Mathilde  
Par Mlle de Scudéry (Madeleine) (Sapho)



Mathilde
i' escris l' histoire de
Mathilde d' Aguilar, où
l' ambition, l' amour et
la haine, le vice et la
vertu, ont produit des evenemens
assez remarquables pour la faire
lire avec quelque vtilité et quelque
plaisir: mais qui se trouve tellement
meslée à celle de toute la
Castille, qu' on ne m' entendroit
pas, si je n' expliquois auparavant
en peu de mots, quel estoit dans
ce royaume l' estat du gouvernement
et des affaires en ces
temps-là.



Aprés la mort de Ferdinand
quatriesme, et durant les premieres
années du ieune Alphonse
treisiesme son fils, le royaume
comme sous vne minorité, ne
manqua pas d' estre agité de factions
differentes. Les principaux
chefs estoient dom Iuan et dom
Manuel, princes puissans et ambitieux,
avec dom Ferdinand de
la cerde grand maistre de Castille;
tous aspirans à gouverner,
et dans ce dessein, quelquefois
vnis, quelquefois divisez; tantost
sousmis, tantost opposez à
la reine mere: dont la mort survenuë
quelque temps aprés, au lieu
d' appaiser ces desordres ne fit que
les augmenter. Mais ce roy devenu
majeur, agissant par luy-mesme,
et monstrant autant de courage
que d' habileté, sembla devoir



bientost changer toutes choses en
mieux. Il avoit la pluspart des
qualitez d' vn excellent prince, et
l' on en eust trouvé peu à souhaiter
en luy, si la passion de sa grandeur
estouffant dans son esprit toutes
les autres, ne luy eust fait prendre
son interest pour regle vnique de
ses actions, ou luy eust laissé connoistre
qu' aux rois encore plus
qu' aux particuliers, la bonne reputation
est le premier interest du
monde. Car n' aimant, ne haïssant,
et ne gardant sa parole qu' autant
qu' il le croyoit avantageux pour
chaque dessein particulier, il rendit
sa vie non seulement moins
glorieuse, mais aussi moins heureuse.
Il flatta d' abord en mille
manieres les deux princes dom
Manuel et dom Iuan, rejettant
sur autruy tous les mescontentemens



qu' ils pouvoient avoir receus:
mais le dernier estant revenu
à la cour sur ces belles esperances,
il le fit assassiner dans vn
festin. Depuis ce temps il ne manqua
presque jamais d' ennemis, ni
la Castille de nouveaux troubles.
Dom Manuel plus sage que son
amy, se tint dans vne place tres-forte,
dont rien ne luy put jamais
persuader de sortir. En vain le
roy luy fit diverses propositions,
et s' engagea solennellement à
espouser sa fille nommée Constance
qui estoit tres-belle. L' exemple
de dom Iuan l' instruisoit,
il n' ignoroit pas mesme que le
roy aimoit Leonore de Gusman,
et traitoit encore secretement d' vn
autre costé son mariage avec l' infante
de Portugal, qui s' accomplit
quelque temps aprés. Il ne pensa



donc aprés cela qu' à se deffendre
en se liguant avec les rois de Grenade
et d' Arragon, et donnant sa
fille Constance à dom Rodolphe
d' Aguilar, d' vne des grandes
maisons de Castille, tres-brave et
dans les mesmes interests que luy.
Constance qui avoit esperé d' estre
reine, ne consentit qu' avec peine
à ce mariage; et enfin forcée
d' obeïr, eut quelque consolation
de voir que son pere pensoit à se
venger. Tous ces princes declarerent
la guerre au roy de Castille,
qui estant menacé en mesme
temps par les Maures, se vit à la
veille de son entiere ruine, et contraint
d' accorder à dom Manuel
presque tout ce qu' il demandoit.
Ie ne veux pas m' engager plus
avant dans le détail de la vie de
ce roy: il suffit de remarquer que



sa conduite perpetuelle fut de se
tirer tres-habilement des plus
mauvaises conjonctures, ceder au
temps, tout accorder quand il
estoit pressé, s' en souvenir peu
quand les choses avoient changé
de face; au lieu de faire la guerre
pour avoir la paix, ne faire jamais
de paix que pour reprendre plus
avantageusement la guerre; satisfaire
les mescontents quand il ne
les pouvoit perdre, en faire de
nouveaux aussitost aprés pour des
vtilitez presentes, se confiant en
son adresse pour le danger avenir.
De ce nombre furent dom Nugnez
de Lara, dom Fernand de
Castro, dom Iean Alphonse d' Albuquerque,
qui se retirans de la
cour se joignirent à dom Manuel,
alors dans vne nouvelle rupture
avec le roy, aprés plusieurs



raccommodemens, plusieurs paix,
et plusieurs tréves. Mais le roy
ayant employé à negocier dom
Albert de Benavidez, personne de
qualité, regagna Albuquerque et
Castro, et voyant que les deux
autres ne vouloient plus se fier à sa
parole, il se resolut de les poursuivre
avec vigueur. Il assiegea Nugnez
de Lara dans Lerma, le contraignit
de se rendre et de s' accommoder.
Il envoya des troupes
nombreuses sous la conduite du
grand maistre de saint Iacques
de Calatrave et d' Alcantara, contre
dom Manuel, qui se trouvant
abandonné de tous les autres, et
ne voyant nulle seureté aux propositions
qu' on luy faisoit, sortit
du royaume, et aima mieux vn
exil perpetuel. Il prévoyoit mesme
deslors que le jeune prince



qui devoit vn jour succeder au
roy, auroit les inclinations plus
violentes que luy; en effet c' est
celuy que l' histoire d' Espagne appelle
dom Pedro le Cruel: et qui
jusques dans les premiers jeux de
son enfance faisoit connoistre qu' il
meriteroit vn jour ce nom. Dom
Albert de Benavidez qui avoit negocié
tous ces accommodemens,
devenu par là mesme en quelque
sorte suspect au roy, n' en fut guere
mieux traité; mais prevenant
sa disgrace, il se retira adroitement
à Palentia, car il en estoit
gouverneur, et ne pensa plus
qu' à bien élever vn fils vnique,
dont il avoit passionnément aimé
la mere. Quant à dom Rodolphe
d' Aguilar mari de Constance,
quoy que d' vn courage grand et
élevé, il s' estoit brouïllé quelques



années auparavant avec dom Manuel
son beaupere, pour avoir des
sentimens plus moderez que luy:
et voyant sa patrie toûjours divisée,
qu' il ne pouvoit prendre
parti sans servir contre les siens
ou contre son prince, qu' il n' y
avoit ni probité à faire de ses
interests particuliers la cause publique,
ni prudence à s' opposer
aux desseins du souverain, quoy
qu' injustes: il avoit fait volontairement
ce que dom Manuel fut
contraint de faire depuis par force,
et s' estoit retiré avec Constance
sa femme et Mathilde leur fille
vnique, à la cour de Rome,
qui estoit alors en Avignon, attiré
tant par la douceur du climat,
que par l' ancienne et estroite amitié
de sa maison avec celle des
colonnes. Cette cour estoit magnifique



et tranquile, et la politesse
se trouvoit alors incomparablement
plus grande en ce lieu
là qu' en nul autre, particulierement
parmi les dames, à qui seules
on doit le bel vsage du monde,
et la veritable galanterie.
Mais entre vn grand nombre de
belles personnes, il y avoit vne fille
celebre pour sa beauté, pour son
esprit, pour sa vertu, et de qui le
nom a rempli toute la terre, par
l' amour extrême que le fameux Petrarque
eut pour elle. Cette cour
estant composée des plus honnestes
gens de Provence et d' Italie, ne
pouvoit pas manquer d' estre tres-agreable;
Laure qui estoit de tres-bonne
maison, avoit vne tante
qui estoit de la maison des Gantelmes,
auprés de qui elle demeuroit,
et qui avoit vn merite extrême.



Ce n' estoit pas vne de ces
tantes qui ressemblent à des meres,
elle n' avoit que trois ou quatre
ans plus que Laure; elle estoit
belle, elle sçavoit beaucoup de
choses agreables, elle faisoit des
vers agreablement aussi bien que
Laure, et sçavoit le monde parfaitement;
elle aimoit sa niepce
avec beaucoup de tendresse, et en
estoit aimée de mesme; et l' on
voyoit chez ces deux personnes
tout ce qu' il y avoit d' honnestes
gens en cette cour: il se mit
mesme de leur societé douze autres
dames qui estoient inséparables,
et qui avoient toutes beaucoup
de merite. Les vnes estoient
de l' illustre maison de Forcalquier,
les autres de Baulx, d' Ancezune,
aujourd' huy Caderousse,
de Vence, d' Agoult, de Trans,



de Salon, et de plusieurs autres
tres-considerables. Les comtes de
Ventimille et de Tende alloient
tres-souvent exprés en Avignon
pour jouïr des douceurs de cette
charmante societé, et les deux
amis intimes de Petrarque, Sennucio
et le comte d' Anguillara,
estoient de tous les divertissemens
de cette agreable troupe. On s' accoustuma
mesme à proposer parmi
ces dames des questions galantes
et ingenieuses, qui servoient
beaucoup à faire paroistre
l' esprit de toutes ces belles, de
sorte qu' en peu de temps on appella
cette societé la cour d' amours,
et cela produisit cent agreables
choses: car il y avoit en
ce temps vn nombre infini de
gents d' esprit en ce lieu-là; il s' y
trouvoit des gens d' vn sçavoir sublime,



d' autres qui se contentoient
des sciences agreables. Il
y avoit mesme vn homme d' vn
grand merite, appellé Anselme,
qui estoit tres-sçavant en astrologie,
et qui avoit prédit au roy
Robert tous les malheurs de la
reine Ieanne sa fille; il predit
aussi que l' amour de Petrarque et
de Laure seroit eternelle. Voilà
donc quelles estoient les plus considerables
personnes avec qui Rodolphe
et Constance chercherent
à faire amitié; et quoy que Mathilde
n' eut encore que dix ans, sa
mere desira passionnément qu' elle
fust souvent auprés de Laure. Pour
cét effet elle fit amitié avec la
tante de Laure, chez qui elle demeuroit,
et comme Mathilde
estoit infiniment aimable, et qu' elle
ressembloit mesme vn peu à



cette admirable fille, excepté
qu' elle n' estoit pas si blonde, on
l' appelloit quelquefois la petite
Laure, et elle vint à en estre si
tendrement aimée, qu' on ne les
voyoit jamais l' vne sans l' autre.
Laure estoit encore alors dans sa
plus grande beauté; il seroit inutile
de la descrire, il ne faut que lire
les ouvrages de Petrarque pour
sçavoir ce qu' estoit cette personne,
dont les charmes surpassoient
de beaucoup la beauté, et dont la
vertu et la constance ne pouvoient
estre surpassées. Comme Petrarque
remarqua que Laure aimoit
tendrement la jeune Mathilde, il
prit plaisir à luy former l' esprit,
et il disoit vn jour en riant, que
puisqu' il n' avoit pû donner de l' amour
à Laure, il vouloit du moins
faire naistre vne grande amitié



dans son coeur pour Mathilde, afin
de tascher de l' accoustumer à aimer
quelque chose. Le dessein de
Petrarque reüssit facilement, la
jeune Mathilde estoit belle, charmante,
pleine d' esprit, d' vne humeur
complaisante et douce, ayant
du jugement au delà de son âge,
vne belle voix, et pardessus tout
cela elle estoit fille d' vne mere
infiniment aimable, et extrémement
malheureuse. En effet Constance
n' avoit jamais pû se consoler
de n' avoir pas esté reine de
Castille: elle s' estoit mariée par
obeïssance, de sorte qu' encore
qu' elle vescust parfaitement bien
avec Rodolphe, on peut dire
qu' elle l' avoit plustost aimé par
vertu et par devoir, que par choix
ni par inclination: elle voyoit
dom Manuel exilé et malheureux,



et Rodolphe mal avec luy; et bien
qu' elle fust encore tres-belle, sa
melancholie luy faisoit negliger sa
beauté et aimer la solitude, n' ayant
nulle autre pensée dans l' esprit
que de bien élever Mathilde.
Elle eut donc beaucoup de joye
de voir que Laure la prenoit en
si grande amitié, sçachant bien
qu' il n' y avoit pas vne personne
au monde plus sage, plus
modeste, et plus vertueuse: car encore
que Laure eust donné de l' amour
à tous ceux qui l' avoient
veuë, et que la constante passion
de Petrarque fust connuë de toute
la terre, l' envie respectoit vne si
vertueuse affection, et l' on peut dire
que c' est la premiere fois qu' on
a veu vne amour sans avoir besoin
de secret. Mathilde estoit donc inseparable
de Laure, elle parla admirablement



bien la langue provençale,
qui estoit alors en reputation
par tout, ayant eu de tres-ingenieux
poëtes que les plus fameux
d' Italie n' ont pas dédaigné d' imiter,
et dont les ouvrages en grand
nombre se trouvent encore écrits
à la main dans vne des principales
villes de ce royaume. Elle sceut
aussi l' italien en six mois, et l' on
peut dire que Petrarque le luy apprit:
car elle sçavoit tous les vers
qu' il avoit faits pour Laure, et les
recitoit de la meilleure grace du
monde; aussi Petrarque disoit-il
quelquefois, qu' il ne trouvoit ce
qu' il avoit fait supportable, que
dans la bouche de Mathilde. Cette
jeune personne estoit de toutes les
parties de plaisir qui se faisoient:
et tout le monde remarquant que
Laure et Petrarque prenoient tant



de soin de Mathilde, disoit que
l' esprit de cette jeune fille seroit
leur vnique enfant: car on jugeoit
bien qu' ils ne se marieroient jamais.
Quelquefois dans la belle
saison, la tante de Laure alloit à
Vaucluse si celebre par la merveilleuse
fontaine de mesme nom, dont
Petrarque a tant parlé, qui tantost
haute et tantost basse, forme toute
seule vne des plus belles rivieres
qu' on puisse voir, et par mille
boüillons d' eau qui partent impetueusement
d' auprés d' elle, sans
troubler la tranquillité de sa source,
fait des cascades naturelles
qui rendent la vallée de Vaucluse
la plus delicieuse du monde. La
maison de Laure estoit en ce lieu-là,
et Petrarque en avoit vne tout
proche sur vne petite éminence;
de sorte que si la modeste rigueur



de Laure ne se fust pas opposée à
sa felicité, il eust pû avoir mille
commoditez de l' entretenir en particulier.
Mais bien que Laure eust
pour luy la plus grande estime
qu' elle pûst avoir, et toute la tendresse
dont elle estoit capable;
elle vivoit avec tant de retenuë,
que sans luy faire jamais nulle
rudesse, on peut dire qu' il n' avoit
pourtant jamais sujet d' en estre
tout à fait content. Aussi ne voit-on
dans ses ouvrages que des plaintes
tendres et respectueuses; si
bien qu' encore que la jeune Mathilde
fust tous les jours avec les
plus galantes personnes du monde,
elle n' y voyoit rien qui ne fust
tres-propre à la porter à la vertu,
qui est assûrément d' autant plus
belle qu' elle est moins farouche.
Mathilde avoit alors douze ans,



et comme elle estoit adroite à toutes
choses, et que Laure aimoit si
fort les fleurs, qu' elle en avoit mesme
l' hiver; c' estoit elle qui luy
faisoit des bouquets et des guirlandes,
dont elle aimoit fort à se
parer, principalement quand elle
estoit à Vaucluse: de sorte que
Petrarque voyant vn jour Laure
toute couverte de fleurs les plus
galament rangées qu' il soit possible
de voir, se plaignit de la trouver
si belle et si rigoureuse, et fit
vn sonnet pour cela, qu' il pria la
jeune Mathilde de reciter à Laure.
Mais cette jeune personne entendant
fort bien raillerie, luy dit
qu' elle n' en feroit rien, que c' estoit
elle qui avoit cueilli et rangé les
fleurs, et que ce sonnet estoit vne
satire indirecte contre son adresse.
Il est vray, adjoûta-t-elle agreablement



en riant, que sans les fleurs
qui sont sur le beau teint de Laure,
vous ne vous plaindriez guere de
celles que j' ay cueillies: il y en a
déja de si belles sur le vostre, reprit
Laure en rougissant, que je
m' estonne que Petrarque ne s' en
plaigne plûtost que de celles que
vous avez cueillies. Ah Laure! Repliqua
Mathilde, je croy que
quand on se plaind de vous, on ne
se peut plaindre de nulle autre
personne; c' est-pourquoy vous me
voyez vivre avec Petrarque d' vne
autre façon que je ne fais avec le
comte d' Anguillara et tous les autres
hommes. Il est vray, repliqua
Laure, que j' ay remarqué que vous
fuyez les autres, ou que du moins
vous leur parlez peu; que vous prenez
vn petit air severe qui semble
déja se vouloir faire respecter,



quoy que vous soyez en vn âge,
où tout ce qu' on peut pretendre
d' ordinaire, est de commencer de
se faire aimer; et c' est pour cela,
Mathilde, que je vous loüe de vôtre
air modeste et retenu: car assûrément
c' est vn grand malheur de
se faire aimer, avant qu' on ait
assez de raison pour se faire craindre.
Mais il me semble avoir oüi
dire, reprit Mathilde avec vne ingenuité
charmante, en adressant
la parole à Petrarque, que lors que
vous commençâtes d' aimer Laure,
elle n' avoit que douze ans; dites
moy, je vous prie; si vous la craigniez
dés ce temps-là, et ce qu' elle
fit pour se faire craindre. Elle se
fit aimer, repliqua promptement
Petrarque, et aimer esperduëment:
ah, Mathilde, respondit Laure,
n' allez pas vous imaginer que tous



ceux qui vous aimeront, vous
craindront: car je vous assûre sincerement
que la pluspart des amants
d' aujourd' huy, ne craignent
point ce qu' ils aiment; de
sorte, repliqua Mathilde en riant,
que si jamais quelqu' vn s' avisoit
de m' aimer, et que je voulusse estre
assûrée de son affection, il ne faudroit
pas que je luy demandasse
s' il m' aime, il faudroit que je
luy demandasse s' il me craint. Laure
rit de ce que disoit Mathilde,
et l' embrassant tendrement,
croyez-moy, ma chere fille, luy
dit-elle, le plus seur sera de douter
de l' affection qu' on aura pour vous,
et quand vous n' en pourrez plus
douter, de deffendre vostre coeur
par vn sentiment de gloire. Mais
s' il estoit rebelle, repliqua Mathilde,
et qu' il se voulust rendre,



que faudroit-il faire? Il faudroit
cacher soigneusement sa défaite,
reprit Laure: car il n' est pas
de cela comme des autres guerres,
où l' on ne peut cacher qu' on
est vaincu. Ah! Madame, interrompit
Petrarque, on voit bien
que vostre coeur a tousjours esté
libre, et je vous défierois avec tout
vostre esprit de me cacher mon
bonheur vn seul moment, si j' avois
esté assez heureux pour estre
maistre de vostre coeur. Voulez-vous,
reprit Mathilde en riant, que
je sois vostre espion, et que je tasche
de sçavoir comme vous estes
dans le coeur de Laure: car il me
semble qu' il n' est point trop difficile,
elle paroist si sincere, si bonne,
quelle apparence y a-t-il qu' elle
puisse si bien cacher ses sentimens?
Ah! Belle Mathilde, repliqua



