Premiers recueils. 1549-1553

Joachim Du Bellay

A Tres illustre Princesse Madame Marguerite 

Au lecteur 
Auratus in olivam 
I 
II 
III 
IV 
V 
VI 
VII 
VIII 
IX 
X 
XI 
XII 
XIII 
XIV 
XV 
XVI 
XVII 
XVIII 
XIX 
XX 
XXI 
XXII 
XXIII 
XXIV 
XXV 
XXVI 
XXVII 
XXVIII 
XXIX 
XXX 
XXXI 
XXXII 
XXXIII 
XXXIV 
XXXV 
XXXVI 
XXXVII 
XXXVIII 
XXXIX 
XL 
XLI 
XLII 
XLIII 
XLIV 
XLV 
XLVI 
XLVII 
XLVIII 
XLIX 
L 
LI 
LII 
LIII 
LIV 
LV 
LVI 
LVII 
LVIII 
LIX 
LX 
LXI 
LXII 
LXIII 
LXIV 
LXV 
LXVI 
LXVII 
LXVIII 
LXIX 
LXX 
LXXI 
LXXII 
LXXIII 
LXXIV 
LXXV 
LXXVI 
LXXVII 
LXXVIII 
LXXIX 
LXXX 
LXXXI 
LXXXII 
LXXXIII 
LXXXIV 
LXXXV 
LXXXVI 
LXXXVII 
LXXXVIII 
LXXXIX 
XC 
XCI 
XCII 
XCIII 
XCIV 
XCV 
XCVI 
XCVII 
XCVIII 
XCIX 
C 
CI 
CII 
CIII 
CIV 
CV 
CVI 
CVII 
CVIII 
CIX 
CX 
CXI 
CXII 
CXIII 
CXIV 
CXV 
L'antérotique de la vieille et de la jeune amye 
Vers lyriques 
Au lecteur 
I. Les louanges d'Anjou au fleuve de Loyre 
II. Des misères et fortunes humaines au seigneur Jan Proust 
III. Les louanges d'amour au seigneur René d'Urvoy 
IV. De l'inconstance des choses au Seigneur Pierre de Ronsard 
V. A deux Damoyzelles 
VI. Du premier jour de l'an au Seigneur Bertran Bergier 
VII. Du jour des bacchanales au Seigneur Rabestan 
VIII. Du retour du printens à Jan d'Orat 
IX. Chant du desesperé 
X. Au Seigneur Pierre de Ronsard 
XI. A une dame cruelle et inexorable 
XII. De porter les miseres et la calumnie au seigneur Christofle du Breil 
XIII. De l'immortalité des poëtes au seigneur Bouju 
XIV. Epitaphe de Clement Marot 
Recueil de poésie 
A Tresillustre Princesse Madame Marguerite Seur unique du Roy 
A Sa Lyre 
Prosphonematique 
Chant triumphal sur le voyage de Boulongne 
Vers liriques 
I. A la Royne 
II. A Tresillustre Princesse Madame Marguerite seur unique du Roy 
III. A Mellin de Sainct Gelais 
IV. A Madame Marguerite d'escrire en sa langue 
V. A Tresillustre Prince Monseigneur Reverendiss. Cardinal de Guyse 
VI. A Monseigneur Reverendiss. Cardinal de Chastillon 
VII. L'avantretour en France de Monseigneur Reverendiss. Cardinal du Bellay 
VIII. Contre les Avaritieux 
IX. A Bouju. Les conditions du vray poëte 
X. De l'innocence et de n'attenter contre la magesté divine 
XI. Au Seigneur du Boysdaulphin Maistre d'hostel du Roy 
XII. A Carles 
XIII. A Heroet 
XIV. A Mercure et à sa lyre pour adoucir la cruauté de sa dame 
XV. La louange du feu Roy François et du Treschrestien Roy Henry 
XVI. A Madame la Contesse de Tonnerre 
XVII. Dialogue d'un amoureux et d'écho 
XVIII. A une dame 
XIX. La mort de Palinure du cinquiesme de Virgile 
XX. Elégie 
XXI. Chanson 
Oeuvres de l'invention de l'autheur 
I. La complainte du desesperé 
II. Hymne Chrestien 
III. La monomachie de David et de Goliath 
IV. Ode au Reverendiss. Cardinal du Bellay 
V. La Lyre Chrestienne 
VI. Discours sur la louange de la vertu et sur les divers erreurs des hommes à 
Salm. Macrin 
VII. Les deux Marguerites 
VIII. Ode au Seigneur des Essars sur le discours de son Amadis 
IX. Au Seign. Rob. de la Haye pour Estrene 
X. Estrène à D. M. de la Haye 
XI. Ode Pastorale à Ung Sien Amy 
XII. A Salm. Macrin 
XIII. Sonnetz de l'honneste amour 
XIV. L'adieu aux muses pris du latin de Buccanan



A Tres illustre Princesse Madame Marguerite 
Seur unique du Roy Luy presentant ce livre 

Sonnet 
Par un sentier inconneu à mes yeux 
Vostre grandeur sur ses ailes me porte 
Où de Phebus la main sçavante et forte 
Guide le frein du chariot des cieulx. 
Là elevé au cercle radieux 
Par un Demon heureux, qui me conforte, 
Celle fureur tant doulce j'en rapporte, 
Dont vostre nom j'egalle aux plus haulx dieux. 
O Vierge donc, sous qui la Vierge Astrée 
A faict encor' en nostre siecle entrée! 
Prenez en gré ces poëtiques fleurs. 
Ce sont mes vers, que les chastes Carites 
Ont emaillez de plus de cent couleurs 
Pour aler voir la fleur des Marguerites. 
COELO MUSA BEAT 



