuse. 
Paris, mais bien la France toute, 
De Seine oit tous les jours le son, 
Qui fait de toy mainte chanson 
Que nostre siecle heureux ecoute. 
Heroët aux vers heroïques, 
(Suject vrayment digne du ciel) 
Qui en doulceur passent le miel, 
En gravité les fronts Stoïques: 
Ta Muse, des Graces amye, 
La mienne à te louer semond, 
Qui sur le hault du double mont 
As erigé l'Academie. 
Si l'on doibt croire à Pythagore, 
Qui les corps fait reanimer, 
On peut, Heroet, estimer 
En toy celuy revivre encore, 
A qui jadis dedans la bouche 
Les abeilles aloint formant 
Le miel, lors qu'il estoit dormant 
Encor' enfant dedans sa couche. 
Tu as rompu l'arc, et la trousse 
Du jeune archer malicieux 
Qui blessoit la terre et les cieulx, 
Luy baillant nature plus doulce. 
Venus, qui n'a plus de puissance, 
En vain par tout cerche son filz, 
Que n'agueres voler tu feis 
D'icy au lieu de sa naissance. 
Sus, Muses, que l'on environne 
Le front sçavant de cetui-ci, 
Qui a bien merité aussi 
De voz mains recevoir couronne. 
Voz mains donques la luy composent 
Non du victorieux laurier, 
Mais du pacifique olivier, 
Dessoubs qui les loix se reposent. 
  
XIV. A Mercure et à sa lyre pour adoucir la cruauté de sa dame 
Ode XIV 
Neveu d'Atlas, qui donnas le pouvoir 
Au vieil Thebain des pierres esmouvoir, 
Et toy encor', ô coquille dorée, 
Des plus grands Roys au vieux siecle adoree, 
Montre moy les accords 
Des accordans discords, 
D'ont ma doulce ennemye 
Se puisse emerveiller, 
Et face reveiller 
Son oreille endormie. 
Ell' fuit ainsi que la jeune jument, 
Qui va l'ardeur des chevaulx allumant 
Deçà delà, jouant par les campaignes 
Ou sur le doz des prochaines montaignes. 
Des noces de doulx point 
Encores ne la poingt 
(La sauvage et farouche) 
Mais d'un pié non oisif 
Fuit le mary lascif, 
De peur qu'il ne la touche. 
Tu peux mener les compaignes forestz: 
Tygres, lyons te vont suyvant de près: 
Et soubs ton chant les rivières bruyantes 
Haussent la bride à leurs ondes fuyantes. 
Le portier aboyant 
Tes chansons feut oyant, 
Bien que sa teste porte 
Serpens pleins de laideur, 
Et que puante odeur 
De ses trois gueulles sorte. 
Le grand Tytie à l'oeil fier et hydeux 
Et Ixion rirent en depit d'eulx. 
La rouë aussi, qui jamais ne s'arreste, 
Avec la pierre à t'escouter feut preste. 
La doulceur de ta voix 
Arresta quelquefois 
Le Bussart tousjours vyde, 
Ce pendant que chantant 
Tu alois esbatant 
La race Danaïde. 
Ecoute donq' de ces vierges ici 
La cruauté, et les tourments aussi, 
Celle qui m'est en plus cruelle peine 
Qu'à leur maris cete gent inhumaine: 
Dont l'une seulement, 
Qui mentit noblement 
A son pere infidele, 
Valoit bien que le fruit 
De nuptiale nuit 
Ne feust eloingné d'elle. 
Sus, leve-toy (tous bas dist elle adonc' 
Au jeune epoux) que ton sommeil trop long 
Tout maintenant par la tourbe cruelle 
Ne soit mué en nuit perpetuelle. 
Desjà toutes ont mis 
Leurs espoux endormis 
A mort (les inhumaines): 
La lyonne courant' 
Ainsi va devorant 
Les veaux parmy les plaines. 
Moy, que pitié et l'amour de toy poingt, 
O mon amy! je ne t'occiray point. 
Haste toy donq', ta vie (helas) je n'ose 
Tenir ici plus longuement enclose. 
Soint de pesans liens 
Chargez les membres miens, 
Ou face que j'endure 
Exil perpetuel 
Le mien pere cruel, 
Pour n'avoir esté dure. 
Fuy de rechef, où le vent te conduit, 
Fuy ce pendant que Venus et la nuit 
Donnent faveur à ta course hastive. 
Je demouray en ta place captive. 
Sur mon sepulchre au moins 
Grave ces pleurs tesmoings 
De mon amour extreme: 
Tesmoings dor'enavant 
Que je t'ay fait vivant 
Par la mort de moymesme. 
  
XV. La louange du feu Roy François et du Treschrestien Roy Henry 
Ode XV 
Combien tu doibs, France, à ceulx de Valoys, 
Tesmoings en sont les armes et les loix, 
Qui ont fleury soubs Françoys, ainsi comme 
Jadis en Grece, et soubs Auguste à Romme. 
C'est luy qui a de ce beau siecle ici, 
Comme un soleil, tout obscur eclairci, 
Ostant aux yeux des bons espriz de France 
Le noir bandeau de l'aveugle ignorance. 
C'est luy premier qui du double coupeau 
A ramené des Muses le troupeau, 
Pour consacrer à leur mere la gloire 
Du Lot, du Loyr, de la Touvre et de Loyre. 
Si n'a-il point un plus grand oeuvre faict, 
Que de laisser un enfant si parfaict 
Comme ce Roy, qui rendra eternelle 
Par sa vertu la vertu paternelle. 
Comme l'oyzeau de prodige annonceur, 
Du blond Troyen fidele ravisseur, 
A qui des Dieux le souverain otroye 
Les vagabonds volatiles en proye, 
Des plus doulx vents au printemps soutenu, 
Vole hardy parmy l'air incongnu 
Si tost que l'aage, et vigueur paternelle 
Dehors le nyd ont esbranlé son aile, 
Suit les oyzeaux, puis faict plus couraigeux, 
Ose assaillir les serpents outraigeux: 
Tel fut senty et tel sera encore 
Ce nouveau Roy, que nostre siecle adore. 
La bische ainsi, ou le jeune cheval 
Ont veu de loing descendre contreval 
Le lyonceau hardy, qui les devore 
Avec' ses dents innocentes encore. 
Qui tost après ose en fureur saillir, 
Pour les taureaux indomtez assaillir, 
Et appaiser par le sang qu'il en tire, 
Sa longue faim, et l'ardeur de son ire. 
Jadis, Angloys, jadis preuve tu feis 
Que c'est d'avoir de François esté filz, 
Et combien vault la bonne discipline 
Au naturel qui à vertu s'incline. 
Maintenant donq' eprouver tu peuz bien, 
Par la grandeur de tes pertes, combien 
D'un si grand Roy peult la saige entreprise, 
Et la vertu que le ciel favorise. 
  
XVI. A Madame la Contesse de Tonnerre 
Ode XVI 
Haulte vrayment dire j'ose 
Trois et quatre fois la chose, 
Où les feminins espris 
N'ont peu quelquefois attaindre. 
Bien doit donq la cheute craindre, 
Qui a tel oeuvre entrepris. 
Dieu leur a donné des ailes, 
Qui sont bien assez isnelles 
Pour voler jusques aux cieux. 
Quelle grandeur de couraiges! 
De leurs belliqueux ouvraiges 
Tesmoings feurent noz ayeux. 
Le bruit jusqu'ici resonne 
De celle brave Amazone, 
Qui par l'espez des miliers, 
A Mars se donnant en proye, 
Fist rougir les champs de Troye 
Au sang des Grecz chevaliers. 
Des ans vivront mil' et mile 
L'Assirienne, et Camille. 
Quel marbre, quel dyamant 
Est plus dur que la memoire, 
Qui garde encores la gloire 
De Marphize et Bradamant? 
Thebes encore se vante 
De sa Corinne scavante. 
Sur toy, Pindare, mordoit 
La doulce lyre ancienne, 
Que la fille Lesbienne 
Si doctement accordoit. 
Celle qui fist plus feconde 
De ses enfans la faconde, 
Romme, en memoire tu l'as. 
Mainte autre n'est plus prisée, 
Qui se veit favorisée 
De l'une et l'autre Pallas. 
O plumes trop envieuses, 
Qui es eaux oblivieuses 
Laissez noyer le renom 
De tant de celestes dames, 
D'ont ores les tristes lames 
Couvrent le corps et le nom! 
Combien sont mieulx fortunées, 
Qui en cet age sont nées, 
Où maint gentil ecrivant 
A bien osé entreprendre 
Par ses doctes vers de rendre 
Leur hault honneur survyvant? 
La vertu est trop severe, 
Qui la Muse ne revere. 
La Muse aime le vertu. 
Tu ne verras donq', Contesse, 
Devaler de sa hautesse 
Ton loz par mort abatu. 
Qui publira les louanges 
Des nostres ou des estranges, 
Et de toy ne chantera 
L'esprit, la doulceur, la grace, 
Dont la genereuse race 
De Clairmont se vantera? 
C'est pourquoy mes vers aspirent 
Où tes louanges les tirent: 
Bien que ton sçavoir soit tel, 
(Si tu le veulx entreprendre) 
Que ton renom se peut rendre 
Par toymesmes immortel. 
  
XVII. Dialogue d'un amoureux et d'écho 
Piteuse Echo, qui erres en ces bois, 
Repons au son de ma dolente voix. 
D'où ay-je peu ce grand mal concevoir. 
Qui m'oste ainsi de raison le devoir? De voir. 
Qui est l'autheur de ces maulx avenuz? Venus. 
Comment en sont tous mes sens devenuz? Nuds. 
Qu'estois-je avant qu'entrer en ce passaige? Saige. 
Et maintenant que sens-je en mon couraige? Raige. 
Qu'est-ce qu'aimer, et s'en plaindre souvent? Vent. 
Que suis je donq', lors que mon coeur en fend? Enfant. 
Qui est la fin de prison si obscure? Cure. 
Dy moy, quelle est celle pour qui j'endure? Dure. 
Sent-elle bien la douleur, qui me poingt? Point. 
O que cela me vient bien mal à point! 
Me fault il donq' (o debile entreprise) 
Lascher ma proye, avant que l'avoir prise? 
Si vault-il mieulx avoir coeur moins haultain, 
Qu'ainsi languir soubs espoir incertain. 
  
XVIII. A une dame 
J'ay oublié l'art de petrarquizer. 
Je veulx d'amour franchement deviser 
Sans vous flater, et sans me deguiser. 
Ceulx qui font tant de plaintes 
N'ont pas le quart d'une vraye amytié, 
Et n'ont pas tant de peine la moitié, 
Comme leurs yeulx, pour vous faire pitié, 
Getent de larmes feintes. 
Ce n'est que feu de leurs froides chaleurs, 
Ce n'est qu'horreur de leurs feinctes douleurs, 
Ce n'est encor' de leurs souspirs et pleurs 
Que vents, pluye, et oraiges. 
Et bref, ce n'est, à ouyr leurs chansons, 
De leurs amours, que flammes et glaçons, 
Flesches, lyens, et mile autres façons 
De semblables oultraiges. 
De voz beautez, ce n'est que tout fin or, 
Perles, crystal, marbre, et ivoyre encor', 
Et tout l'honneur de l'Indique thresor, 
Fleurs, lys, oeilletz, et roses. 
De voz doulceurs, ce n'est que sucre et miel, 
De voz rigueurs n'est qu'aloës, et fiel, 
De voz espris, c'est tout ce que le ciel 
Tient de graces encloses. 
Puis tout soudain ilz vous font mile tors, 
Disans, que voir voz blonds cheveux retors, 
Vos yeux archers, autheurs de mile mors, 
Et la forme excellente 
De ce que peult l'accoustrement couver, 
Dyane en l'onde il vauldroit mieulx trouver, 
Ou voir Meduse, ou au cours s'esprouver 
Avecques Athalante. 
Tout l'orient, avec' toutes les fleurs 
Dont le printemps bigarre ses couleurs, 
Ne fourniroient à peindre voz valeurs, 
Ny le cor d'Amalthée 
De leur largesse, ici je n'en dy rien: 
Aussi l'amour, qui est souverain bien, 
Par les presens d'un avoir terrien 
Ne peult estre achetée. 
S'il fault parler de vostre jour natal, 
Vostre ascendant heureusement fatal 
De vostre chef escarta tout le mal 
Qui aux humains peult nuyre. 
Quant au trespas, sçavons quand ce sera 
Que vostre esprit le monde laissera? 
Ce sera lors que là hault on voirra 
Un nouvel Astre luyre. 
Ce n'est assez à leur subtil parler 
Ou ma maitresse, ou madame appeller, 
Cela est trop voz beautez r'avaler, 
Pour oindre voz oreilles. 
Ce mot, Deesse, est beaucoup mieulx duysant, 
Mais je ne puis, tant je suis mal plaisant, 
User ainsi en me contrefaisant 
De ces faulses merveilles. 
Si pour sembler autre que je ne suis, 
Je me plaisois à masquer mes ennuis. 
J'irois au fond des eternelles nuictz 
Plein d'horreur inhumaine. 
Là d'un Sysiphe, et là d'un Ixion 
J'esprouverois toute l'affliction, 
Et de celui qui pour pugnition 
Rid, et meurt à sa peine. 
De voz beautez, sçavons que j'en dirois? 
De voz deux yeulx deux astres je ferois, 
Voz blonds cheveulx en or je changerois, 
Et voz mains en yvoire. 
Quand est du teinct, je le peindrois trop mieulx 
Que le matin ne colore les cieulx: 
Bref, vous seriez belle comme les Dieux, 
Si vous me vouliez croire. 
Mais cet enfer de vaines passions, 
Ce paradis de belles fictions, 
Deguisement de noz affections, 
Ce sont peinctures vaines, 
Qui donnent plus de plaisir aux lisans 
Que voz beautez à tous voz courtisans, 
Et qu'au plus fol de tous ces biendisans 
Vous ne donnez de peines. 
Il n'y a roc qui n'entende leur vois, 
Leurs piteux, cris ont faict cent mile fois 
Pleurer les monts, les plaines et les bois, 
Les antres, et fontaines. 
Bref, il n'y a ny solitaires lieux, 
Ny lieux hantez, voire mesmes les cieux, 
Qui çà et là ne monstrent à leurs yeux 
L'image de leurs peines. 
Cestuy là porte en son coeur fluctueux 
De l'ocean les flotz tumultueux, 
Cestuy l'horreur des ventz impetueux 
Sortans de leur caverne. 
L'un d'un Caucase et Montgibel se plaingt, 
L'autre en veillant plus de songes se peinct, 
Qu'il n'en feut onq' en cet orme qu'on feinct 
En la fosse d'Averne. 
Ores luy semble estre arbre devenu, 
Ores un mont de nege tout chenu, 
Ores l'oyzeau en Meandre congneu, 
Ore' il se faict accroire 
Sentir ses nerfz tiedement languissans, 
Entre voz bras les siens entrelaçans, 
Mais tout cela sont des songes passans 
Par la porte d'ivoyre. 
L'un contrefait ce Tantale mourant 
De soif, qu'il a au milieu d'un torrent, 
L'autre qui paist un aigle devorant 
S'accoustre en Promethée, 
Mais cestui là, par un plus chaste voeu, 
En se bruslant veult Hercule estre veu, 
L'autre se mue en eau, air, terre, et feu, 
Comme un second Prothée. 
L'un meurt de froid, et l'autre meurt de chault, 
L'un vole bas, et l'autre vole hault, 
L'un est chetif, l'autre a ce qu'il luy fault, 
L'un sur l'esprit se fonde, 
L'autre s'arreste à la beauté du corps: 
On ne veid onq' si terribles discords 
En ce Caos, qui troubloit les accords 
Dont fut basty le monde. 
Quelque autre après, ayant subtilement 
Trouvé l'accord de chascun element, 
Façonne un rond tendant egalement 
Au centre de son ame. 
Son firmament est peint sur un beau front, 
Tous ses espriz sont balancez en rond, 
Son pol artiq', et antartiq', ce sont 
Les beaux yeux de sa dame. 
Quelqu'autre encor' la terre dedaignant 
Va du tiers ciel les secretz enseignant, 
Et de l'amour où il se va baignant, 
Tire une quinte essence: 
Mais quant à moy, qui plus terrestre suis, 
Et n'aime rien, que ce qu'aimer je puis, 
Le plus subtil, qu'en amour je poursuis, 
S'appelle jouyssance. 
Cestui voulant plus simplement aimer 
Veult un Properce et Ovide exprimer, 
Et vouldroit bien encor' se transformer 
En l'esprit d'un Tibulle. 
Mais cestui là, comme un Petrarque ardent, 
Va son amour et son style fardant. 
Cet autre encor'va le sien mignardant 
Comme un autre Catulle. 
Je ne veulx point scavoir si l'amitié 
Prist du facteur, qui jadis eut pitié, 
Du pauvre tout fendu par la moitié, 
Sa celeste origine. 
Vous souhaiter autant de bien qu'à moy, 
Vous estimer autant comme je doy, 
Avoir de vous le loyer de ma foy, 
Voila mon Androgine. 
Noz bons ayeux, qui cet art demenoient, 
Pour en causer, Petrarque n'apprenoient, 
Ains franchement leur dame entretenoient 
Sans fard, ou couverture. 
Mais aussi tost qu'Amour s'est fait sçavant, 
Lui qui estoit François au paravant, 
Est devenu menteur, et decevant, 
Et de Thusque nature. 
Je sçay qu'Amour est le subjet des vers, 
Et que sans luy tant d'escrivains divers 
Ne voleroient si bien en l'univers 
Par les bouches estranges. 
Mais ces beautez, dont tant de bons espriz 
Se vont plaignant avoir esté surpris, 
Ne furent onq'vers eulx en si hault pris 
Que chantent leurs louanges. 
Voz beautez donq' leurs servent d'argumens, 
Et ne leur fault de meilleurs instruments 
Pour les tirer tous vifz des monumens: 
Aussi comme je pense, 
Sans que plus fort vous les recompensez 
De tant d'ennuiz mieulx escriz que pensez, 
Amour les a de peine dispensez, 
Et vous de recompense. 
Je ry souvent, voyant pleurer ces foulx, 
Qui mille fois' vouldroient mourir pour vous, 
Si vous croyez de leur parler si doulx 
Le parjure artifice. 
Mais quand à moy, sans feindre ny pleurer 
Touchant ce point, je vous puis asseurer 
Que je veulx sain et dispos demeurer 
Pour vous faire service. 
Si vous trouvez quelque importunité 
En mon amour, qui vostre humanité 
Prefere trop à la divinité 
De vos graces cachées, 
Changez ce corps, object de mon ennuy: 
Alors je croy que de moy ny d'aultruy, 
Quelque beauté que l'esprit ait en lui, 
Vous ne serez cherchées. 
Et qu'ainsi soit, quand les hyvers nuisans 
Auront terni la fleur de voz beaux ans, 
Rydé ce marbre, esteint ces feux luisans, 
Quand vous verrez encore 
Ces cheveux d'or en argent se changer, 
De ce beau seing l'yvoire s'allonger, 
Ces lys fanir, et de vous s'estranger 
Ce beau teinct de l'Aurore: 
Qui pensez vous qui vous aille chercher, 
Qui vous adore, ou qui daigne toucher 
Ce corps divin, qui vous tenez tant cher? 
Vostre beauté passée 
Ressemblera un jardin à noz yeux, 
Riant n'aguere aux hommes et aux Dieux, 
Ores faschant de son regard les cieulx 
Et l'humaine pensée. 
N'attendez donq' que la grand' faulx du temps 
Moissonne ainsi la fleur de voz printemps, 
Qui rend les Dieux et les hommes contens. 
Les ans, qui peu sejournent. 
Ne laissent rien, que regretz et souspirs, 
Et empennez de nos meilleurs desirs, 
Avecques eulx emportent noz plaisirs, 
Qui jamais ne retournent. 
Pour faire fin, je vous prie excuser 
Mon amitié, qui ne peult abuser, 
Et mon esprit, qui ne sçauroit user 
De plus belle harangue: 
Puis que vos yeulx appris à decevoir 
De ma parole empeschent le devoir, 
Et que les miens esblouys de les voir 
Font office de langue. 
Si je n'ay peints mes ennuys sur le front, 
Et les assaulx que voz beautez me font, 
Ilz sont pourtant gravez [au] plus profond 
De ma volunté franche: 
Non comme un tas de vains admirateurs, 
Qui font souvent par leurs souspirs menteurs 
Et par leurs vers honteusement flateurs 
Rougir la carte blanche. 
Desormais donq' (Amour) si tu m'en croys, 
Adresse là ton petit arc Turquois, 
Tes petiz traicts, et ton petit carquois, 
Et telles mignardises: 
Presente les à la legere foy 
D'un plus sçavant, mais moins aimant que moy, 
Qui n'ait jamais rien esprouvé de toy, 
Que ces belles faintises. 
Si toutesfois tel style vous plaist mieulx, 
Je reprendray mon chant melodieux, 
Et voleray jusqu'au sejour des Dieux 
D'une aisle mieux guidée. 
Là dans le seing de leurs divinitez 
Je choisiray cent mile nouveautez, 
Dont je peindray voz plus grandes beautez 
Sur la plus belle Idée. 
  