Petrarque, vous estes encore
trop jeune pour estre vn bon espion.
Ie pensois bien, reprit-elle,
que pour estre vn grand capitaine,
il faloit avoir vne longue experience;
mais pour vn espion, je
croyois qu' il suffisoit d' estre jeune,
hardi, et assez adroit. Mais puisque
je me trompe, soyez-le donc
vous-mesme. Laure et Petrarque
rirent de ce que disoit Mathilde:
et plusieurs dames estant arrivées,
Mathilde divertit toute la compagnie
le reste du jour. Cette belle
fille vescut de cette sorte jusqu' à
l' âge de quinze ans: et quoy qu' il
y eust cent choses galantes à dire
des premieres années de sa vie, je
les passe legerement; parce que j' en
ay de plus considerables à raconter.
Iusques là Mathilde avoit esté la
plus aimable enfant du monde;



mais elle fut alors la plus charmante
personne qu' on pût voir: et l' on
peut dire que si elle ne surpassoit
Laure, du moins elle l' égaloit,
quand les yeux mesme de Petrarque
en faisoient la comparaison.
Ce fut alors qu' elle devint effectivement
la premiere amie de Laure,
et de son illustre amant: car
son esprit s' estoit tellement avancé
dans la conversation continuelle
de tant de personnes excellentes,
que n' ayant pas esté nourrie
parmi des enfans, elle estoit sortie
de l' enfance beaucoup plûtost que
son âge ne le devoit permettre. Et
l' on peut dire à son honneur, ce
que Petrarque dit à plusieurs personnes,
que s' il n' eust pas aimé
Laure, il ne doutoit point qu' il
n' eust aimé Mathilde. En ce temps-là
le duc d' Anjou comte de Provence



fit vne feste magnifique en
vn lieu qui s' appelle Cavaillon, et
qu' il fit exprés pour voir ensemble
Laure et toutes ses amies; de sorte
que les douze dames qui
estoient tous les jours avec elle, en
furent; et Constance y mena sa
fille. Cette feste se fit en vne tres-belle
maison au bord de la Durance,
où tout ce qui peut contribuer
au plaisir, se trouva. Le lieu estoit
charmant par sa situation, la maison
estoit belle et bien meublée,
et les jardins delicieux: le repas
fut magnifique, et propre: la musique
excellente, et le lieu où l' on
mangea estoit parfumé de luy-mesme:
car c' estoit vn grand salon
de myrthe et de jasmin, environné
de plusieurs fontaines, dont
le doux murmure se méloit à l' harmonie,
sans la troubler. Lors que



toute cette belle compagnie arriva
dans divers chariots, que les hommes
de qualité accompagnoient
magnifiquement habillez et montez
sur les plus beaux chevaux du
monde; le duc d' Anjou emporté
par la grande beauté de Laure, la
salüa selon l' vsage de France, et
la salüa la premiere, quoy que la
plus grande partie des autres dames
fussent de plus haute qualité
qu' elle. Il est vray que Mathilde
estoit demeurée quelques pas derriere,
à cause qu' elle avoit eu quelque
chose à raccommoder à son
voile. Cét honneur que le duc fit
à Laure ne fit aucun dépit à toutes
ses compagnes: car on peut dire
que le merite de Laure estoit au
dessus de cette jalousie de beauté,
qui est presque inseparable de toutes
les belles. Mais pour Petrarque



il n' en fut pas de mesme, et il fit
vn sonnet sur cela, où en loüant
le jugement du duc, il fait connoistre
qu' il luy portoit envie; mais
aprés que le duc eut salué toutes
ces belles, et qu' il vit entrer Mathilde,
quoy, s' écria-t-il en avançant!
Est-il possible qu' il y ait vne
seconde Laure au monde? Ah, seigneur!
Repliqua-t-elle modestement,
j' aurois trop de vanité, si je
pretendois seulement luy ressembler
en quelque chose. Il y en a
sans doute vne, répondit le duc,
où je crois qu' il seroit difficile
que vous luy pûssiez ressembler;
mais à celle-là prés, je suis
persuadé par ce que je voy et par
ce que l' on m' a dit de vous, que
vous pouvez avoir le mesme avantage,
soit pour la beauté, pour l' esprit,
pour la voix, pour la bonne



grace, et pour cette vertu sociable
et charmante que Laure vient
d' apporter au monde, car on ne
l' y connoissoit pas auparavant.
Mais, aimable Mathilde, il ne
vous sera pas aisé avec tous vos
charmes de conquerir vn coeur,
comme celuy de Petrarque; ainsi
vous pouvez estre parfaitement aimable,
sans estre parfaitement aimée.
Ie voudrois bien, seigneur,
reprit Mathilde, estre aussi aimable
que Laure, à condition de n' être
jamais aussi aimée; et quand
on a resolu de n' aimer jamais rien,
je ne voy pas que ce soit vn grand
malheur de n' estre point aimée,
du moins de cette sorte d' affection:
car pour l' amitié je ne pretends
pas y renoncer. Comme Mathilde
parloit ainsi au duc, qui avoit
quitté Laure pour la salüer, dom



Fernand d' Albuquerque frere de
celuy qui s' estoit racommodé avec
le roy de Castille, arriva; il venoit
negocier quelque chose de la
part du roy son maistre touchant
la guerre des Maures. Aprés les
premiers complimens, le duc luy
dit qu' il ne pouvoit arriver plus à
propos pour connoistre dés le premier
jour tout ce qu' il y avoit de
plus beau en Provence, et luy
montra toutes les dames en general,
sans luy en presenter pas-vne
en particulier. Dom Fernand
charmé de la beauté de la jeune
Mathilde la salüa la premiere, durant
que Laure parloit à Petrarque
vers vn miroir. Toutes ces
dames ne s' en offenserent point,
et luy dirent qu' il devoit estre
bien aise de voir qu' vne belle de
Castille emportast le prix de la



beauté sur toutes les belles de Provence,
qui estoient alors les plus
belles personnes du monde. Petrarque
avoit vne soeur dans cette
troupe, qui passoit pour la plus
grande beauté d' Italie, mais elle
ceda pourtant à Laure, et à Mathilde,
aussi bien que toutes les autres.
Dom Fernand fut ravi de
voir vne personne de son païs: car
il ne parloit pas provençal, ni italien,
quoy qu' il entendist bien
l' vn et l' autre; de sorte que s' approchant
d' elle, vous avez si peu
l' air d' vne exilée, luy dit-il en espagnol,
que quoy que je sceusse
bien que vous estiez en Provence,
et que vous estiez parfaitement
belle, j' avoüe que je ne vous ay
pas connuë pour Espagnole quand
je vous ay salüée. Le lieu, où je
suis, reprit modestement Mathilde,



est si agreable qu' on peut l' appeller
la patrie de tous les honnestes gens;
de sorte que comme je
ne me suis veuë en Castille dans
mon enfance, que parmi des gens
de guerre et dans des villes assiegées,
il ne faut pas s' estonner si je
me trouve tres-heureuse de me voir
en vn païs de tranquilité et parmi
tant de dames accomplies, qui
ont la bonté de me souffrir. Mathilde
n' en dit pas davantage; car
elle sçavoit bien que Rodolphe n' avoit
pas esté content que dom
Iuan d' Albuquerque, frere de
dom Fernand, se fust accommodé
avec le roy de Castille comme
il avoit fait; et comme elle se r' approcha
de ses amies, il ne pût
luy parler plus long-temps. Aprés
le disner il y eut vne course de bague
où cét Espagnol parut avec



beaucoup d' adresse: il courut contre
les comtes de Tende et d' Anguillara.
Le duc d' Anjou donna
deux prix; le comte d' Anguillara
emporta le premier qu' il donna à
Laure maistresse de son ami; et
dom Fernand le second qu' il donna
à Mathilde, à qui Constance
commanda de le recevoir. Le reste
du jour se passa en promenade et
en conversation: et comme Petrarque
avoit l' esprit le plus naturel,
le plus sociable et le plus galand
du monde, il trouvoit tousjours
moyen en tous les lieux où il
se rencontroit, d' empécher que
personne ne s' ennuiast. Cependant,
toutes les dames s' en retournerent,
et les mesmes hommes
qui les avoient accompagnées les
escorterent. Pour dom Fernand,
il fut obligé de demeurer avec le



duc d' Anjou: mais comme ce
qu' il avoit à faire auprés de luy ne
pouvoit estre si tost resolu, il fut
passer quelque temps auprés de
Mathilde, dont la beauté l' avoit si
fort charmé, qu' il ne croyoit pas
avoir jamais rien veû de pareil en
toute l' Espagne; de sorte qu' encore
que naturellement il fust fier et
imperieux, il se resolut d' aller voir
Rodolphe afin de voir son incomparable
fille; et Rodolphe qui
commençoit de desirer de retourner
en son païs, et qui se lassoit
d' estre exilé, le receut mieux qu' il
n' eust fait en vn autre temps: il
n' en fut pas de mesme de Constance,
qui ne pouvant se resoudre
d' aller en Castille tant qu' Alphonse
y regneroit, le receut avec beaucoup
de froideur. Mathilde de son
costé eut pour luy vne civilité indifferente,



qui au lieu d' étouffer
cette flâme naissante qui estoit
dans son coeur l' alluma davantage;
car comme il estoit imperieux,
il vouloit vaincre tout ce qui luy
resistoit: de sorte qu' il forma le
dessein de faire durer sa negociation
autant qu' il pourroit. Et comme
il est bien plus aisé de faire
traîner vne affaire que de la finir,
celle qu' il avoit en Provence dura
plus de six mois, pendant lesquels
par sa qualité, par son esprit,
et par sa hardiesse, il fut de toutes
les parties de divertissement
qui se firent. Durant ce temps-là
Rodolphe commanda à Mathilde
d' avoir toute l' honneste civilité
qu' elle pourroit pour dom Fernand;
et Constance la conjura
quand Rodolphe n' y seroit pas,
de le traiter avec toute la rigueur



possible: car enfin, ma fille luy
dit-elle, je ne puis souffrir qu' on
me parle de retourner en Espagne:
songez que si Alphonse eust tenu
sa parole je serois reine de Castille,
et pensez que si nous y
retournions on nous regarderoit
comme des malheureux, à qui on
croiroit faire grace de les laisser
vivre. Vous avez sceû par dom
Fernand luy mesme, que le fils de
ce prince appellé dom Pedro, a
les inclinations les plus mauvaises
du monde, et qu' il est l' amant de
toutes les belles; auriez-vous le
courage assez bas pour souffrir
que le fils d' vn prince sans parole
entreprist de gagner vostre
coeur? Souvenez-vous du pitoyable
estat, où vous avez veû tous vos proches
dans vostre enfance, poursuivis,
assiegez, exilez; pensez que



dom Manuël à qui je dois la vie
est encore malheureux en Arragon:
souvenez-vous que ce mesme
roy qui fit assassiner dom Iuan,
aprés l' avoir rappellé, regne encore
où l' on vous veut mener. Cependant,
je connois bien que Rodolphe
pretend se servir de dom
Fernand, et faire agir dom Albert
de Benavidez, afin de commencer
quelque negociation pour nostre
retour: mais si j' ay du pouvoir sur
vous, et que vous ayez de l' amitié
pour moy, vous suivrez mes sentimens;
car je ne doute point que si
Rodolphe se confie au roy de Castille,
il ne le fasse assassiner comme
le prince dom Iuan. Il y va donc
de la vie de vostre pere et de mon
repos. Ie sçay bien que je ne suis
pas sur le throsne en Avignon:
mais du moins si je n' y suis pas reine,



je n' y suis pas sujette, et je suis
maistresse de moy et de vous: mais
en Castille je serois exposée à la
tyrannie, et vous aussi. Ie vous assure,
madame, reprit Mathilde,
qu' il me sera tres-aisé de maltraiter
dom Fernand; je le trouve si
imperieux que je craindrois fort
qu' vn tel esclave n' agist bien-tost
en tyran: mais je vous conjure de
faire en sorte que mon pere ne me
commande pas absolument de le
souffrir, afin que je vous obeïsse
avec plus de facilité. Laure s' apperceut
bien-tost de la passion de
Dom Fernand, et elle en parla à
Mathilde dans la pensée que peut-estre
cela pourroit faire rappeller
Rodolphe en Castille. Mathilde
confia alors à Laure ce que Constance
luy avoit dit. Vous pouvez penser,
luy dit Laure, que je seray tousjours



ravie de vostre satisfaction, et
que je consentirois à vous perdre,
pourveu que vous fussiez heureuse.
Mais, ma chere Mathilde, je doute
que le mariage soit propre à vous
le rendre, principalement avec vn
homme imperieux comme dom
Fernand. De grace, respondit Mathilde,
n' y faites point d' exception;
car dans l' aversion naturelle
que j' ay pour le mariage je vous
tiens la plus heureuse personne du
monde, d' estre aimée d' vn homme
qui par l' estat de sa fortune,
ne peut jamais vous espouser. Vostre
vertu, vostre conduite et vostre
bonheur, ont fait ensorte que
Petrarque vous aime sans que vostre
gloire en soit blessée. Vous
pouvez l' estimer infiniment sans
qu' on y trouve à dire: il est tres-bien
fait et tres-aimable, il est



estimé dans toutes les cours de
l' Europe: il a vne vertu solide et
sociable tout ensemble: ce n' est
pas vn de ces sçavans qui ne connoissent
que leurs livres, ni vn de
ces beaux esprits qui ne songent
qu' à divertir les autres ou à se divertir
eux-mesmes; c' est vn homme
capable de tous les grands emplois,
et des negociations les plus
importantes, quoy qu' il soit tres-propre
à toutes les choses galantes;
il a mesme ce bonheur que
son merite est vniversellement reconnu:
il porte vostre nom par
toute la terre: vous n' aurez jamais
nul interest qui vous puisse diviser;
nul des chagrins domestiques
qui troublent la tranquilité des
gens qui se marient, ne peut troubler
vostre repos: vous avez, s' il
est permis de parler ainsi, toutes



les fleurs de l' amour et de l' amitié
sans en avoir les espines, et je vous
trouve enfin, la plus heureuse personne
qui fut jamais. Il est vrai,
luy répondit Laure, que je suis infiniment
heureuse, ce n' est pas
que je ne croye possible de trouver
deux personnes qui vivroient
bien ensemble estant mariez: mais
je conviens que cela est tres-rare,
et que le plus grand malheur qui
puisse jamais arriver, c' est de s' épouser
lorsqu' on doit s' aimer moins qu' auparavant.
C' est-pourquoi je doute
si j' eusse pû me resoudre d' épouser
Petrarque, quand mesme l' estat de
sa fortune luy auroit permis de le
faire: car enfin, je soustiens que
quand il arrive que deux personnes
libres viennent à s' aimer moins
ou à ne s' aimer plus, elles sont
cent fois moins malheureuses, que



ne sont deux personnes qui sont
mariées. Quand on est libre, on
peut se haïr et ne se voir jamais,
on peut mesme quelquefois se venger
sans honte; mais quand on est
marié, l' honneur veut encore qu' on
s' aime, quoy que le coeur ne le veuïlle
plus, il faut estre inseparable
quand on voudroit ne se voir jamais,
et il faut avoir la douleur de
voir vne amour esteinte, ou pour
mieux dire, vne amour changée
ou en indifference ou en haine.
C' est-pourquoi, Mathilde, si vous
m' en croyez, songez plus d' vne
fois à vous engager pour tousjours,
et ne vous sacrifiez pas legerement
pour des interests de famille, qui
ne servent souvent de rien à la
douceur de la vie. Tous ceux qui
conseillent de se marier, ne songent
guere à ce qu' ils disent: la