Au lecteur 

Combien que j'aye passé l'aage de mon enfance et la meilleure part de mon 
adolescence assez inutilement, lecteur, si est-ce que par je ne sçay quelle 
naturelle inclination j'ay tousjours aimé les bonnes lettres: singulierement 
nostre poësie françoise, pour m'estre plus familiere, qui vivoy' entre ignorans 
des langues estrangeres. Depuis, la raison m'a confirmé en cete opinion: 
considerant que si je vouloy' gaingner quelque nom entre les Grecz, et Latins, 
il y fauldroit employer le reste de ma vie, et (peult estre) en vain, etant jà 
coulé de mon aage le temps le plus apte à l'etude: et me trouvant chargé 
d'affaires domestiques, dont le soing est assez suffisant pour dégouter un homme 
beaucoup plus studieux que moy. Au moyen de quoy, n'ayant où passer le temps, et 
ne voulant du tout le perdre, je me suis volontiers appliqué à nostre poësie: 
excité et de mon propre naturel, et par l'exemple de plusieurs gentiz espritz 
françois, mesmes de ma profession, qui ne dedaignent point manier et l'epée et 
la plume, contre la faulse persuasion de ceux qui pensent tel exercice de 
lettres deroger à l'estat de noblesse. Certainement, lecteur, je ne pouroy' et 
ne voudroy' nier, que si j'eusse ecrit en grec ou en latin, ce ne m'eust esté un 
moyen plus expedié pour aquerir quelque degré entre les doctes hommes de ce 
royaume: mais il fault que je confesse ce que dict Ciceron en l'oraison pour 
Murene, Qui cùm cytharoedi esse non possent, et ce qui s'ensuit. Considerant 
encores nostre langue estre bien loing de sa perfection, qui me donnoit espoir 
de pouvoir avecques mediocre labeur y gaingner quelque ranc, si non entre les 
premiers, pour le moins entre les seconds, je voulu bien y faire quelque essay 
de ce peu d'esprit que la Nature m'a donné. Voulant donques enrichir nostre 
vulgaire d'une nouvelle, ou plustost ancienne renouvelée poësie, je m'adonnay à 
l'immitation des anciens Latins, et des poëtes Italiens, dont j'ay entendu ce 
que m'en a peu apprendre la communication familiere de mes amis. Ce fut 
pourquoy, à la persuasion de Jaques Peletier, je choisi le Sonnet et l'Ode, deux 
poëmes de ce temps là (c'est depuis quatre ans) encores peu usitez entre les 
nostres: étant le Sonnet d'italien devenu françois, comme je croy, par Mellin de 
Sainct Gelais, et l'Ode, quand à son vray et naturel stile, representée en 
nostre langue par Pierre de Ronsard. Ce que je vien de dire, je l'ay dict 
encores en quelque autre lieu, s'il m'en souvient: et te l'ay bien voulu 
ramentevoir, lecteur, afin que tu ne penses que je me vueille attribuer les 
inventions d'autruy. Or, afin que je retourne à mon premier propos, voulant 
satisfaire à l'instante requeste de mes plus familiers amis, je m'osay bien 
avanturer de mettre en lumiere mes petites poësies: après toutesfois les avoir 
communiquées à ceux que je pensoy' bien estre clervoyans en telles choses, 
singulierement à Pierre de Ronsard, qui m'y donna plus grande hardiesse que tous 
les autres, pour la bonne opinion que j'ay tousjours eue de son vif esprit, 
exact sçavoir, et solide jugement en nostre poësie françoise. Je n'ay pas icy 
entrepris de respondre à ceux qui me voudroient blasmer d'avoir precipité 
l'edition de mes oeuvres, et, comme on dict, avoir trop tost mis la plume au 
vent. Car si mes ecriz sont bons, ma jeunesse ne leur doibt oster leur louange 
meritée. S'ilz ne sont tels, elle doibt pour le moins leur servir d'excuse: 
d'aultant que si j'ay faict en cet endroit quelque acte de jeunesse, je n'ay 
faict si non ce que je devoy'. Pour le moins, ce m'est une faulte commune 
avecques beaucoup d'autres meilleurs espriz que le mien. Je ne suis tel, que je 
vueille blâmer le conseil d'Horace, quand à l'edition des poëmes: mais aussi ne 
suis-je de l'opinion de ceux qui gardent religieusement leurs ecriz, comme 
sainctes reliques, pour estre publiez apres leur mort: sçachant bien que tout 
ainsi que les mors ne mordent point, aussi se sentent-ilz les morsures. Cete 
conscientieuse difficulté, lecteur, n'estoit ce qui me retardoit le plus en la 
premiere edition de mes ecriz. Je craignoy' un autre inconvenient, qui me 
sembloit avoir beaucoup plus apparente raison de future reprehension. C'est que 
telle nouveauté de poësie pour le commencement seroit trouvée fort etrange, et 
rude. Au moyen de quoy, voulant prevenir cete mauvaise opinion, et quasi comme 
applanir le chemin à ceux qui, excitez par mon petit labeur, voudroient enrichir 
nostre vulgaire de figures et locutions estrangeres, je mis en lumiere ma 
Deffence et illustration de la langue françoise: ne pensant toutefois au 
commencement faire plus grand oeuvre qu'une epistre et petit advertissement au 
lecteur. Or ay-je depuis experimenté ce qu'au paravant j'avoy assez preveu, 
c'est que d'un tel oeuvre je ne rapporteroy jamais favorable jugement de noz 
rethoriqueurs françoys, tant pour les raisons assez nouvelles, et paradoxes 
introduites par moy en nostre vulgaire, que pour avoir (ce semble) hurté un peu 
trop rudement à la porte de noz ineptes rimasseurs. Ce que j'ay faict, lecteur, 
non pour aultre raison que pour eveiller le trop long sillence des cignes et 
endormir l'importun croassement des corbeaux. Ne t'esbahis donques si je ne 
respons à ceulx qui m'ont apellé hardy repreneur: car mon intention ne feut 
onques d'auctorizer mes petiz oeuvres par la reprehension de telz gallans. Si 
j'ay particularizé quelques ecriz, sans toutefois toucher aux noms de leurs 
aucteurs, la juste douleur m'y a contrainct, voyant nostre langue, quand à sa 
nayfve proprieté si copieuse, et belle, estre souillée de tant de barbares 
poësies, qui par je ne scay quel nostre malheur plaisent communement plus aux 
oreilles françoises que les ecritz d'antique, et solide erudition. Les gentilz 
espris, mesmes ceulx qui suyvent la court, seule escolle ou voluntiers on 
apprent à bien proprement parler, devroient vouloir pour l'enrichissement de 
nostre langue, et pour l'honneur des espriz françois, que telz poëtes barbares, 
ou feussent fouettez à la cuysine, juste punition de ceulx qui abusent de la 
pacience des Princes, et grands Seigneurs par la lecture de leurs ineptes 
oeuvres: ou (si on les vouloit plus doucement traicter) qu'on leur donnast 
argent pour se taire; suyvant l'exemple du grand Alexandre, qui usa de semblable 
liberalité en l'endroict de Cherille, poëte ignorant. Certes j'ay grand'honte, 
quand je voy' le peu d'estime que font les Italiens de nostre poësie en 
comparaison de la leur: et ne le treuve beaucoup etrange, quand je considere que 
voluntiers ceulx qui ecrivent en la langue Toscane sont tous personnaiges de 
grand' erudition: voire jusques aux Cardinaux mesmes et aultres seigneurs de 
renom, qui daignent bien prendre la peine d'enrichir leur vulgaire par infinité 
de beaux ecriz: usant en cela de la diligence et discretion familiere à ceulx 
qui legerement n'exposent leurs conceptions au publique jugement des hommes. 
Pense donques, je te prie, Lecteur, quel prix doivent avoir, en l'endroict de 
celle tant docte et ingenieuse nation Italienne, les ecriz d'ung petit Magister, 
d'un Conard, d'un Badault, et aultres mignons de telle farine, dont les oreilles 
de nostre peuple sont si abbreuvées, qu'elles ne veulent aujourd'huy recevoir 
aultre chose. Je suis certain que tous lecteurs de bon jugement prendront ce que 
je dy en bonne part, veu que je ne parle du tout sans raison. Au fort, si nos 
petiz Rimeurs s'en trouvoint un peu fachez, je leur conseilleroy' de prendre 
pacience: considerant que je ne suis ung Aristarque ou Aristophane, dont la 
grave censure doive oster leurs ecriz du rôle de noz poësies, ou retarder leurs 
aucteurs de mieux faire à l'advenir. Aussi leur mescontentement ne me doit 
rompre ma deliberation, qui par veu solennel me suis obligé aux Muses de ne 
mentir jamais (que je le puisse entendre) ni en vin ni en poësie. Toutefois je 
ne veux pas du tout estre juge si severe, et incorruptible en matiere de poësie, 
que je suyve l'heresie de celuy qui disoit Mitte me in lapicidinas. Quelques uns 
se plaignent de quoy je blâme les traductions poëtiques en nostre langue, dont 
ilz ne sont (disent-ilz) illustrateurs ny gaigez ny renommez. Aussi ne suis-je. 
Mais s'ilz n'alleguent aultre raison, je n'y feray point de response. Encores 
moins à ce qu'ilz disent, que j'ay reservé la lecture de mes ecriz à une 
affectée demy-douzaine des plus renommez poëtes de nostre langue. Car je n'avoy' 
entrepris de faire un catalogue de tous les autres, mesmes de ceulx qui ne 
m'etoient conneuz ny à leurs noms ny à leurs oeuvres. Ceux dont je ne cherche 
point les applaudissements ont occasion de gronder. Aussi me plaisent leurs 
aboys: car je n'en crain' gueres les morsures. Je fonde encor' (disent-ilz) 
l'immortalité de mon nom sur moindre chose que leurs escritz, dont toutefois ilz 
ne pretendent aucune louange. Ce n'est à eulx ny à moy à juger de nostre cause: 
qui (Dieu mercy) n'est de telle importance, que la court y doibve estre 
longuement embesongnée. Aussi n'ay-je pas fondé mon advancement sur telles 
magnifiques comparaisons. Si en mes poësies je me loüe quelques fois, ce n'est 
sans l'imitation des anciens: et en cela je ne pense avoir encor' esté si 
excessif, que j'aye, pour illustrer le mien, offensé l'honneur de personne. Et 
puis je me vante d'avoir inventé ce que j'ay mot à mot traduit les aultres. A 
peu que je ne leur fay la responce que fist Virgile à un quiddam Zoile, qui le 
reprenoit d'emprunter les vers d'Homere. J'ay (ce me semble) ailleurs assez 
deffendu l'immitation. C'est pourquoy je ne feray longue response à cet article. 
Qui vouldroit à ceste ballance examiner les escritz des anciens Romains et des 
modernes Italiens, leurs arrachant toutes ces belles plumes empruntées dont ilz 
volent si haultement, ilz seroint en hazard d'estre accoutrez en corneille 
Horacienne. Si, par la lecture des bons livres, je me suis imprimé quelques 
traictz en la fantaisie, qui après, venant à exposer mes petites conceptions 
selon les occasions qui m'en sont données, me coulent beaucoup plus facilement 
en la plume qu'ilz ne me reviennent en la memoire, doibt-on pour ceste raison 
les appeller pieces rapportées? Encor' diray-je bien que ceulx qui ont leu les 
oeuvres de Virgile, d'Ovide, d'Horace, de Petrarque, et beaucoup d'aultres, que 
j'ay leuz quelquefois assez negligemment, trouverront qu'en mes escriptz y a 
beaucoup plus de naturelle invention que d'artificelle ou supersticieuse 
immitation. Quelques ungs voyans que je finissoy' ou m'efforçoy' de finir mes 
sonnetz par ceste grace qu'entre les aultres langues s'est faict propre 
l'epigramme françois, diligence qu'on peult facilement recongnoistre aux oeuvres 
de Cassola Italien, disent pour ceste raison que je l'ay immité, bien que de ce 
temps là il ne me feust congneu seulement de nom, ou Apollon jamais ne me soit 
en ayde. Je ne me suis beaucoup travaillé en mes ecriz de ressembler aultre que 
moymesmes: et si en quelque endroict j'ay usurpé quelques figures et façons de 
parler à l'imitation des estrangers, aussi n'avoit aucun loy ou privilege de le 
me deffendre. Je dy encores cecy, Lecteur, affin que tu ne penses que j'aye rien 
emprunté des nostres, si d'avanture tu venois à rencontrer quelques epithetes, 
quelques phrases et figures prises des anciens, et appropriées à l'usaige de 
nostre vulgaire. Si deux peintres s'efforcent de representer au naturel quelque 
vyf protraict, il est impossible qu'ilz ne se rencontrent en mesmes traictz et 
lineamens, ayans mesme exemplaire devant eulx. Combien voit-on entre les Latins 
immitateurs des Grecz, entre les modernes Italiens immitateurs des Latins, de 
commencemens et de fins de vers, de couleurs, et figures poëtiques quasi 
semblables? Je ne parle poinct des orateurs. Ceulx qui voudront considerer le 
stile des Ciceroniens, ou aultres, ne trouverront estrange la ressemblance 
qu'ont ou pourront avoir les poëmes françois, si chacun s'efforce d'escrire par 
immitation des estrangers. Tous arts et sciences ont leurs termes naturelz. Tous 
mestiers ont leurs propres outilz. Toutes langues ont leurs motz et loqutions 
usitées: et qui n'en voudroit user, il se faudroit forger à part nouveaux artz, 
nouveaulx mestiers et nouvelles langues. Ce que j'ay dict, cetuy ci l'a dict 
encor', et cetuy là: aussi les Muses n'ont restrainct, et enfermé en l'esprit de 
deux ou trois tout ce qui se peut dire de bonne grace en nostre poësie. S'il y a 
quelques faultes en mes escritz, aussi ne sont tous les aultres parfaictz. Ceulx 
qui avecques raison me voudront faire ce bien de me reprendre, je mettray peine 
d'en faire mon profit. Car je ne suis du nombre de ceulx qui ayment myeux 
deffendre leurs faultes que les corriger. Mais si quelques ungs directement ou 
indirectement (comme on dict) me vouloient taxer, non point avecques la raison 
et modestie accoutumée en toutes honnestes controversies de lettres, mais 
seulement avecques une petite maniere d'irrision et contournement de nez, je les 
adverty' qu'ilz n'attendent aulcune response de moy: car je ne veux pas faire 
tant d'honneur à telles bestes masquées, que je les estime seulement dignes de 
ma cholere. Si quelques uns vouloient renouveler la farce de Marot et de Sagon, 
je ne suis pour les en empescher: mais il fault qu'ilz cherchent aultre badin 
pour jouer ce rôle avecques eux. Voylà ung petit desseing lecteur, de ce que je 
pouroy' bien respondre à mes calomniateurs, si je vouloy' prendre la peine de 
leur tenir plus long propoz. Quand à ceux qui blasment en moy cet etude 
poëtique, comme totalement inutile, s'ilz veulent combatre contre la poësie, 
elle a des armes pour se deffendre: s'ilz plaignent l'empeschement de ma 
promotion, je les remercie de leur bonne volunté. Ceux qui ayment le jeu, les 
banquetz et aultres menuz plaisirs, qu'ilz y passent et le jour; et la nuict si 
bon leur semble. Quand à moy, n'ayant aultre passetems de plus grand plaisir, je 
donneray vouluntiers quelques heures à la poësie. Et combien ce m'est un labeur 
peu laborieux, et coutumier, si ce n'est ou faisant quelque voiage ou en lieu 
qui n'ait aultre plus joyeuse occupation, bien l'entendent ceux qui me hantent 
de familiarité. J'ayme la poësie, me tire bien souvent la Muse (comme dict 
quelqu'un) furtivement en son oeuvre: mais je n'y suis tant affecté, que 
facilement je ne m'en retire, si la fortune me veult presenter quelque chose, ou 
avecques plus grand fruict je puisse occuper mon esprit. Je te prie donques, amy 
Lecteur, me faire ce bien de penser que ma petite muse, telle qu'elle est, n'est 
toutefois esclave ou mercenaire, comme d'ung tas de rymeurs à gaiges: elle est 
serve tant seulement de mon plaisir. Je te prie encores ne trouver mauvais cet 
advertissement, ou t'ennuyer de sa longueur, comme oultrepassant les bornes 
d'une epistre. En recompence de quoy, je te fay' present de mon Olive augmentée 
de plus de la moitié, et d'une Musagnoeomachie, c'est à dire la Guerre des Muses 
et de l'Ignorance. Ceux qui ne treuvent rien bon, si non ce qui sort de leur 
main, y trouverront à mordre en beaucoup de lieux: mesme en cet endroict ou je 
fay mention de quelques sçavans hommes de nostre France. Les uns diront que j'en 
ay laissé que je ne devoy' pas oublier: les aultres, que je n'ay pas gardé 
l'ordre, nommant quelques ungs les derniers, qui meritoient bien estre au 
premier ranc. Je n'ay qu'une petite response à toutes ces objections frivoles: 
c'est que mon intention n'estoit alors d'ecrire une hystoire, mais une poësie. 
Et combien ce genre d'escrire est peu consciencieux en telles choses, je m'en 
rapporte seulement à ceux qui l'entendent. Mais pourquoy pren-je tant de peine, 
lecteur, à preoccuper l'excuse de ce qui sera trouvé (peult estre) la moindre 
faulte de mes oeuvres? J'ay tousjours estimé la poësie comme ung somptueux 
banquet, ou chacun est le bien venu, et n'y force lon personne de manger d'une 
viande ou boire d'un vin, s'il n'est à son goust, qui le sera (possible) à celuy 
d'un aultre. C'est encor' la raison pourquoy j'ay si peu curieusement regardé à 
l'orthographie, la voyant au jourdhuy aussi diverse qu'il y a de sortes 
d'ecrivains. J'appreuve et loue grandement les raisons de ceux qui l'ont voulu 
reformer, mais voyant que telle nouveaulté desplaist autant aux doctes comme aux 
indoctes, j'ayme beaucoup mieulx louer leur invention que de la suyvre: pource 
que je ne fay pas imprimer mes oeuvres en intention qu'ilz servent de cornetz 
aux apothequaires, ou qu'on les employe à quelque aultre plus vil mestier. Si tu 
treuves quelques faultes en l'impression, tu ne t'en dois prendre à moy, qui 
m'en suis rapporté à la foy d'autruy. Puis le labeur de la correction est tel, 
singulierement en un oeuvre nouveau, que tous les yeux d'Argus ne fourniroient à 
voir les faultes qui s'i treuvent. 