XIX. La mort de Palinure du cinquiesme de Virgile 
Mais ce pendant Venus de dueil attainte 
Degorge ainsi à Neptune sa plainte: 
Le fier desdaing, l'insatiable raige, 
Qui de Junon tourmente le couraige, 
Que la pitié ny la longue saison, 
Ny Jupiter n'ont sceu mettre à raison, 
Et que les sorts mesmes n'ont peu plier, 
Me font (Neptune) un chascun supplier. 
Avoir parmi les peuples Phrygiens 
Rongé, mangé les murs Dardaniens, 
Avoir trainé par tout genre de peines 
Cruellement les reliques Troyennes, 
Ne luy suffist, mais son courroux enclos 
Poursuit encor' leurs cendres et leurs oz. 
De sa fureur la cause je n'entens. 
Tu m'es tesmoing combien puis peu de temps 
Elle agita d'oraige furieux 
L'onde Libyque, elle mesla aux cieux 
Toutes les mers, et osa ceste fole 
Mettre (ô forfaict) les tempestes d'Eole 
Où tu est Roy. Les Troyennes gallées 
Par son moyen vilainement bruslées, 
N'aguere aussi furent mises en proye 
A la fureur des matrosnes de Troye, 
Forçant les miens de laisser en arriere 
Leurs compaignons, en province estrangere. 
Au demeurant, je te pry que tes eaux 
Donnent passaige au reste des vaisseaux, 
Et que mon filz (au moins s'il est permis, 
Et les destins ces murs luy ont promis). 
Puisse aborder au Tybre Ausonien. 
Alors respond le flz Saturnien 
Roy de la mer: tu peus, ô Cytherée, 
Estre par tout en mon regne asseurée, 
Dont tu nasquis, et je merite aussi 
Que de ma foy tu estimes ainsi, 
Moy, qu'on a veu tant de fois reprimer 
Telles fureurs du ciel et de la mer: 
Et si n'ay eu (Xante m'en soit tesmoing, 
Et Simoïs) sur terre moindre soing 
De ton Enée, alors qu'on veid Achille 
Chasser les tiens, et que sa course agile 
Contre les murs demy-mors les pressoit, 
Lors qu'à milliers son braz les meurtrissoit, 
Et que les corps, les canaulx remplissants, 
Bouchoient la voye aux fleuves gemissans, 
Et que les eaux de Xante ne couloient 
Dedans la mer, ainsi qu'elle souloient. 
Alors j'ostay soubs une nue vuide 
Ton filz Enée au superbe Pelide 
Plus favori des armes et de nous, 
Bien que voulusse alors dessus-dessoubs 
Verser les murs de Troye parjurée, 
Dont je l'avois moymesme[s] emmurée. 
Ce bon vouloir est encor arresté 
Dedans mon coeur, ton filz en seureté 
(Chasse ta peur) conduira ses navires 
Au port d'Averne, ainsi que tu desires. 
Un seul sans plus dans la mer perira, 
Un seul sans plus pour le reste mourra. 
Incontinent que le Pere eut ainsi 
Le coeur joyeux de Venus adoulci, 
Ses fiers chevaux il attéle, et embouche 
D'escumeux freins leur braveté farouche, 
Lasche la resne, et à bride avalée 
Raze le hault de la plaine salée 
Sur son char bleu: les flotz incontinent 
Se sont planez dessoubs l'esseul tonnant, 
La mer s'unist, les vents audacieux 
Fuyent parmy le grand vague des cieux. 
Voici apres un horrible exercite 
De grands poissons: Glauque, et sa blanche suyte, 
Et Palemon, et Phorce avec sa trouppe, 
Et les Tritons à la legere crouppe. 
Sur l'aisle gauche estoit l'onde couppée 
Dessoubs Thetis, Melite, et Panopée: 
Nisée aussi à leur bande s'alie, 
Avec Spion, Cymodoce, et Thalie. 
La gayeté à son ranc retournée 
Chatouille ici le coeur douteux d'Enée, 
Il faut soudain ses vaisseaux envoiler, 
Guinder au mast, les verges estaler. 
Chacun se prent à tendre le cordaige, 
Et à donner la voile au navigaige, 
Ores à dextre, or' à senestre, et ores 
Croisent bien hault les antennes encores. 
Lors un bon vent vin empouper la flote, 
Au front estoit Palinur' le pilote, 
Qui d'avirons un grand nombre menoit: 
Tous vont suivant la route qu'il tenoit. 
Jà de la nuit la moyteuse carriere 
Touchoit du ciel la moyenne barriere, 
Et les nochers d'un doulx somme allechez 
Estoient le ranc soubs les rames couchez, 
Quand le sommeil des estoilles coulant 
L'air tenebreux esclaircit en volant, 
Pour t'abuser, et d'un somme trop dur 
Charmer tes yeux, ô pauvre Palinur', 
Ne meritant un si triste mechef. 
Lui donq' assis au plus hault de la nef 
De Phorbe prist la parole, et la grace. 
O Palinur', la Jasienne race, 
Nos vaisseaux ont le vent et la marée, 
La saison est au repos preparée, 
Repose toy, et tous ennuiz chassez 
Au long travail emble tes yeux lassez, 
En cepandant je feray ton devoir. 
Lors Palinur' à peine ayant pouvoir 
D'entr'ouvrir l'oeil: veulx-tu donq' que j'ignore 
La mer paisible, et ses doulx flots encore? 
Que je me fie à ce fier monstre ici? 
Comment veulx-tu que j'abandonne ainsi 
Mon prince Enée à la fraude du vent, 
Du temps serain abusé si souvent? 
Ainsi parloit au gouvernail fiché, 
Et par les yeux aux astres attaché. 
Le Dieu alors un rameau stygieux 
Trempé en l'eau du fleuve oblivieux, 
Sur une temple et l'autre secouant, 
Luy ferme l'oeil vagabond et nouant. 
Ce faulx dormir alors non attendu 
L'avoit à peine au repos estendu, 
Quand dessus luy tumbant le cruel somme 
Renverse en l'eau et gouvernail et homme, 
Et avec' luy grande part de la pouppe. 
Cestuy en vain huche souvent sa trouppe, 
Et cestuy là, qui en volant s'enfuit, 
D'une aisle prompte en l'air s'esvanouït. 
La flote alors usant de la fortune 
Qu'avoit promis le bon pere Neptune, 
Single à plaisir par les humides plenes. 
Et jà les nefz costoyoient des Syrenes 
Les haulx rochers jadis pleins de dangers, 
Et blanchissans d'ossemens estrangers. 
L'enroué bruit de l'onde retournée 
Tempestoit là, quand le bon prince Enée 
Se sent errer à brides vagabondes. 
Lui mesme adonq' par les nocturnes ondes 
Servit de guide à son vaisseau flotant 
Sans gouverneur, et d'un coeur sanglotant 
De son amy plaint beaucoup l'aventure. 
Làs, il te fault, ô pauvre Palinure, 
Trompé du ciel et de la mer seréne, 
Coucher tout nu sur la deserte aréne. 
  
XX. Elégie 
Non que d'excuse ou feinte ou veritable 
Ne soit besoing en ma cause equitable: 
Non que je soye en doute de la foy 
Qui vous unist estroictement à moy: 
Non que je pense un traict de jalousie 
D'estre fiché dans vostre fantasie. 
Pour tout cela, ou pout tel autre poinct, 
O le coeur mien, je ne vous escry point: 
Mais bien pourtant que la ferme pensée 
Qui tient mon ame à la vostre enlacée 
Ne me permet un seul ennuy sentir, 
Ou un seul bien, sans vous en advertir. 
Or saichez donq' qu'Amour qui favorize 
D'un chaste coeur la louable entreprise, 
Au poinct heureux m'a n'aguere advancé, 
Dont vous m'avez maintefois dispensé, 
Me remonstrant or' l'estat de mon aage, 
Ores les jeux de fortune volage: 
Et combien nuist d'attendre au lendemain 
Ce qu'aujourd'huy se presente à la main. 
Vous me disiez (il m'en souvient encore): 
Bien que l'ennuy tout mon plaisir devore, 
Pour voir assez combien à l'advenir 
J'auray pour toy de triste souvenir, 
Si veulx je bien te donner congnoissance 
Que mon plaisir n'a point tant de puissance 
Sur ma raison, que ton advancement 
Je ne prefere à mon contentement. 
Or poursuy donq' (amy) ton advantage, 
Dont le moyen est le seul mariage. 
Ce bon conseil vous me donniez alors, 
Et moy après cent contraires effors 
Persuadé de vostre advis honneste, 
Finalement à ce poinct je m'arreste, 
Qui n'ha jamais contenté mon desir, 
Sinon d'autant que c'est vostre plaisir. 
Aussi les cieulx, et les enfers je jure, 
Que pour ne faire à nostre amour injure, 
Jamais tel joug mon desir n'eust dompté, 
S'il eust despleu à vostre volunté. 
Ce n'est un joug qui captive mon ame 
Soubz le lyen d'une impudique flamme: 
Ce n'est un joug qui dompte mon desir 
Soubz l'aiguillon d'un follastre plaisir: 
Mais c'est un joug d'amitié conjugale, 
Qui d'une foy honnestement egale 
Separe en deux celle chaste amitié, 
Dont vous avez la premiere moitié 
Ceste moitié que vous avez pour gaige, 
Long temps y a que l'eustes en partage. 
Et ce fut lors qu'Amour et fermeté 
Me firent serf de vostre honnesteté. 
L'autre moitié, celle qui l'ha saisie, 
Croyez qu'elle ha si bien esté choisie, 
Qu'autre ne peult mieulx qu'elle meriter 
L'honneste amour que je vous veulx porter. 
L'une a esté, comme la plus aagée, 
Premierement sur mon coeur partagée, 
Et sur luy mesme en mesme chasteté 
Secondement une aultre l'ha esté. 
Ne craignez donq que soyez dessaisie 
De vostre droict, ou qu'autre fantaisie 
Puisse ravir ce coeur, qui n'est point mien, 
Sinon d'autant que de vous je le tien: 
Coeur, qui l'honneur si sainctement regarde, 
Que l'honneur mesme en est la seule garde: 
Coeur, qui ne peult gouster plaisir plus doulx 
Que tout hayr pour estre aymé de vous: 
Coeur, qui ne peult sentir plus grand dommage 
Qu'estre affranchi du droit de vostre hommage. 
Plus tost les cerfz vivront parmy les eaux, 
Et les poissons, ou vivent les oizeaux: 
Plus tost sera la grande mer sans voiles, 
Les boys sans umbre, et le ciel sans estoiles, 
Et voyra lon plus tost le monde enclos 
Dedans le seing de son premier cahos, 
Que pour vertu en mon coeur imprimée 
Votre vertu de moy soit moins aymée, 
Ou que d'un coeur honnestement lié 
L'honneste amour soit jamais oublié. 
Ains tout ainsi qu'un impetueux fleuve 
Plus furieux par un autre se treuve, 
Quand les deux cours en un cours assemblez 
Vont ravissant les arbres et les bledz, 
Pierres, maisons, boys, et toute autre chose 
Qui au devant de leur fureur s'oppose: 
Ainsi l'amour qui en mon chaste coeur 
D'un autre amour prent nouvelle vigueur, 
Courra tousjours d'une si vive sourse 
Qu'aultre amitié n'arrestera sa course. 
O doncq' heureux, heureux double lyen, 
Qui deux espris unis avecq' le mien, 
Double lyen, qui d'une double force 
Plus fermement que la corde retorse 
N'estreinct le faiz, enchaisnes dedans moy 
Troys coeurs unis d'une eternelle foy: 
Soit à jamais ta puissance immortelle, 
Et puis encor' dessus l'un et l'autre aelle 
De ces deux coeurs, le mien si hault voler 
Qu'aultre amitié ne le puisse avaler. 
Combien qu'un clou par l'autre se repousse, 
Ne pensez voir par aucune secousse 
L'accord premier entre nous commencé 
Par le second estre desadvancé: 
Car la vertu dont cestuy prist naissance 
A cestuy la donne encor' accroissance. 
Le feu ne peut habiter nullement 
Avecques l'eau, son contraire element: 
Les animaulx de diverse nature 
Ne prennent point ensemble nourriture. 
Mais un amour saigement entrepris, 
Qui sur vertu son fondement ha pris, 
Ne crainct jamais l'amour qui luy ressemble, 
Car la vertu à la vertu s'assemble. 
  