pluspart ont quelque interest caché,
et quand cela ne seroit pas,
on doit en cette sorte de chose plus
donner à son inclination qu' à celle
d' autruy: il est mesme bon de se tirer
du commun des femmes, qui sont
d' ordinaire plus considerées pour
les enfans qu' elles donnent dans
leurs familles que pour leur propre
merite. Ah! Ma chere Laure,
reprit Mathilde, que je vous suis
obligée de me confirmer dans les
sentimens que j' avois déja, et je
vous promets qu' il m' en souviendra
toute ma vie. Laure luy monstra
en confidence des vers qu' elle
avoit faits contre le mariage, qu' elle
n' avoit jamais fait voir à personne,
et qu' elle ne voulut pas mesme
luy donner. Laure donna encore
vne amie à Mathilde, qui la
confirma dans les sentimens où



elle estoit; elle s' appelloit Berengere
d' Ancezune. Sa mere qui se
nommoit Alix d' Aramont eust
fort desiré qu' elle se fust mariée;
car estant belle, pleine d' esprit, et
d' vne maison tres-illustre, originaire
d' Allemagne, et alliée de toutes
les grandes maisons de Provence,
elle eust pû trouver vn party
tres-avantageux: mais elle la supplia
de ne l' y contraindre point.
Cette personne avoit vne belle soeur
appellée Belhiane, que Mathilde
estimoit fort: elle avoit la taille belle
et deliée, tous les traits regulierement
beaux, le tour du visage merveilleux,
les yeux bleus et charmans,
le sousrire fin, l' air noble
et delicat, et vne certaine negligence
sans affectation qui plaisoit
infiniment; elle avoit aussi les inclinations
tres-nobles et beaucoup



d' esprit, ne se souciant pas mesme
trop de le monstrer quoy qu' il parust
malgré elle. Cette belle personne
vint à la fin de la conversation
de Laure et de Mathilde avec
l' aimable Berengere, et elles la recommencerent
encore; de sorte
que Berengere se trouvant de mesme
avis, leur amitié en devint
plus forte. Le lendemain elles firent
vne partie de s' aller promener
en bateau sur la Sorgue assez proche
de l' endroit, où aprés s' estre
separée en trois bras, elle se reünit
pour s' aller ensuite jetter dans le
Rhosne. Elles furent donc douze
dames dans des chariots magnifiques
jusques au bord de la riviere,
où elles trouverent deux bateaux
que Petrarque avoit fait
preparer exprés. Ils estoient couverts
de branches de myrthe, et de



laurier entrelassées avec des festons
de fleurs, et partout des carreaux
pour les dames dans celuy
où elles entrerent; les hommes
estoient dans l' autre bateau qui
suivoit tousjours celuy de ces belles
d' assez prés pour faire conversation:
elles estoient toutes en habits
de couleurs differentes. Petrarque,
le comte d' Anguillara,
dom Fernand, le comte de Tende
et Anselme, estoient de cette
promenade. D' abord on parla de
la beauté du jour, de celle de la
riviere, et de cent choses indifferentes;
puis tout d' vn coup Mathilde
prenant garde qu' Anselme
révoit profondément, luy demanda
s' il faisoit l' horoscope de la promenade.
Cette expression fit rire
toute la compagnie, et comme Anselme
connut que Mathilde n' estoit



pas trop persuadée de l' astrologie:
ie voy bien, belle Mathilde, luy
dit-il, que vous voulez que ceux qui
vous approchent consultent plûtost
vos yeux que les estoiles, pour sçavoir
quel sera leur destin: mais quoiqu' ils
soient plus brillans qu' elles,
peut-estre devinerois-je mieux
que pas-vn de ceux qui les admirent,
ce que vostre coeur deviendra.
Ah! Pour mon coeur, reprit Mathilde,
je vous engage ma parole, qu' il
n' est point en la disposition des
astres, et qu' il sera tousjours en la
mienne. Vous en respondez bien
affirmativement, reprit dom Fernand.
Elle a le plus grand tort du
monde, respondit Anselme en soûriant,
et je luy prédis aujourd' huy,
que devant qu' il soit deux ans son
coeur sera plus rebelle à sa volonté
qu' elle ne le croit presentement.



Dom Fernand croyant déja qu' Anselme
avoit veû son bonheur dans
les étoilles, eut dessein d' estre son
ami intime: car il avoit entendu
dire cent choses de luy, qui luy
persuadoient qu' il ne pouvoit jamais
manquer en ses prédictions.
Pour moy, dit Mathilde, je n' ay
pas la vanité de croire que mes
aventures soient écrites dans le
ciel; et si tout ce qui arrive sur la
terre s' y voyoit écrit, on pourroit
dire que ce seroit le plus bizarre
livre qu' on eut jamais veû: et
bien loin d' apprendre l' astrologie
je voudrois la deffendre; car
aussi-bien dequoy serviroit de sçavoir
ce qu' on ne pourroit empescher;
c' est assez de recevoir le
bien et le mal quand ils arrivent.
Dom Fernand pensant estre bien
obligé à l' astrologie, se mit à la



soûtenir: mais quoy qu' il n' y sceust
rien du tout, ce fut d' vne maniere
decisive et imperieuse, qui n' avança
pas la conqueste qu' il vouloit
faire du coeur de Mathilde.
Cependant, cette belle vn peu irritée
de la prédiction d' Anselme,
luy dit qu' elle gageroit qu' il ne
sçauroit deviner ses propres aventures,
et qu' elle le luy prouveroit dans
peu de temps. Petrarque qui prenoit
plaisir à faire disputer Mathilde,
sembla se ranger du parti
d' Anselme, et luy dit: pour moy
belle Mathilde, qui ne consulte
point les astres, je ne laisse pas
de faire des prédictions aussi seures
que les astrologues ordinaires:
et quand je voy vne jeune personne
parfaitement belle, pleine
d' esprit, et qui a toutes les qualitez
qui peuvent charmer, je dis hardiment



qu' estant infiniment aimable
elle sera infiniment aimée:
mais je ne conclus pas pour cela
qu' elle doive infiniment aimer; car
j' en connois de jeunes, de belles,
d' accomplies en toutes choses, qui
sont infiniment aimables et infiniment
aimées, et qui n' ont jamais
rien aimé. Comme je suis
jeune sans estre belle, repliqua
Mathilde, je n' ay rien à respondre
à ce que vous dites; mais pour
Anselme, je luy declare la guerre
malgré toutes les intelligences
qu' il a au ciel. Vous me l' avez
peut-estre déja declarée sans le sçavoir,
reprit-il. Dom Fernand regardant
alors Anselme, craignit
qu' il ne fust son rival, et que ce
ne fust à luy que les astres fussent
favorables; de sorte qu' il changea
de parti, et dit autant de mal



de l' astrologie qu' il en avoit dit
de bien auparavant. Dans ce
temps-là Laure ayant apperceu
deux bateaux qui venoient vers
leur troupe, entendit tout à coup
vne musique excellente dans vn
des bateaux, et vit vne tres-belle
collation dans l' autre, servie
fort proprement dans des corbeilles
ornées de fleurs, sur vne table
qui tenoit toute la longueur du bateau.
Cette galanterie surprit toute
cette belle troupe, à la reserve
de la personne qui la faisoit, et
d' vne de ses amies. Et bien, dit
agreablement Mathilde, aviez-vous
prédit que vous seriez aujourd' huy
d' vne excellente collation,
et que vous entendriez vne
si bonne musique. Aprés cela,
comment voudriez-vous me persuader
que vous pussiez sçavoir si



mon coeur me sera rebelle; puisque
vous ignorez vn evenement
où vous avez plus de part que vous
n' en aurez jamais en mon coeur.
Tout le monde rit de ce que disoit
Mathilde; mais Anselme ne
laissa pas de soûtenir ce qu' il avoit
avancé. Cependant, toutes les dames
firent approcher ces deux bateaux,
et remarquerent qu' il y
avoit vne inscription attachée à la
voile de chacun; celle du bateau
où estoit la musique estoit telle:
la riviere de Sorgve
aux nymphes de Vaucluse.
Si mon murmure estoit plus doux,
quand je roule mes flots sur mes petits
cailloux,
vous n' auriez point d' autre harmonie:
cependant, telle que je suis,
i' endors quelquefois les ennuys



d' vn coeur brûlant d' amour dont la
joye est bannie.
Il ne tiendra qu' à vous d' en bannir les
douleurs,
ma source a moins de nom, que celle de
ses pleurs.
Pour moy, dit l' aimable Berengere,
je ne la connois pas, si ce
n' est Mathilde. Ie sçay bien, reprit
agreablement cette belle fille,
que ce n' est pas moy; mais il
faut le demander à Anselme qui
se vante de sçavoir toutes choses.
Non non, interrompit Petrarque,
il ne faut pas luy demander cela,
cét evenement est trop proche;
n' avez-vous pas pris garde qu' il y
a des maisons d' où l' on ne voit
pas les villages, qui sont scituez
au pied des montagnes, sur lesquelles
elles sont bâties, et qui cependant
découvrent vne fort grande



étenduë de pays. Mais voyons
vn peu, dit Laure, quelle est l' inscription
du bateau, où il y a vne
collation si magnifique. Toutes
ces dames la regarderent alors,
et virent ce qui suit.
La riviere de Sorgve
aux nymphes de Vaucluse.
Bel ornement de nos bocages,
ie vous offre des fruits sauvages,
tels que dans ce valon le soleil les
produit.
Vn mal-heureux amant les arrose de
larmes:
ie l' entends de mon lit soûpirer jour et
nuit,
et pour luy seulement mon desert est
sans charmes:
le silence le fuit, et mes plus chers
zephirs
font gloire de ceder à ses tendres
soûpirs.



Laure rougit aprés avoir achevé
de lire, et toutes les dames creûrent
que cette galanterie estoit
faite par Petrarque, qu' on sçavoit
estre naturellement liberal,
et que Mathilde en avoit esté la
confidente. Il ne le voulut pourtant
pas avouër; et en effet ces
vers ne se sont point trouvez parmi
les siens, et il affecta de faire
vn sonnet le lendemain, sur cette
promenade des douze dames, et
l' on le voit encore dans ses ouvrages.
Il y marque mesme que Laure
chanta admirablement bien,
aprés qu' elle fut sortie du bateau,
et qu' elle fut montée dans vn chariot
pour s' en retourner. En effet,
aprés que cette belle troupe eut
passé du bateau où elle estoit,
dans celuy où la collation estoit
preparée, et qu' elle eut écouté la



musique d' instrumens qui estoit
fort bonne, toutes ces dames
s' en retournerent sans sçavoir qui
avoit fait cette galanterie. Dom
Fernand s' imagina que c' étoit le
comte d' Anguillara, ou Anselme:
mais excepté luy toute la
compagnie creut que c' estoit Petrarque.
Cependant, comme Mathilde
ne trouvoit pas que Petrarque
eut assez pris son parti, elle
resolut de luy faire vne malice;
de sorte qu' aprés que Laure eut
chanté, elle se mit à chanter à
son tour vn couplet qu' elle avoit
fait sur le champ, en espagnol,
où elle avoit imité trois vers de
Petrarque. Elle s' excusa avant que
de chanter de ce qu' elle alloit dire
vne chanson qu' elle sçavoit devant
que de partir de Castille.
Laure qui estoit de cette confidence,



obligea Petrarque de la venir
écouter. Les chariots alloient
lentement, tous les hommes de
cette feste alloient à cheval le plus
prés qu' ils pouvoient: la lune
éclairoit, et le silence de la campagne
donnoit vn nouveau charme
à la voix de Mathilde, qui
chanta admirablement bien ce
couplet.
Nul ne sçait comme amour sçait blesser
et guerir,
qui ne sçait comme Iris parle, rit, et
soûpire:
heureux qui vit sous son empire,
et bienheureux encor ceux qu' on y
voit mourir!
A peine Mathilde eut-elle achevé
de chanter ce couplet, que
toute la compagnie connût que
les deux premiers vers estoient



presque tout semblables à trois
vers qui estoient dans vn sonnet
de Petrarque, que tout le monde
sçavoit; et luy-mesme en fut
si surpris qu' il ne put s' empescher
de tesmoigner son estonnement:
ah belle Mathilde! S' écria-t-il,
ou je suis le voleur, ou l' on m' a volé;
car la moitié de vostre chanson
est dans vn sonnet que je
crois avoir fait, jugez-en vous
mesme: voicy ce que j' ay dit en
ma langue naturelle,
non sa com' amor sana, e com'
ancide,
chi non sa, come dolce ella sospira,
e come dolce parla, e dolce ride.
I' avouë, dit Mathilde, que l' Espagnol
qui a fait la chanson vous
a volé, ou que vous avez fait
l' honneur à l' Espagnol de vous
servir de ce qui est à luy; car cela



se rencontre trop juste. Ie vous
assure, reprit Petrarque, tout embarassé,
et ne devinant point la
verité, que je n' ay jamais entendu
vostre chanson espagnole: et
cependant il y a si peu que le
sonnet est fait, que je ne croy
pas qu' il puisse avoir esté porté en
Espagne. Mais, reprit vne de ces
dames, Mathilde a dit qu' elle
sçait cette chanson devant que de
partir de Castille: si cela est, reprit
Petrarque, en riant, il faut
que je sois vn voleur: il est pourtant
constamment vray que je ne
le pensois pas estre: mais enfin,
disoit Mathilde le plus agreablement
du monde, cela ne s' appelle
pas larcin, c' est vne imitation digne
de loüange: et j' ay ouy dire
que tous ceux qui écrivent, soit
en vers, soit en prose, sont des



imitateurs perpetuels, ou de ceux
qui les ont precedez, ou de ceux
qui vivent en méme temps qu' eux.
Pour les morts, reprit Petrarque,
qu' on les imite tant qu' on voudra
j' y consens, et je fais mesme gloire
de les imiter de loin: mais
pour les vivans, il faut leur laisser
ce qui est à eux. Encore faut-il,
quand on prend quelque chose à
ceux qui ne sont plus, se donner
la peine de le prendre de bonne
grace. Et c' est proprement à ces
sortes de larcins, que je voudrois
employer la loy de Lacedemone,
qui permettoit le larcin à
ceux qui déroboient avec adresse,
et punissoit ceux qui déroboient
si grossierement, qu' on
reconnoissoit d' abord ce qu' ils
avoient volé. C' est-pourquoy je
serois bien aise de sçavoir au



vray, si c' est moy qui suis le voleur,
afin de me preparer à estre
puni; car j' avouë de bonne foy
que la chanson vaut mieux que le
sonnet: en effet, elle dit en deux
vers ce que je n' ay pû dire qu' en
trois. Comme je suis sincere, adjoûta-t-il,
je confesse que ne pouvant
venir à bout de bien peindre
la beauté de Laure, j' ay imité
vn des premiers poëtes du
monde, lors qu' il dépeind Venus
apparuë en nymphe à Enée: encore
ay-je esté plus hardi que luy;
car il n' osa parler des yeux de Venus,
et j' ay eu l' audace de parler
des beaux yeux de Laure. Mais ce
larcin que je fis, fut vn effet de la
crainte que j' eus de mal reüssir en
vne si belle entreprise. Laure voulant
par modestie détourner la conversation,
et voyant que Petrarque



estoit en peine, se resolut de finir
son inquietude, en faisant honneur
à Mathilde; c' est-pourquoy
appellant Petrarque, ne cherchez
point, luy dit-elle, qui vous a volé,
et voyez seulement celle qui
a trompé toute la compagnie en
voulant vous tromper. En disant
cela elle monstra Mathilde, qui
se tournant agreablement vers
Petrarque, luy dit que Laure railloit,
et que pour elle il n' y avoit pas
d' apparence qu' elle eust voulu faire
vne tromperie, en presence d' vn
homme qui voyoit tout dans les
étoilles. Vous connoistrez vn
jour, reprit Anselme, que je
n' y ay pas veû vne chanson, lors
que je vous ay parlé de la rebellion
de vostre coeur. Ensuite,
Laure ayant dit à toute la compagnie,
que Mathilde avoit fait



ce couplet à l' heure mesme, afin
de tromper Petrarque: toute la
compagnie la loüa, et Petrarque
luy dit, que si ce n' estoit qu' il
avoit fait vne espece de voeu, de
ne faire jamais de vers de galanterie
et de loüange, que pour
vne seule personne, il en auroit
fait pour elle. Tout le monde
l' admira, dom Fernand en devint
toûjours plus amoureux, et
Laure l' aima avec vne tendresse
infinie. Le lendemain de cette
promenade, Mathilde estant seule
avec Laure, se mit à louër Petrarque
de son respect pour elle,
et de sa fidelité en toutes choses;
car enfin, luy dit-elle, n' admirez-vous
point jusques où il la porte,
de ne faire jamais de vers
que pour vous: je trouve cela si
beau et si obligeant, que de l' humeur



dont je suis, vne pareille chose
me plairoit infiniment. En effet,
il n' y a pas vne belle qui ne
vous porte envie d' estre loüée par
Petrarque. Cependant, il m' entre
dans la fantaisie de le tromper
encore vne fois, si j' en trouve
l' occasion, pourveu que vous me
veuïlliez aider. Ces deux belles
personnes estoient alors assises auprés
d' vn balcon, qui donnoit
sur vn jardin, c' estoit vers le
soir. Et comme il faisoit chaud,
Mathilde avoit osté ses gants et
les avoit mis sur la balustrade;
Laure avoit aussi osté les siens.
Mathilde ayant alors avancé la
main sur cette balustrade où
estoient ses gants, elle en fit
tomber vn; de sorte que Petrarque
qui se promenoit avec le
comte d' Anguillara, l' ayant veû