  
Auratus in olivam 
Sola virûm nuper volitabat docta per ora 
Laura, tibi Thuscis dicta, Petrarcha, sonis: 
Tantaque vulgaris fuerat facundia linguas, 
Ut premeret fastu scripta vetusta suo. 
At nunc Thuscanam Lauram comitatur Oliva 
Gallica, Bellaii cura laborque sui. 
Phoebus amat Laurum, glaucam sua Pallas Olivam: 
Ille suum vatem, nec minus ista suum. 
SALMONII MACRINI IULIODUNENSIS ODE IN OLIVAM IOACHIMI BELLAII ANDENSIS 
Supreme vatum hîc postera quos feret, 
Exacta et astas quos tulit hactenus, 
Facunde Bellaï, coruscum 
Andegavis Ligerique lumen: 
Me bellicoso condita Julio, 
Illustre cujus nomen habet, tulit 
Urbs anserem rauce strepentem 
Inter Apollineos olores. 
Dulci tuo effers carmine me tamen, 
Inter poestas atque aliquem facis, 
De musca avens barrhum videri: 
Metior at modulo meo me, 
Dixere multi Pictona quem prius: 
Malim sed Andes sint mihi patria, 
Urbs urbium quòd nostra prorsus 
In medio sita sit duarum. 
De judicatum sic et Horatio: 
Lucanus, anceps, esset an Appulus, 
Utrumque sub finem colonus 
Cum Venusinus agros araret. 
Te propter atqui hinc Andegavus ferar, 
Excîtus auras flatibus ut tuas 
Sublime cantem, prosperoque 
Sydera celsa petam volatu. 
Felix Olivas carminibus, tuas, 
An vate felix illa suo magis, 
Lauram secutura hinc Petrarchas, 
Quintiliam, Nemesin, Corinnam? 
Conjungeretur his utinam mea 
Olim Gelonis! mortua sit licet, 
Tristemque decedens Macrinum 
Liquerit heu! saturumque vitas. 
Sic illa vixit cum unanimi viro, 
Laude ut perenni digna sit evehi: 
At solus argutis valeres 
Tu facere id, Joachime, rythmis. 
  