XXI. Chanson 
On peult feindre par le cizeau 
Ou par l'ouvraige du pinceau 
Toute visible chose, 
Mais d'Amour le seul poingnant traict 
Vous peult figurer le protraict 
De ma tristesse enclose. 
On peult diffinir au compas 
De tout ce qu'on void ici bas, 
La forme en rond unie, 
Mais on ne scauroit mesurer 
Le mal, que me fait endurer 
Mon amour infinie. 
Au centre, au tour duquel se fait 
Du monde le cercle parfait, 
Toutes les lignes tendent, 
Et le divin de vos beautez 
Est le poinct où mes voluntez 
Egalement se rendent. 
L'esprit infus en ce grand corps 
Unist par differents accords 
Et les cieux et la terre, 
Et vos sainctes perfections 
Assemblent mes affections 
Par une doulce guerre. 
Du chault et de l'humidité 
Procede la fecondité 
Des semences du monde, 
Et de ma violente ardeur 
Joincte à vostre lente froideur 
Naist ma peine feconde. 
Le mal d'un corps intemperé 
Peult estre esteint ou moderé 
Par just d'herbe ou racine: 
Mais du trop de mon amitié 
Ou la mort, ou vostre pitié 
Sera la medecine. 
La gloire incite l'empereur, 
La richesse le laboureur, 
Le butin l'homme d'armes: 
Mais tout le gaing que je reçoy 
De mon inviolable foy, 
Ce sont souspirs et larmes. 
Tout cela qu'on void de mondain, 
Suivant du ciel le cours soudain, 
Se change d'heure en heure, 
Mais le desir ambitieux 
Qui me tire apres voz beaux yeux, 
Tousjours ferme demeure. 
La pierre dont le seul toucher 
Guide l'aiguille du nocher, 
Tousjours se tourne au pole, 
Et mon coeur de voz yeux touché 
Ne peult si bien estre attaché 
Qu'après eulx il ne vole. 
Le roq des flots marins batu 
N'est jamais par eulx abbatu, 
Mais demeure imployable, 
Et mon coeur plein de fermeté 
De mille peines tourmenté 
N'est jamais variable. 
La cire transformer se peult 
Et telle imaige que lon veult, 
Non pas la gemme dure, 
Qui plus tost se laisse briser, 
Qu'en autre protraict deguiser 
Sa premiere figure. 
Amour grava vostre beauté 
Au plus fort de ma loyauté 
De vous tant esprouvée, 
Et mon coeur si bien la reçoit 
Qu'autre beauté, tant belle soit, 
N'y peult estre engravée. 
Tout coeur leger est incité 
Par les dons ou l'auctorité 
Que le vulgaire adore, 
Mais le mien qui vous est aquis, 
Par or ne peult estre conquis, 
Ny par grandeur encore. 
Par force, par mine ou trahison, 
On peult gaigner une maison, 
Tant soit elle tenable: 
Mais la fortresse de mon coeur, 
Dont vostre oeil fut le seul vainqueur, 
S'est rendue imprenable. 
Il ne fault muraille ou rampart 
Pour garder qu'un autre y ait part, 
Car soyez asseurée 
Que plus ferme et entiere foy 
De loyal subject à son Roy 
Ne fut onques jurée. 
Quant à celle que je vous doy, 
Croyez que vous estes de moy 
Encores mieulx servie, 
Et que pour vostre honneur garder, 
Je vouldrois le mien hazarder, 
Qui m'est plus que la vie. 
Si vous traictez si mal celuy 
Qui vous a plus chere que luy, 
Que pourriez vous pis faire 
A vostre cruel ennemy, 
Ou celuy qui soubs nom d'amy 
Vous seroit adversaire? 
Toutefois si mon desplaisir 
Peult contenter vostre desir, 
Soyez moy pitoyable, 
Ou comme bon vous semblera, 
Jamais rien ne me desplaira, 
Qui vous soit agreable. 
Caelo musa beat 
  
Oeuvres de l'invention de l'autheur 
  
I. La complainte du desesperé 
Qui prestera la parole 
A la douleur, qui m'affole? 
Qui donnera les accens 
A la plainte, qui me guyde 
Et qui laschera la bride 
A la fureur, que je sens? 
Qui baillera double force 
A mon ame, qui s'efforce 
De soupirer mes douleurs? 
Et qui fera sur ma face 
D'une larmoyante trace 
Couler deux ruysseaux de pleurs? 
Sus mon coeur, ouvre ta porte, 
Affin que de mes yeux sorte 
Une mer à ceste foys. 
Ores fault que tu te plaignes, 
Et qu'en tes larmes tu baignes 
Ces montaignes et ces boys. 
Et vous mes vers, dont la course 
A de sa premiere sourse 
Les sentiers habandonnez, 
Fuyez à bride avalée, 
Et la prochaine valée 
De vostre bruyt estonnez. 
Vostre eau, qui fut clere et lente, 
Ores trouble et violente, 
Semblable à ma douleur soit, 
Et plus ne meslez vostre onde 
A l'or de l'arene blonde, 
Dont vostre fond jaunissoit. 
Mais qui sera la premiere? 
Mais qui sera la derniere 
De vos plaintes? O bons dieux! 
La furie qui me domte, 
Las je sens qu'elle surmonte 
Ma voix, ma langue et mes yeux. 
Au vaze estroict, qui degoute 
Son eau, qui veult sortir toute, 
Ores semblable je suis: 
Et fault (ô plainte nouvelle) 
Que mes plainctz je renovelle, 
Dont plaindre assez je ne puis. 
Quand toutes les eaux des nües 
Seroient larmes devenues, 
Et quand tous les ventz congnuz 
De la charette importune, 
Qui fend les champs de Neptune, 
Seroient soupirs devenuz: 
Quand toutes les voix encores 
Complaintes deviendroient ores, 
Si ne me suffiroient point 
Les pleurs, les soupirs, le plaindre, 
A vivement contrefeindre 
L'ennuy qui le coeur me poingt. 
Ainsi que la fleur cuillie 
Ou par la Bize assaillie 
Pert le vermeil de son teinct, 
En la fleur du plus doulx âage 
De mon palissant visage 
La vive couleur s'esteinct. 
Une languissante nuë 
Me sille desja la vëue, 
Et me souvient en mourant 
Des doulces rives de Loyre, 
Qui les chansons de ma gloyre 
Alloit jadis murmurant: 
Alors que parmy la France 
Du beau Cygne de Florence 
J'alloys adorant les pas, 
Dont les plumes j'ay tirées, 
Qui des ailes mal cirées 
Le vol n'imiteront pas. 
Quel boys, quelle solitude, 
Tesmoing de l'ingratitude 
De l'archer malicieux, 
Ne resonne les alarmes 
Que les amoureuses larmes 
Font aux espris ocieux? 
Les bledz ayment la rousée, 
Dont la plaine est arrousée: 
La vigne ayme les chaleurs, 
Les abeilles les fleurettes, 
Et les vaines amourettes 
Les complaintes et les pleurs. 
Mais la douleur vehemente, 
Qui maintenant me tormente, 
A repoussé loing de moy 
Telle fureur insensée, 
Pour enter en ma pensée 
Le trait d'un plus juste esmoy. 
Arriere, plaintes frivoles 
D'ung tas de jeunesses folles. 
Vous, ardens soupirs encloz, 
Laissez ma poictrine cuyte, 
Et traynez à vostre suyte 
Mile tragiques sangloz. 
Si l'injure desriglée 
De la fortune aveuglée, 
Si ung faulx bon-heur promis 
Par les faveurs journalieres, 
Si les fraudes familieres 
Des trops courtizans amis, 
Si la maison mal entiere 
De cent procez heritiere, 
Telle qu'on la peut nommer 
La gallere desarmée, 
Qui sans guide et mal ramée 
Vogue par la haute mer: 
Si les passions cuysantes 
A l'ame, et au corps nuyzantes, 
Si le plus contraire effort 
D'une fiere destinée, 
Si une vie obstinée 
Contre ung desir de la mort: 
Si la triste congnoissance 
De nostre fresle naissance, 
Et si quelque autre douleur 
Geynne la vie de l'homme, 
Je merite qu'on me nomme 
L'esclave de tout malheur. 
Qu'ay-je depuis mon enfance 
Sinon tout injuste offence 
Senty de mes plus prochains? 
Qui ma jeunesse passée 
Aux tenebres ont laissée, 
Dont ores mes yeux sont plains. 
Et depuis que l'âge ferme 
A touché le premier terme 
De mes ans plus vigoreux, 
Las, helas, quelle journée 
Feut onq' si mal fortunée 
Que mes jours les plus heureux? 
Mes oz, mes nerfs, et mes veines, 
Tesmoins secrez de mes peines, 
Et mile souciz cuysans 
Avancent de ma vieillesse 
Le triste hyver, qui me blesse 
Devant l'esté de mes ans. 
Comme l'autonne saccage 
Les verdz cheveux du boccage 
A son triste advenement, 
Ainsi peu à peu s'efface 
Le crespe honneur de ma face 
Veufve de son ornement. 
Mon coeur jà devenu marbre 
En la souche d'ung vieil arbre 
A tous mes sens transmuez: 
Et le soing, qui me desrobe, 
Me faict semblable à Niobe 
Voyant ses enfants tuez. 
Quelle Medée ancienne 
Par sa voix magicienne 
M'a changé si promptement? 
Fichant d'aiguilles cruelles 
Mes entrailles, et moëlles 
Serves de l'enchantement? 
Armez vous contre elle donques, 
O vous mes vers! et si onques 
La fureur vous enflamma, 
Faites luy sentir l'ïambe 
Dont contre l'ingrat Lycambe 
La rage Archiloq arma. 
O nuict! ô silence! ô lune! 
Que ceste vieille importune 
Ose du ciel arracher, 
Pourquoy ont la terre, et l'onde, 
Mais pourquoy a tout le monde 
Conspiré pour me facher? 
Ny toute l'herbe cuillie 
Par les champs de Thessalie, 
Ny les murmures secrez, 
Ny la verge enchanteresse, 
Dont la Dame vangeresse 
Tourna les visages Grecz: 
Ny les flambeaux qu'on allume 
Aux obseques, ny la plume 
Des mortuaires oizeaux, 
Ny les oeufz qu'on teinct et mouille 
Dans le sang d'une grenouille, 
Ny les Avernales eaux: 
Ny les images de cire, 
Ny ce qui l'enfer attire, 
Ny tous les vers enchantez 
Par la vieille eschevelée 
D'une voix entremeslée 
Six et trois fois rechantez: 
Ny le menstrueux breuvage 
Meslé avecques la rage 
Qui s'enfle au front des chevaux, 
Ny les furies ensemble 
Enfanteroient (ce me semble) 
Le moindre de mes travaux. 
Moindre feu ne me consume 
Et moindre peste ne hume 
La tiede humeur de mes oz, 
Que l'Herculienne flamme 
Ayant le don de sa femme 
Engravé dessus le doz. 
Les flotz courroussez, qui baignent 
Leurs rivages, qui se plaignent, 
Ne sont plus sourds que je suis: 
Ny ce peuple, qui habite 
Où le Nil se precipite 
Dedans la mer par sept huys. 
Les ventz, la pluye et l'orage 
N'exercent plus grand oultrage 
Sur les montz et sur les flotz, 
Que l'eternelle tempeste 
Qui brouille dedans ma teste 
Mile tourbillons encloz. 
Comme la fole prestresse, 
A qui le Cynthien presse 
Le coeur superbe et despit, 
Herissant sa chevelure 
Contre-tourne son allure 
Par ung mouvement subit, 
Ainsi aveq' noire myne 
Tout furieux je chemine 
Par les champs plus eslongnez, 
Remaschant d'ung soucy grave 
Mile fureurs, que j'engrave 
Sur mes souciz renfrongnez. 
Tel est le Thebain Panthée, 
Quand son ame espovantée 
Voit le soleil redoublé: 
Tel, le vangeur de son pere, 
Quand les serpents de sa mere 
Luy ont son esprit troublé. 
D'une entre-suyvante fuyte 
Il adjourne, et puys annuyte: 
L'an d'ung mutuel retour 
Ses quatre saisons rameine: 
Et après la lune pleine 
Le croissant luist à son tour. 
Tout ce que le ciel entourne, 
Fuyt, refuyt, tourne, et retourne, 
Comme les flotz blanchissans, 
Que la mer venteuse pousse, 
Alors qu'elle se courrousse 
Contre ses bords gemissants. 
Chacune chose decline 
Au lieu de son origine: 
Et l'an, qui est coustumier 
De faire mourir, et naistre, 
Ce qui feut rien, avant qu'estre, 
Reduict à son rien premier. 
Mais la tristesse profonde, 
Qui d'ung pié ferme se fonde 
Au plus secret de mon coeur, 
Seule immuable demeure, 
Et contre moy d'heure en heure 
Acquiert nouvelle vigueur. 
Ainsi la flamme allumée, 
Que les ventz ont animée, 
Forcenant cruellement 
En mile poinctes s'eslance, 
Dedaignant la violence 
De son contraire element. 
Quand l'obscurité desserre 
Ses aisles dessus la terre, 
Et quant le present des Dieux 
Pour emmieller la peine, 
De toute la gent humaine 
Charme doulcement les yeux, 
Lors d'une horreur taciturne 
Dessoubz le voyle nocturne 
Tout se fait paisible et coy: 
Toute manière de beste 
Au sommeil courbe la teste 
Dedans son privé recoy. 
Mais le mal, qui me reveille, 
Ne permet que je sommeille 
Ung seul moment de la nuict, 
Sinon que l'ennuy m'assomme 
D'ung espoüantable somme, 
Qui plus que le veiller nuyt. 
Puis quand l'aulbe se descouche 
De sa jaunissante couche. 
Pour nous esclerer le jour, 
Avec moy s'esveille à l'heure 
Le soing rongeard, qui demeure 
En mon familier sejour: 
Où tout cela que l'on nomme 
Les bienheuretez de l'homme, 
Ne me sçauroit esjouyr, 
Privé de l'aise, qu'aporte 
A la vie demy-morte 
Le doulx plaisir de l'ouyr. 
Et si d'ung pas difficile 
Hors du triste domicile 
Je me trayne par les champs, 
Le soucy, qui m'accompaigne, 
Ensemence la campaigne 
De mile regrez tranchans. 
Si d'avanture j'arrive 
Sur la verdoyante rive, 
J'essourde le bruyt des eaux: 
Si au bois je me transporte, 
Soudain je ferme la porte 
Aux doulx goziers des oyzeaux. 
Jadis la tourbe sacrée, 
Qui sur le Loyr se recrée, 
Me daignoit bien quelquesfois 
Guyder au tour des rivages, 
Et par les antres sauvages, 
Imitateurs de ma voix: 
Mais or' toute espoüantée 
Elle fuyt d'estre hantée 
De moy despit, et felon, 
Indigne que ma poictrine 
Reçoyve soubz la courtine 
Les sainctz presentz d'Apollon. 
Mesmes la voix pitoyable, 
Dont la plainte larmoyable 
Rechante les derniers sons, 
Dure et sourde à ma semonce, 
Dedaigne toute response 
A mes piteuses chansons. 
Quelque part que je me tourne, 
Le long silence y sejourne 
Comme en ces temples devotz, 
Et comme si toutes choses 
Pesle mesle estoyent r'encloses 
Dedans leur premier Cäos. 
Mettez moy donq' où la tourbe 
Du peuple estonné se courbe 
Devant le sceptre des Roys, 
Et en tous les lieux encore' 
Où plus la France decore 
Et ses armes et ses loix: 
Mettez moy où lon accorde 
La contr'-accordante chorde 
Pas les discordans accords, 
Et où la beauté des dames 
Souffle les secrettes flammes 
Qui bruslent dedans le corps. 
Mettez moy (si bon vous semble) 
Où la Delienne assemble 
Sa bande apprise au labeur, 
A cry, à cor, et à suyte 
Pressant la legere fuyte 
Des cerfz aislez par la peur. 
Mettez moy où Cytherée 
En la saison alterée 
Sa jeune troppe conduict, 
Et sans craindre la froidure 
Dessus l'humide verdure 
Bale au serain de la nuict. 
Mettez moy là où florissent 
Les arbres, qui se nourrissent 
Au beau sejour d'Alcinoys, 
Et là où le riche Autonne 
D'une main prodigue donne 
L'honneur du front d'Acheloys. 
Mettez moy où plus abonde 
Tout ce qui plus en ce monde 
Contente l'humain' desir, 
Si ne pouray-je en tel aise 
Trouver plaisir qui me plaise, 
Que l'obstiné deplaisir. 
Helas, pourquoy tant s'augmentent 
Les malheurs qui me tormentent 
Desesperé d'avoir mieux? 
Ou pourquoy à les accroistre, 
Par trop les vouloir congnoistre, 
Suys-je tant ingenieux? 
Heureux, qui a par augures 
Preveu les choses obscures! 
Et trop plus heureux encor', 
En qui des Dieux la largesse 
A respandu la sagesse, 
Des cieux le plus beau tresor! 
Combien (si nous estions sages) 
Se demonstrent de presages, 
Avant-coureurs de noz maulx? 
Soit par injure celeste, 
Par quelque perte moleste, 
Ou par mort des animaulx. 
Mais la pensée des hommes, 
Pendant que vivans nous sommes, 
Ignore le sort humain: 
La divine prescience 
Par certaine experience 
Le tient cloz dedans sa main. 
Seroit-point determinée. 
Quelque vieille destinée 
Contre les espriz sacrez? 
Mile, qui dessus Parnaze 
Beurent de l'eau de Pegaze, 
Ont faict semblables regrez. 
De la Lyre Thracienne 
Et de l'Amphionnienne 
Les malheurs je ne diray. 
De l'aveuglé Sthesicore, 
Et du grand aveugle encore 
Les labeurs je n'escriray. 
Je tays la mort d'Eurypide, 
Et la tortüe homicide. 
Je laisse encore la faim 
De ce miserable Plaute, 
Et les peines de la faulte 
De l'amoureux escrivain. 
Seulement me plaist escrire 
Comment le Dieu qui inspire 
Le troppeau musicien, 
Mortel, soubz habit champestre, 
Sept ans les boeufz mena paistre 
Au rivaige Amphrysien. 
Mauldicte donq' la lumière 
Qui m'esclaira la premiere, 
Puys que le ciel rigoreux 
Assujetit ma naissance 
A l'indomtable puissance 
D'ung astre si malheureux. 
O Dieux, que lon jure, 
Dieux, qui punissez l'injure 
D'une rompue amitié, 
Si les devotes prieres 
Pour les injustes miseres 
Vous emeuvent à pitié, 
Las, pourquoy ne se retire 
De moy ce cruel martyre, 
Si mes innoncentes mains, 
Pures de sang et rapines, 
Ne feurent onques inclines 
A rompre les droictz humains? 
Je ne suis né de la race 
Qui dessus les montz de Thrace, 
O Dieux, s'arma contre vous, 
Ny de l'hoste abhominable 
Qui pour son forfaict, damnable 
Accreut le nombre des loups. 
Je n'ay hanté le college 
De ce larron sacrilege 
Qui feut premier inventeur 
De feindre la congnoissance 
De vostre divine essence 
Par ung visage menteur 
Je ne suys né de la terre 
Qui en la Thebaine guerre 
Huma le sang fraternel, 
Dont le mutuel oultrage 
Tesmoigna l'aveugle rage 
De l'inceste paternel. 
D'une cruaulté nouvelle 
Je n'ay rompu la cervelle 
De mon pere, et si n'ay pas 
De ses entrailles saillantes 
Remply les gorges sanglantes 
Par ung nocturne repas. 
Si mon innocente vie 
Ne feut onques asservie 
Aux serves affections, 
Si l'avare convoitize, 
Si l'ambicion n'attize 
Le feu de mes passions: 
Si pour destruire ung lignage 
Par escrit, ou tesmoignage, 
Ma langue n'a point menty, 
Si au sang de l'homme juste 
Avecques le plus robuste 
Jamais je n'ay consenty: 
Si la vielle depiteuse 
Du mal d'autruy convoiteuse, 
Si l'ire, si la ranqueur 
(Et si quelque autre furie 
A sur l'homme seigneurie) 
Ne m'ont affolé le coeur, 
Divine majesté haulte, 
D'où me viennent, sans ma faulte, 
Tant de remors furieux? 
O malheureuse innocence, 
Sur qui ont tant de licence 
Les astres injurieux! 
Heureuse la creature 
Qui a fait sa sepulture 
Dans le ventre maternel! 
Heureux celuy dont la vie 
En sortant s'est veu ravie 
Par un sommeil eternel! 
Il n'a senty sur sa teste 
L'inevitable tempeste 
Dont nous sommes agitez, 
Mais asseuré du naufraige 
De bien loing sur le rivaige 
A veu les flotz irritez. 
Sur mon ame, tourne arriere, 
Et borne icy la carriere 
De tes ingrates douleurs. 
Il est temps de faire espreuve, 
Si apres la mort on treuve 
La fin de tant de malheurs. 
Ma vie desesperée 
A la mort deliberée 
Jà-desjà se sent courir. 
Meure donques, meure, meure, 
Celuy qui vivant demeure, 
Mourant sans pouvoir mourir. 
Ainsi le Devin d'Adraste, 
Qui pour le filz d'Iöcaste 
Encontre Thebes s'arma, 
S'eslançoit de grand'audace 
Dedans l'horrible crevace, 
Qui sur luy se referma. 
Vous, à qui ces durs allarmes 
Arracheront quelques larmes, 
Soyez joyeux en tout temps, 
Ayez le ciel favorable, 
Et plus que moy, miserable, 
Vivez heureux, et contens. 
  