tomber, voyant vne main fort
belle, et croyant que c' estoit vn
des gants de Laure, dont il voyoit
vne partie du visage, le fut relever,
et le garda. Mathilde ayant
par hazard tourné la teste, dans
ce moment-là, vit l' action de Petrarque,
et pria Laure de luy laisser
croire que ce gant estoit à
elle, ne doutant pas qu' il ne fist
des vers sur cela. Mathilde avoit
les mains aussi belles que Laure,
ainsi il n' estoit pas estrange que
Petrarque s' y fust trompé, et les
gants qu' on portoit en ce lieu-là
pendant l' esté, n' avoient rien
de remarquable. Vn moment
aprés, Laure cria à Petrarque qu' il
rendist le gant qu' il avoit pris: il
respondit qu' il le devoit à la fortune,
et que ce gant ne meritoit pas
le soin qu' elle prenoit de le luy



demander. Il adjousta que c' estoit
vn envieux de sa gloire, et que
s' il eust aussi bien trouvé son voile
que son gant, il ne le luy auroit
point rendu. Mathilde se méla
à cette conversation, le plus
agreablement du monde, et quoy
qu' on pust dire à Petrarque, il
emporta le gant. Il fit vn sonnet
fort ingenieux sur cette aventure.
Mathilde fit promettre à
Laure, qu' elle ne desabuseroit Petrarque
que quand elle le voudroit.
Le lendemain Petrarque fut
condamné à rendre le gant; et
voyant que Laure ne le mettoit
pas, il en eut vn leger despit, et
fit encore vn autre sonnet, et
Mathilde par son ingenieuse malice,
fit si bien, qu' elle l' engagea
à en faire vn troisiesme. Aprés
quoy, comme elles estoient cinq



ou six amies ensemble, elle demanda
à Petrarque s' il estoit bien
assuré de n' avoir jamais fait de
vers de galanterie et de loüanges
que pour Laure, il respondit
que cela estoit sceu et remarqué
de tout le monde. Ie suis assurée,
reprit Mathilde, de vous
prouver quand il me plaira,
que vous en avez fait pour vne
personne qui est infiniment au
dessous de Laure en merite:
nommez-la moy donc dit Petrarque?
Mais encore, reprit Mathilde,
pour qui pensez-vous avoir
fait les trois sonnets des gants?
Ce que vous me demandez, me
surprend, reprit Petrarque, je les
ay faits pour la belle personne qui
avoit laissé tomber le gant. Vous
les avez donc faits pour moy, reprit
Mathilde; car le gant est à



moy, aussi bien que la main que
vous vistes sur le balustre: et je vous
assure que si j' estois Laure, je trouverois
fort mauvais que vous n' eussiez
pas connu que ce n' estoit point
la sienne. Aprés cela, ne vantez
plus tant la fidelité de vostre
muse pour Laure; car qui prend
vne autre main pour celle de sa
maistresse, pourroit aussi prendre
quelque autre coeur au lieu du
sien. Petrarque fut si surpris de
ce que luy dit Mathilde, qu' avec
tout son esprit il se trouva vn
peu embarassé; car toute la compagnie
rioit, et l' amour extrême
de Petrarque luy persuadoit qu' en
effet c' estoit vn crime d' avoir pris
la main de Mathilde pour celle de
Laure, aussi se garda-t-il bien de
mettre jamais cette circonstance
dans ses vers. Cette surprise fut le



sujet de la conversation du reste
du jour. Le lendemain Laure et
Mathilde devoient s' aller promener
ensemble avec la belle Belliane
et quelques autres; mais il
arriva que la tante de Laure,
contre sa coustume, l' en empescha.
Cependant, la partie ne laissa
pas de s' achever. Petrarque ne sçachant
pas que Laure n' estoit point
avec ses amies, fut au bord du Rhône
où elles estoient: et comme il
fut surpris de ne voir pas Laure
avec elles, transporté de sa passion,
il leur demanda où elles alloient
ainsi gayes, resveuses, accompagnées
et seules tout ensemble.
Mathilde et ses compagnes
rirent de cette demande. C' est la
premiere fois, luy dit cette aimable
fille, qu' on a dit accompagnées
et seules, qu' on a parlé à



cinq ou six personnes, comme
si ce n' en estoit qu' vne. Mais je
voy bien, adjousta-t-elle en soûriant,
que parce que Laure n' est
pas icy vous nous contez toutes
pour rien. Cependant, pour vous
respondre plus precisément, vous
sçaurez que nous sommes gayes;
parce que nous nous souvenons
avec plaisir du merite de Laure:
que nous sommes resveuses; parce
que nous avons bien du regret
de ce qu' elle n' est pas icy. Pour
vous en consoler, sçachez que je
suis persuadée avoir veû dans ses
yeux qu' elle estoit bien faschée
de n' y venir pas. Petrarque s' approcha
alors de Mathilde, et luy
parlant bas, de grace, luy dit-il,
dites moy quelque chose qui me
persuade, que vous croyez que
j' ay quelque part au chagrin qu' a



Laure, de n' estre point de cette
partie. Vous seriez de si mauvaise
humeur, repliqua Mathilde,
si je vous disois que vous n' y en
avez point, que vous dis au
contraire, que vous y en avez
autant que moy. Ah! Madame,
luy dit-il, ne me détrompez jamais.
En suite de cela il passa
dans vne allée qui aboutissoit auprés
du Rhosne, et mit cette
petite aventure en vers. Aprés
quoy, il vint les dire à Mathilde,
qui les trouva fort agreables.
Laure en fut pourtant faschée, et
c' est en effet la seule chose, qui
dans la suite des temps, a fait dire
à plusieurs qui ont expliqué les
ouvrages de cét excellent homme,
qu' en cette occasion il avoit
paru estre assuré de l' affection de
Laure. Cela fait bien voir que les



femmes ne sçauroient avoir trop
de soin d' empescher, que des bagatelles
ingenieuses qu' on dit ou
qu' on escrit ne courent pas; car il
ne faut rien pour faire mal expliquer
les choses qu' on ne sçait
qu' à demi. Cette journée ne finit
pas aussi agreablement pour Mathilde
qu' elle avoit commencé:
car estant retournée chez elle, on
luy dit que Constance se trouvoit
mal. Elle entra dans sa chambre,
et la trouva encore plus affligée
que malade: elle luy dit
qu' elle sçavoit que dom Fernand
s' en retourneroit bien-tost, que
Rodolphe avoit sceu d' ailleurs
que dom Albert de Benavidez
negocioit pour luy, afin de tascher
de le faire retourner en Castille,
et qu' elle ne doutoit pas
que cela ne fust: elle commanda



à Mathilde de parler à dom Fernand,
et de tascher de rompre ce
dessein. Cette commission parut
tres-difficile à Mathilde: mais
comme elle estoit bien aise d' obeïr
à Constance, qu' elle craignoit
pour la vie de son pere,
qu' elle haïssoit dom Fernand,
qu' elle aimoit tendrement Laure,
qu' elle ne vouloit point se marier,
et que la vie qu' elle menoit en
Avignon luy estoit fort douce; elle
promit à Constance de faire tout
ce qu' elle pourroit. Desorte que le
lendemain, dom Fernand estant
allé chez Constance, et voyant
auprés d' elle la tante de Laure,
il se mit auprés de Mathilde,
qui voulant profiter de l' occasion:
i' ay sceû, luy dit-elle, que
vous devez bien-tost partir, pour
aller en Castille: il est vray, reprit



dom Fernand, que dés que
j' auray veû encore vne fois le prince,
auprés de qui j' ay eu quelque
affaire à negocier, je m' en retourneray,
et peut-estre, adjoûta-t-il,
seray-je assez heureux pour contribuer
à vous y faire retourner; et
quand je vous auray rendu quelque
service, je vous diray vne chose,
que je veux croire que toutes mes
actions vous ont déja dite, et nous
verrons alors, si la prediction d' Anselme
sera à mon avantage. Ie me
trouve si heureuse où je suis, reprit
Mathilde, que je n' ay nulle
envie de retourner en mon païs:
et pour ce que vous me dites
d' Anselme, je croy estre obligée
de vous dire que je suis tres-assurée
qu' il se trompera. C' est-pourquoy
ne faites nul fondement sur
sa prediction, ne vous rendez



point suspect au roy de Castille,
en luy parlant pour de malheureux
exilez. Il m' escoutera mieux,
reprit-il, quand je luy parleray
pour vne belle exilée comme
vous: mais afin qu' il sçache
mieux ce que vous estes, adjoûta-t-il,
je luy porteray vostre portrait.
En effet, dom Fernand
monstra à Mathilde vn portrait
qu' il avoit d' elle, sans qu' elle le
sceust, et qu' il avoit fait desrober
vn jour que Laure se faisoit peindre
par vn peintre de Siene, appellé
Simon, tres-celebre en ce
temps-là, comme il paroist par
deux sonnets que fit Petrarque
sur cette peinture que Laure faisoit
faire pour Mathilde, et dont
il eut vne copie. Mais durant
qu' on peignoit Laure, qui estoit
tres-difficile à peindre, principalement



parce qu' elle avoit vne
langueur modeste dans les yeux
qu' on ne pouvoit exprimer: vn
disciple de ce peintre qui sçavoit
bien dessigner, avoit pris en
crayon les traits de Mathilde; de
sorte qu' en deux ou trois fois il
desroba ce portrait qu' il vendit
bien cher à dom Fernand qui l' avoit
employé. Mathilde fut bien
surprise de voir son portrait entre
les mains de dom Fernand: elle
en fut en colere: elle le pria de le
lui donner, mais ce fut inutilement:
elle luy dit qu' elle en parleroit et
à Constance et à Rodolphe, et il
luy respondit qu' il ne le donneroit
jamais à personne, et s' en alla
sans luy laisser le temps de luy
rien dire davantage; et quatre
jours aprés il partit, estant tres-bien
avec Rodolphe. Constance



fut si affligée, et son mal en devint
si considerable, que les medecins
desespererent de sa vie: et
en effet elle mourut peu de temps
aprés, recommandant toûjours à
Mathilde de se ressouvenir des
choses qu' elle luy avoit dites. Rodolphe
fut fort touché de sa mort:
mais Mathilde en fut inconsolable;
et Laure et Petrarque luy
donnerent mille marques d' amitié
en cette rencontre. Deux mois
aprés dom Albert de Benavidez
et dom Fernand escrivirent à Rodolphe,
qu' il pouvoit retourner
en Castille, et que pour luy tesmoigner
qu' il pouvoit y estre en
seureté, le roy luy rendoit le
gouvernement de Lerma, qu' avoit
eu dom Manuel, à condition
que sa fille demeureroit à la
cour, ou auprés de la reine, ou



auprés de quelqu' vne de ses parentes;
car il en avoit plusieurs à
Burgos. Rodolphe fut ravi de cette
nouvelle, et Mathilde en eut
vne douleur mortelle; Laure en
fut si affligée qu' elle en pleura tendrement,
en presence de Petrarque
qui fit quatre sonnets sur la
beauté de ses larmes, que toute la
terre a sceus. En ce mesme temps
on escrivit à Petrarque, et de Paris
et de Rome, pour luy faire vn
honneur qui estoit sans doute fort
grand; puisqu' il s' agissoit de luy
donner vne couronne de laurier,
pour marque de la plus haute reputation
qu' on pûst avoir dans
l' empire des belles lettres. Mais
enfin, Laure voyoit bien qu' elle
alloit perdre tout à la fois, les
deux personnes du monde qu' elle
aimoit le mieux. Petrarque mesme,
tout glorieux qu' il estoit d' aller



estre couronné à Rome avec
beaucoup de ceremonie, souffroit
toutes les douleurs de l' amour et
de l' amitié, en prevoyant vne longue
absence; de sorte que les conversations
de ces trois personnes
qui avoient esté si douces, si enjoüées
et si agreables, devinrent
seulement tendres et tristes. Cependant,
le malheur de Mathilde
estoit sans remede, et elle voyoit
bien qu' elle seroit toûjours esloignée
de Laure qu' elle aimoit plus
que sa vie. Il falut pourtant obeïr;
car Rodolphe luy dit qu' il partiroit
avec elle dans huit jours. Mathilde
dit adieu à toute la ville, qu' elle
laissa en larmes. Le comte d' Anguillara,
le comte de Tende, et
Anselme en furent infiniment affligez.
Mais Laure et Petrarque
qui eurent ses derniers adieux, en



furent inconsolables. Il se rencontra
mesme, que Petrarque fut
obligé de partir le jour que Mathilde
partit: si bien que Laure
vit aller sa premiere amie en Castille,
et son amant à Rome.
Dans ce mesme temps Berengere,
pour s' oster entierement l' occasion
de se marier, se mit parmi
ces filles qui renoncent au monde
pour jamais, malgré les prieres
de la charmante Belliane: et
Laure se vit separée en mesme
jour des trois personnes du monde
qu' elle aimoit le plus. Aussi
eut-elle besoin de toute sa constance
pour supporter ce déplaisir.
Mais Mathilde quoy qu' elle
s' en retournast à sa patrie, n' en
estoit pas moins à plaindre: elle
en estoit partie si jeune, qu' on
peut dire, qu' elle n' y connoissoit



personne; la passion de dom
Fernand luy déplaisoit extrémement,
elle quittoit mille choses
agreables, et elle n' en prevoyoit
que de fascheuses au lieu où elle
alloit. Constance l' avoit eslevée
avec vne grande aversion pour
la cour d' Alphonse; aussi supplia-t-elle
Rodolphe de la mettre auprés
de quelqu' vne de ses parentes,
et non pas auprés de la reine,
afin d' estre moins exposée au
monde. Elle obtint ce qu' elle desiroit;
de sorte qu' en arrivant à
Burgos capitale de Castille-la-vieille,
il mena Mathilde chez
vne de ses parentes, appellée
Theodore, femme de dom Gonçales,
qui estoit alors en consideration
à la cour. Cette dame
avoit de l' esprit et de l' ambition, et
sçavoit fort bien le monde: elle receut



Mathilde avec beaucoup de
joye, et donna mille loüanges à
sa beauté, dés le premier jour
qu' elle la vit. Dom Gonçales avertit
dom Albert de Benavidez,
que dom Rodolphe estoit arrivé;
car il estoit alors dans son gouvernement
de Palencia. Mais
pendant que Rodolphe et Goncales
s' entretenoient, Theodore
ayant conduit Mathilde à l' appartement
qu' elle luy destinoit: ne
pensez-pas, luy dit-elle, estre inconnuë
à la cour de Castille,
dom Fernand y a monstré vn
portrait de vous, qui vous y a déja
fait beaucoup d' admirateurs, et
si ce n' estoit que le roy l' a envoyé
en quelque negociation secrette,
en Arragon, il m' auroit
sans doute aidé à vous recevoir:
mais du moins, reprit Mathilde



en rougissant, dom Fernand a-t-il
dit la verité, et sçait-on que c' est
vn larcin, et non pas vne faveur.
Dom Fernand, repliqua Theodore,
est imperieux et violent;
mais il n' est pas capable d' vne vanité
sans fondement; ainsi il a
avoüé de bonne foy qu' il avoit suborné
vn peintre, pendant qu' vne
fille de vos amies, dont il dit
des merveilles, se faisoit peindre.
Au reste, adjoûta Theodore, toute
la cour a veû vostre portrait,
les filles de la reine en ont déja
de la jalousie, elles se flatent
pourtant de l' esperance que ce
portrait vous fait plus belle que
vous n' estes: mais elles seront au
desespoir, quand elles verront
qu' il fait tort à vostre beauté. Cependant,
je croy qu' il est bon que
vous sçachiez l' estat de nostre



cour, avant que de la voir. Sçachez
donc, que la reine est vne
princesse qui a de tres-bonnes
qualitez, qu' elle est fort considerée
du roy, et ne l' est pas trop de
dom Pedro son fils, dont toutes
les inclinations sont violentes: je
ne dis rien des fils naturels du
roy, car ils sont fort jeunes: mais
l' on parle d' vn neveu de l' admiral
de Castille, fils de dom Albert
de Benavidez, qui doit revenir
bien-tost d' vn long voyage, qu' on
dit estre le plus honneste homme
du monde. On connoist assez-tost
les honnestes gens, reprit Mathilde,
quand on est vn peu du monde:
mais pour les femmes de la cour,
je ne serois pas marrie de sçavoir
avec lesquelles on peut faire plus
seurement amitié. Dom Fernand
d' Albuquerque, dit Theodore, a



vne soeur fort aimable, qui s' appelle
Elvire, mais elle a la reputation
de ne sçavoir pas trop bien aimer
ses amies. Il y a vne femme de
qualité, qui demeure assez prés
d' icy, qui se nomme Lucinde,
qui est vne des plus honnestes
personnes qu' on puisse voir, et il
y a vne de ses parentes auprés
d' elle, appellée Padille, qui est
belle, et bien faite, mais qui est
vne tres-dangereuse amie. Pour
les filles de la reine, elles sont
belles, et il y en a deux entre les
autres qui ont beaucoup d' esprit,
l' vne s' appelle Iacinte, et l' autre
Doristée. Pendant que Mathilde
et Theodore s' entretenoient, Rodolphe
et Gonçales parloient ensemble,
et le dernier instruisoit
son ami de quelle maniere il
se devoit conduire dans vne cour



qui avoit changé de face depuis
qu' il en estoit parti. Quoy qu' il fust
déja assez tard quand Rodolphe
estoit arrivé, on sceut pourtant
son retour dans Burgos, et le lendemain
il vit le roy et le prince,
et fut salüer la reine: il en fut
tres-bien receu, et demeura surpris
de voir que par-tout on luy parloit
de la beauté de sa fille. Cependant
Mathilde n' estant pas encore
habillée à l' espagnole, garda la
chambre deux jours, et fut visitée
de tous les hommes de la cour, qui
avoient accoustumé d' aller chez
Theodore. Dom Pedro, tout fier
qu' il estoit, fut fort civil pour
Mathilde, et la reputation de sa
beauté fut si grande, qu' on ne
parloit d' autre chose. Sa modestie
luy donnoit vn tres-grand éclat,
et elle affecta quand elle fut la