I 
Je ne quiers pas la fameuse couronne, 
Sainct ornement du Dieu au chef doré, 
Ou que du Dieu aux Indes adoré 
Le gay chapeau la teste m'environne. 
Encores moins veulx-je que l'on me donne 
Le mol rameau en Cypre decoré: 
Celuy qui est d'Athenes honoré, 
Seul je le veulx, et le Ciel me l'ordonne. 
O tige heureux, que la sage Déesse 
En sa tutelle, et garde a voulu prendre, 
Pour faire honneur à son sacré autel! 
Orne mon chef, donne moy hardiesse 
De te chanter, qui espere te rendre 
Egal un jour au laurier immortel. 
  
II 
D'amour, de grace, et de haulte valeur 
Les feux divins estoient ceinctz, et les cieulx 
S'estoient vestuz d'un manteau precieux 
A raiz ardens, de diverse couleur. 
Tout estoit plein de beauté, de bonheur, 
La mer tranquille, et le vent gracieulx, 
Quand celle là naquit en ces bas lieux 
Qui a pillé du monde tout l'honneur. 
Ell' prist son teint des beaux lyz blanchissans, 
Son chef de l'or, ses deux levres des rozes, 
Et du soleil ses yeux resplandissans. 
Le ciel usant de liberalité 
Mist en l'esprit ses semences encloses, 
Son nom des Dieux prist l'immortalité. 
  
III 
Loyre fameux, qui ta petite source 
Enfles de maintz gros fleuves et ruysseaux, 
Et qui de loing coules tes cleres eaux 
En l'Ocean d'une assez vive course: 
Ton chef royal hardiment bien hault pousse 
Et apparoy entre tous les plus beaux 
Comme un thaureau sur les menuz troupeaux 
Quoy que le Pau envieux s'en courrousse. 
Commande doncq' aux gentiles Naiades 
Sortir dehors leurs beaux palais humides 
Avecques toy, leur fleuve paternel, 
Pour saluer de joyeuses aubades. 
Celle qui t'a, et tes filles liquides, 
Deifié de ce bruyt eternel. 
  
IV 
L'heureuse branche à Pallas consacrée, 
Branche de paix, porte le nom de celle 
Qui le sens m'oste, et soubz grand' beauté cele 
La cruaulté, qui à Mars tant agrée. 
Delaisse donq' ô cruelle obstinée! 
Ce tant doulx nom, ou bien te monstre telle, 
Qu'ainsi qu'en tout sembles estre immortelle, 
Sembles le nom avoir par destinée. 
Que du hault ciel il t'ait eté donné, 
Je ne suis point de le croire etonné, 
Veu qu'en esprit tu es la souveraine: 
Et que tes yeux, à ceulx qui te contemplent, 
Coeur, corps, esprit, sens, ame, et vouloir emblent 
Par leur doulceur angelique, et seraine. 
  
V 
C'etoit la nuyt que la Divinité 
Du plus hault ciel en terre se rendit 
Quand dessus moy Amour son arc tendit 
Et me fist serf de sa grand' deité. 
Ny le sainct lieu de telle cruaulté, 
Ny le tens mesme assez me deffendit: 
Le coup au coeur par les yeux descendit 
Trop ententifz à ceste grand' beauté. 
Je pensoy' bien que l'archer eust visé 
A tous les deux, et qu'un mesme lien 
Nous deust ensemble egalement conjoindre. 
Mais comme aveugle, enfant, mal avisé, 
Vous a laissée (helas) qui eties bien 
La plus grand' proye, et a choisi la moindre. 
  
VI 
Comme on ne peult d'oeil constant soustenir 
Du beau Soleil la clarté violente, 
Aussi qui void vostre face excellente 
Ne peult les yeulx assez fermes tenir. 
Et si de près il cuyde parvenir 
A contempler vostre beauté luysante, 
Telle clarté à voir luy est nuysante, 
Et si le faict aveugle devenir. 
Regardez doncq' si suffisant je suys 
A vous louer, qui seulement ne puys 
Voz grands beautez contempler à mon gré. 
Que si mes yeulx avoient un tel pouvoir, 
J'estimeroy' plus fermes les avoir, 
Que n'a l'oyseau à Jupiter sacré. 
  
VII 
De grand' beauté ma Déesse est si pleine, 
Que je ne voy' chose au monde plus belle. 
Soit que le front je voye, ou les yeulx d'elle, 
Dont la clarté saincte me guyde, et meine: 
Soit ceste bouche, ou souspire une halaine 
Qui les odeurs des Arabes excelle: 
Soit ce chef d'or, qui rendroit l'estincelle 
Du beau Soleil honteuse, obscure et vaine: 
Soient ces coustaux d'albastre, et main polie, 
Qui mon coeur serre, enferme, estreinct, et lie, 
Bref, ce que d'elle on peult ou voir, ou croyre. 
Tout est divin, celeste, incomparable: 
Mais j'ose bien me donner ceste gloyre, 
Que ma constance est trop plus admirable. 
  
VIII 
Auray'-je bien de louer le pouvoir 
Ceste beauté, qui decore le monde? 
Quand pour orner sa chevelure blonde 
Je sens ma langue ineptement mouvoir? 
Ny le romain, ny l'atique sçavoir, 
Quoy que là fust l'ecolle de faconde, 
Aux cheveulx mesme, où le fin or abonde, 
Eussent bien faict à demy leur devoir. 
Quand je les voy' si reluysans et blons, 
Entrenouez, crespes, egaulx et longs, 
Je m'esmerveille, et fay' telle complaincte: 
Puis que pour vous (cheveulx) j'ay tel martyre, 
Que n'ay-je beu à la fontaine saincte? 
Je mourroy' cygne, ou je meurs sans mot dire. 
  
IX 
Garde toy bien ô gracieux Zephire! 
D'empestrer l'esle en ces beaulx noeuds epars, 
Que çà, et là, doulcement tu depars 
Sur ce beau col de marbre, et de porphire. 
Si tu t'y prens, plus ne vouldras nous ryre 
Le verd printemps: ainçoys de toutes pars 
Flore voyant que d'autre amour tu ards, 
Fera ses fleurs dessecher par grand' ire. 
Que dy-je las! Zephire n'est-ce point, 
C'est toy, Amour, qui voles en ce point, 
Tout à l'entour, et par dedans ces retz. 
Que tu as faictz d'art plus laborieux 
Que ceulx, ausquelz jadis feurent serrez 
Ta doulce mere, et le Dieu furieux. 
  
X 
Ces cheveux d'or sont les liens Madame, 
Dont fut premier ma liberté surprise, 
Amour la flamme autour du coeur eprise, 
Ces yeux le traict, qui me transperse l'ame, 
Fors sont les neudz, apre, et vive la flamme, 
Le coup, de main à tyrer bien apprise, 
Et toutesfois j'ayme, j'adore, et prise 
Ce qui m'etraint, qui me brusle, et entame. 
Pour briser donq', pour eteindre, et guerir 
Ce dur lien, ceste ardeur, ceste playe, 
Je ne quier fer, liqueur ny medecine, 
L'heur, et plaisir, que ce m'est de perir 
De telle main, ne permect que j'essaye 
Glayve trenchant, ny froydeur, ny racine. 
  
XI 
Des ventz emeuz la raige impetueuse 
Un voyle noir etendoit par les cieux, 
Qui l'orizon jusqu'aux extremes lieux 
Rendoit obscur, et la mer fluctueuse. 
De mon soleil la clarté radieuse 
Ne daignoit plus aparoitre à mes yeulx, 
Ains m'annonçoient les flotz audacieux 
De tous costez une mort odieuse. 
Une peur froide avoit saisi mon ame 
Voyant ma nef en ce mortel danger, 
Quand de la mer la fille je reclame, 
Lors tout soudain je voy' le ciel changer, 
Et sortir hors de leurs nubileux voyles 
Ces feux jumeaux, mes fatales etoiles. 
  
XII 
O de ma vie à peu pres expirée 
Le seul filet! yeux, dont l'aveugle archer 
A bien sceu mil',et mil' fleches lascher, 
Sans qu'il en ait oncq' une en vain tirée. 
Toute ma force est en vous retirée, 
Vers vous je vien' ma guerison chercher, 
Qui pouvez seulz la playe dessecher, 
Que j'ay par vous (ô beaux yeux!) endurée. 
Vous estes seulz mon etoile amyable, 
Vous pouvez seulz tout l'ennuy terminer, 
Ennuy mortel de mon ame offensée. 
Vostre clarté me soit doncq' pitoyable, 
Et d'un beau jour vous plaise illuminer 
L'obscure nuyt de ma triste pensée. 
  