II. Hymne Chrestien 
O Seigneur Dieu, mon rampart, ma fience, 
Rampare moy du fort de pacience 
Contre l'effort du corps injurieux, 
Qui veult forcer l'esprit victorieux. 
L'ardeur du mal, dont ma chair est attainte, 
Me faict gemir d'une eternelle plainte, 
Moins pour l'ennuy de ne pouvoir guerir, 
Que pour le mal de ne pouvoir mourir. 
Certes, Seigneur, je sens bien que ma faulte 
Me rend coupable à ta majesté haulte: 
Mais si de toy vers toy je n'ay secours, 
Ailleurs en vain je cherche mon recours. 
Car ta main seule inviciblement forte 
Peult des enfers briser l'avare porte, 
Et me tirer aux rayons du beau jour 
Qui luyt au ciel, ton eternel sejour. 
Si je ne suys que vile pouriture, 
Tel que je suis, je suis ta creature. 
N'est-ce pas toy, dont la divine main 
De vil bourbier forma le corps humain, 
Pour y enter l'ame, que tu as feinte 
Sur le protraict de ton image saincte? 
N'est-ce pas toy, qui formas la rondeur 
De l'univers, tesmoing de ta grandeur? 
Et qui fendis l'obscurité profonde, 
Pour en tirer la lumiere du monde? 
N'est-ce pas toy, qui as prefix le tour 
De l'Ocëan, qui nous baigne à l'entour, 
Fichant aux cieux du jour la lampe clere, 
Et la flambeau qui à la nuict eclaire? 
Et toutesfois ces grands oeuvres parfaiz, 
Que ta main saincte heureusement a faiz, 
Doyvent perir, non ta parole ferme, 
De qui le temps n'a point borné le terme. 
Cete parole a promis aux esleuz, 
Dont les saincts noms en ton livre sont leuz, 
Ennuy, travail, servitude moleste, 
Le seul chemin de ton regne celeste. 
O trop ingrat! ô trop ambicieux! 
Cil qui premier nous defferma les yeux, 
Et qui premier, par trop vouloir congnoistre, 
Fist le peché entre nous apparoistre. 
Ce feut alors que le ciel peu benin 
Vomit sur nous son courroux et venin, 
Faisant sortir du centre de la terre 
La pasle faim, et la peste, et la guerre. 
Le monde alors d'une nüe empesché 
Vivoit captif soubz les loix du peché, 
De qui l'horreur sur tant d'ames immondes 
Fist deborder la vengeance des ondes. 
Alors Seigneur, d'ung clin d'oeil seulement 
Tu moissonnas la terre egalement, 
Ne reservant de tant de miliers d'hommes 
Qu'une famille en ces lieux où nous sommes. 
O bienheureux et trois et quatre fois, 
Qui a gouté le sucre de ta vois! 
Et dont la foy, qui le peché defie, 
En ton effort sa force fortifie! 
Certes celuy qui tel bien a receu 
De son espoir ne se verra deceu: 
S'il est ainsi que la foy sauva l'Arche, 
Et d'Israël le premier Patriarche, 
Ce fut celuy, Seigneur, à qui tu fis 
Multiplier le nombre de ses filz, 
Plus qu'on ne voit d'estoiles flamboyantes, 
Ou de sablon aux plaines ondoyantes 
Ce peuple alors contrainct de se ranger 
Dessoubz les loix du barbare estranger, 
Vivoit captif: quand ta main favorable 
Luy fist sentir ton pouoir secourable: 
Pendant le cours de l'onde rougissant, 
Dont a pié sec ton peuple feut yssant, 
Et vid encor' loing derriere sa fuyte 
Floter sur l'eau l'Egyptienne suyte. 
Puis au mylieu des travaulx et dangers 
Tu le guydas aux peuples estrangers 
Par les desers, ou vingt, et vingt années 
Feurent par toy ces bandes gouvernées. 
Là ta pitié, pour leur soif amortir, 
Fist des rochers les fontaines sortir, 
Et fist encor' de ta main planteureuse 
Neger sur eulx la manne savoureuse. 
Là feut soubs toy Moyze ton amy 
Chef de ta gent, qui murmuroit parmy 
Les longs erreurs de ce desert sauvage, 
D'avoir laissé l'Egyptien rivage. 
Là maintefois le cours de ta fureur 
Se desbrida sur l'obstinée erreur 
De ces mutins: et tes loix engravées 
Se virent là mile fois depravées. 
O quantefois de ton grave sourcy 
Tu abysmas ce faulx peuple endurcy! 
Qui mesprisant de son Dieu les louanges 
Idolatroit après les Dieux estranges. 
Justice adonq' sur le peché naissant 
Faisoit brandir son glayve punissant, 
Et la pitié loing du ciel exilée 
Erroit çà bas triste et deschevelée. 
Finablement, ce peuple belliqueur 
Guydé par toy, haulsa le chef vainqueur 
Sur mile roys, et peuples, que la guerre 
Fist renverser horriblement par terre, 
Ains que les tiens par sentiers incongnuz 
Feussent aux champs planteureux parvenuz, 
Où tu avois dès mainte et mainte année 
Au paravant leur demeure bornée. 
Qui contera les dangers et horreurs, 
Les fiers combaz, et vaillantes fureurs 
De Josüé? et la brave entreprize 
De Gedëon, que ta main favorize? 
Qui descrira ce guerrier ordonné 
Pour le rampart de ton peuple estonné, 
Et le forfaict de la main desloyale 
Qui luy embla sa perruque fatale? 
Qui chantera l'oracle d'Israël, 
Ce grand prophete et prestre Samüel, 
Säul, Jonathe, et les despouilles vides 
Rouges du sang de tes Israëlides? 
O Dieu guerrier! des victoires donneur! 
Donne à mes doigz cete grace, et bonheur 
De n'accorder sur ma lyre d'ivoyre 
Pour tout jamais que les vers de ta gloire. 
S'il est ainsi, arriere les vains sons, 
Les vains soupirs et les vaines chansons, 
Arriere amour, et les songes antiques 
Elabourez par les mains poëtiques. 
Ce n'est plus moy, qui vous doy' fredonner: 
Car le Seigneur m'a commandé sonner 
Non l'Odissée, ou la grand'Iliade, 
Mais le discours de l'Israëliade. 
Lors je diray ce grand pasteur Hebrieu 
Qui s'opposa pour le peuple de Dieu: 
Les saincts accords de sa lyre faconde, 
Le certain coup de sa fidele fonde, 
Avec' l'honneur de son premier butin, 
Et le grand tronq du brave Philistin. 
Je chanteray par combien de traverses 
Il sceut tromper les embusches diverses 
De ses hayneux, ainsi que Dieu l'eust assis 
Pour commender au peuple circoncis. 
Heureux vray'ment si l'oeil de Bersabée 
Sa liberté n'eust onques desrobée, 
Et s'il n'eust mis en proye à l'estranger 
Celuy qui feut de sa mort messager. 
Las, ce qu'on voit de bonheur en ce monde, 
Jamais constant et ferme ne se fonde, 
Et nul ne peut suyvre d'ung cours entier 
De la vertu le penible sentier. 
Quel siecle encor' ne porte tesmoignage 
Du Roy congneu par le surnom de sage? 
Qui attraynant des plus barbares lieux 
L'or, et l'argent, et le bois precieux, 
Elaboura d'estofe et d'artifice 
Du temple sainct le superbe edifice. 
Ce n'est icy que descrire je veux 
De ses vieux ans les impudiques feuz, 
De sa maison la grand'troppe lascive, 
Sa vanité, et sa pompe excessive, 
Pour ses faulx Dieux le vray Dieu meprisé 
Et de son filz le sceptre divisé. 
Je voy encor' les campagnes humides 
Rougir au sang de ces Abrahamides, 
Peuple endurcy entre tous les humains: 
Qui adorant l'ouvrage de ses mains, 
Parfume Bâl d'encens et sacrifice. 
Peuples, et roys, apprenez la justice: 
Et si de Dieu quelque peur vous avez, 
Dedans voz coeurs hardiment engravez 
La mort d'Achab, et la serve couronne 
De tant de roys, captifz en Babilonne. 
Mais toy, Seigneur, de qui le braz puissant 
Decaptiva ton peuple languissant, 
Si de bon coeur devant toy je lamente, 
Romps le lien du mal qui me tormente, 
Ou mon esprit, pour de toy l'approcher, 
Tire dehors la prison de la chair. 
Je ne veulx point par ung autel de terre 
Encourtiné de verveine et d'ïerre, 
Par vers charmez, ny par prodigues voeuz, 
Mottes, encens, ou meurtre de cent boeufz, 
De ma santé haster la course lente, 
Las! qui tant feut au partir violente. 
Gueriz, Seigneur, gueriz moy de peché, 
Dont le remede à tout autre est caché. 
Alors mes vers, louant tes faictz loüables, 
Te pourront estre offrandes agrëables. 
  