premiere fois chez la reine, de
ne se parer point, et de se fier à
ses propres charmes. Il est vray
qu' elle estoit fort propre, et habillée
d' vn si bon air, qu' il n' y
avoit rien de mieux. Aussi fut-elle
loüée de tous ceux qui la virent,
et les plus belles mesme furent
contraintes d' avouër, qu' on
ne pouvoit trouver nul defaut à sa
beauté. Le roy de Castille trouva
qu' elle ressembloit fort à Constance,
et loüa fort sa beauté. En
effet, Mathilde avoit de tres-beaux
yeux, vn beau teint, vne belle
bouche, la taille admirable, la
gorge bien faite, les mains belles,
et tres-bonne grace; de sorte
que dés les premiers jours elle
inspira et beaucoup d' amour et
beaucoup d' amitié. Mais pour elle,
tout ce qu' elle voyoit ne la consoloit



point de Laure. Lucinde fut
pourtant celle qu' elle creut qui
pourroit avec le temps estre la
confidente de la douleur qu' elle
avoit de l' absence de son incomparable
Laure; car elle ne comprenoit
pas en ce temps-là qu' elle
pûst jamais avoir d' autres secrets à
confier. Cependant dom Albert
de Benavidez ne put venir voir
Rodolphe, parce qu' il se trouvoit
mal; de sorte que quelques jours
aprés Rodolphe le fut voir à Palencia.
Ils renouvellerent leur ancienne
amitié; et parlant de leurs
interests et de l' estat de la cour
de Castille, ils convinrent que le
roy estant toûjours d' humeur méfiante,
et le prince dom Pedro
estant tres-violent, il n' y avoit
point de meilleur parti à prendre
pour n' estre point exposez à tous les



malheurs passez, que de ne se méler
de nulle intrigue, d' aller rarement
à la cour, et de demeurer
avec tranquilité chacun dans son
gouvernement. Mais pour se lier
d' interests, ils resolurent, sans en
parler à personne, de marier leurs
enfans ensemble; car comme je
l' ay déja dit, dom Albert n' avoit
qu' vn fils, qui s' appelloit dom
Alphonse, et qui devoit bien-tost
revenir. Rodolphe n' avoit aussi
que Mathilde, qu' il aimoit extrémement,
et il craignoit fort,
voyant le grand bruit que faisoit
sa beauté à la cour, que cela ne
luy nuisist, au lieu de luy servir.
Aprés avoir donc resolu cette alliance
ensemble, et s' estre promis
vn secret reciproque, ils se separerent.
Dom Albert demeura à Palencia,
qui est vn des plus agreables



lieux du monde: et Rodolphe
aprés avoir encore veû le
roy, s' en alla à Lerma, où il fit
son sejour ordinaire, laissant Mathilde
chez Theodore, comme le
roy l' avoit desiré. Cette belle fille
vint peu à peu à trouver quelque
consolation, en racontant à
Lucinde, qui l' aima d' abord fort
tendrement, quelle estoit l' agreable
vie qu' elle avoit menée en
Avignon: elle avoit le portrait de
Laure dans sa chambre, et tous
les vers de Petrarque dans son cabinet;
de sorte qu' au milieu de
tous les divertissemens d' vne grande
cour, elle faisoit ses plus
grands plaisirs, du souvenir de
deux personnes absentes: et Lucinde
entra si obligeamment dans
les sentimens de Mathilde, qu' elle
connut effectivement qu' elle



en estoit aimée, et en eut beaucoup
de reconnoissance. Durant cela
Rodolphe et dom Albert, avoient
souvent des nouvelles l' vn de l' autre:
le dernier escrivit à son fils,
qui aprés avoir veû toutes les
cours de l' Europe, s' estoit arresté
à deux journées de là, auprés de
l' admiral de Castille, son oncle,
qu' il trouva en vn port de mer où
il estoit allé pour sa charge. Dom
Alphonse luy avoit beaucoup d' obligation,
puisque c' estoit luy
principalement qui avoit porté
Dom Albert à le bien élever: il
avoit méme pris vn soin particulier
de son education, car non seulement
il luy choisit les meilleurs
maistres, mais aussi il voulut estre
son maistre luy-mesme, se faisant
rendre compte de ce qu' il apprenoit,
l' obligeant à raisonner



sur toutes choses, luy monstrant
comment on pouvoit appliquer à
l' action et au monde, tout ce que
les livres enseignent, et luy remettant
toûjours devant les yeux
les plus belles et les plus grandes
actions. Quelquefois mesme avant
que d' achever de luy conter vne
histoire, il luy demandoit ce qu' il
auroit fait en vne telle occasion,
ou en vne telle extrémité, afin
d' exercer son esprit et son courage
en mesme temps; de sorte que
par ce moyen il l' avoit rendu passionnément
amoureux de la gloire
et de la grande reputation, ne
pensant presque qu' à faire quelque
chose dont on parlast vn jour
avec loüange. Et comme il avoit autrefois
compris par sa propre experience,
que les voyages contribuent
beaucoup à former les honnestes



gens; il l' envoya sous la conduite
d' vn sage gouverneur, voir l' Italie,
l' Allemagne, la France, et l' Angleterre,
avec ordre que dans ses voyages
sa principale curiosité fust de
connoistre particulierement les
grands hommes en toutes sortes
de choses, de s' en faire aimer, et
d' apprendre de chacun ce qu' il
sçavoit le mieux. Dom Alphonse
ayant cette obligation à l' admiral
de Castille son oncle, eût bien voulu
s' arrester quelques jours auprés
de luy; mais recevant vn ordre precis
de se haster d' aller à Palencia,
il partit, et sans sca_voir ce que
dom Albert desiroit de luy, fut le
trouver en diligence, taschant de
deviner en chemin ce qui pouvoit
le faire rapeller si promptement.
Comme il n' avoit que de
l' ambition dans le coeur, il creut



que son pere avoit obtenu quelque
employ, qui luy donneroit
lieu de faire paroistre son esprit et
son courage; et il avoit vne impatience
extréme d' aquerir autant
d' honneur dans la cour de
Castille, qu' il en avoit aquis dans
toutes les autres cours où il avoit
passé. Car Alphonse profitant des
avis qu' il avoit receus, n' avoit pas
voiagé comme font certaines gens,
qui ne connoissent que les mers,
les fleuves, les montagnes, les villes,
le langage, et les habillemens
des pays, par lesquels il passent:
il connoissoit toutes les cours, il
s' estoit mesme signalé à la guerre
quand il en avoit trouvé occasion.
Et comme Philippe de Valois
roy de France, venoit de
faire vn edit, par lequel il permettoit
de se battre en combat



singulier, avec les conditions que
l' edit contenoit, dom Alphonse,
pour venger l' honneur d' vne
dame de qualité, s' estoit batu en
champ clos, contre vn des plus
vaillans hommes du monde, l' avoit
vaincu, desarmé, et luy
avoit donné la vie, aprés l' avoir
fait desdire de ce qu' il avoit avancé
contre la dame, dont il avoit
mal-parlé; de sorte que dom Alphonse
revenoit tout couvert de
gloire en son pays: aussi dom Albert
son pere le receut-il avec
de grands tesmoignages de joye
et d' affection. Mais dom Alphonse
fut extrémement surpris
et affligé, lors qu' il luy dit qu' il
l' avoit pressé de revenir plûtost
qu' il n' eust fait, parce qu' il le vouloit
marier. Ah! Seigneur, s' écria-t-il,
sans luy donner loisir



d' en dire davantage, je ne pourrois
pas souffrir que la premiere
chose qu' on dist de moy à la cour,
fust que je me vay marier, ce
n' est pas assurément pour cela que
vous m' avez permis de faire vn si
grand et si long voyage. Dom Albert
voulant expliquer à son fils les
raisons qui l' avoient porté à ce dessein,
luy dit que celle qu' il luy destinoit
estoit riche, belle, et que cette
alliance l' vnissant avec Rodolphe,
luy seroit tres-avantageuse dans la
suite. Seigneur, reprit dom Alphonse,
je croy que tout ce que
vous dites est tres-veritable; mais
si vous connoissiez mon coeur,
vous jugeriez pourtant que ce que
vous desirez de moy est impossible,
je suis nay pour la gloire et
pour l' ambition, et tellement ennemi
du mariage que je n' y puis



songer, sans vn chagrin que je ne
sçaurois exprimer, ne me forcez
donc pas à vous desobeïr, laissez
moy suivre mon inclination qui
me porte à la guerre, à la gloire,
à l' ambition, et à la liberté; car
quand je le voudrois entreprendre,
je ne sçaurois vous obeïr.
Dom Albert qui estoit violent, se
mit en colere, et luy dit qu' il ne
s' agissoit plus de consulter, que
c' estoit vne affaire resoluë entre
dom Rodolphe et luy, et qu' il
faloit qu' il tinst la parole qu' il
avoit donnée; que tout ce qu' il
pouvoit faire c' estoit de luy donner
huit jours pour se mettre en
equipage, afin d' aller à la cour et
de se faire voir à Mathilde. Dom
Alphonse se trouva dans vn embarras
extréme; son pere estoit
violent et absolu: il ne pouvoit



avoir dequoy subsister selon sa
condition et son humeur magnifique,
ni à la cour, ni en voyage,
si dom Albert ne le luy donnoit.
Mais il pouvoit encore moins
se resoudre en l' âge où il estoit à
se marier et à commencer à faire
parler de luy à la cour, par des
nopces, ni vaincre cette grande
aversion qu' il avoit pour le mariage.
Il fit parler à dom Albert par
plusieurs personnes; mais inutilement:
au contraire, Albert dit
qu' il avoit envoyé dire à Rodolphe,
que dés qu' Alphonse seroit
en equipage de paroistre dans le
monde, il iroit le voir, et en
suite voir Mathilde. Rodolphe de
son costé qui ignoroit les sentimens
de dom Alphonse, et mesme
ceux de sa fille, manda à
Theodore qu' elle disposast Mathilde



à bien recevoir vn homme
qu' il luy avoit destiné pour mary,
et qui l' iroit voir dans peu de
temps par son ordre. Mathilde
receut cette nouvelle avec vne
douleur extréme, vn moment
aprés qu' elle eut receu vne lettre
de Laure, qu' elle monstroit
à l' aimable Lucinde; car l' amitié
que Mathilde avoit dans le coeur
estoit presque aussi tendre que de
l' amour. Elle connoissoit l' humeur
de Rodolphe, et voyoit
bien que ses plaintes et ses larmes
seroient inutiles. Cependant,
l' exemple de Laure qui ne se vouloit
point marier, et qui avoit acquis
vne si grande reputation
dans la façon de vie qu' elle avoit
menée, flatoit son humeur si agreablement,
qu' elle ne concevoit
pas qu' il luy fust possible de consentir



à estre mariée. Sa nouvelle
amie contribuoit encore à l' entretenir
dans ces sentimens-là; car
Lucinde ne se trouvoit pas heureuse
dans son mariage; de sorte
que Mathilde eut vne douleur incroyable,
et ne voyoit rien d' agreable
à faire pour elle: car encore
qu' elle ne pust se resoudre à
se marier, elle aimoit le monde,
et ne se seroit pas resoluë sans peine
à s' enfermer parmi ces filles
qui s' en separent volontairement
pour toûjours, quoy qu' elle y eust
pourtant moins d' aversion qu' au
mariage. Elle pria Theodore d' écrire
à Rodolphe, pour le supplier
de ne penser point encore à
la marier; mais son pere luy manda
seulement qu' il vouloit estre
obeï; de sorte qu' elle en eut vne
douleur si sensible qu' elle en tomba



malade considerablement.
Mais pendant que cette belle personne
s' afflige avec Lucinde de
son malheur, dom Alphonse
estoit dans vn embarras extréme,
et ne trouvoit de consolation
qu' avec vn ami intime qu' il avoit,
appellé dom Felix de la
Cerde, à qui il disoit tous ses
sentimens. Comme il connoissoit
qu' Albert ne changeroit pas de
volonté, il taschoit de flechir
dom Alphonse: mais enfin, luy
dit-il vn jour, vous avez du moins
l' avantage, qu' on dit que celle
qu' on vous veut faire épouser, est
extrémement belle. Voyez-la
donc, si vous m' en croyez: car
peut-estre quand vous l' aurez
veuë perdrez-vous vne partie de
l' aversion que vous avez pour le
mariage. C' est pour cela méme,



dit dom Alphonse, que je ne la
veux pas voir, de peur que je
n' eusse la foiblesse de me laisser
seduire par sa beauté: car je
sçay bien que de l' humeur dont
je suis, je m' en repentirois toute
ma vie. Ie suis nay pour la guerre,
pour l' ambition et pour la gloire,
et non pas pour le mariage: je
veux chercher la fortune à ma
mode, et n' estre retenu ni par les
larmes d' vne femme, ni par l' interest
d' vne famille; enfin je cherche
à me distinguer des gens de
ma condition, ou par mon esprit,
ou par mon courage, et ne veux
point du tout me marier. Comme
il disoit cela, Albert apprit par
des lettres de Rodolphe, que Mathilde
estoit malade, et qu' il le
prioit qu' Alphonse ne la vist pas
qu' elle ne fust entierement guerie.



Dom Felix sçachant cela par
Rodolphe, le fut dire à son ami
qui en eut vne joye extréme, et
peu s' en falut qu' il ne desirast que
Mathilde mourust, afin d' estre
delivré de l' embarras où il se trouvoit.
Cela luy donna du moins vn
peu de temps pour penser à ce
qu' il avoit à faire; mais comme
il apprenoit que dom Albert estoit
toûjours plus opiniastre dans son
dessein, il en forma vn extraordinaire,
qui fut d' écrire à Mathilde,
et de prier dom Felix de luy porter
sa lettre sans la luy laisser, l' obligeant
seulement à la luy faire lire.
Dom Felix s' opposa d' abord à ce
qu' il vouloit faire: mais il promit
enfin à son ami de faire ce qu' il desiroit.
Alphonse écrit: dom Felix
se charge de la lettre; va chez
Theodore, employe le nom d' vne



parente de Mathilde, dont il
dit avoir vne lettre à luy donner,
et obtient enfin la permission de
la voir et de luy rendre cette lettre.
Il vit donc cette belle malade
qui malgré sa pasleur et sa melancolie,
luy parut toûjours la
plus charmante personne du monde;
de sorte qu' il pensa ne rendre
pas la lettre de dom Alphonse,
et s' en retourner luy dire qu' il
avoit vn tort extréme de s' opposer
à son bonheur. Enfin poussé
par vn sentiment contraire, il fit
ce qu' il avoit promis, et pria Mathilde
de lire la lettre qu' il luy
donna, sans luy dire qui l' avoit
écrite. Mathilde en fit d' abord
beaucoup de difficulté; mais dom
Felix luy dit si serieusement, qu' il
s' agissoit d' vne affaire de la derniere
importance, et qu' il luy donnoit



sa parole que ce n' estoit pas
vne lettre de galanterie, qu' enfin
elle l' ouvrit et y leut ces paroles.
Ne pensez-pas, madame, que je me
donne l' honneur de vous escrire, pour
commencer de m' aquerir quelque part
en vos bonnes graces; car je suis vn
malheureux qui n' en suis pas digne, et
qui sçachant que vous estes vne des plus
belles personnes du monde, ay resolu de
vous fuyr avec autant de soin que tous
les autres vous cherchent, de peur de
vous faire vn outrage, en deffendant mon
coeur contre vos charmes. Mais, madame,
afin d' avoir quelque pitié de moy,
sçachez que je suis vn miserable ambitieux,
qui veux estre ennemi de l' amour,
et qui ne veux aimer que la
gloire; de sorte que je croirois, comme
je l' ay déja dit, vous faire vne injure
si j' allois vous voir avec la resolution



de deffendre mon coeur contre vous. Ie
sçay que vous avez mille agreables
qualitez, capables de faire le bonheur
d' vn homme qui ne seroit pas de mon
humeur. C' est-pourquoy, par respect
pour elles, j' ay pris le dessein de vous
découvrir le veritable estat de mon
ame: ne pensez pas, madame, que
je sois préoccupé d' vne autre passion,
et que ce soit ce qui m' empesche d' accepter
l' honneur que Rodolphe me veut
faire. Non, madame, cela n' est point
ainsi, j' ay vn coeur qui n' aime rien et
ne veut rien aimer, du moins de cette
sorte, et si je puis obtenir de vous que
vous me refusiez, et que vous disiez
à Rodolphe que vous ne voulez point
de moy, je vous promets de vous honorer
toute ma vie, et je consens si
j' en aime, ou si j' en épouse jamais quelque
autre, que vous me hayssiez horriblement,
et que vous me teniez pour



vn homme sans honneur et sans parole:
je vous promets mesme de vous servir
tant que je vivray, si je suis assez
heureux pour en trouver les occasions,
et de n' employer la liberté que vous
me laisserez, qu' à chercher la gloire ou
la mort. Ie sçay que ce que je fais est le
plus extraordinaire du monde; mais
cela mesme vous doit faire pitié, et
vous devez plaindre vn homme qui
est contraint de vous supplier de le
mépriser, quoy qu' il vous honore infiniment,
et qui devoit avoir ce respect-là
pour vous, de peur que son
malheur ne vous empeschast d' estre
heureuse.
Mathilde fut extrémement surprise
de cette lettre; mais elle le
fut agreablement, quoy que dans
le premier moment elle rougist,
comme si elle eust eu quelque leger