XIII 
La belle main, dont la forte foiblesse 
D'un joug captif domte les plus puissans, 
La main, qui rend les plus sains languissans, 
Debendant l'arc meurtrier qui les coeurs blesse, 
La belle main, qui gouverne, et radresse 
Les freinz dorez des oiseaux blanchissans, 
Quand sur les champs de pourpre rougissans 
Guydent en l'air le char de leur maistresse, 
Si bien en moy a gravé le protraict 
De voz beautez au plus beau du ciel nées, 
Que ny la fleur, qui le sommeil attraict, 
Ny toute l'eau d'oubly, qui en est ceinte, 
Effaceroient en mil' et mil' années 
Vostre figure en un jour en moy peinte. 
  
XIV 
Le fort sommeil, que celeste on doibt croyre, 
Plus doulx que miel, couloit aux yeulx lassez, 
Lors que d'amour les plaisirs amassez 
Entrent en moy par la porte d'ivoyre. 
J'avoy' lié ce col de marbre: voyre 
Ce sein d'albastre, en mes bras enlassez 
Non moins qu'on void les ormes embrassez 
Du sep lascif, au fecond bord de Loyre. 
Amour avoit en mes lasses mouëlles 
Dardé le traict de ses flammes cruelles, 
Et l'ame erroit par ces levres de roses, 
Preste d'aller au fleuve oblivieux, 
Quand le reveil de mon ayse envieux 
Du doulx sommeil a les portes decloses. 
  
XV 
Pié, que Thétis pour sien eust avoué, 
Pié, qui au bout monstres cinq pierres telles, 
Que l'Orient seroit enrichi d'elles, 
Cil Orient en perles tant loué. 
Pié albastrin, sur qui est appuyé 
Le beau sejour des graces immortelles, 
Qui feut baty sur deux coulonnes belles 
De marbre blanc, poly, et essuyé. 
Si l'oeil n'a plus de me nourir esmoy, 
Si ses thesors la bouche ne m'octroye, 
Si les mains sont en mes playes si fortes, 
Au moins (ô pié) n'esloingne point de moy 
Mon triste coeur, dont Amour a faict proye, 
L'emprisonnant en ce corps que tu portes. 
  
XVI 
Qui a peu voir celle que Déle adore 
Se devaler de son cercle congneu, 
Vers le pasteur d'un long sommeil tenu 
Dessus le mont, qui la Carie honore: 
Et qui a veu sortir la belle Aurore 
Du jaulne lict de son espoux chenu 
Lors que le ciel encor' tout pur et nu 
De mainte rose indique se colore: 
Celuy a veu encores (ce me semble) 
Non point les lyz et les roses ensemble, 
Non ce, que peult le printemps concevoir: 
Mais il a veu la beauté nompareille 
De ma Déesse, ou reluyre on peult voir 
La clere Lune, et l'Aurore vermeille. 
  
XVII 
J'ay veu, Amour (et tes beaulx traictz dorez 
M'en soient tesmoings) suyvant ma souvereine, 
Naistre les fleurs de l'infertile arene 
Après ses pas dignes d'estre adorez. 
Phebus honteux ses cheveulx honorez 
Cacher alors que les vents par la plaine 
Eparpilloient de leur souëfve halaine 
Ceulx là, qui sont de fin or colorez. 
Puis s'en voler de chascun oeil d'icelle 
Jusques au ciel une vive etincelle, 
Dont furent faictz deux astres clers, et beaux. 
Favorisans d'influences heureuses 
(O feux divins! ô bienheureux flambeaulx!) 
Tous coeurs bruslans aux flammes amoureuses. 
  
XVIII 
Le chef doré cestuy blasonnera, 
Cestuy le corps, l'autre le blanc ivoire 
De l'estommac, l'autre eternelle gloire 
Aux yeux archers par ses vers donnera. 
Comme une fleur tout cela perira: 
Mais en esprit, en faconde, et memoire, 
Quand l'aage aura sur la beauté victoire, 
Mieux que devant Madame florira. 
Que si en moy le souverain donneur 
Pour tel subject heureusement poursuyvre 
Eust mis tant d'art, tant de grace, et bonheur, 
Mieux qu'en tableau, en bronze, en marbre, en cuyvre, 
Je luy feroy', et à moy un honneur, 
Qui elle et moy feroit vivre et revivre. 
  
XIX 
Face le ciel (quand il vouldra) revivre 
Lisippe, Apelle, Homere, qui le pris 
Ont emporté sur tous humains espris 
En la statue, au tableau, et au livre. 
Pour engraver, tirer, decrire, en cuyvre, 
Peinture, et vers, ce qu'en vous est compris, 
Si ne pouroient leur ouvraige entrepris 
Cyzeau, pinceau, ou la plume bien suyvre. 
Voilà pourquoy ne fault, que je souhete 
De l'engraveur, du peintre, ou du poëte, 
Marteau, couleur ny encre, ô ma Déesse! 
L'art peult errer, la main fault, l'oeil s'ecarte. 
De voz beautez mon coeur soit doncq' sans cesse 
Le marbre seul, et la table, et la charte. 
  
XX 
Puis que les cieux m'avoient predestiné 
A vous aymer, digne object de celuy, 
Par qui Achille est encor' aujourdhuy 
Contre les Grecz pour s'amye obstiné, 
Pourquoy aussi n'avoient-ilz ordonné 
Renaitre en moy l'ame, et l'esprit de luy? 
Par maintz beaux vers tesmoings de mon ennuy 
Je leur rendroy', ce qu'ilz vous ont donné. 
Helas Nature, au moins puis que les cieux 
M'ont denié leurs liberalitez, 
Tu me devois cent langues, et cent yeux, 
Pour admirer, et louer cete là, 
Dont le renom (pour cent graces, qu'elle a) 
Merite bien cent immortalitez. 
  
XXI 
Les bois fueilleuz, et les herbeuses rives 
N'admirent tant parmy sa troupe saincte 
Dyane, alors que le chault l'a contrainte 
De pardonner aux bestes fugitives, 
Que tes beautez, dont les autres tu prives 
De leurs honneurs, non sans envie mainte 
Veu que tu rends toute lumiere etainte 
Par la clarté de deux etoiles vives. 
Les demydieux, et les nymphes des bois 
Par l'epesseur des forestz chevelues 
Te regardant, s'etonnent maintesfois, 
Et pour à Loire eternité donner 
Contre leurs bords ses filles impolues 
Font ton hault bruit sans cesse resonner. 
  
XXII 
O doulce ardeur, que des yeulx de ma Dame 
Amour avecq' sa torche acoustumée 
Dedans mon coeur a si bien allumée, 
Que je la sen au plus profond de l'ame! 
Combien le ciel favorable je clame, 
Combien Amour, combien ma destinée, 
Qui en ce point ma vie ont terminée 
Par le torment d'une si doulce flamme! 
Qu'en moy (Amour) ne durent tes doulx feux, 
Je ne le puys et pouvoir ne le veulx 
Bien que la chair soit caducque, et mortelle. 
Car ceste ardeur, dont mon ame est ravie, 
Prendra aussi immortalité d'elle, 
Vivant par mort d'une eternelle vie. 
  
XXIII 
Si des beaux yeux, où la beaulté se mire, 
Voire le ciel, et la nature, et l'art, 
Depent le frein, qui en plus d'une part 
A son plaisir et m'arreste et me vire, 
Pourquoy sont-ilz armez d'orgueil et d'ire? 
Pourquoy s'esteint ce doulx feu, qui en part? 
Pourquoy la main, qui le coeur me depart, 
Cache ces retz, liens de mon martire? 
O belle main! ô beaux cheveux dorez! 
O clers flambeaux dignes d'estre adorez! 
Par qui je crain', j'espere, je lamente. 
Mon fier destin et vostre force extreme, 
En vous aimant, me commandent, que j'aime 
L'heureux object du bien, qui me tormente. 
  
XXIV 
Piteuse voix, qui ecoutes mes pleurs, 
Et qui errant entre rochiers et bois 
Avecques moy, m'as semblé maintesfoys 
Avoir pitié de mes tristes douleurs. 
Voix qui tes plainz mesles à mes clameurs, 
Mon dueil au tien, si appeller tu m'oys 
Olive Olive: et Olive est ta voix, 
Et m'est avis qu'avecques moy tu meurs. 
Seule je t'ay pitoyable trouvée. 
O noble Nymphe! en qui (peult estre) encores 
L'antique feu de nouveau s'evertue. 
Pareille amour nous avons eprouvée, 
Pareille peine aussi nous souffrons ores. 
Mais plus grande est la beaulté, qui me tue. 
  