III. La monomachie de David et de Goliath 
Celuy en vain se vante d'estre fort, 
Qui aveuglé d'une ire outrecuydée 
Ne voit combien peu sert ung grand effort, 
Quand de raison la force n'est guidée. 
L'humble foiblesse est voluntiers aydée 
De cetuy là qui donne la victoire: 
Mais du haultain la fureur debridée 
Pert en ung coup et la force et la gloire. 
Ny le canon, ny le glaive tranchant, 
Ny le rampart, ni la fosse murée 
Ont le pouvoir de sauver le meschant, 
Dont le Seigneur la vengeance a jurée. 
Les fiers torrens n'ont pas longue durée: 
Et du sapin, umbrage des montaignes, 
La hauteur n'est si ferme et asseurée 
Que l'arbrisseau, qui croist par les campagnes. 
O Dieu guerrier, Dieu que je veulx chanter, 
Je te supply', tens les nerfz de ma lyre: 
Non pour le Grec, ou le Troyen vanter, 
Mais le Berger que tu voulus eslire: 
Ce feut celuy qui s'opposant à l'ire 
Du Philistin mesprisant ta hautesse, 
Montra combien puissante se peut dire 
Dessou' ta main une humble petitesse. 
Toy, qui armé du sainct pouvoir des cieux 
Devant l'honneur et les yeux de la France 
Domtas jadis l'orgueil ambicieux, 
Qui sa fureur perdit au camp d'outrance: 
Puis que tu as de ce Dieu congnoissance, 
Qui des plus grands a la gloire étoufée, 
Escoute moy, qui louant sa puissance 
Te viens icy eriger ung trophée. 
Le Philistin, et le peuple de Dieu 
S'estoient campez sur deux croppes voisines. 
Icy estoit assis le camp Hebrieu: 
Là se montroient les tentes Philistines: 
Quand un Guerrier flambant d'armes insignes, 
Sorty du camp du barbare exercite, 
Vint defier, et par vois, et par signes 
Tous les plus fors du peuple Israëlite. 
Vingt et vingt fois ce brave Philistin 
Estoit en vain sorty hors de sa tente, 
Et nul n'aspire à si riche butin: 
Dont Säul pleure et crie et se tormente. 
Où est celuy (disoit il) qui se vente 
De s'opposer à si grand vitupere? 
A cestuy là ma fille je presente, 
Et affranchis la maison de son pere. 
O Israël, jadis peuple indomté! 
Où estoit lors ceste grande vaillance, 
Dont tu avois tant de fois surmonté 
Les plus gaillars par le fer de ta lance? 
Las, il fault bien que quelque tienne offence 
Eust provoqué la vangeance divine, 
Puis que ton coeur eut si foible defence 
Contre une audace et gloire Philistine. 
On voit ainsi de peur se tapissant 
Par les buyssons les humbles colombelles, 
Qui ont de loing veu l'aigle ravissant 
Tirer à mont, et fondre dessus elles. 
Alors ce fier avec' sifflantes ailes 
Ores le hault, ores le bas air tranche, 
Et craquetant de ses ongles cruelles, 
Raude à l'entour de l'espineuse branche. 
Tel se monstroit ce Guerrier animé: 
Et qui eust veu la grandeur de sa taille, 
Il eust jugé ou ung colosse armé 
Ou une tour desmarcher en bataille. 
Son corps estoit tout hérissé d'escaille: 
D'airain estoit le reste de ses armes. 
Le fer adonq', et l'acier, et la maille 
N'estoient beaucoup usitez aux alarmes. 
Son heaume feut comme ung brillant escler; 
Sur qui flotoit ung menaçant pennache: 
Nembroth estoit protraict en son boucler: 
Sa main branloit l'horreur d'une grand'hache. 
Ainsi armé, par cent moyens il tasche 
Son ennemy à la campagne attraire: 
Mais Israël en ses tentes se cache, 
Epoüanté d'ung si fier aversaire. 
O (disoit-il) fuyarde nation, 
Nourrie au creux des antres plus sauvages, 
Qui as laissé ton habitation 
Pour labourer noz fertiles rivages: 
Où est ce Dieu, où sont ces grands courages, 
Dont tu marchois si superbement haute? 
Voicy le braz vangeur de tant d'outrages, 
Qui te fera recongnoistre ta faulte. 
Je suis celuy qui avec' ces deux mains 
Me feray voye au celeste habitacle. 
Lequel des Dieux, ou lequel des humains 
Osera donc' s'opposer pour obstacle? 
O sotte gent, qui pour ung faulx miracle 
Te vas paissant de ces vaines merveilles, 
Ce n'est pas moy, que la voix d'ung oracle 
Si doucement tire par les oreilles. 
Où est celuy qui batailloit pour toy, 
Je dy celuy qu'Israel tant honnore? 
Que ne vient il s'opposer contre moy, 
Qui autre Dieu que ma force n'adore? 
Pauvre soldat, qui sur toy verras ore' 
D'ung rouge lac cete plaine arrouzee, 
Mieux te valust en tes dezers encore' 
Vivoter d'eau et de blanche rozee. 
O gaillard peuple! ô hardy belliqueur 
Parmy les boys, ou sur quelque montaigne! 
Est-ce ton Dieu, ou bien faulte de coeur, 
Qui te defend descendre à la campagne? 
Ung coeur vaillant, que la force accompagne, 
En ung rampart voluntiers ne se fie. 
Si quelqu'ung donq' en la vertu se bagne, 
Voicy au camp celuy qui le defie. 
Comme en ung parc, qui est environné 
Du peuple oyzif à quelque jour de feste, 
Le fier taureau au combat ordonné 
Deça delà va contourant sa teste: 
Ce Philistin, qui au combat s'appreste, 
Bravant ainsi de menaces terribles, 
Faisoit floter les plumes de sa creste, 
Rempissant l'air de blasphemes horribles. 
Le camp Hebrieu tremblant à cete fois 
D'ung teinct de mort alla peindre sa face, 
Criant au ciel d'une publique vois: 
Vange Seigneur, la sacrilege audace 
De ce crüel, qui ton peuple menace. 
Lors le Seigneur esbranlant sa main dextre, 
Donnoit aux siens ung signe de sa grace, 
Heureusement tonnant à la senestre: 
Et sur le champ apparoistre lon voit 
Ung Bergerot à la chere eveillée: 
Sa pennetiere en escharpe il avoit, 
Et à son braz sa fondé entortillée. 
Lors des deux camps la tourbe emerveillée 
D'ung oeil fiché en bëant le regarde, 
Quand d'une grace au danger aveuglée 
Le gay Berger au combat se hazarde. 
Mais quand ce fier vint à le regarder 
Si bravement marchant parmy la plaine, 
D'ung riz amer se prist à l'oeillader, 
Et de le voir plaignoit quasi la peine. 
Puis tout soudain d'une audace haultaine 
Se renfrongnant en horrible furie, 
Haussa la teste, et d'une vois loingtaine 
Le survenant par tels mots il escrie: 
Dy moy chetif, de ta vie ennuyé, 
Petit bout d'homme, et honte de nature, 
Quel tien hayneux t'a icy envoyé, 
Pour estre faict des corbeaux la pasture? 
Tu me fais honte, ô vile crëature! 
Quand je t'aguigne, et quand je me contemple. 
Si mouras-tu, ô la belle avanture! 
Pour en dresser la despouille en ung temple. 
Mais que ne vient sur cete arene icy 
Ce fier Säul avec' sa lance? voire 
Ce fort Abner, et ce Jonathe aussi, 
A qui son arc a donné tant de gloire? 
C'est là, c'est là, que ma vertu notoire 
Se deust baigner: non point en cete fange, 
Qui souillera l'honneur de ma victoire, 
Et par sa mort accroitra sa louange. 
Ha grand mastin (respondit le Berger) 
Tes gros aboys me donnent assurance. 
Car Dieu, qui veult tes blasphemes vanger, 
Est le boucler de ma ferme esperance. 
Desjà sa main sur ton chef se ballance, 
Pour ton grand cors accabler sou' sa foudre: 
Et me voicy, que sa juste vangeance 
Pousse vers toy, pour te rüer en poudre. 
Ce diable adonq' tonnant horriblement, 
Et tout baveux d'ecumeuze fumiere, 
Grinsa les dents espoüantablement, 
Et en fronçant nez, et front, et paupiere, 
Blasphema Dieu, le ciel, et la lumiere. 
Ainsi entre eux de parolle ilz s'attachent: 
Puis se hastant d'une alure plus fiere 
Diversement au combat contre-marchent. 
Le Philistin de fureur aveuglé, 
Roüant sa masse, alloit d'ardent courage, 
A gueule ouverte, et à pas deregle 
Portant la peur, la tempeste et l'orage. 
Mais le Berger d'une allure plus sage 
Son ennemy ores costoye, et ores 
Subtilement luy met droict au visaige 
Le vent, la poudre, et le soleil encores. 
Comme lon void au pié d'une grand' tour, 
Qu'à la campagne egaler on s'eforce, 
Le pionnier myrant tout à l'entour 
Faire une trace à la poudreuze amorce: 
Non autrement, par une longue entorce 
Ce cault Berger guygnant à teste basse 
Contre-gardoit son impareille force 
Contre l'horreur de la pesante masse. 
Le grand Guerrier à tour et à travers 
Menoit les braz d'une force incroyable, 
Et fendant l'air par ung sifflant revers 
Alloit finir ce combat pitoyable: 
Quand du Seigneur la bonté secourable 
Trompa le coup de la crüelle dextre, 
Qui lourdement foudroyant sur le sable, 
Raza les pieds du Berger plus adextre. 
Finablement courbé sur les genous, 
Panché à droict, d'ung pié ferme il se fonde: 
Ainsi que Dieu, lors qu'il darde sur nous 
Le feu vangeur des offences du monde: 
Ce fort Hebrieu roüant ainsi sa fonde 
Deux fois, trois fois, assez loing de sa teste, 
Avec' un bruit qui en fendant l'air gronde, 
Fist descocher le traict de sa tempeste. 
Droict sur le front, où le coup fut donné, 
Se va planter la fureur de la pierre. 
Le grand Colosse à ce coup estonné 
D'un sault horrible alla broncher par terre. 
Son harnois tonne, et le vainqueur le serre: 
Puis le cyant mesmes de son espée, 
Entortilla, pour le prix de sa guerre, 
Au tour du bras la grand' teste coupée. 
Lors Israël, que la peur du danger 
Suyvoit encor' en sa victoire mesme, 
Sort de son camp, et du vainqueur Berger 
Envoye au ciel la louange supreme. 
Le Philistin pasle de peur extreme 
Montre le doz, d'une fuyte vilaine: 
Abandonnant le grand tronq froid et blesme, 
Qui gist sans nom sur la dezerte plaine. 
Chantez, mes vers, cet immortel honneur, 
Dont vous avez la matiere choizie. 
Ce vous sera plus de gloire et bonheur 
Que les vieux sons d'une fable moizie. 
Car tout au pis, quand vostre poëzie 
Du long oubly devroit estre la proye, 
Si avez vous plus saincte fantaizie 
Que le sonneur des Pergames de Troye. 
  
IV. Ode au Reverendiss. Cardinal du Bellay 
Cetuy là qui s'estudie 
Representer en ses vers 
Tous les accidens divers 
De l'humaine tragedie, 
Celuy encores descrive 
Tous les floz tumultueux 
Qui retournent à la rive 
D'Euripe l'impetueux. 
L'air, le feu, la terre, l'onde, 
Et les ästres conjurez 
Nous rendent peu asseurez 
Contre l'orage du monde. 
Le sort cruel nous devore 
Par non revocable loy: 
Mais l'homme n'a point encore' 
Plus grand ennemy que soy. 
Tout autre animal apporte 
Plus grande commodité, 
Armant sa nativité 
D'une defence plus forte. 
L'homme seul à sa naissance 
Par gemissemens et pleurs 
Tesmoigne son impuissance, 
Presage de ses malheurs. 
Mais si la Nature amere 
Aux hommes tant seulement, 
Nous est eternellement 
Trop plus meratre que mere, 
Il ne faut pourtant que l'homme 
Entre tous les animaux 
Seul miserable se nomme, 
Esclave de mile maux. 
L'Ame en l'univers enclose 
Baillant nourriture aux cieux, 
A l'onde, à la terre, aux yeux, 
Qui eclerent toute chose, 
N'est-ce pas Dieu, qui embrasse 
Les membres de ce grand corps, 
Agitant toute la masse 
Par amyables discors? 
Cete Ame de la Nature 
Forma le dernier de tous 
L'Animal qui est plus doux 
Et plus noble creature: 
Affin qu'il feust seul capable 
D'ung sens plus divin, et hault, 
Estant aussi plus coupable, 
Si la raizon luy defaut. 
La Providence divine 
Mist en nous ses petiz feux, 
Nous faisant sentir par eux 
Le lieu de nostre origine. 
Ainsi de raizon l'usage, 
Qui n'est en autre animal, 
Fait que l'homme, qui est sage, 
Discourt le bien et le mal. 
Mais le gros fardeau moleste, 
Dont nostre esprit est vestu, 
Tarde souvent la vertu 
De l'ame, qui est celeste. 
De là provient la lïesse, 
La douleur et le souci, 
La peur, et la hardïesse, 
La haine et l'amour aussi. 
De là provient la furie 
De toutes les passions, 
Qui sur noz affections 
Exercent leur seigneurie: 
Si la raizon, seule guide 
De noz espris aveuglez, 
Souvent ne hause la bride 
Aux apetiz dereglez. 
Ung chacun durant sa vie 
Porte ung domestique Dieu, 
Qui tousjours et en tout lieu 
Secretement le convie. 
Voylà pourquoy nous ne sommes 
D'ung mesme desir domtez: 
Autant que nous voyons d'hommes, 
Autant sont de voluntez. 
Mais ny la court, ny les princes, 
Ny le fer victorieux, 
Ny l'honneur laborieux 
De commander aux provinces, 
Ny les Muses, que j'adore, 
Ny ung plus grave sçavoir 
Le souverain bien encore 
Ne me feront pas avoir. 
Je ne blame la richesse, 
Ny les honneurs, ny les biens, 
Que pourroit bien faire miens 
Du Roy la grande largesse. 
J'admire la bonne grace, 
La beauté plaist à mes yeux, 
J'honnore une antique race, 
Mais la vertu me plaist mieux. 
Tout ce qui est hors de l'homme, 
L'homme le desire, afin 
De parvenir à la fin 
Que suffizance lon nomme. 
Mais la vertu, estimable 
Plus que tout l'Indique honneur, 
Pour elle mesme est aimable, 
Et non pour autre bonheur. 
L'ayant pour ta guide prize, 
O l'ornement des prelaz! 
Tu montre' bien que tu l'as 
En tes premiers ans apprize: 
Fuyant l'alechante amorce 
Qui noz plus jeunes desirs 
Tire d'une doulce force 
Aux peu durables plaisirs. 
Car sortant du jeu d'enfance 
Aux exercices plus fors, 
Ta vertu sortit alors 
Devant les yeux de la France. 
Puis d'une aile plus legere 
Volant aux peuples divers, 
La publique Messagere 
La porta par l'univers. 
Quel nombre pourroit suffire 
A raconter les dangers 
Qui par les floz etrangers 
Ont agité ta navire? 
Et celle de ton grand frere, 
Qui par l'heur de sa vertu 
Rendoit la France prospere 
Et l'Espagnol abatu. 
Comme du haut des montaignes, 
Alors que la nege fond, 
Deux hardis fleuves se font 
Divers cours par les campaignes, 
Et puis en une valée 
Venant à se joindre en ung, 
Courent à bride avalée, 
Avecques ung nom commun: 
Ainsi, l'indomté couraige 
Du vaillant-docte Langé, 
Qui par la mort s'est vangé 
De l'oblivieux outrage, 
Joingnant son nom et sa course. 
Au tien, qui n'est moins congneu, 
Nous monstre de quelle source 
Et l'ung et l'autre est venu. 
  