dépit. Elle leut pourtant vne
seconde fois cette lettre, afin d' avoir
le temps de resoudre ce qu' elle
devoit répondre. Aprés quoy,
prenant la parole: ie m' estonne,
dit-elle en soûriant, que dom Alphonse
ne veuïlle pas de moy;
car si la conformité de sentimens
devoit faire naistre de l' affection,
nous devrions nous aimer; puisqu' il
est vray que j' ay encore plus
d' aversion au mariage que luy:
en effet, adjoûta-t-elle, je ne suis
malade que de la peur que j' ay
euë d' épouser dom Alphonse; ce
n' est pas que je n' aye entendu dire
que c' est vn fort honneste
homme; mais c' est que j' aime autant
la liberté qu' il aime la gloire,
et que j' ay autant d' inclination
pour la tranquilité qu' il en
a pour l' ambition. Vous luy direz



donc qu' il me rend la vie, en
m' assurant qu' il ne pense et ne
pensera jamais à moy. Mais comme
il n' est pas juste que je sois
seule à m' attirer l' indignation de
mon pere, il faut qu' il s' oppose à
dom Albert, comme je m' opposeray
à Rodolphe, et que nous
nous avertissions l' vn l' autre, de
ce que nous aurons à faire pour
conserver nostre liberté. Dom Felix
fut si charmé de la beauté de
Mathilde, qu' à peine entendit-il
la moitié de ce qu' elle luy dit; de
sorte qu' il la supplia de vouloir
écrire elle-mesme ses propres sentimens.
Elle s' en excusa, et souffrit
seulement que dom Felix écrivist
de sa main ce qu' elle vouloit qu' il
dist à son ami. Aprés quoy, il s' en
retourna, et laissa Mathilde avec
vne joye si grande, qu' elle recouvra



bien-tost la santé; mais elle
en fit vn secret à Rodolphe, et
luy manda qu' elle se trouvoit encore
fort mal, afin de gagner du
temps. Cependant dom Felix avoit
des sentimens bien meslez, il
estoit bien aise d' avoir vne si bonne
nouvelle à porter à dom Alphonse;
il estoit charmé de la
beauté de Mathilde, de son esprit,
de sa modestie et de sa douceur,
et sentoit pourtant quelque
secret dépit de luy voir vne si
grande passion pour la liberté,
comme s' il y avoit eu quelque interest.
Mais enfin il fut trouver
dom Alphonse, qui luy demanda
comme sa negociation s' estoit passée:
dom Felix luy en rendit
compte, et il en fut tres-content.
Cependant, dit-il à son ami, dés
que vous fustes parti avec ma lettre,



j' envoyay vn de mes gens aprés
vous pour vous obliger à revenir,
trouvant moy-méme ce que j' avois
écrit si extraordinaire et si bizarre,
que j' en avois de la confusion, et
choisissois plûtost d' aller chercher
la guerre à l' autre bout du monde,
que de faire vne chose si nouvelle
et si surprenante. Cependant,
puisque cela a si bien reüssi, je
suis bien aise que vous ayez veû
Mathilde. Mais de grace, adjoûta-t-il,
ne me parlez ni de sa beauté,
ni de son esprit, et dites moy
seulement ce qu' il faut faire pour
ne l' épouser pas. Dom Felix eut
vne secrette joye de n' avoir pas à
luy parler de Mathilde; et ils resolurent
enfin qu' il faloit de chaque
costé faire traîner les choses
autant qu' on pourroit, et se servir
des occasions qui naistroient, et



s' entravertir de tout. Quelques
jours aprés dom Alphonse crut
qu' il faloit remercier Mathilde de
la maniere dont elle avoit receu
vne lettre si surprenante. Et enfin
dom Felix la vit, non seulement
vne seconde fois; mais
plusieurs autres, sur diverses choses
qu' il faloit resoudre, pour faire
naistre des obstacles à leur mariage.
Cependant, Albert et Rodolphe
voyant qu' il y avoit toûjours
quelque chose qui faisoit
que leur dessein ne s' executoit
pas, entrerent en deffiance l' vn
de l' autre. Rodolphe s' imagina
qu' Albert vouloit luy donner lieu
de rompre pour faire épouser quelque
autre fille à son fils qui fust
parente des gens de la faveur, et
Albert crut la mesme chose de
Rodolphe; ils font donc épier



dans les maisons l' vn de l' autre,
pour sçavoir ce qui s' y passoit; et
Rodolphe découvre que dom Alphonse
envoye vers sa fille, et Albert
que Mathilde a commerce
avec son fils; cela les embarrassa
d' abord extrémement. Ils se font
sçavoir ce qu' ils ont découvert. Et
Albert enfin, sçachant que dom
Felix est celuy qui va parler à Mathilde,
ou qui envoye quelquefois
son escuyer vers elle, prend
le parti d' envoyer des gens déguisez
en chemin, qui volent cét
escuyer et luy prennent le paquet
de dom Alphonse, dont la
lettre estoit conceuë en des termes
qui firent connoistre à Albert
et à Rodolphe, que le commerce
qui estoit entre leurs enfans
estoit directement contre
leurs intentions et contre leur autorité.



Ces deux peres se trouverent
fort embarrassez en se
voyant; Rodolphe s' imagine que
dom Alphonse est amoureux ailleurs,
et dom Albert qui estoit
violent et soupçonneux croit que
Mathilde aime quelque homme
de la cour, et le dit à Rodolphe
qui s' en fasche; de sorte qu' ils se
separent fort mécontens l' vn de
l' autre. Rodolphe fut à Burgos se
plaindre à Theodore de la desobeïssance
de sa fille: mais il connut
pourtant bien, et par ce que
Theodore luy dit, et par les discours
de Mathilde, que ce qu' Albert
luy a dit n' est qu' vne chose
dite sans fondement, dans l' excés
de la colere. D' autre part Albert
querelle dom Alphonse, et
luy dit que pour le punir de n' avoir
pas voulu épouser vne tres-belle



fille, il luy en fera épouser
vne laide et insupportable, et
qu' enfin il veut estre obey. Dom
Alphonse voyant jusques où son
pere portoit sa violence, partit le
lendemain sans en rien dire qu' à
dom Felix, pour s' en retourner
trouver l' admiral de Castille son
oncle, afin qu' il luy donnast lieu
de s' en aller chercher la guerre en
quelque part. Dom Felix, dont le
coeur estoit sensiblement touché
de la beauté de Mathilde, fut tenté
par generosité de luy dire quels
estoient les charmes de cette belle
fille, luy semblant que s' il luy
avoit dit tout ce qu' il connoissoit
de son merite, il eust pû changer
de sentiment. Mais d' ailleurs
venant à penser que quand dom
Alphonse l' auroit aimée, elle n' auroit
pas apparemment voulu l' épouser,



il conclud qu' il n' estoit
pas juste de se faire luy-mesme vn
rival, et resolut de laisser partir
son ami, ne croyant pas mesme
faire rien contre la generosité,
puisqu' il estoit resolu de combatre
cette passion naissante, qui
estoit dans son coeur. Dom Alphonse
partit donc, et laissa vne
lettre pour dom Albert qui en fut
fort irrité, et vne pour Mathilde
que dom Felix luy rendit: elle
estoit telle:
ie pars, madame, pour vous tenir
la parole que je vous ay donnée;
joüyssez en repos de la liberté que je
vous laisse, et puisque nous n' avons
pas esté destinez à nous aimer, aimons
du moins toute nostre vie la plus precieuse
chose du monde: et croyez s' il
vous plaist, qu' en quelque lieu de la



terre que la fortune me mene, vous
me trouverez toûjours tout prest à vous
rendre tous les services que vostre generosité
merite.
Dom Felix rendit cette lettre à
Mathilde qui la receut fort agreablement,
et qui remercia celuy
qui la luy rendit, comme vn
homme qu' elle croyoit avoir
beaucoup contribué à son bonheur;
mais plus elle le remercioit,
plus il se confirmoit dans
le dessein de s' opposer à l' amour
qu' il avoit dans l' ame, et dont il
se trouvoit si persecuté, qu' il se resolut
d' aller pour quelque temps
à Seville pour se guerir; de sorte
que dom Alphonse s' éloignoit de
peur d' aimer Mathilde, et dom
Felix pour cesser de l' aimer. Aprés
cela, elle demeura dans vne assez



grande tranquilité, elle se vit mesme
delivrée de l' importunité que
luy donnoit la passion de dom
Fernand, lors qu' il fut revenu
d' Arragon, sans qu' elle en sceust
alors la cause: elle ne sçavoit mesme
que penser de cela; car il ne
cessa de luy donner des marques
de sa passion, qu' en luy disant
qu' elle estoit aimée d' vn homme
qui luy ostoit la hardiesse et la liberté
de l' aimer, si ce n' estoit en
secret, et qu' elle sçauroit vn jour
ce qui le faisoit parler ainsi. On
remarquoit seulement que le frere
de dom Fernand d' Albuquerque
estoit le favori de dom Pedro
prince de Castille, qui voyoit
fort souvent Mathilde, mais qui
ne luy disoit pourtant rien qui
pust tesmoigner qu' il eust de l' amour
pour elle. Mathilde avoit



conté à Lucinde toute son aventure
de dom Alphonse, et elles
avoient conclu ensemble; qu' il
faloit qu' il eust du merite, et
qu' vn homme qui aimoit tant la
liberté devoit avoir quelque chose
de grand dans le coeur. I' ay déja
dit que Lucinde avoit avec elle
vne parente, appellée Padille,
qui avoit de la beauté et des charmes,
mais dont l' esprit estoit dangereux.
Cette fille se mit dans la
fantaisie de donner de l' amour à
dom Pedro, et l' on peut dire
qu' il sembloit alors qu' il n' y auroit
pas eu tant de peine à apprivoiser
vn lion: elle creût que si
elle agissoit comme vne personne
qui vouloit plaire, elle ne plairoit
pas, mais qu' elle plairoit infalliblement,
pourveu qu' elle peust
seulement aquerir quelque familiarité



avec dom Pedro. Dom Iuan
d' Albuquerque son favori, estoit
amoureux d' vne fille de la reine
qui estoit son amie: elle se resolut
de le servir autant qu' elle pourroit.
Outre cela, ayant remarqué
que la maison de Theodore estoit
celle de toute la cour, où il alloit le
plus de gens de grande qualité, et
où dom Pedro se plaisoit le plus;
elle se fit aimer de Theodore à
qui elle parloit toûjours, pendant
que Lucinde et Mathilde parloient
ensemble; et toutes les fois
que dom Pedro y estoit, elle
cherchoit à luy dire quelque chose
qui luy plust, sans considerer
s' il estoit vray ou faux; de-sorte
qu' elle luy avoit dit plus d' vne
fois que Mathilde l' estimoit infiniment:
ce n' estoit pas qu' elle
voulust qu' il aimast Mathilde,



mais elle pensa que s' il avoit à
l' aimer, il estoit bon pour son
dessein qu' elle fust de la confidence,
ne doutant point que si cela
estoit ainsi, elle ne vinst à bout de
faire cesser vne amour, dont elle
sçauroit le secret, et qu' elle ne
vinst ensuite à se faire aimer elle-mesme.
Cette fille avoit vne ingenuité
apparente, tres-propre à
tromper les personnes à qui elle
n' auroit pas esté suspecte. Cependant,
dom Alphonse estoit allé à
la guerre en Arragon, et s' y estoit
signalé si hautement, que tous
ceux qui venoient de cette armée
ne parloient que de son courage.
En ce temps-là, Rodolphe mourut,
Mathilde en fut extrémement
touchée; mais quand le
temps eut adouci sa douleur, elle
se trouva en pleine possession



de sa liberté; il sembla mesme
qu' elle en fust devenuë plus belle
et plus charmante, et elle mena
la plus douce et la plus agreable
vie du monde, ne regretant rien
que l' absence de Laure et de Petrarque
dont elle avoit souvent
des nouvelles. Cependant, dom
Felix n' ayant pû guerir de sa passion
pour Mathilde, revint à Burgos,
et la vit plus belle que jamais,
et sceut qu' elle sembloit n' avoir nul
dessein de se marier; comme elle
croyoit luy estre obligée elle le
traitoit tres-civilement, et elle ne
le vit pas plûtost en particulier,
que prenant la parole: ie vous assure,
luy dit-elle, que vostre ami
avoit raison de me preferer la
gloire; car il acquiert tant d' honneur
à la guerre, que le royaume
auroit beaucoup perdu s' il n' y avoit



pas esté. En mon particulier,
reprit dom Felix, en la regardant,
je connois quelques gens
qui eussent perdu la plus douce
chose du monde, puisque si vous
eussiez esté servie par vn aussi
honneste homme que celuy-là,
ils n' auroient jamais osé avoir l' esperance
de vous plaire, sans laquelle
la vie ne leur seroit guere
agreable. Ie ne sçay, repliqua
Mathilde, qui sont ceux que vous
dites; mais je sçay bien que pour
me plaire, il faut du moins ne
me dire jamais rien qui me desplaise,
ni que je puisse mal expliquer.
Dom Felix connut bien que
s' il en disoit davantage il ne seroit
pas favorablement escouté; de
sorte qu' il destourna la chose adroitement;
mais Mathilde ne
laissa pas de craindre qu' il ne l' aimast;



car l' estimant assez pour
estre son amie, elle eust esté faschée
de le perdre. D' autre-part,
dom Fernand fuyoit autant qu' il
pouvoit Mathilde; mais quand il
se trouvoit auprés d' elle, il estoit
aisé de connoistre qu' il n' avoit
pas cessé de l' aimer, quoy qu' il
ne luy dist rien de sa passion. Pour
dom Pedro, il agissoit d' vne certaine
manière brusque et indifferente,
qui ne donnoit aucun lieu
aux conjectures: il faisoit quelquefois
des festes, il voyoit souvent
Mathilde, mais on ne pouvoit
connoistre s' il avoit quelque
dessein particulier pour elle. Les
choses estant en cét estat, le roy
de Maroc crût qu' il luy seroit aisé
de restablir la gloire des Maures
en Espagne, s' il y vouloit porter
ses armes. Le roy de Grenade apprehendant



alors que le roy de
Castille ne l' attaquast, se ligua avec
le roy de Maroc, et à l' heure
mesme ils firent de grandes levées
et de grands magasins. Le
roy de Castille estant averti de
ces preparatifs, ne douta pas que
ce ne fust contre luy: de sorte
qu' il se hasta de pacifier les affaires
d' Arragon, et fit si bien qu' il
eut vne grande armée sur pied,
avant que les Maures fussent en
estat de l' attaquer: en effet, il entra
dans le pays d' Antequera, il y
fit des ravages incroyables. Tous
les gens de la cour suivirent dom
Pedro, dom Iuan d' Albuquerque,
dom Fernand, dom Felix,
et tous les braves furent en cette
occasion: mais avant que de partir,
ils dirent tous adieu à Theodore,
à Mathilde, à Lucinde, et



à Padille. Ce fut alors que Mathilde
connut vne partie de la persecution
que sa beauté luy alloit
attirer: car dom Fernand en prenant
congé d' elle, luy dit qu' il
alloit chercher la mort avec plaisir,
puisqu' il avoit esté contraint
de faire ceder la plus grande passion
du monde, au respect qu' il
estoit obligé d' avoir. D' abord,
Mathilde crut que cela ne vouloit
dire autre chose, sinon que le
respect qu' il avoit pour elle l' avoit
obligé de combatre son amour.
Mais dom Pedro, l' ayant vn peu
separée de la compagnie, luy dit
avec vn air proportionné à son
humeur, et vn soûris vn peu fier:
i' ay attendu que je fusse à la veille
de vous aller sacrifier dix mille
Maures, avant que de vous dire ce
que j' ay dans le coeur pour vous;



je ne veux pas mesme vous descouvrir
tout mon secret; mais si
je reviens victorieux, preparez
vostre coeur à estre ma conqueste,
et à se rendre de bonne grace.
Quand vous aurez vaincu les Maures,
reprit modestement Mathilde,
avec vn soûris forcé, vous ne
songerez plus à d' autres victoires,
et il ne seroit mesme pas à propos
de s' exposer à ne vaincre point en
vne seconde guerre, aprés avoir
esté vainqueur à la premiere. Ce
prince ne faisant pas semblant
d' avoir entendu cela, s' en alla; et
dom Felix prit congé de Mathilde,
sans oser luy témoigner sa passion
que par vn soûpir. Cependant,
Mathilde ayant conté à Lucinde
ce que luy avoit dit dom
Fernand, et ensuite dom Pedro:
Lucinde luy dit qu' elle croyoit



que le changement du procedé de
dom Fernand, venoit de ce que
son frere qui estoit favori de dom
Pedro luy avoit deffendu de la
part de ce prince de continuer de
l' aimer. Mathilde eut de la douleur
de voir beaucoup d' apparence à ce
que disoit Lucinde: car l' humeur
violente et cruelle de dom Pedro
agissoit aussi bien contre ceux qu' il
aimoit, que contre ceux qu' il haïssoit.
Mais enfin le roy de Castille
ayant appris que le prince Abomelic
attaquoit Medina Sidonia,
et que l' armée du roy de Grenade
campoit devant la ville de Sillos,
et commençoit de l' assieger,
il retira ses troupes au dedans de
son estat, afin de deffendre mieux
son pays. Dom Alphonse sans passer
à Burgos, se rendit à l' armée,
et fut tres-bien receu du roy de