XXV 
Je ne croy point, veu le dueil que je meine 
Pour l'apre ardeur d'une flamme subtile, 
Que mon oeil feust en larmes si fertile, 
Si n'eusse au chef d'eau vive une fonteine. 
Larmes ne sont, qu'avecq' si large vene 
Hors de mes yeux maintenant je distile, 
Tout pleur seroit à finir inutile 
Mon dueil, qui n'est qu'au meillieu de sa peine. 
L'humeur vitale en soy toute reduite 
Devant mon feu craintive prent la fuyte 
Par le sentier qui meine droict aux yeux. 
C'est cete ardeur, dont mon ame ravie 
Fuyra bien tost la lumiere des cieux, 
Tirant à soy et ma peine et ma vie. 
  
XXVI 
La nuit m'est courte, et le jour trop me dure, 
Je fuy l'amour, et le suy' à la trace, 
Cruel me suis, et requier' vostre grace, 
Je pren' plaisir au torment, que j'endure. 
Je voy' mon bien, et mon mal je procure, 
Desir m'enflamme, et crainte me rend glace, 
Je veux courir, et jamais ne deplace, 
L'obscur m'est cler, et la lumiere obscure. 
Votre je suis, et ne puis estre mien, 
Mon corps est libre, et d'un etroit lien 
Je sen' mon coeur en prison retenu. 
Obtenir veux, et ne puis requerir, 
Ainsi me blesse, et ne me veult guerir 
Ce vieil enfant, aveugle archer, et nu. 
  
XXVII 
Quand le Soleil lave sa teste blonde 
En l'Ocean, l'humide, et noire nuit 
Un coy sommeil, un doulx repos sans bruit 
Epant en l'air, sur la terre et soubz l'onde. 
Mais ce repos, qui soulaige le monde 
De ses travaux, est ce qui plus me nuist, 
Et d'astres lors si grand nombre ne luist, 
Que j'ay d'ennuiz et d'angoisse profonde. 
Puis quand le ciel de rougeur se colore, 
Ce que je puis de plaisir concevoir 
Semble renaître avec la belle Aurore. 
Mais qui me fait tant de bien recevoir? 
Le doulx espoir, que j'ay de bien tost voir 
L'autre Soleil, qui la terre decore. 
  
XXVIII 
Ce que je sen', la langue ne refuse 
Vous decouvrir, quand suis de vous absent, 
Mais tout soudain que près de moy vous sent, 
Elle devient et muette, et confuse. 
Ainsi, l'espoir me promect, et m'abuse: 
Moins près je suis quand plus je suis present: 
Ce qui me nuist, c'est ce qui m'est plaisent, 
Je quier' cela, que trouver je recuse. 
Joyeux la nuit, le jour triste je suis. 
J'ay en dormant ce qu'en veillant poursuis. 
Mon bien est faulx, mon mal est veritable. 
D'une me plain', et deffault n'est en elle, 
Fay doncq', Amour, pour m'estre charitable, 
Breve ma vie, ou ma nuit eternelle. 
  
XXIX 
Les cieux, l'amour, la mort, et la nature, 
Honneur, credit, faveur, envie, ou crainte, 
De ceste forme en moy si bien emprainte 
N'effaceront la vive protraiture. 
Ivoire, gemme, et toute pierre dure 
Se peut briser, si du fer est attainte, 
Mais bien qu'ell' soit de se rompre contrainte, 
De se changer jamais elle n'endure. 
Mon coeur est tel: et me le fist prouver 
Amour, alors que pour vous y graver, 
A coups de trait me livra la bataille. 
Je sçay combien son arc y travailla, 
Plus de cent coups, non un seul, me bailla 
Premier qu'il peust en lever une ecaille. 
  
XXX 
Bien que le mal, que pour vous je supporte, 
Soit violent, toutesfois je ne l'ose 
Appeller mal, pour ce qu'aucune chose 
Ne vient de vous, qui plaisir ne m'apporte. 
Mais ce m'est bien une douleur plus forte, 
Que je ne puys de ma tristesse enclose 
Tourner la clef, lors que je me dispose 
A vous ouvrir de mes pensers la porte. 
Si donc mes pleurs, et mes soupirs cuysans, 
Si mes ennuiz ne vous sont suffisans 
Temoings d'amour, quele plus seure preuve, 
Quele autre foy, si non mourir, me reste? 
Mais le remede (helas) trop tard se treuve 
A la douleur, que la Mort manifeste. 
  
XXXI 
Le grand flambeau gouverneur de l'année, 
Par la vertu de l'enflammée corne 
Du blanc thaureau, prez, montz, rivaiges orne 
De mainte fleur du sang des princes née. 
Puis de son char la roüe estant tournée 
Vers le cartier prochain du Capricorne, 
Froid est le vent, la saison nue et morne, 
Et toute fleur devient seiche et fenée. 
Ainsi, alors que sur moy tu etens, 
O mon Soleil! tes clers rayons epars, 
Sentir me fais un gracieux printens. 
Mais tout soudain que de moy tu depars, 
Je sens en moy venir de toutes pars 
Plus d'un hyver, tout en un mesme tens. 
  
XXXII 
Tout ce, qu'icy la Nature environne, 
Plus tost il naist, moins longuement il dure. 
Le gay printemps s'enrichist de verdure, 
Mais peu fleurist l'honneur de sa couronne. 
L'ire du ciel facilement etonne 
Les fruicts d'esté, qui craignent la froidure; 
Contre l'hiver ont l'ecorce plus dure 
Les fruicts tardifs, ornement de l'automne. 
De ton printemps les fleurettes seichées 
Seront un jour de leur tige arrachées, 
Non la vertu, l'esprit, et la raison. 
A ces doulx fruicts, en toy meurs devant l'aage, 
Ne faict l'esté ny l'autonne dommage, 
Ny la rigueur de la froide saison. 
  
XXXIII 
O prison doulce, où captif je demeure 
Non par dedaing, force, ou inimitié, 
Mais par les yeulx de ma doulce moitié, 
Qui m'y tiendra jusq'à tant que je meure. 
O l'an heureux, le mois, le jour, et l'heure, 
Que mon coeur fut avecq'elle allié! 
O l'heureux noeu, par qui j'y fu' lié, 
Bien que souvent je plain', souspire, et pleure! 
Tous prisonniers, vous etes en soucy, 
Craignant la loy, et le juge severe: 
Moy plus heureux, je ne suis pas ainsi. 
Mile doulx motz, doulcement exprimez, 
Mil' doulx baisers, doulcement imprimez, 
Sont les tormens où ma foy persevere. 
  
XXXIV 
Après avoir d'un bras victorieux 
Domté l'effort des superbes courages, 
Aucuns jadis bastirent haulx ouvrages, 
Pour se venger du temps injurieux. 
Autres craignans leurs actes glorieux 
Assujetir à flammes, et orages, 
Firent ecriz, qui malgré telz outrages 
Ont faict leurs noms voler jusques aux cieulx. 
Maintz au jourdhuy en signe de victoire 
Pendent au temple armes bien etophées, 
Mais je ne veulx acquerir telle gloire. 
Avoir esté par vous vaincu et pris, 
C'est mon laurier, mon triomphe, et mon prix, 
Qui ma depouille egale à leurs trophées. 
  
XXXV 
Me soit amour ou rude, ou favorable, 
Ou hault, ou bas me pousse la fortune, 
Tout ce, qu'au coeur je sen' pour l'amour d'une, 
Jusq'à la mort, et plus, sera durable. 
Je suis le roc de foy non variable, 
Que vent, que mer, que le ciel importune, 
Et toutesfois adverse, ou oportune 
Soit la saison; il demeure imployable. 
Plus tost voudra le diamant apprendre 
A s'amolir de son bon gré, ou prendre 
Soubz un burin de plom diverse forme, 
Que par nouveau ou bonheur, ou malheur, 
Mon coeur, où est de vostre grand' valeur 
Le vray protraict, en autre se transforme. 
  
XXXVI 
L'unic oiseau (miracle emerveillable) 
Par feu se tue, ennuyé de sa vie: 
Puis quand son ame est par flammes ravie, 
Des cendres naist un autre à luy semblable. 
Et moy qui suis l'unique miserable, 
Faché de vivre une flamme ay suyvie, 
Dont conviendra bien tost, que je devie, 
Si par pitié ne m'etes secourable. 
O grand' doulceur! ô bonté souveraine! 
Si tu ne veulx dure, et inhumaine estre 
Soubz ceste face angelique et seraine, 
Puis qu'ay pour toy du Phenix le semblant, 
Fay qu'en tous poinctz je luy soy' resemblant, 
Tu me feras de moymesme renaistre. 
  