V. La Lyre Chrestienne 
Moy cestuy là, qui tant de fois 
Ay chanté la Muse charnelle, 
Maintenant je haulse ma vois 
Pour sonner la Muse eternelle. 
De ceulx là qui n'ont part en elle, 
L'applaudissement je n'attens: 
Jadis ma folie estoit telle, 
Mais toutes choses ont leur temps. 
Si les vieux Grecz et les Romains 
Des faux Dieux ont chanté la gloire, 
Seron' nous plus qu'eulx inhumains, 
Taisant du vray Dieu la memoire? 
D'Helicon la fable notoire 
Ne nous enseigne à le vanter: 
De l'onde vive il nous fault boyre, 
Qui seule inspire à bien chanter. 
Chasse toute divinité 
(Dict le Seigneur) devant la mienne: 
Et nous chantons la vanité 
De l'idolatrie ancienne 
Par toy, ô terre Egyptienne! 
Mere de tous ces petiz Dieux, 
Les vers de la Lyre Chrestienne 
Nous semblent peu melodieux. 
Jadis le fameux inventeur 
De la doctrine Academique 
Chassoit le poëte menteur 
Par les loix de sa republique. 
Où est donq' l'esprit tant cynique, 
Qui ose donner quelque lieu 
Aux chansons de la Lyre ethnique, 
En la republique de Dieu? 
Si nostre Muse n'estoit point 
De tant de vanitez coyfée, 
La saincte voix, qui les coeurs poingt, 
Ne seroit par nous estoufée. 
Ainsi la grand' troppe echaufée 
Avec son vineux Evöé 
Estrangloit les chansons d'Orphée 
Au son du cornet enroué. 
Cestuy-là, qui dict, que ces vers 
Gastent le naïf de mon style, 
Il a l'estomac de travers, 
Preferant le doux à l'utile: 
La plaine heureusement fertile, 
Bien qu'elle soit veufve de fleurs, 
Vault mieulx, que le champ inutile 
Emaillé de mile couleurs. 
Si nous voulons emmïeller 
Noz chansons de fleurs poëtiques, 
Qui nous gardera de mesler 
Telles douceurs en noz cantiques? 
Convertissant à noz pratiques 
Les biens trop long temps occupez 
Par les faux possesseurs antiques, 
Qui sur nous les ont usurpez. 
D'Israël le peuple ancien 
Affranchi du cruel service, 
Du riche meuble Egyptien 
Fit à Dieu plaisant sacrifice: 
Et pour embellir l'edifice, 
Que Dieu se faisoit eriger, 
Salomon n'estima pas vice 
De mandier l'or estranger. 
Nous donques faisons tout ainsi: 
Et comme bien ruzéz gendarmes, 
Des Grecz et des Romains aussi 
Prenons les bouclers et guyzarmes: 
L'ennemy baillera les armes 
Dont luy mesme' sera batu. 
Telle fraude au faict des alarmes 
Merite le nom de vertu. 
O fol, qui chante les honneurs 
De ces faulx Dieux! ou qui s'amuse 
A farder le loz des seigneurs 
Plus aimez qu'amys de la Muse. 
C'est pourquoy la mienne refuse 
De manïer le luc vanteur. 
L'espoir des princes nous abuse, 
Mais nostre Dieu n'est point menteur. 
Celuy (Seigneur) à qui ta vois 
Vivement touche les oreilles, 
Bien qu'il sommeille quelquefois, 
Finalement tu le reveilles: 
Lors en tes oeuvres non pareilles 
Fichant son esprit, et ses yeux, 
Il se rid des vaines merveilles 
Du miserable ambicieux, 
Qui eslongné du droict sentier 
Suyt la tortueuse carriere, 
Où celuy qui est plus entier 
Plus souvent demeure en arrière, 
Humant la faveur journaliere 
Compaigne des souciz cuyzans, 
Et la vanité familiere 
A la tourbe des courtizans. 
Ma nef, evitez ce danger, 
Et n'attendez pas que l'orage 
Par force vous face ranger 
Au port après vostre naufrage. 
L'homme ruzé par long usage 
N'est follement avantureux: 
Mais qui par son peril est sage, 
Celuy est sage malheureux. 
Bien heureux donques est celuy 
Qui a fondé son asseurance 
Aux choses dont le ferme appuy 
Ne desment point son esperance. 
C'est luy que nulle violence 
Peult esbranler, tant seulement, 
Si bien il se contreballence 
En tous ses faictz egalement. 
Celuy encor' ne cherche pas 
La gloire, que le temps consomme: 
Saichant que rien n'est icy bas 
Immortel, que l'esprit de l'homme. 
Et puis le poëte se nomme 
Ores cigne melodieux, 
Or' immortel et divin, comme 
S'il estoit compaigon des Dieux. 
Quand j'oy les Muses cacqueter, 
Enflant leurs motz d'ung vain langage, 
Il me semble ouyr cracqueter 
Ung perroquet dedans sa cage: 
Mais ces folz qui leur font hommage, 
Amorçez de vaines doulceurs, 
Ne peuvent sentir le dommage 
Que traynent ces mignardes Soeurs. 
Si le fin Grec eust escouté 
La musique Sicilienne 
Peu cautement: s'il eust gouté 
A la couppe Circeïenne, 
De sa doulce terre ancienne 
Il n'eust regouté les plaizirs: 
Et Dieu chassera de la sienne 
Les esclaves de leurs dezirs. 
O fol, qui se laisse envieillir 
En la vaine philosophie, 
Dont l'homme ne peut recueillir 
L'esprit, qui l'ame vivifie! 
Le Seigneur, qui me fortifie 
Au labeur de ces vers plaisans, 
Veut qu'à luy seul je sacrifie 
L'offrande de mes jeunes ans. 
Puys quelque delicat cerveau, 
D'une impudence merveilleuse, 
Dict que pour ung esprit nouveau 
La matiere est trop sourcilleuse. 
Pandant la vieillesse honteuse 
D'avoir pris la fleur pour le fruict, 
Haste en vain sa course boyteuse 
Apres la vertu, qui la fuyt. 
Celuy qui prenoit double prix 
De ceux qui sous ung autre maistre 
L'art de la Lyre avoient appris, 
M'enseigne ce que je dois estre. 
Sus donques, oubliez, ma dextre, 
De ceste Lyre les vieux sons, 
Afin que vous soyez adextre 
A sonner plus haultes chansons. 
Mais (ô Seigneur) si tu ne tens 
Les nerfz de ma harpe nouvelle, 
C'est bien en vain que je pretens 
D'accorder ton loz dessus elle. 
Que si tu veulx luy prester l'aisle, 
Alors d'ung vol audacieux, 
Cryant ta louange immortelle, 
Je voleray jusques aux cieux. 
Le luc je ne demande pas, 
Dont les filles de la Memoire 
Apres les Phlegrëans combas 
Sonnerent des Dieux la victoire. 
Desormais sur les bordz de Loyre 
Imitant le sainct pouce Hebrieu, 
Mes doigtz fredonneront la gloire 
De celuy qui est trois fois Dieu. 
  
VI. Discours sur la louange de la vertu et sur les divers erreurs des hommes à 
Salm. Macrin 
Bien que ma Muse petite 
Ce doulx-utile n'immite 
Qui si doctement escrit, 
Ayant premier en la France 
Contre la saige ignorance 
Faict renaistre Democrit: 
Pourtant, Macrin, ne te fasche 
Si la bride ung peu je lasche 
Au soing qui l'esprit me rompt: 
Et se pour t'aider à rire, 
J'ay entrepris de t'escrire, 
Pour me derider le front. 
La felicité non faulse, 
L'eschelle qui nous surhaulse 
Par degrez jusques aux cieux, 
N'est-ce pas la vertu seule, 
Qui nous tire de la gueule 
De l'Orque avaricieux? 
L'homme vertueux est riche: 
Si sa terre tumbe en friche, 
Il en porte peu d'ennuy: 
Car la plus grande richesse 
Dont les Dieux luy font largesse 
Est tousjours avecques luy. 
Il est noble, il est illustre: 
Et si n'emprunte son lustre 
D'une vitre, ou d'ung tumbeau, 
Ou d'une image enfumée 
Dont la face cousumée 
Rechigne dans ung tableau. 
S'il n'est duc, ou s'il n'est prince 
D'une et d'une autre province, 
Si est-il roy de son coeur: 
Et de son coeur estre maistre, 
C'est plus grand' chose que d'estre 
De tout le monde vainqueur. 
Si les mains de la nature 
Toute sa linëature 
N'ont mignardé proprement, 
Si en est l'esprit aymable: 
Et qui est plus estimable, 
Le corps, ou l'accoustrement? 
La richesse naturelle, 
C'est la santé corporelle: 
Mais si le ciel est donneur 
D'une ame saine, et lavée 
De toute humeur dépravée, 
C'est le comble du bonheur. 
Que me sert la docte escolle 
De Platon, ou que j'accolle 
Tout cela que maintenoit 
Le grand Peripatetique, 
Ou tout ce qu'en son portique 
Zenon jadis soustenoit: 
Si l'ignorant et pauvre homme 
Tout ce que vertu on nomme 
Garde precieusement, 
Pandant que monsieur le sage, 
Qui n'a vertu qu'au visage, 
En parle ocieusement? 
Que me sert-il que j'embrasse 
Petrarque, Vergile, Horace, 
Ovide, et tant de secrez, 
Tant de Dieux, tant de miracles, 
Tant de monstres, et d'oracles 
Que nous ont forgé les Grecz: 
Si pandant que ces beaux songes 
M'apastent de leurs mensonges, 
L'an, qui retourne souvent, 
Sur ses ailes empennées 
De mes meilleurs années, 
M'enporte avecques le vent? 
Que me sert la thëorique 
Du nombre Pythagorique: 
Ung rond, une ligne, ung poinct: 
Le pinceter d'une chorde, 
Ou sçavoir quel ton accorde 
Et quel ton n'accorde point: 
Que me sert voir tout le monde 
En papier, ou je me fonde 
A l'arpanter pas à pas: 
Si en mon coeur je n'eu' onques 
Mesure, ou nombre quelquonques, 
Accord, reigle ny compas? 
Que me sert l'architecture, 
La perspective, et peincture, 
Ou au mouvement des cieux 
Contempler les choses haultes, 
Si pour congnoistre mes faultes 
Je ne me voy que des yeux? 
Que sert une longue barbe, 
Ung clystere, une reubarbe, 
Pour me faire vertueux? 
Ou une langue sçavante, 
Ou une loy mise en vante 
Au barreau tumultueux? 
Que me sert-il que je vole 
De l'ung jusqu'à l'autre pole, 
Si je porte bien souvent 
La peur et la mort en pouppe, 
Avecques l'horrible trouppe 
Des ondes grosses du vent? 
Que me sert que je m'ottroye 
Pour quelque petite proye 
Au sort douteux des combaz, 
Si la fortune crüelle 
Et la mort continüelle 
Me talonnent pas à pas? 
Que me sert-il que je suyve 
Les princes, et que je vive 
Aveugle, müet et sourd, 
Si apres tant de services 
Je n'y gaigne que les vices 
Et les bons jours de la court? 
C'est une divine ruze 
De bien forger une excuze, 
Et en subtil artizan, 
Soit qu'on parle ou qu'on chemine, 
Contrefaire bien la myne 
D'ung vieil singe courtizan. 
C'est une loüable envie 
A ceux qui toute leur vie 
Veulent demourer oyzeux, 
D'ung nouveau ne faire conte, 
Et pour garder qu'il ne monte, 
Tirer l'eschelle apres eulx. 
C'est belle chose, que d'estre 
Des hommes appellé maistre: 
Et du vulgaire eslongné, 
Ne parlant qu'en voix d'oracle, 
Espouänter d'ung miracle 
Et d'ung sourcy renfrongné 
C'est chose fort singuliere 
Qu'une reigle irreguliere 
Dessoubs ung front de Caton: 
Ou dire qu'on est fragile, 
Affeublant de l'Evangile 
La charité de Platon. 
C'est une heureuse poursuytte, 
Estre dix ans à la suyte 
D'ung benefice empestré: 
Et puis pour toute resource 
Vider et procez et bourse 
Par ung arrest non chastré. 
C'est une belle science, 
Pour faire une experience 
Avant qu'estre vieil routier, 
Par la mort guerir les hommes, 
Et puis dire que nous sommes 
Des plus sçavans du mestier. 
C'est ung vertueux office, 
Avoir pour son exercice 
Force oyzeaux, et force aboys, 
Et en meutes bien courantes 
Clabauder toutes ses rentes 
Par les champs et par les boys. 
C'est une chose divine, 
Qu'une femme ou sotte, ou fine. 
C'est encor' ung heureux poinct 
De l'avoir pauvre et foeconde: 
Puis monstrer à tout le monde 
Les cornes qu'on ne void point. 
C'est ung heureux advantage, 
Qu'ung alambic en partage, 
Ung fourneau Mercurien: 
Et de toute sa sustance 
Tirant une quinte essence, 
Multiplier tout en rien. 
C'est une chose fort grave, 
Estre magnifique, et brave: 
Et sans y espargner Dieu, 
S'obliger en beau langage: 
Et puis mettre tout en gage 
Pour enrichir sainct Matthieu. 
C'est chose noble, que d'estre 
En lice, en carriere adextre, 
Soit de nuict, ou soit de jour: 
Bon au bal, bon à l'escrime: 
Puis d'ung luc et d'une ryme 
Trionfer dessus l'amour. 
Ce sont beaux motz, que bravade, 
Soldat, cargue, camyzade 
Avec' ung brave san-dieu. 
Trois beaux detz, une querelle, 
Et puis une maquerelle, 
C'est pour faire ung Demy-dieu. 
Ce sont choses fort aigües, 
Par sentences ambigües 
Philosopher haultement: 
Et voyant que la fortune 
Ne vous veult estre opportune, 
Nous feindre ung contentement. 
Quel estat doy' je donq' suyvre, 
Pour vertueusement vivre? 
Je ne parle desormais 
Du courtizan, ou agreste: 
Car c'est la fable d'Oreste, 
Qui ne s'acheve jamais. 
Le tonneau Dïogenique, 
Le gros sourcy Zenonique, 
Et l'ennemy de ses yeux, 
Cela ne me deïfie: 
La gaye philosophie 
D'Aristippe me plaist mieulx. 
Celuy en vain se travaille, 
Soit en terre, ou soit qu'il aille 
Où court l'avare marchant, 
Qui fasché de sa presence, 
Pour trouver la suffisence, 
Hors de soy la va cherchant. 
Macrin, pandant qu'à Ivrée 
Dessus ta lyre enyvrée 
Du nectar Aönien, 
Tu refredones la gloire, 
Qui consacre à la memoire 
Ton Mecenas, et le mien: 
Ma Muse, qui se pourmeine 
Par Anjou, et par le Meine, 
A faict ce discours plaisant: 
Ryant les erreurs du monde, 
Où en raison je me fonde, 
Le sage contrefaisant. 
  
VII. Les deux Marguerites 
Sus, ma Lyre, desormais 
Chante plus doulx que jamais 
L'une et l'autre Marguerite: 
Ce sont les deux fleurs d'eslite, 
Où il fault cuillir le miel 
Des chansons dignes du ciel. 
Jadis les Dieux transformoient 
En astres ceulx qu'ilz aimoient, 
Et si les vers sont croyables, 
Les campagnes pitoyables 
Grosses de sang, et de pleurs 
Enfantoient les belles fleurs. 
Le ciel, qui donne ses lois 
Soubz le sceptre de Valois, 
A mis au rang des planettes 
Les plus ardentes et nettes 
Tous les rameaux bienheureux 
De ce Tige planteureux. 
Là, est l'honneur d'Angoumois 
Charles, et le grand François, 
François, et Charles encores, 
Deux feuz, qui eclairent ores 
Tout ainsi que les flambeaux 
Des freres qui sont jumeaux. 
Ilz luyzent d'ordre là hault, 
Et si des mortelz il chault 
A ceux là qui plus ne meurent, 
Noz Rois, qui au ciel demeurent, 
Ne rejectent pas les veuz 
De leurs enfans et neveuz. 
Du sang que j'ay tant loué, 
Qui des Dieux est avoué, 
Deux belles fleurs sont venues: 
L'une vole sur les nues 
Qui a le ciel eclaircy, 
Et l'autre florist icy. 
Ce dyamant, que voilà, 
Est frere de cestuy-là; 
Ces rozes s'appellent rozes, 
Ces deux fleurettes declozes, 
Qui se ressemblent ainsi, 
Ont ung mesme nom aussi. 
Ne me vantez plus, ô Grecz, 
De Narcisse les regrez, 
Ny la fleur de ses pleurs née: 
Ny l'ardeur Apollinée, 
Hyacint', dont le malheur 
Fist naistre une rouge fleur. 
Ne me vantez plus aussi 
Ny Phebus ny son soucy, 
Ny la fleur Adonienne, 
Ny la Telamonienne, 
Ny celles par qui Junon 
Aquist de mere le nom. 
Ne me vantez le sejour 
Qui voit revivre le jour, 
Où du marinier sont quises 
Les Marguerites exquises: 
De la France le bonheur 
Surmonte l'Indique honneur. 
Sus donc, ô François espris, 
Donnez l'honneur et le pris 
A la Marguerite saincte: 
Faictes de sa mort complaincte, 
Par qui les avares cieux 
Ont ravy tout nostre mieux. 
Dictes comme elle avoit eu 
L'honneur, l'esprit, la vertu, 
Qui tout nostre siecle honnore: 
Et de celle dont encore' 
Les jours ne sont revoluz, 
Dictes en autant, ou plus. 
C'est de mes vers l'ornement: 
Seule, qui divinement 
Anime, enhardist, inspire 
Les bas fredons de ma Lyre: 
C'est elle, et je sçay combien 
Mes chansons luy plaisent bien. 
Si des premiers je n'ay pas 
Orné le Royal trespas, 
Aussi ma Muse est trop basse 
Pour une premiere place: 
Et qui sçait si les derniers 
Se feront point les premiers? 
Les artizans bien subtilz 
Animent de leurs outilz 
L'airein, le marbre, le cuyvre: 
Mais châcun ne peut pas suyvre 
Si hault et brave argument 
Comme ung royal monument. 
Cestuy son sepulchre a bien, 
Et cestuy cy a le sien: 
Mais François, dont la memoire, 
Seule tumbe de sa gloire, 
Par tout le monde s'etend, 
Son sepulchre encor' attend. 
L'edifice elabouré 
Dont Mausole est honnoré, 
Les erreurs Dedaliennes, 
Les poinctes Egyptiennes, 
Et tout autre oeuvre parfaict, 
En ung jour ne fut pas faict. 
Qui a le stile assez hault, 
Pour epuyser, comme il fault, 
Une gloire si feconde? 
Le grand Monarque du monde 
De tout peintre et engraveur 
Ne cherchoit pas la faveur. 
Si me puis-je bien vanter 
De faire icy rechanter 
Les trois Angloizes Charites, 
Qui l'une des Marguerites 
Portent aux astres plus haulx 
En deux cents pas inegaulx. 
Les Dieux de noz biens jaloux 
T'avoient plantée entre nous, 
Royale fleur de Navarre, 
Et puis, d'une main avare 
T'arrachant de ces bas lieux, 
Ilz t'ont replantée aux cieux. 
Là, le chault et la froideur 
Ne seichent point ta verdeur, 
Verdeur que tousjours evante 
Ung Zephyre, qui doulx-vante 
En ces lieux, où en tout temps 
On voit rire le printemps. 
Là, de mile et mile espriz 
Qui volent par le pourpris, 
Le ciel, qui sienne t'appelle, 
Ne voit une ame plus belle: 
Le ciel ne peut il pas bien 
Reprendre ce qui est sien? 
Le ciel t'a reprise donc, 
Nous laissant d'ung mesme tronc 
Cete autre Fleur, ta compaigne, 
Et ta fille, qui se baigne 
En ce labeur glorieux 
Qui t'a mise au rang des Dieux. 
Permette le ciel amy 
Qu'apres ung siecle et demy 
La Fleur icy florissante 
A la Fleur non perissante 
Puisse voler d'ung prinsault, 
Pour se rejoindre là hault. 
Ce pendant nous, qui vivons, 
Ces doux vers nous escrivons, 
Affin que de race en race 
L'immortalité embrasse 
La non mortelle valeur 
De l'une et de l'autre Fleur. 
  