Castille, et du prince dom Pedro;
de sorte que lors que le roy
partagea ses troupes, pour en envoyer
vne partie contre le roy de
Grenade, et qu' il mena l' autre
contre Abomelic, qui s' estoit avancé
jusqu' à Alcala, Alphonse
suivit le roy de Castille qui fut
heureux en ces deux expeditions;
car le roy de Grenade fut contraint
de lever le siege, et le vaillant
Abomelic fut tué de la main
d' Alphonse, toute sa cavalerie
deffaite, et toute son armée en déroute.
Le roy de Castille devant
la victoire à la valeur d' Alphonse,
qui avoit fait des choses audelà
de toute croyance, le caressa extraordinairement:
mais comme il
avoit esté blessé, il falut le laisser
dans vne ville proche de là: de
sorte qu' il ne retourna pas à Burgos



aussi-tost que les autres gens
de la cour. Quand il fut gueri il
fut voir dom Albert, qui s' estoit
enfin appaisé, voyant quelle gloire
il avoit acquise, et quelques
jours aprés il alla à Burgos. Lors
qu' il y arriva, on luy dit qu' il y
avoit vn combat de taureaux que
dom Pedro donnoit à toute la
cour: de sorte qu' aprés s' estre mis
en estat de paroistre en vne aussi
grande assemblée que celle-là, il
fut où estoit toute la cour, et se
plaça dans vne grande galerie soûtenuë
par des colomnes de marbre,
qui regnoit à l' entour du lieu
où les taureaux combatoient.
Mais à peine se fut-il placé, que
regardant à la galerie opposée, il
vit Mathilde vis à vis de luy qu' il
n' avoit jamais veuë, et qui luy parut
si admirablement belle, que



cessant de regarder le combat, il
la regarda avec admiration, et
demanda à vn homme de qualité
qui le touchoit, et qui estoit vn
grand diseur de nouvelles, qui
estoit cette belle personne. Il paroist
bien, luy repliqua celuy à
qui il parloit, qui l' avoit veû à l' armée,
que vous avez esté longtemps
en voyage, puisque vous
ne connoissez pas la belle Mathilde.
Quoy, reprit Alphonse,
celle que je voy est Mathilde, fille
de Rodolphe, qui a passé son
enfance en exil! Oüy, respondit-il,
c' est la belle Mathilde, à qui
le prince dom Pedro donne assurément
le divertissement que vous
voyez, quoy qu' on ne le dise pas
publiquement: et je voy vn homme,
adjousta-t-il, en luy monstrant
dom Felix qui en est bien



chagrin: car il en est aussi fort
amoureux, et je ne sçay, poursuivit-il
encore, si dom Fernand en
est bien aise, du moins paroist-il
fort melancolique. Il faudroit
estre bien hardi, dit alors Alphonse,
pour aimer vne personne
à qui tant de gens pretendent.
Cependant, sans prendre plus nul
interest au combat des taureaux,
Alphonse observa soigneusement
Mathilde, et il s' imagina qu' elle
l' avoit regardé, qu' elle avoit méme
demandé qui il estoit, et
qu' elle avoit rougi il ne se trompoit
pas: car comme Alphonse
estoit parfaitement bien fait, qu' il
avoit la taille tres-belle, la mine
fort haute et fort noble, et l' air
infiniment agreable, Mathilde
l' avoit remarqué, et lors qu' on le
luy avoit nommé, elle avoit changé



de couleur, et avoit parlé bas
à Lucinde pour cacher sa rougeur
qu' elle sentoit. Cependant, le
combat finit, la compagnie se separa,
et Alphonse allant chez le
roy, et ensuite chez la reine,
n' entendit parler que de la beauté,
de l' esprit, et du merite de
Mathilde. Il y eut vn bal ce soir-là
chez la reine: mais cette belle
personne s' estant trouvée mal
n' y fut pas. Alphonse l' y chercha
avec soin, et fut bien fasché de
ne l' y rencontrer point: il se trouvoit
pourtant fort embarrassé, et
quand il se souvenoit qu' il avoit
refusé de l' épouser, il ne pouvoit
se resoudre à la voir. Cependant,
la civilité le voulut, et son coeur
l' y portoit sans qu' il s' en apperceust.
Alphonse parut au bal avec
beaucoup d' éclat, il dança de



tres-bonne grace: il se tira si bien
de la conversation, et chez le
roy, et chez la reine, que le
lendemain tous ceux qui furent
voir Mathilde, ne luy parlerent
d' autre chose que du merite d' Alphonse.
Vn homme de qualité
qui l' avoit veû durant six mois,
pendant ses voyages, luy dit
qu' il n' y avoit pas vn plus honneste
homme au monde, qu' il
estoit aussi vaillant qu' Alexandre,
et que Cesar, aussi liberal et aussi
sçavant que le premier, aussi habile
et aussi galand que le second, qu' il
escrivoit tres-bien et en prose et en
vers, et qu' outre cela, il estoit le
plus fidelle ami du monde. Mais
pendant qu' on disoit à Mathilde
tant de bien d' Alphonse, il songeoit
comment il pourroit faire
pour l' aller voir. Si on ne luy eust



pas dit que dom Felix en estoit
amoureux il l' auroit prié de l' y
mener: mais par vn sentiment
dont il ignoroit la cause, il ne
vouloit point luy parler de Mathilde,
et ayant veû Lucinde dans
son enfance il la fut voir, et fit si
bien qu' il l' engagea à le mener
chez Mathilde. Cependant, dom
Felix estoit fort embarrassé; s' il
eust suivi ce que la raison et l' amitié
luy conseilloient, il eust dit
à dom Alphonse qu' il aimoit Mathilde;
mais il s' imagina qu' Alphonse
croiroit que cette passion
l' avoit autrefois obligé à luy obeïr
trop-tost, lors qu' il l' avoit prié de
ne luy dire rien de la beauté de
Mathilde; joint que n' estant pas
aimé et n' esperant presque pas de
l' estre, il croyoit qu' il estoit inutile
de luy faire cette confidence.



Cependant, Lucinde ne s' engagea
à mener Alphonse chez Mathilde,
qu' aprés avoir sceu qu' elle
le trouvoit bon. Padille suivant sa
coustume, quoy qu' elle ne sceust
rien de ce qui s' estoit passé entre
Mathilde et Alphonse, (car cela
estoit demeuré fort secret) songea
fort à observer ces deux personnes
dont le merite servoit d' entretien
à toute la cour: elle ne
put pourtant pas les voir ensemble
la premiere fois qu' ils se virent:
car Lucinde se déroba d' elle.
Mathilde estoit seule dans sa
chambre, en vn habillement le
plus galant du monde, et l' on
eust dit qu' elle avoit entrepris de
faire repentir dom Alphonse,
tant elle estoit belle et propre ce
jour-là; car le mal qui l' avoit empeschée
d' aller au bal n' estoit



qu' vn leger mal de teste qui s' estoit
passé. Elle receut dom Alphonse
fort civilement et d' vn air
fort guay, afin qu' il ne creust pas
qu' elle eust nul chagrin de ne l' avoir
pas épousé. Quand Alphonse
entra dans sa chambre, il sentit
ce qu' il n' eust pû exprimer
quand il l' eust voulu, et quand il
la vit avec cét air charmant qui
l' accompagnoit tousjours, il commença
de penser ce qu' il n' avoit
jamais pensé, et creut qu' il pouvoit
y avoir de plus grands plaisirs que
celuy d' estre aimé de la fortune.
Vous voyez, madame, luy dit-il,
vn homme qui n' auroit peut-estre
jamais eu la hardiesse de paroistre
devant vous, si vous mesme ne
me l' eussiez donnée; mais quand
on a eu vne fois l' honneur de vous
rencontrer, nulle consideration ne



peut plus empescher qu' on ne
cherche avec soin le mesme plaisir
et le mesme honneur. Vous
me vistes en vne si grande et si
belle compagnie, reprit Mathilde,
que je ne pensois pas que vous
m' eussiez discernée; et puis, adjoûta-t-elle,
en soûriant, je croyois
que quand on venoit de la guerre,
la veuë d' vn combat estoit encore
assez agreable pour empescher
qu' on ne prist garde à quelque autre
chose. Pour parler selon vos sentimens,
madame, respondit-il, je
croy que ceux qui auroient le goust
d' aimer les perils, ne pourroient
guere trouver de plus dangereuse
occasion que celle d' avoir l' honneur
de vous voir. Quand on est
accoustumé de vaincre comme
vous, repliqua-t-elle, il n' est point
d' occasion dangereuse, et je ne



suis pas si redoutable que l' estoit
le prince Abomelic que vous avez
vaincu. Il l' estoit sans doute
beaucoup, les armes à la main,
respondit Alphonse, mais toute
desarmée que vous estes, je vous
trouve plus à craindre que luy. Elle
l' est plus encore que vous ne
pensez, dit alors Lucinde, pour
les tirer tous deux d' embarras, et
je ne connois personne qui la
connoisse bien, qui n' en convienne
avec moy: en mon particulier
j' en ay fait vne experience dont je
ne puis douter: car quand j' ay
commencé de connoistre Mathilde,
elle ne me vouloit ni estimer
ni aimer: elle n' avoit le coeur
rempli que d' vne amie qu' elle a
en Avignon, dont vous pouvez
voir le portrait auprés de son miroir,
l' incomparable Laure regnoit



dans son esprit et y regne
encore. Cependant, malgré son
indifference, et quoy que je sceusse
que la premiere place de son
coeur estoit occupée par la personne
du monde qui la merite le
mieux, je ne laissay pas de l' aimer
plus que moy-mesme. Ie croy facilement
ce que vous dites, reprit
Alphonse, et je croy mesme qu' il
est possible d' aimer éperduëment
la belle Mathilde, sans esperance
d' en estre jamais aimé. Vous me
connoissez encore si peu, respondit-elle,
que tout ce que vous me
dites d' obligeant ne le peut estre
pour moy, et ne peut passer que
pour vne civilité: mais, adjousta-t-elle
comme il n' y a que Lucinde
icy à qui je dis tout ce que j' ay
dans l' ame, il est bien juste que je
vous remercie de la plus sensible



obligation que je pouvois jamais
vous avoir, puisque c' est de vous de
qui je tiens toute la douceur de ma
vie, et que la liberté dont je jouïs est
vn effet de la grandeur de vos sentimens.
Ah madame, s' écria Alphonse,
quel remerciment me faites-vous,
et de quelle confusion me
voulez-vous couvrir; j' ay bien peur,
madame, que je ne me repente de
vous avoir tant obligée, et que ce
repos dont vous jouïssez ne trouble
celuy de toute ma vie. Ne
vous souvenez-vous plus, luy dit-elle,
de nos conditions, qui sont,
que puisque nous n' estions pas
nais pour nous aimer, que nous
aimerions du moins toûjours la
mesme chose: aimons donc la liberté
toute nostre vie, continua-t-elle,
et souffrons seulement que
cette conformité de sentimens



fasse naistre de l' estime dans nostre
coeur et rien davantage. Ie
vous assure, madame, respondit
Alphonse, qu' on ne sçait plus guere
ce qu' on pense quand on vous
voit et qu' on vous entend; mais
enfin comme je suis tres-sincere,
je vous declare aujourd' huy que
je suis resolu de deffendre mon
coeur contre vous jusques à la derniere
extrémité, sans que cela
m' empesche de vous voir, de vous
honorer, de vous respecter, et de
vous servir toute ma vie, quoy
qu' à dire les choses comme je les
pense, je ne me tienne plus autant
vostre obligé que je faisois avant
que d' avoir l' honneur de vous
voir. Lucinde se meslant alors
dans la conversation, se mit à les
louër de l' aversion qu' ils avoient
tous deux pour le mariage; Mathilde



se souvint alors de Laure,
pour se louër de ce qu' elle l' avoit
confirmée dans ces sentimens-là.
Mais, madame, interrompit Alphonse,
cette incomparable Laure,
dont le nom est connu par
toute la terre, par les admirables
vers de Petrarque, n' est pas ennemie
de l' honneste amitié, comme
du mariage. Cela est vray, reprit
Mathilde, mais c' est vne affection
si pure, si noble que celle
que Petrarque a pour elle, qu' elle
merite plustost d' estre loüée de la
souffrir que d' en estre blasmée. Ie
sçay ce qu' est cét illustre amant,
reprit Alphonse, je l' ay veu à la
cour du roy de Naples, dont il
est infiniment aimé, et j' ay veû des
gens de plusieurs nations qui avoient
esté esprés en Avignon
pour la seule curiosité de le voir,



et qui ne l' ayant pas trouvé estoient
allez le chercher où il estoit. Mathilde
fut ravie de trouver quelqu' vn
qui eut veû Petrarque, et
passant d' vne chose à vne autre,
elle connut qu' Alphonse sçavoit
tous les beaux endroits de ses ouvrages,
et cela luy pleut infiniment:
mais comme il vint du
monde, la conversation changea:
car Mathilde, quoy qu' elle aimast
toutes les belles choses, ne faisoit
pas le bel esprit. Vn moment
aprés dom Pedro arriva, qui ne
fit que parler du courage des taureaux
qui avoient combatu, il demanda
à Alphonse ce qu' il luy en
avoit semblé: mais comme il n' en
sçavoit rien, parce qu' il n' avoit
fait que regarder Mathilde, il
loüa en general, et ne dit rien de
particulier. Pour dom Pedro, son



plus grand plaisir estoit d' avoir
des objets funestes et cruels, et il
aimoit bien mieux donner des
combats de taureaux, de tigres et
de lions, que des serenades. Il
estoit mesme amoureux de Mathilde
par accés, et il y avoit des
temps où l' on eust dit que son
coeur estoit gueri. Il n' en estoit
pas de mesme de dom Felix qui
cherchoit à plaire par des voyes
plus douces. La conversation de
dom Pedro respondoit à ses plaisirs;
car il soustenoit toûjours que
la justice ne consistoit qu' en la
force, que le droit des conquerans
estoit le veritable droit de
tous les hommes en toute sorte
de choses, que tout devenoit juste
par la violence, et que pourveu
qu' on fist ce qu' on entreprenoit,
il n' en faloit pas davantage.



Mathilde prenoit plaisir à le
contrarier, et luy soustenoit au
contraire, que la justice estoit la
veritable qualité des princes, que
c' estoit elle qui les faisoit aimer
et craindre tout ensemble, et que
sans elle ils ne pouvoient estre
heureux. Ses amies trembloient
quelquefois pour elle, quand elle
luy parloit avec tant de liberté:
mais Alphonse trouva quelque
chose de si beau à l' honneste hardiesse
qu' elle prenoit en essayant de
corriger l' humeur cruelle de ce
jeune prince, qu' il l' en estima
beaucoup davantage: enfin le
jour finit, et Alphonse se retira.
Il rencontra le soir dom Felix,
qui ne luy parla point de Mathilde,
Alphonse ne luy en dit rien
aussi: cependant, ils ne pensoient
qu' à elle en se parlant. Alphonse



eut le plaisir de revoir encore plusieurs
fois Mathilde, mais plus il la
vit, plus il la trouva aimable, et plus
il sentit naistre dans son coeur vne si
violente passion qu' il en fut sensiblement
affligé. Il ne changeoit
pourtant pas de sentiment pour le
mariage, et il connoissoit mesme
bien que quand il en eust changé,
Mathilde n' eust pas changé
comme luy: il craignoit aussi
que dom Pedro, quoy qu' il ne
dist pas qu' il aimast Mathilde, ne
laissast pas de l' aimer: il voyoit
de plus que son principal ami en
estoit amoureux, et que la melancolie
de dom Fernand estoit
vne marque que sa passion n' estoit
pas finie: il remarquoit méme que
ces deux amants de Mathilde le
regardoient avec quelque jalousie;
mais il connoissoit bien que malgré



luy il aimoit Mathilde, et que
sans qu' il cessast d' estre ambitieux,
l' amour s' emparoit de son coeur.
Il fut deux ou trois jours à s' examiner
luy-mesme, et à voir quel parti
il prendroit, d' vn costé il se voyoit
dans le chemin d' vne grande fortune,
aprés le service signalé qu' il
avoit rendu; le roy l' estimoit et
luy faisoit beaucoup de caresses,
dom Pedro mesme le traitoit fort
bien, dom Iuan favori de ce
prince luy témoignoit beaucoup
d' amitié, et il luy sembloit que
rien ne pouvoit empescher qu' il
ne fist vne fortune considerable;
de sorte que du costé de l' ambition
tout luy sembloit favorable;
mais malgré tout cela son coeur
luy disoit qu' il aimoit Mathilde,
et quand il pensoit qu' il avoit dépendu
de luy de l' épouser, il sentoit



dans son coeur des mouvemens
tumultueux qu' il ne connoissoit
point, il se disoit pourtant
pour sa consolation que peut-estre
s' il l' eust épousée de cette
sorte elle l' eust haï, et qu' il en eût
esté plus miserable: il ne laissoit
toutefois pas malgré sa passion de
haïr le mariage, quoy que la pensée
d' avoir refusé la possession de
Mathilde luy fust tres-douloureuse:
il voyoit encore que si sa passion
éclatoit, elle déplairoit à
dom Pedro qui luy nuiroit en
toutes choses; mais il se respondoit
à luy mesme pour flater son amour,
que ce prince n' estoit capable que
d' vne amour passagere, et que de
plus ne paroissant pas amant de
Mathilde ouvertement, il pourroit
ignorer la passion de ce prince.
Pour dom Felix, il croyoit n' estre



pas obligé de deviner qu' il
aimoit Mathilde, puisqu' il ne
luy en disoit rien. Alphonse pensoit
mesme que dom Felix avoit
eu tort de ne la luy loüer pas autrefois
davantage, quoy qu' il le
luy eût deffendu; mais ce qui l' affligeoit
avec excés, estoit qu' il
croyoit qu' il luy seroit impossible
de se faire aimer de Mathilde, il se
glissoit mesme quelque secrete jalousie
dans son coeur, et il crût que
selon les apparences dom Felix seroit
plûtost aimé que luy; de sorte
qu' il se trouva tout à la fois de
l' ambition, de la jalousie et de l' amour.
Quant à dom Felix il estoit
dans vne peine extréme, il n' osoit
parler de sa passion ni à son
ami ni à sa maistresse, il craignoit
la colere de l' vn, et les reproches
de l' autre. Dom Pedro