XXXVII 
Celle qui tient par sa fiere beauté. 
Les Dieux en feu, en glace, aise, et martire, 
L'oeil impiteux soudain de moy retire, 
Quand je me plain' à sa grand' cruauté. 
Si je la suy', ell' fuit d'autre couté; 
Si je me deulx, mes larmes la font rire, 
Et si je veulx ou parler ou ecrire, 
D'elle jamais ne puis estre ecouté. 
Mais (ô moy sot!) de quoy me doy-je plaindre, 
Fors du desir, qui par trop hault ataindre, 
Me porte au lieu, où il brusle ses aesles? 
Puis moy tumbé, Amour, qui ne permet 
Finir mon dueil, soudain les luy remet, 
Renouvelant mes cheutes eternelles. 
  
XXXVIII 
Sacrée, saincte et celeste figure, 
Pour qui du ciel l'admirable, et hault temple 
Semble courbé, afin qu'en toy contemple 
Tout ce, que peult son industrie et cure: 
Si de tes yeulx les beaux raiz d'avanture 
Daignent mon coeur echaufer, il me semble 
Qu'en moy soudain un feu divin s'assemble, 
Qui mue, altere, et ravist ma nature. 
Et si mon oeil ose se hazarder 
A contempler une beauté si grande, 
Un Ange adonq' me semble regarder. 
Lors te faisant d'ame et de corps offrande 
Ne puis le coeur idolatre garder, 
Qu'il ne t'adore, et ses veux ne te rande. 
  
XXXIX 
Plus ferme foy ne fut onques jurée 
A nouveau prince, ô ma seule princesse! 
Que mon amour, qui vous sera sans cesse 
Contre le temps et la mort asseurée. 
De fosse creuse, ou de tour bien murée 
N'a point besoing de ma foy la fortresse, 
Dont je vous fy' dame, roine, et maistresse, 
Pour ce qu'ell' est d'eternelle durée. 
Thesor ne peult sur elle estre vainqueur, 
Un si vil prix n'aquiert un gentil coeur: 
Non point faveur, ou grandeur de lignage, 
Qui eblouist les yeulx du populaire, 
Non la beauté, qui un leger courage 
Peult emouvoir, tant que vous, me peult plaire. 
  
XL 
Si des saincts yeulx que je vois adorant, 
Vient mon ardeur, si les miens d'heure en heure, 
Par le degout des larmes, que je pleure, 
Donnent vigueur à mon feu devorant, 
Si mon esprit vif dehors, et mourant 
Dedans le cloz de sa propre demeure, 
Vous contemplant, permet bien que je meure, 
Pour estre en vous; plus qu'en moy, demeurant, 
Bien est le mal et violent, et fort, 
Dont la doulceur coulpable de ma mort 
Me faict aveugle à mon prochain dommage. 
Cruel tyran de la serve pensée, 
De ce loyer est donq' recompensée 
L'ame qui faict à son seigneur hommage. 
  
XLI 
Je suis semblable au marinier timide; 
Qui voyant l'air çà et là se troubler, 
La mer ses flotz ecumeux redoubler, 
Sa nef gemir soubz ceste force humide, 
D'art, d'industrie, et d'esperance vide, 
Pense le ciel, et la mer s'assembler, 
Se met à plaindre, à crier, à trembler, 
Et de ses voeux les Dieux enrichir cuyde. 
Le nocher suis, mes pensers sont la mer, 
Soupirs, et pleurs sont les ventz et l'orage, 
Vous ma Déesse etes ma clere etoile, 
Que seule doy', veux, et puis reclamer, 
Pour asseurer la nef de mon courage, 
Et eclersir tout ce tenebreux voile. 
  
XLII 
Les chaulx soupirs de ma flamme incongnue 
Ne sont soupirs, et telz ne les veulx dire, 
Mais bien un vent: car tant plus je soupire, 
Moins de mon feu la chaleur diminue. 
Ma vie en est toutesfois soutenue, 
Lors que par eulx de l'ardeur je respire, 
Ma peine aussi par eulx mesmes empire, 
Veu que ma flamme en est entretenue. 
Tout cela vient de l'Amour, qui enflamme 
Mon estommac d'une eternelle flamme, 
Et puis l'evente au tour de luy volant. 
O petit Dieu, qui terre, et ciel allumes! 
Par quel miracle en feu si violant 
Tiens-tu mon coeur, et point ne le consumes? 
  
XLIII 
Penser volage, et leger comme vent, 
Qui or' au ciel, or' en mer, or' en terre 
En un moment cours, et recours grand erre, 
Voire au sejour des ombres bien souvent. 
Et quelque part que voises t'eslevant, 
Ou rabaissant, celle qui me faict guerre, 
Celle beauté tousjours devant toy erre, 
Et tu la vas d'un leger pié suyvant. 
Pourquoy suis-tu (ô penser trop peu sage!) 
Ce qui te nuist? pourquoy vas-tu sans guide, 
Par ce chemin plein d'erreur variable? 
Si de parler au moins eusses l'usage, 
Tu me rendrois de tant de peines vide, 
Toy en repos, et elle pitoyable. 
  
XLIV 
Au goust de l'eau la fievre se rappaise, 
Puis s'evertue au cours, qui sembloit lent: 
Amour aussi m'est humble, et violent, 
Quand le coral de voz levres je baise. 
L'eau goute à goute anime la fournaize 
D'un feu couvert le plus etincelant: 
L'ardent desir, que mon coeur va celant, 
Par voz baisers se faict plus chault que braize. 
D'un grand traict d'eau, qui freschement distile, 
Souvent la fievre est etainte, Madame. 
L'onde à grand flot rent la flamme inutile. 
Mais, ô baisers, delices de mon ame! 
Vous ne pouriez, et fussiez vous cent mile, 
Guerir ma fievre, ou eteindre ma flamme. 
  
XLV 
Ores qu'en l'air le grand Dieu du tonnerre 
Se rue au seing de son epouse amée, 
Et que de fleurs la nature semée 
A faict le ciel amoureux de la terre. 
Or' que des ventz le gouverneur desserre 
Le doux Zephire, et la forest armée 
Voit par l'épaiz de sa neuve ramée 
Maint libre oiseau, qui de tous coutez erre: 
Je vois faisant un cry non entendu 
Entre les fleurs du sang amoureux nées, 
Pasle, dessoubz l'arbre pasle etendu: 
Et de son fruict amer me repaissant, 
Aux plus beaux jours de mes verdes années 
Un triste hiver sen' en moy renaissant. 
  
XLVI 
Lequel des Dieux fera que je ne sente 
L'heureux malheur de l'espoir qui m'attire, 
Si le plaisir, suject de mon martire, 
Fuyant mes yeulx à mon coeur se presente? 
Quel est le fruict de l'incertaine attente, 
Ou sans profit si longuement j'aspire? 
Quel est le bien, pour qui tant je soupire? 
Quel est le gaing du mal qui me contente? 
Qui guerira la playe de mon coeur? 
Qui tarira de mes larmes la source? 
Qui abatra le vent de mes soupirs? 
Montre le moy, ô celeste vainqueur! 
Qui a finy le terme de ma course 
Au ciel, où est le but de mes desirs. 
  
XLVII 
Le doulx sommeil paix, et plaisir m'ordonne, 
Et le reveil guerre, et douleur m'aporte: 
Le faulx me plaist, le vray me deconforte: 
Le jour tout mal, la nuit tout bien me donne. 
S'il est ainsi, soit en toute personne 
La verité ensevelie, et morte. 
O animaulx de plus heureuse sorte, 
Dont l'oeil six mois le dormir n'abandonne! 
Que le sommeil à la mort soit semblant, 
Qu le veiller de vie ait le semblant, 
Je ne le dy, et le croy' moins encores. 
Ou s'il est vray, puis que le jour me nuist 
Plus que la mort, ô mort, veilles donq' ores 
Clore mes yeulx d'une eternelle nuit. 
  
XLVIII 
Pere Ocean, commencement des choses, 
Des Dieux marins le sceptre vertueux, 
Qui maint ruisseau, et fleuve impetueux 
En ton seing large enfermes, et composes: 
Tu ne sens point, quand moins tu te reposes, 
Plus s'irriter de flotz tempestueux 
Contre tes bords; qu'en mon coeur fluctueux 
Je sen' de ventz, et tempestes encloses. 
Helas reçoy mes chaudes larmes donques 
En ton liquide: eteins leur feu, si onques 
Tu as senty d'amour quelque scintile, 
Et si tes eaux peuvent le feu eteindre, 
Qui rend la foudre, et trident inutile, 
Et qui se faict jusques aux enfers creindre. 
  
XLIX 
Sacré rameau, de celeste presage, 
Rameau, par qui la colombe envoyée, 
Au demeurant de la terre noyée 
Porta jadis un si joyeux message. 
Heureux rameau, soubz qui gist à l'ombrage 
La doulce paix icy tant desirée, 
Alors que Mars, et la Discorde irée 
Ont tout remply de feu, de sang, de rage: 
S'il est ainsi que par les sainctz escriptz 
Sois tant loué, helas! reçoy mes criz, 
O mon seul bien! ô mon espoir en terre! 
Qui seulement ne me temoignes ores 
Paix, et beautemps: mais toymesmes encores 
Me peulx sauver de naufrage et de guerre. 
  