VIII. Ode au Seigneur des Essars sur le discours de son Amadis 
Celuy qui vid le premier 
Avec' sa torche etherée 
L'embrassement coutumier 
De Mars et de Cytherée, 
Ce fut le tout-voyant Dieu, 
Celuy qui tient le milieu 
Du choeur Hypocrenien, 
Dieu par qui fut revelée 
Cette amour long temps celée 
Au Feuvre Junonien. 
Ce Feuvre couvert alors 
De sueur et de poudriere 
Doroit ung harnoys de cors 
A la sçavante Guerriere: 
Ouvrage laborieux, 
Où l'ouvrier industrieux 
Avoit feinct subtilement 
Les sciences, et les armes, 
Que sa soeur docte aux alarmes 
Favorize egalement. 
Mais la honte, et le desdain, 
Qui luy domtent le courage, 
Luy font oublier soudain 
Cet ingenieux ouvrage. 
Lors de ses plus fins outilz 
Il forge les nez subtilz 
Attachez à clouds d'aymant, 
Dont la mesme Jalouzie, 
Si on croit la poëzie, 
Lia l'ung et l'autre amant. 
Ayant dressé ses appaz, 
Il sort de son domicile, 
Tournant feintement ses paz 
Aux fournaizes de Secile: 
Où les braz acoustumez 
Des Cyclopes enfumez 
Coup sur coup vont martelant, 
D'une tenaille mordente 
Retournant la masse ardente 
Du tonnerre etincelant. 
Là ce vieillart Lemnien 
Feint d'aller à l'heure, à l'heure, 
Pour donner au Thracien 
L'oportunité meilleure: 
Puis avecques ung long tour 
Celant son traistre retour 
Pour surprendre l'estranger, 
Ce sot jaloux delibere 
Par ung plus grand vitupere 
Sa grande honte vanger. 
A peine ce Dieu boyteux 
Avoit la porte passée, 
Et jà l'amant convoyteux 
Tenoit sa dame embrassée: 
Et pressant l'ivoyre blanc, 
Or' la cuysse, ores le flanc, 
Or' l'estomac luy serroit, 
Cueillant à levres desclozes 
L'ame, qui parmy les rozes 
Entre deux langues erroit. 
Jà-jà le feu ravissant 
Des doulces flammes cruëlles 
D'ung long soupir languissant 
Humoit leurs tiedes moëlles: 
Et voicy de toutes pars 
Mile petiz neuds espars, 
Dont les deux amans lacez 
Plus fort s'estraignent et lient, 
Que les vignes ne se plient 
Sur les ormes embrassez. 
Pres du lict, qui gemissoit, 
Tesmoing d'ung si doulx martyre, 
Le jaloux se tappissoit, 
Mordant ses deux levres, d'ire. 
Puis courant deçà delà, 
En sa chambre il appella 
Toute la trouppe des Dieux, 
Et palissant de colere 
Leur montra cet adultere, 
Joyeuse fable des cieux. 
Mars paizible à cete fois, 
Fronçant le hault de sa face, 
Remachoit à base vois 
Je ne sçay quelle menace. 
Venus d'ung regard piteux 
Tenoit en bas l'oeil honteux, 
Et de ses beaux doigts poliz 
En vain mignardant sa force, 
Çà et là cacher s'efforce 
Et les rozes, et les lyz. 
Celuy qui a veu le tour 
De l'yraigne mesnagere, 
Filant ses rez à l'entour 
De la mouche passagere, 
Il a veu Mars et Venus 
Enchainez à membres nuds, 
Et Vulcain guignant au près 
De son embusche yraigneuze, 
Qui la couple vergongneuze 
Alloit serrant de si pres. 
Alors les plus renfrongnez 
De la bande Olympienne 
Soudain s'en sont eslongnez 
D'une ire Saturnienne. 
Mais quelqu'ung des moins facheux 
Voyant ces folastres jeux, 
Se sent chatouiller le coeur, 
Et en souriant desire 
D'apprester ainsi à rire 
A l'injurieux moqueur. 
Celuy qui chanta jadis 
En sa langue Castillane 
Les proesses d'Amadis 
Et les beautez d'Oriane, 
Par les siecles envieux 
D'ung sommeil oblivieux 
Jà s'en alloit obscurci, 
Quand une plume gentile 
De cete fable subtile 
Nous a l'obscur eclerci. 
C'est le Phebus des Essars, 
Lumiere Parizienne, 
Qui nous montre le dieu Mars 
Joint avec' la Cyprienne: 
Chantant sous plaisant discours 
Les armes et les amours 
D'ung stile aussi violant, 
Lors qu'il tonne les alarmes, 
Comme aux amoureuses larmes 
Il est doulcement coulant. 
Si de ce brave suject 
On goute bien l'artifice 
On y verra le project 
De maint royal edifice: 
Qui tesmoigne le grand heur 
De la Françoise grandeur. 
Là, se peut encores voir 
Maint siege, mainte entreprise, 
Ou celuy qui en devise 
Jadis a faict son devoir. 
Là, se voit du grand François 
La foy constante, et loyale, 
Ses faictz, sa grandeur, ançois 
Sa posterité royale: 
Dont l'ung, qui tient en sa main 
L'heur du monarque Romain, 
De la France est gouverneur, 
L'autre, tesmoing de sa race, 
Porte escrit dessus sa face 
Des Princesses tout l'honneur. 
Là, ce gentil artizan 
Nous montre au vif: quel doit estre 
Le prince, le courtizan, 
Le sertiteur et le maistre: 
Combien d'ung fort bataillant 
Peut le courage vaillant: 
Quel est ou l'heur, ou malheur 
D'une entreprise amoureuse, 
Et la chanse malheureuse 
D'ung injuste querelleur. 
Qui du cygne Dorien 
Le vol immiter desire, 
D'ung ozer Icarien 
Se joint des ailes de cire. 
Et celuy se geynne en vain 
Après ce doulx ecrivain, 
Qui s'efforce d'egaler 
(Soit que les armes il vante, 
Soit que les amours il chante) 
Le sucre de son parler. 
Vous, que les Dieux ont esleuz 
Pour combatre l'ignorance, 
Et dont les escriz sont leuz 
Des voisins de nostre France, 
Donnez à cetuy l'honneur, 
Qui les faict par son bonheur 
De nostre langue apprentiz: 
Langue, qui estoit bornée 
Du Rhin, et du Pyrenée, 
Des Alpes, et de Thetis. 
Peut estre aussi que les ans 
Apres ung long et long âge 
Par estrangers courtizans 
Brouilleront nostre langage: 
Adonques la purité 
De sa doulce gravité 
Se pourra trouver icy. 
Du Grec la veine feconde 
Et la Romaine faconde 
Revivent encor' ainsi. 
Quel esprit tant sourcilleux 
Contemplant la Thebaïde, 
Ou le discours merveilleux 
De l'immortelle Eneïde, 
Se plaint que de ces autheurs 
Les poëmes sont menteurs? 
Ainsi l'Aveugle divin 
Nous faict voir sous feint ouvrage 
D'ung guerrier le fort courage 
Et l'esprit d'ung homme fin. 
Des poëtiques espris 
L'utile et doulce escriture 
Comprent ce qui est compris 
Au ciel et en la nature. 
Les Roys sont les argumens 
De leurs divins monumens: 
Et si nous montrent encor' 
Le beau, l'honneste, l'utile, 
Avec' ung plus docte stile 
Que Chrysipe ne Crantor. 
Mais je souhaite souvent 
D'estre banny jusqu'au More, 
Ou que la fureur du vent 
Me pousse jusq'à l'Aurore: 
Quand j'oy bruyre quelque fois 
Du peuple l'indocte vois, 
Ou quand j'escoute les criz 
De ces pourceaux d'Epicure, 
Qui en despit de Mercure 
Grongnent aux doctes escriz. 
L'ung plaint la contagion 
De la jeunesse abuzée: 
L'autre, la religion 
Par noms payens deguizée. 
Cetui-cy fort elegant 
Va ung songer alligant: 
Cetuy-là trop rigoreux 
Approuve l'edict d'Auguste, 
Et le bannissement juste 
De l'Artizan amoureux. 
Vous les diriez, tant ilz sont 
D'une hayneuze nature, 
Qu'avecques Tymon ilz ont 
Jadis pris leur nourriture. 
Caton semble dissolu 
A cetuy là, qui a leu 
Dessus leur front Curien: 
Du reste, je m'en raporte 
Au tesmoignage que porte 
Leur ventre Epicurien. 
Puis ces graves enseigneurs 
D'une effrontée assurance 
Se prennent aux grands Seigneurs, 
Les accusant d'ignorance. 
Mesmes leurs cler-voyans yeux 
Se monstrent tant curieux, 
Que d'abaisser leurs edictz 
Jusq'aux simples damoizelles, 
Et aux cabinetz de celles 
Qui lizent nostre Amadis. 
Si le Harpeur ancien, 
Qui perdit deux fois sa femme, 
Corrumpit l'air Thracien 
D'une furieuse flamme: 
Pourtant nous n'avons appris 
D'avoir l'amour à mespris 
Dont la saincte ardeur nous poingt, 
Non celle desnaturée 
Qui de Venus ceincturée 
Les lois ne recongnoist point. 
Mais pourquoy se sent blessé 
Par nostre façon d'escrire 
Celuy qui a tout laissé 
Fors son vice de mesdire? 
Lequel pour se deffacher, 
Voulant (ce semble) attacher 
Or' cetuy, ores celuy, 
Par ne sçay queles sornettes 
Faict ung present de sonnettes 
A qui moins est fol que luy. 
Si est ce, que le japper 
De telz indoctes volumes 
N'a le pouvoir de coupper 
L'aile aux bien-volantes plumes: 
Qui sous ung argument feint 
Nous ont si vivement peint 
Toutes noz affections, 
L'honneur, la vertu, le vice, 
La paix, la guerre, et l'office 
Des humaines actions. 
Or entre les mieux appris 
Le choeur des Muses ordonne 
Qu'à Herberay soit le pris 
De la plus riche couronne: 
Pour avoir si proprement 
De son propre acoutrement 
Orné l'Achille Gaulloys, 
Dont la douceur allechante 
Donne à celuy qui le chante 
Le nom d'Homere François. 
Si j'avoy' l'archet divin 
De la harpe Ronsardine, 
Le bas fredon Angevin 
Diroit la gloire Essardine: 
Neantmoins tel que je suis, 
Je la diray, si je puis, 
Non icy tant seulement, 
Mais en cent papiers encore, 
Afin que son bruit decore 
Le mien eternellement. 
  
IX. Au Seign. Rob. de la Haye pour Estrene 
Ores, que l'an dispos, 
Qui tourne sans repos 
Par une mesme trace, 
Nous figure en son rond 
Du Pere au double front 
Et l'une et l'autre face: 
Amy, pour toy je veulx 
En poëtiques voeux 
De la nouvelle année 
Le jour solennizer, 
Afin d'eternizer 
Nostre amour nouveau-née. 
Je t'offriroy les dons, 
Qui feurent les guerdons, 
Des plus vaillans de Grece: 
Ou l'or malicieux, 
Qui tenteroit les yeux 
D'une chaste Lucrece: 
Je t'offriroy encor' 
L'ambicieux thezor, 
Que le marchant avare 
Au plus près du matin 
Pille pour son butin 
Au rivage barbare: 
Mais tant, et tant de biens, 
Que je desire tiens, 
Ne sont en ma puissance: 
Et l'avare soucy 
N'apauvrist point aussi 
Ta riche suffisance. 
Si ma main eust acquis 
Le sçavoir tant exquis 
D'un Lysippe, ou Apelle, 
Tu devrois au pinceau, 
Au marbre et au cizeau 
Ta louange plus belle. 
Je n'oubliroy icy 
Ton Sybilet aussi 
Dont le docte artifice 
Nous rechante si bien 
Du Roy Mycenien 
Le triste sacrifice. 
Mais la Muse, et les Dieux 
Ne t'ont faict studieux 
D'une peincture morte, 
Et puis contre le tems 
En mes vers tu attens 
Une image plus forte. 
Mais que dy-je, en mes vers? 
Les tiens, qui l'univers 
Rempliront de leur gloire, 
Sur le marbre des cieux 
Engraveront trop mieux 
Le vif de ta memoire. 
Tes phaleuces tant doulx, 
Qui coulent entre nous 
Mile graces infuses, 
De nous sont adorez, 
Pour estre redorez 
Du plus fin or des Muses. 
Tu vyvrois par les sons 
De plus haultes chansons, 
Si je sçavois eslire 
L'inimitable vois 
Que le grand Vandomoys 
Accorde sur sa lyre. 
Quelz parfaicts artisans 
N'ont bien donné dix ans 
Au rond de leur science? 
Qui veult ravir le pris, 
Doit estre bien appris 
Par longue experience. 
  
X. Estrène à D. M. de la Haye 
Je fay present de fleurettes descloses 
A Flore mesme, et à Venus de rozes: 
Quand par ces vers peu florissans j'essaye 
Faire florir la florissante Haye: 
Qui par l'hyver de son âge touchée 
Comme ces fleurs, ne se verra seichée: 
Mais florira trop mieux que la couronne 
De son printems, qui maintenant fleuronne. 
Excusez donq' ma puissance peu haulte, 
Immitant ceux qui n'ayans de rien faulte 
Prennent en gré l'humble present des hommes. 
Mesmes le Dieu de ce mois où nous sommes, 
Clavier de l'an, qui rien plus ne demande 
Que miel, et palme, et figues pour offrande. 
Le coeur sans plus les Deïtez contente: 
Et c'est le don, lequel je vous presente. 
  
XI. Ode Pastorale à Ung Sien Amy 
Bergers couchez à l'envers, 
A l'ombre des saules verds: 
Bergers, qui au près des ondes 
Du Clain lentement fuyant 
Arrestez le cours oyant 
De ses Nymfes vagabondes, 
Desmanchez voz chalumeaux, 
Et dictes à ces ormeaux, 
A ces antres et fontaines: 
N'escoutez plus noz chansons, 
Ni ces ruisseaux, ny leurs sons, 
Enfans des roches haultaines: 
Mais oyez le son divin 
Du chalumeau Poictevin, 
Renouvelant la memoire 
Du pasteur Sicilien, 
Et du grand Italien 
La vive et durable gloire. 
N'a gueres nostre Berger, 
Traversant d'ung pié leger 
Le doz chenu des montaignes, 
R'amena les doctes Soeurs, 
Abreuvant de leurs doulceurs 
Les Poictevines campaignes. 
C'est luy premier des bergers, 
Qui dedaignant les dangers 
De l'envieuse ignorance, 
A ses vers osta le frain, 
Les faisant d'ung libre train 
Galloper parmy la France. 
Ses vers de fureur guydez, 
Comme fleuves desbridez, 
D'une audacieuse fuyte 
Noz campaignes vont foulant, 
Mais les ruisseaux vont coulant 
Tousjours d'une mesme suyte. 
O qu'ilz ont tardé souvent 
Et les ondes et le vent, 
Quand les Nymphes Poictevines 
Et les Dieux aux piedz de bouc 
Trepignoient dessoubz le joug 
De ses cadanses divines! 
Mais bien les troupeaux barbuz, 
Oyant des sommes herbuz 
Ses aubades nompareilles, 
Ont faict mile et mile saux, 
Et les plus lourds animaux 
En ont chauvy des oreilles. 
Ainsi le grand Thracien, 
De son luc musicien 
Tiroit les pierres oyantes, 
Les fleuves esmerveillez, 
Et des chesnes oreillez 
Les testes en bas ployantes. 
Heureux Berger desormais, 
Tu seras pour tout jamais 
L'honneur des champs et des prées, 
L'honneur des petiz ruisseaux, 
Des bois, et des arbrisseaux, 
Et des fontaines sacrées: 
Pour sonner si bien tes vers 
Sur les chalumeaux divers, 
Dont la doulceur esprouvée 
Aux oreilles de bon goust 
Coule plus doulx que le moust 
De la premiere cuvée. 
L'amour se nourrist de pleurs, 
Et les abeilles de fleurs: 
Les prez ayment la rozée, 
Phoebus ayme les neuf Soeurs, 
Et nous aymon' les doulceurs 
Dont ta Muse est arrousée. 
Ores ores il te fault 
Avec ung style plus hault 
Poulser la royale plaincte 
Jusqu'aux oreilles des Roys, 
Sacrant du pré Navarroys 
La fleur nouvellement saincte. 
Ainsi l'Arcadique Dieu 
Te favorize en tout lieu, 
Et tes brebis camuzettes: 
Ainsi à toy seulement 
Demeure eternellement 
L'honneur des vieilles muzettes. 
  