de son costé avoit de l' amour
sans inquietude, et se fioit à sa
qualité, il croyoit que quand il
voudroit on agiroit pour luy comme
si on l' aimoit, et ne se soucioit
pas du reste, et ce qui l' empeschoit
de témoigner sa passion
ouvertement, c' est qu' il ne vouloit
s' assujettir à nuls soins, et la
seule chose qui faisoit connoistre à
Mathilde qu' il estoit amoureux
d' elle, c' est qu' elle sceut avec certitude
qu' il avoit fait deffendre à
dom Fernand de continuer de la
servir. Cependant, Alphonse vint
à bout d' obliger Mathilde d' avoir
pour luy beaucoup d' amitié sans
nulle galanterie, n' osant pas luy
découvrir ses veritables sentimens:
tout cét hiver-là se passa
en festes continuelles. Mais comme
la societé estoit ce qui touchoit



le plus le coeur de Mathilde,
elle aimoit sans comparaison
mieux estre dans la chambre de
Theodore et dans la sienne que
chez la reine, où la conversation
estoit plus tumultueuse. Vn jour
que dom Pedro, Lucinde, Padille,
Alphonse, dom Felix, et
plusieurs autres, estoient chez
Theodore, et que Mathilde
estoit aussi dans sa chambre, on
vint insensiblement à parler de la
dissimulation dont on accuse plus
les gens de la cour que le reste
du monde. Pour moy, dit dom
Pedro, je suis tres-persuadé que la
cause de cela, est qu' il y a plus d' esprit
parmi eux que parmi les autres,
et qu' à parler sincerement la parfaite
dissimulation est le chef-d' oeuvre
de la prudence et du jugement.
Ah! Seigneur, reprit Mathilde,



est-il possible que vous puissiez
parler ainsi, et pouvez-vous loüer
ce qui est directement opposé à
la sincerité, qui fait toute la douceur
de la vie des honnestes gens,
et sans laquelle le commerce du
monde ne seroit qu' vne tromperie
continuelle. Pour moy, reprit-il,
j' ay toûjours crû que ceux qui dissimulent
le plus habilement, sont
ceux qui ont le plus la reputation
d' estre sinceres. Il y a bien de la
difference, reprit Lucinde, entre
paroistre sincere, et l' estre effectivement.
C' est assurément vne chose
où il est fort aisé de se tromper,
dit Theodore. En mon particulier,
adjousta l' artificieuse Padille, qui
n' avoit point encore parlé, je voudrois
bien sçavoir precisément ce
que c' est que cette sincerité, dont
tout le monde se vante sans exception.



Il est vray, adjousta Lucinde,
que c' est la vertu dont on se
pare le plus vniversellement; la
plus grande partie des autres bonnes
qualitez ne sont pas à l' vsage
de toute sorte de personnes.
La bonté, qui est vne chose si precieuse,
trouve des gens qui ne
voudroient pas mesme passer pour
bons, et qui mettent presque leur
honneur à estre crûs méchans.
Beaucoup d' hommes, qui ne sont
pas de profession à aller à la guerre,
avoüent de bonne foy qu' ils
ne sont pas braves; ils se retranchent
à la generosité, quoy que
je sois persuadée que rarement les
timides sont genereux. Il y en a
d' autres qui s' offenseroient si on
les appelloit sçavans; j' en connois
quelques-vns qui se mocquent
de la tendresse, et qui croyent



que l' indifference est la veritable
qualité des gens de la cour, afin
d' estre toûjours tout prests d' embrasser
tel parti que leur interest
demande; mais pour de la sincerité,
tout le monde s' en vante, et
tout le monde en veut avoir; et
ceux qui sont le plus dissimulez
se revestent du moins de sincerité:
car sans cela leur dissimulation seroit
inutile. Il est vray, reprit Mathilde,
qu' on n' entend parler d' autre
chose que de sincerité, toutes
les conversations en sont remplies,
toutes les lettres en sont pleines;
on s' en pare en amour, en amitié,
en affaires, dans le commerce du
monde, dans les complimens; et
cependant je soûtiens que la sincerité
qui paroist si generale, est
la plus rare chose du monde, et
que bien souvent ceux qui en parlent



le mieux, sont ceux qui en
ont le moins. En mon particulier,
reprit Padille, je voudrois bien
sçavoir precisément ce que c' est
que la sincerité, et s' il y a de la
difference entre estre veritable,
et estre sincere. N' en doutez nullement,
repliqua Mathilde: car
encore que la verité soit, s' il faut
ainsi dire, l' ame de la sincerité, il
y a pourtant de la distinction à faire
entre l' vne et l' autre: on ne peut
jamais estre sincere sans estre veritable;
mais on peut en quelque
occasion ne meriter pas d' estre
appellé sincere, quoy qu' on ne soit
pas menteur; on peut avoir l' esprit
caché, et haïr le mensonge:
mais la sincerité emporte de necessité
avec elle toute la beauté de
la verité, tous les charmes de la
franchise, toute la douceur de la



confiance; elle produit pour l' ordinaire
vne certaine ouverture de
coeur, qui paroist dans les yeux,
et qui rend la physionomie agreable:
la sincerité ne s' arreste pas
aux paroles, comme la verité; il
faut que toutes les actions soient
sinceres, elle est ennemie de tout
artifice, de toute dissimulation;
la prudence excessive n' est pas de
son vsage; enfin c' est vne beauté
sans fard, qui ne craint point qu' on
la voye au grand jour, ni qu' on
l' observe de prés: au contraire, il
luy est avantageux qu' on l' examine
soigneusement, de peur d' estre
prise pour vne fausse sincerité, qui
affecte de la contrefaire, et qui
trompe quelquefois ceux qui ne
connoissent pas bien la veritable.
Il y a pourtant vne grande
difference entre elles; l' vne songe



toûjours à paroistre ce qu' elle n' est
pas, et l' autre ne pense pas mesme
à paroistre ce qu' elle est: la
fausse sincerité s' estudie, se regarde,
et se proportionne aux autres,
et la veritable, sans refléchir sur
autruy ni sur soy, est toûjours la
mesme. Mais si on estoit si excessivement
sincere, interrompit
dom Pedro, ne seroit-on pas quelquefois
ou imprudent, ou importun?
Nullement, repliqua Mathilde:
car je ne pretends pas qu' on
ait vne sincerité incivile, qui fasse
reprocher les defauts des gens
qu' on voit, ni qui fasse dire tout
ce qu' on sçait: ie ne veux pas,
dis-je, que pour estre sincere, on
perde le jugement: c' est par luy
que toutes les vertus peuvent avoir
vn bon vsage, et sans luy la iustice
et la clemence, qui sont les deux



plus grandes de toutes les vertus
heroïques, ne seroient pas toûjours
à leur place, ce sont deux vertus
qui ne peuvent jamais cesser de
l' estre; mais cela n' empesche pas
qu' il n' y ait des occasions où la
iustice est plus necessaire que la
clemence, et beaucoup d' autres
aussi où la clemence est plus
noble que la iustice. La sincerité
de mesme doit estre accompagnée
d' vn juste discernement,
qui luy donne des bornes, et qui
en regle l' vsage: il ne faut jamais
estre dissimulé ni cesser d' estre
sincere: mais quand on rencontre
des gens artificieux et fourbes,
il est permis de n' ouvrir pas
son coeur, et il est tres-bon de leur
reprocher leurs defauts par vn procedé
tout contraire, et d' avoir la
sincerité et generosité tout ensemble,



de témoigner qu' on ne les
approuve pas. Mais si l' on portoit
la sincerité si loing, dit Padille, il
faudroit renoncer à la societé:
songez bien, je vous prie, à la maniere
dont on vit à la cour, et
puis vous jugerez si j' ay raison.
Les ambitieux peuvent-ils estre
sinceres sans renoncer à la fortune?
Les amants seroient-ils aimez,
s' ils l' estoient toûjours? Ne
disent-ils pas qu' ils soûpirent sans
cesse, qu' ils brûlent, qu' ils meurent,
et de tout cela il n' en est
presque rien. Ah! Madame, dit
alors Alphonse, vous parlez comme
vne personne qui ne connoist
pas bien la sincerité, vous en faites
vne esclave, et c' est vne reyne,
vous la voulez traiter de bagatelle,
et elle doit occuper le coeur
de tous les honnestes gens. Il y a



vn certain langage flateur introduit
dans le monde qui ne trompe
personne, adjousta Mathilde,
et qui ne détruit pas la sincerité.
Les amants qui brûlent et qui
meurent en chansons ne trompent
pas leurs maistresses, si elles ont de
la raison: mais vn homme qui feroit
l' amant sans l' estre, qui sembleroit
agir tres-serieusement, et
qui au fonds ne voudroit autre
chose que tromper celle qu' il serviroit,
seroit assurément vn fourbe,
et je suis persuadée qu' vn
fort homme d' honneur, excepté
en certaines galanteries pleines
de civilité, que l' vsage a établies,
et qui, comme je l' ay déja dit, ne
trompent personne, ne doit ni parler,
ni agir contre les sentimens de
son coeur en amour, non plus qu' en
affaires: il ne faut pas au reste se



figurer que la sincerité dise tout ce
qu' elle sçait à tout le monde; mais
elle ne dit jamais ce qu' elle ne sçait
pas. Encore vne fois, dit Padille,
voyez-vous des gens tout à fait
sinceres? Croyez-moy, Mathilde,
on dit toûjours plus ou moins
qu' on ne pense, et quand je m' examine
moy-mesme, je sens bien
que la sincerité me quitte souvent.
I' ay dit cent fois à des femmes
de ma connoissance que je
les trouvois belles, propres, bien
faites, qu' elles chantoient bien,
qu' elles dançoient admirablement,
et cependant je n' en croyois
rien: on cache l' amour, la haine,
l' ambition, et l' on ne montre que
ce qu' on croit qui peut plaire, ou
qui peut estre vtile: le monde a
toûjours vécu ainsi, et y vivra toûjours.
Et pour demeurer d' accord



de ce que je dis, repassez dans vôtre
esprit des personnes de toutes
conditions, les roys mesmes peuvent-ils,
et doivent-ils toûjours estre
sinceres, et s' il s' en trouve qui aient
de la sincerité, il faut assurément
qu' elle naisse dans leur propre
coeur: car ils ne la voyent presque
jamais ni dans le visage, ni dans
les paroles de ceux qui les approchent.
Tout le monde s' empresse
à cacher ses sentimens et son
ambition à tous ceux qui peuvent
donner les graces; on veut qu' ils
croyent qu' on hait tout ce qu' ils
hayssent, qu' on aime tout ce qu' ils
aiment, qu' on ne regarde que
leur gloire, et point du tout son
interest. Ensuite, les gens de la
cour se cachent les vns des autres,
ils se font vn mystere de
leurs pretentions, de leurs liaisons,



de leurs intrigues; ils sont gays
avec les enjoüez, chagrins avec
les melancoliques; ils ont de l' amour
ou de la haine, selon que
leur interest le veut: quand deux
hommes de qualité ont querelle,
s' ils ne vont pas chez tous les
deux, ils font ménager celuy chez
qui ils n' ont pas esté, s' il peut
estre propre à quelque chose, et
choisissent d' ordinaire le parti du
plus puissant. Ie ne descends pas
en vn rang plus bas; mais aujourd' huy
on ne trouve pas plus de
sincerité dans les autres conditions,
sans en excepter les esclaves
parmy les Maures. Ie connois
d' vne espece de gens entre les autres,
dit dom Felix, qui n' ont
nulle sincerité, ce sont ceux qui
écrivent soit en vers, soit en prose:
car s' ils loüent les ouvrages



qu' on leur montre, ils loüent plus
qu' ils ne croyent devoir loüer, et
s' ils les blâment quand l' auteur
n' y est pas, ils vont au delà de
leurs sentimens. Du moins souffrirez-vous,
dit Mathilde, que je
dise qu' il y a de la sincerité entre
les veritables amis. Quand vous
m' aurez montré les amis dont
vous parlez, repliqua dom Pedro,
nous verrons ce que j' auray à dire.
Ce seroit vne étrange chose,
reprit Mathilde, s' il n' y avoit nulle
amitié sincere au monde; je ne
dis pas, dit Lucinde, qu' il n' y ait
point de sincerité, ni point d' amitié;
mais je soûtiens qu' il ne se
trouve point de sincerité parfaite:
car pour estre telle il faut qu' elle
soit toûjours égale entre deux personnes
qui s' aiment parfaitement;
cependant je soûtiens qu' entre



celles qui s' aiment le mieux, il y
a quelquefois de certains chagrins
qu' on ne se dit point, du moins
pendant qu' ils durent; cela est
mesme plus souvent dans le coeur
des personnes qui aiment parfaitement,
que dans celuy des autres;
parce qu' il est plus sensible
et plus delicat, et qu' elles sçavent
mieux quelle est la tendresse de
leur affection, que ceux qu' elles
aiment ne le peuvent sçavoir. Cela
estant ainsi, vous jugez bien que
pendant ces chagrins secrets l' exacte
sincerité est blessée. I' en demeure
d' accord, reprit Mathilde;
mais c' est la faute de la personne
qui cause les chagrins, s' ils
sont bien fondez, et non pas de
celle qui les a: car en vne affection
tendre et fidelle, on est
presque obligé de deviner le tort



qu' on peut avoir. C' est vne étrange
chose que l' amour, dit Alphonse,
il est toûjours le maître
par tout; ne prenez-vous pas
garde que nous abandonnons la
sincerité pour parler de luy? Il est
vray, reprit Mathilde: car ce
n' est pas ordinairement sous son
empire qu' il la faut chercher, et
l' amitié est beaucoup plus propre
à la sincerité que l' amour. Au
contraire, dit Alphonse, je tiens
l' amour plus propre à la sincerité,
que l' amitié. Il faut assurément
quelque chose de plus fort
qu' elle pour obliger vne personne
à estre sincere en tout temps
et en toutes choses; il faut des
sentimens au dessus de la raison:
sans cela cette sincerité dont on
parle tant, est vne qualité qui n' a
rien de fixe, qui s' accommode aux



temps, aux occasions, et à ceux à
qui l' on parle: non sans doute cette
sincerité exacte et pleine de confiance,
ne se peut trouver, qu' en
vne violente amour, qui fait qu' on
est aussi sincere pour la personne
qu' on aime, qu' on l' est pour soy-mesme,
s' il faut ainsi dire. De
sorte, dit Padille, en soûriant, que
pour avoir cette sincerité parfaite
que Mathilde estime tant, il faut
necessairement avoir de l' amour.
Ah! Padille, interrompit Mathilde,
n' expliquez pas si mal
mes paroles; mais pour l' ordinaire,
adjousta-t-elle en la regardant,
il ne faut pas estre jeune
belle, aimer à estre aimée, et
s' aimer beaucoup, pour estre fort
sincere: car on a trop d' interests
à mesnager, et il faut estre comme
je le suis, vne bonne personne



qui compte l' amitié pour toutes
choses, et qui la compteroit pour
rien si elle estoit sans sincerité.
Vous estes trop interessée au parti
de la jeunesse et de la beauté,
reprit Padille, pour parler comme
vous faites, et je doute mesme
vn peu qu' vne personne qui
sçait si bien l' art de se faire aimer,
puisse avoir vn grand chagrin
d' estre aimée. Mais sans s' arrester
à cela, je demande s' il y a
d' ordinaire plus de sincerité entre
les hommes, entre les femmes,
ou d' vn sexe à l' autre. Ah!
Pour les dames, dit dom Felix,
elles n' en ont presque jamais ensemble,
du moins toutes celles
qui pretendent à quelque chose
dans le monde. Elles naissent toutes,
s' il faut ainsi dire, dans des
interests differens, toutes les excellentes



qualitez qui les rendent
aimables, les divisent; les blondes
mettent les brunes au second
rang; les brunes quoy qu' avec
moins d' éclat pensent faire des
conquestes plus assurées que les
blondes. Les belles comptent l' esprit
pour rien; celles qui ont plus
d' esprit que de beauté, affoiblissent
autant qu' elles peuvent ce
charme puissant qui entraisne
tant de coeurs. Enfin, elles se font
à chacune vn parti sans y penser,
et cette envie secrette qu' elles
ont dans le coeur, ne permet pas
qu' elles ayent presque jamais de
veritable sincerité les vnes pour
les autres. Cette regle n' est pourtant
pas si generale; il y a des
Mathildes, des Lucindes, et
quelques autres qui en font l' exception;
mais enfin selon mon



sentiment, il n' y a guere de sincerité
entre les dames. Si les
interests que vous attribuez aux
dames, repliqua Mathilde, les
divisent assez pour estre vn obstacle
à la sincerité; comment y
en peut-il avoir entre les hommes?
Eux qui ont bien de plus
grands interests qui les peuvent
diviser: ils ont vne gloire à mesnager,
qui fait que beaucoup de
braves ne peuvent souffrir la valeur
ni en leurs ennemis, ni mesme
en leurs amis; l' ambition,
l' amour, l' envie, les affaires,
les intrigues du monde, et cent
autres choses, mettent encore
plus d' obstacles à la vraye sincerité
qu' entre les femmes. Enfin,
interrompit Padille, je voy bien
qu' il faut conclure qu' il y a ordinairement
plus de sincerité entre



vn honneste homme et vne hon