XII. A Salm. Macrin 
Par ung tumbeau Arthemize honnora 
Et son Mauzole, et sa gloire, qui dure 
Au monument de la vie escriture, 
Non en celuy que l'art elaboura. 
Son coeur ardent le corps mort adora, 
Luy erigeant du sien vif sepulture: 
Mais la saison defist l'architecture, 
L'autre cercueil, la mort le devora. 
Tes vers, Macrin, bruslans d'amour semblable, 
Ta Gelonis font plus emerveillable 
Au seul tumbeau de l'immortalité. 
De ces deux là, reste ung peu de memoire: 
De cestuy-cy la plus durable gloire 
Ne craint la mort, ny la posterité. 
  
XIII. Sonnetz de l'honneste amour 
I 
Comme en l'object d'une vaine peincture 
Je repaissoy' plus l'esprit que le coeur, 
A contempler du celeste vainqueur 
La non encor' bien comprise nature, 
Je projetoy' sou' feincte couverture 
Les premiers traicts de sa doulce rigueur, 
Mieux figurant le mort de sa vigueur 
Qu'imaginant le vif de sa poincture: 
Quand les saincts voeuz de mon humble vouloir 
Ne feurent mis du tout en nonchaloir 
Au Paradis du Dieu de ma victoire, 
Où de sa main ce divin guerdonneur 
M'a consacré prestre de son Honneur, 
Pour y chanter les hymnes de sa gloire. 
II 
Ce ne sont pas ces beaux cheveux dorez, 
Ny ce beau front, qui l'honneur mesme honnore, 
Ce ne sont pas les deux archets encore' 
De ces beaux yeux de cent yeux adorez: 
Ce ne sont pas les deux brins colorez 
De ce coral, ces levres que j'adore, 
Ce n'est ce teinct emprunté de l'Aurore, 
Ny autre object des coeurs enamourez: 
Ce ne sont pas ny ces lyz, ny ces rozes, 
Ny ces deux rancz de perles si bien closes, 
C'est cet esprit, rare present des cieux, 
Dont la beauté de cent graces pourvëue 
Perce mon ame, et mon coeur, et mes yeux 
Par les rayons de sa poignante vëue. 
III 
Je ne me plaing' de mes yeux trop expers, 
Ny de mon coeur trop leger à les croyre, 
Puis qu'en servant à si haulte victoire 
Ma liberté si franchement je pers. 
Amour, qui void tous mes secrez ouvers, 
Me faict penser au grand heur de ma gloire, 
Lors que je peins au tableau de Memoire 
Vostre beauté, le seul beau de mes vers. 
Mais si ce beau ung fol dezir m'apporte, 
Vostre vertu plus que la beauté, forte, 
Le coupe au pié: et veult qu'un plus grand bien 
Prenne en mon coeur une accroissance pleine: 
Ou autrement, que je n'attende rien 
De mon amour, fors l'amour de la peine. 
IV 
Une froydeur secretement brulante 
Brule mon corps, mon esprit, ma raizon, 
Comme la poix anime le tyzon 
Par une ardeur lentement violente. 
Mon coeur tiré d'une force allechante 
Dessou' le joug d'une franche prizon, 
Boit à longs traicts l'aigre-doulce poyzon, 
Qui tous mes sens heureusement enchante. 
Le premier feu de mon moindre plaizir 
Faict halleter mon alteré dezir: 
Puis de noz coeurs la celeste Androgyne 
Plus sainctement vous oblige ma foy: 
Car j'ayme tant cela que j'ymagine, 
Que ne puis aymer ce que je voy. 
V 
Ce Paradis, qui souspire le bâsme, 
D'une angelique et saincte gravité 
M'ouvre le ryz, mais bien le Deïté, 
Où mon esprit divinement se pâsme. 
Ces deux soleilz, deux flambeaux de mon âme, 
Pour me rejoindre à la Divinité, 
Perçent l'obscur de mon humanité 
Par les rayons de leur jumelle flâme. 
O cent fois donq et cent fois bienheureux 
L'heureux aspect de mon Astre amoureux! 
Puis que le ciel voulut à ma naissance 
Du plus divin de mes affections 
Par l'allambic de voz perfections 
Tirer d'Amour une cinquiesme essence. 
VI 
Quand je suis près de la flamme divine, 
Où le flambeau d'Amour est allumé, 
Mon sainct dezir sainctement emplumé 
Jusq'au tiers ciel d'un prin-vol m'achemine. 
Mes sens ravyz d'une doulce rapine 
Laissent leur corps de grand ayze pasmé, 
Comme le Sainct des douze mieux aymé, 
Qui repoza sur la saincte poitrine. 
Ainsi l'esprit dedaignant nostre jour 
Court, fuyt, et vole en son propre sejour 
Jusques à tant que sa divine dextre 
Haulse la bride au folastre dezir 
Du serviteur, qui pres de son plaizir 
Sent quelquefois l'absence de son maistre. 
VII 
Le Dieu bandé a desbandé mes yeux, 
Pour contempler celle beauté cachée 
Qui ne se peut, tant soit bien recherchée, 
Representer en ung coeur vicieux. 
De son autre arc doucement furieux 
La poincte d'or justement descochée 
Au seul endroict de mon coeur s'est fichée, 
Qui rend l'esprit du corps victorieux. 
Le seul dezir des beautez immortelles 
Guynde mon vol sur ses divines ailes 
Au plus parfaict de la perfection. 
Car le flambeau, qui sainctement enflamme. 
Le sainct brazier de mon affection, 
Ne darde en bas les saints traiz de sa flamme. 
VIII 
Non autrement que la Prestresse folle, 
En grommelant d'une effroyable horreur, 
Secoüe en vain l'indomtable fureur 
Du Cynthien, qui brusquement l'afolle: 
Mon estomac gros de ce Dieu qui vole, 
Espoüanté d'une aveugle terreur 
Se faict rebelle à la divine erreur, 
Qui brouille ainsi mon sens et ma parole. 
Mais c'est en vain: car le Dieu, qui m'estrainct, 
De plus en plus m'eguillonne et contrainct 
De le chanter, quoy que mon coeur en gronde. 
Chantez le donq, chantez mieux que devant, 
O vous mes vers! qui volez par le monde, 
Comme fueillars esparpillez du vent. 
IX 
L'aveugle Enfant, le premier né des Dieux, 
D'une fureur sainctement eslancée 
Au vieil Caos de ma jeune pensée 
Darda les traicts de ses tou'-voyans yeux: 
Alors mes sens d'ung discord gracieux 
Furent liez en rondeur ballencée, 
Et leur beauté d'ordre egal dispensée 
Conceut l'esprit de la flamme des cieux. 
De voz vertuz les lampes immortelles 
Firent briller leurs vives estincelles 
Par le voulté de ce front tant serain: 
Et ces deux yeux d'une fuyte suyvie 
Entre les mains du Moteur souverain 
Firent mouvoir la sphere de ma vie. 
X 
J'ay entassé moimesme' tout le bois, 
Pour allumer celle flâme immortelle, 
Par qui mon âme avecques plus haulte aile 
Se guinde au ciel, d'ung egal contre-pois. 
Jà mon esprit, jà mon coeur, jà ma vois, 
Jà mon amour conçoit forme nouvelle 
D'une beauté plus parfaictement belle 
Que le fin or epuré par sept fois. 
Rien de mortel ma langue plus ne sonne: 
Jà peu à peu moimesme' j'abandonne, 
Par cete ardeur, qui me faict sembler tel 
Que se monstroit l'indomté filz d'Alcméne, 
Qui dedaignant nostre figure huméne, 
Brula son corps, pour se rendre immortel. 
XI 
Pour affecter des Dieux le plus grand heur, 
Et pour avoir, ô sacrilege audace! 
Sou' le mortel d'une immortelle grace 
Idolatré une saincte grandeur: 
Pour avoir pris de la celeste ardeur 
Ce qui de moy toute autre flâme chasse, 
Je sen' mon corps tout herissé de glace 
Contre le roc d'une chaste froideur. 
L'aveugle oyzeau, dont la perçante flâme 
S'afile aux rayz du soleil de mon âme, 
Aguize l'ongle, et le bec ravissant 
Sur les dezirs dont ma poictrine est pleine, 
Rongeant mon coeur, qui meurt en renaissant, 
Pour vivre au bien et mourir à la peine. 
XII 
La docte main, dont Minerve eust appris, 
Main dont l'yvoire en cinq perles s'allonge, 
C'est, ô mon coeur! la lyme qui te ronge, 
Et le rabot qui polist mes escris. 
Les chastes yeux, qui chastement m'ont pris, 
Soit que je veille, ou bien soit que je songe, 
Ardent la nuict de mon oeil, qui se plonge 
Au centre, où tend le rond de mes espris. 
L'esprit divin, et la divine grace 
De ce parler, qui du harpeur de Thrace 
Eust le ennuiz doulcement enchantez, 
Vous ont donné la voix inusitée 
Dont (ô mes vers) sainctement vous chantez 
Le tout-divin de vostre Pasithée. 
XIII 
Puis que la main de la saige nature 
Bastit ce corps, des graces le sejour, 
Pour embellir le beau de nostre jour 
De plus parfaict de son architecture: 
Puis que le ciel trassa la protraiture 
De cet esprit, qui au ciel faict retour, 
Habandonnant du monde le grand tour 
Pour se rejoindre à sa vive peincture: 
Puis que le Dieu de mes affections 
Y engrava tant de perfections, 
Pour figurer en cete carte peinte 
L'astre bening de ma fatalité, 
J'appen' ce voeu à l'immortalité 
Devant les pieds de vostre image saincte. 
  
XIV. L'adieu aux muses pris du latin de Buccanan 
L'adieu aux muses 
Pris du latin de Buccanan 
Adieu, ma Lyre, adieu les sons 
De tes inutiles chansons. 
Adieu la source, qui recrée 
De Phebus la tourbe sacrée. 
J'ay trop perdu mes jeunes ans 
En voz excercices plaisans: 
J'ay trop à voz jeuz asservie 
La meilleure part de ma vie. 
Cherchez, mes vers, et vous aussi, 
O Muses, jadis mon souci! 
Qui à voz doulceurs nompareilles 
Se laisse flatter les oreilles. 
Cherchez qui sou' l'oeil de la nuyt, 
Enchanté par vostre doulx bruit, 
Avec' les Nymphes honnorées 
Danse au bal des Graces dorées. 
Vous trompez, ô mignardes Soeurs! 
La jeunesse par voz douceurs: 
Qui fuit le Palais, pour elire 
Les vaines chansons de la Lyre. 
Vous corrompez les ans de ceux 
Qui sou' l'ombrage paresseux 
Laissent languir efeminée 
La force aux armes destinée. 
L'hyver, qui naist sur leur printens, 
Voulte leur corps devant le tens: 
Devant le tems l'avare Parque 
Les pousse en la fatale barque. 
Leur teinct est tousjours palissant. 
Leur corps est tousjours languissant. 
De la mort l'efroyable image 
Est tousjours peinte en leur visage. 
Leur plaisir traine avecques luy 
Tousjours quelque nouvel ennuy: 
Et au repos, où ilz se baignent, 
Mile travaux les accompaignent. 
Le miserable pïonnier 
Ne dort d'un sommeil prisonnier: 
Le nocher au milieu de l'onde 
Sent le commun repos du monde: 
Le dormir coule dans les yeux 
Du laboureur laborieux: 
La mer ne sent tousjours l'orage: 
Les vens appaizent leur courage. 
Mais toy sans repos travaillant, 
Apres Caliope baillant, 
Quel bien, quel plaisir as tu d'elle, 
Fors le parfun d'une chandelle? 
Tu me sembles garder encor' 
Les chesnes se courbans sou' l'or, 
Et les pommes mal attachées, 
Par les mains d'Hercule arrachées. 
Jamais le jour ne s'est levé 
Si matin, qu'il ne t'ayt trouvé 
Resvant dessus tes Poëzies 
Toutes poudreuses et moizies. 
Souvent, pour ung vers allonger, 
Il te fault les ongles ronger: 
Souvent d'une main courroussée 
L'innocente table est poussée. 
Ou soit de jour, ou soit de nuyt, 
Cete rongne tousjours te cuyt: 
Jamais cete humeur ne se change: 
Tousjours le style te demange. 
Tu te distiles le cerveau 
Pour faire ung poëme nouveau: 
Et puis ta Muse est deprizée 
Par l'ignorance authorizée. 
Pendant, la mort qui ne dort pas, 
Haste le jour de ton trespas: 
Adonques en vain tu t'amuses 
A ton Phebus, et à tes Muses. 
Le Serpent, qui sa queue mord, 
Nous tire tous après la mort. 
O fol, qui haste les années, 
Qui ne sont que trop empennées! 
Ajouste à ces malheurs ici 
De pauvreté le dur souci: 
Pesant fardeau, que tousjours porte 
Des Muses la vaine cohorte: 
Ou soit que tu ailles sonnant 
Les batailles d'un vers tonnant: 
Ou soit que ton archet accorde 
Un plus doulx son dessus ta chorde: 
Soit qu'au thëatre ambicieux 
Tu montres au peuple ocieux 
Les malheurs de la tragedie, 
Ou les jeuz de la comedie. 
Sept villes de Greces ont debat 
Pour l'autheur du Troyen combat: 
Mais le chetif, vivant, n'eut onques 
Ny maison ny païs quelquonques. 
Tytire pauvre et malheureux 
Regrete ses champs planteureux: 
Le pauvre Stace à peine evite 
De la faim l'importune suyte. 
Ovide au Getique sejour, 
Faché de la clarté du jour, 
De son bannissement accuse 
Ses yeux, ses livres et sa Muse. 
Mesmes le Dieu musicien 
Sur le rivage Amphrisien 
D'Admete les boeufz mena paistre 
Et conta le troppeau champestre. 
Mais fault-il, pour les vers blâmer, 
Nombrer tous les floz de la mer? 
Et toute l'arene roulante 
Sur le pavé d'une eau coulante? 
Malheureux, qui par l'univers 
Jeta la semence des vers: 
Semence digne qu'on evite 
Plus que celle de l'aconite. 
Malheureux, que Melpomené 
Veid d'un bon oeil, quand il fut né: 
Luy inspirant dès sa naissance 
De son sçavoir la congnoissance. 
Si le bonheur est plus amy 
De celuy qui n'a qu'à demy 
Des doctes Soeurs l'experience, 
O vaine, et ingrate science! 
Heureux et trois, et quatre fois 
Le sort des armes et des lois: 
Heureux les gros sourcils encore' 
Que le peuple ignorant adore. 
Toy, que les Muses ont eleu, 
De quoy te sert-il d'estre leu, 
Si pour tout le gaing de ta peine 
Tu n'a qu'une louange vaine? 
Tes vers sans fruict, laborieux, 
Te font voler victorieux 
Par l'esperance, qui te lie 
L'esprit d'une doulce folie. 
Tes ans, qui coulent ce pandant, 
Te laissent tousjours attendant: 
Et puis ta vieillesse lamente 
Sa pauvreté, qui la tormente: 
Pleurant d'avoir ainsi perdu 
Le tems au livres despandu, 
Et d'avoir semé sur l'arene 
De ses ans la meilleure grene. 
Donne congé, toy qui es fin, 
Au cheval qui vieillist, afin 
Que pis encor' ne luy advienne, 
Et que poussif il ne devienne. 
Que songe'tu? le lendemain 
Du corbeau n'est pas en ta main. 
Sus donq', la chose commencée 
Est plus qu'à demy avancée. 
Malheureux, qui est arresté 
De vieillesse, et de pauvreté. 
Vieillesse, où pauvreté abonde, 
C'est la plus grand' peste du monde. 
C'est le plaisir que vous sentez, 
O pauvres cerveaux evantez! 
C'est le profit qui vient de celles 
Que vous nommez les neuf Pucelles. 
Heureuses nymphes, qui vivez 
Par les forestz, où vous suyvez 
La saincte Vierge chasseresse, 
Fuyant des Muses la paresse, 
Soit donq' ma Lyre ung arc turquois: 
Mon archet devienne ung carquois: 
Et les vers, que plus je n'adore, 
Puissent traictz devenir encore'. 
S'il est ainsi, je vous suivray, 
O nymphes! tant que je vivray: 
Laissant dessus leur double croppe 
Des muses l'ocieuse troppe. 
COELO MUSA BEAT 


Source: http://www.poesies.net