L 
Si mes pensers vous estoient tous ouvers, 
Si de parler mon coeur avoit l'usaige, 
Si ma constance estoit peinte au visaige, 
Si mes ennuiz vous estoient decouvers, 
Si les soupirs, si les pleurs, si les vers 
Montroient au vif une amoureuse raige, 
Lors je pourroy' flechir vostre couraige, 
Voire à pitié mouvoir tout l'univers. 
Adoncq' Amour seul tesmoing de ma peine 
Vous pouroit estre une preuve certaine 
De ma fidele, et serve loyaulté, 
Qui d'aussi loing devant les autres passe, 
Que le parfaict de vostre belle face 
Hausse le chef sur toute aultre beaulté. 
  
LI 
O toy, à qui a été ottroyé 
Voir cete flamme ardent, qui s'entretient 
En l'estommac du Geant, qui soutient 
Un mont de feu sur son doz foudroyé. 
Et cetuy là, qui l'oyzeau dedié 
Au Dieu vangeur, qui la foudre en main tient, 
Paist d'un poumon, qui tousjours luy revient, 
Au froid sommet de Caucase lié: 
Je te supply' imaginer encore 
Ce qui mon coeur brusle, englace, et devore, 
Sans me donner loysir de respirer. 
Lors me diras, voyant ma peine telle, 
Tu sera d'exemple, à qui ose aspirer 
Trop hardiment à chose non mortelle. 
  
LII 
Mere d'Amour, et fille de la mer, 
Du cercle tiers lumiere souverene, 
Qui ciel, et terre, et champs semez d'arene 
Peuz jusq'au fond des ondes enflammer. 
Toy, qui le doulx mesles avec l'amer, 
Quand ce beau riz, qui le ciel rasserene, 
De tous les Dieux le plus cruel refrene, 
Et le contrainct ton aide reclamer, 
Dont luy tout plein de ce tant doulx venin 
Entre tes bras paist son oeil jà benin 
En ta divine, et celeste beauté: 
Te plaise (helas) Déesse, à ma priere, 
Flechir un peu ceste mienne guerriere, 
Qui a trop plus, que Mars, de cruauté. 
  
LIII 
Voyant au ciel tant de flambeaux ardens, 
Je dy souvent, ô beauté non pareille! 
Si le dehors est si plain de merveille, 
Combien parfaict doit estre le dedens? 
Si tes beaux yeulx traictz, et flammes dardans 
Luysent sur moy, mon ame se reveille 
Au paradis, que ta bouche vermeille 
Ouvre aux espritz, qui te sont regardans. 
Mais quand je sen' soubz ta doulce beauté 
L'horrible enfer de ta grand' cruauté, 
Ce qui est beau me semble estre cruel. 
Mesme le ciel, qui tant me souloit rire, 
Me faict douter si plaisant je doy' dire 
Son beau sejour, qui est perpetuel. 
  
LIV 
Or' que la nuit son char etoilé guide 
Qui le silence et le sommeil rameine, 
Me plaist lascher, pour desaigrir ma peine, 
Aux pleurs, aux criz et aux soupirs la bride. 
O ciel! ô terre! ô element liquide! 
O ventz! ô bois! rochiers, monteigne et plaine, 
Tout lieu desert, tout rivage et fonteine, 
Tout lieu remply et tout espace vide! 
O demyz Dieux! ô vous, nymphes des bois! 
Nymphes des eaux, tous animaux divers, 
Si onq' avez senty quelque amitié, 
Veillez piteux ouyr ma triste voix, 
Puis que ma foy, mon amour, et mes vers 
N'ont sceu trouver en Madame pitié. 
  
LV 
O foible esprit, chargé de tant de peines, 
Que ne veulx-tu soubz la terre descendre? 
O coeur ardent; que n'es-tu mis en cendre? 
O tristes yeulx, que n'estes-vous fonteines? 
O bien douteux! ô peines trop certaines! 
O doulx sçavoir, trop amer à comprendre 
O Dieu qui fais que tant j'ose entreprendre, 
Pourquoy rends-tu mes entreprises vaines? 
O jeune archer, archer qui n'as point d'yeulx, 
Pourquoy si droict as-tu pris ta visée? 
O vif flambeau; qui embrases les Dieux, 
Pourquoy as-tu ma froideur attisée? 
O face d'ange! ô coeur de pierre dure! 
Regarde au moins le torment, que j'endure. 
  
LVI 
Amour voulant hausser le chef vainqueur 
Dessus la crainte à la noire sequelle, 
Mist l'esperance, et sa bande avec' elle, 
Sa bande blanche au plus fort de mon coeur. 
Amour est fort, mais foible est la vigueur 
De l'esperance, et la tourbe cruelle 
A ceinct le lieu d'horreur perpetuelle, 
Le foudroyant du canon de rigueur. 
Mais repoussez l'effort de la gent noire, 
Vous, qui tenez le sort de la victoire, 
N'avez-vous point de voz subjects emoy? 
Si vous souffrez que cete prise advienne, 
Vous y aurez plus grand' perte, que moy, 
Veu que la place est plus vostre, que mienne. 
  
LVII 
Qui a nombré, quand l'astre, qui plus luit, 
Jà le milieu du bas cercle environne, 
Tous ces beaux feux, qui font une couronne 
Aux noirs cheveux de la plus clere nuit, 
Et qui a sceu combien de fleurs produit 
Le verd printemps, combien de fruictz l'autonne, 
Et les thesors, que l'Inde riche donne 
Au marinier, qu'avarice conduit. 
Qui a conté les etincelles vives 
D'Aetne, ou Vesuve, et les flotz qui en mer 
Hurtent le front des ecumeuses rives: 
Celuy encor' d'une, qui tout excelle, 
Peult les vertuz, et beautez estimer, 
Et les tormens que j'ay pour l'amour d'elle. 
  
LVIII 
Cet' humeur vient de mon oeil, qui adore 
Ton sainct protraict, seul Dieu de mon soucy, 
De mon cueur part maint soupir adoucy, 
De tes yeulx sort le feu qui me devore. 
Donques le prix de celuy qui t'honnore, 
Est-ce la mort, et le marbre endurcy? 
O pleurs ingratz! ingratz soupirs aussi, 
Mon feu, ma mort, et ta rigueur encore. 
De mon esprit les aesles sont guidées 
Jusques au seing des plus haultes Idées 
Idolatrant ta celeste beaulté. 
O doulx pleurer! ô doulx soupirs cuisans! 
O doulce ardeur de deux soleilz luisans! 
O doulce mort! ô doulce cruaulté! 
  
LIX 
Moy, que l'amour a faict plus d'un Lëandre, 
De cest oyseau prendray le blanc pennaige, 
Qui en chantant plaingt la fin de son aage 
Aux bordz herbuz du recourbé Mëandre. 
Dessoubz mes chantz voudront (possible) apprendre 
Maint bois sacré, et maint antre sauvage, 
Non gueres loin de ce fameux rivage, 
Où Meine va dedans Loyre se rendre. 
Puis descendant en la saincte forest, 
Où maint amant à l'umbrage encor' est, 
Iray chanter au bord oblivieux, 
D'où arrachant vostre bruit non pareil, 
De revoler icy hault envieux, 
Luy feray voir l'un et l'autre soleil. 
  
LX 
Divin Ronsard, qui de l'arc à sept cordes 
Tiras premier au but de la memoire 
Les traictz aelez de la Françoise gloire, 
Que sur ton luc haultement tu accordes. 
Fameux harpeur, et prince de noz odes, 
Laisse ton Loir haultain de ta victoire, 
Et vien sonner au rivage de Loire 
De tes chansons les plus nouvelles modes. 
Enfonce l'arc du vieil Thebain archer, 
Où nul que toy ne sceut onq' encocher 
Des doctes Soeurs les sajettes divines. 
Porte pour moy parmy le ciel des Gaulles 
Le sainct honneur des nymphes Angevines, 
Trop pesant faix pour mes foibles epaules. 
  
LXI 
Allez, mes vers, portez dessus vos aeles 
Les sainctz rameaux de ma plante divine, 
Seul ornement de la terre Angevine, 
Et de mon coeur les vives etincelles. 
De vostre vol les bornes seront telles, 
Que dès l'aurore, où le Soleil decline, 
Je voy desjà le monde, qui s'incline 
A la beauté des beautez immortelles. 
Si quelqu'un né soubs amoureuse etoile 
Daigne eclersir l'obscur de vostre voile, 
Priez, qu'Amour luy soit moins rigoreux: 
Mais s'il ne veult ou ne peult concevoir 
Ce que je sen', souhaitez luy de voir 
L'heureux object, qui m'a faict malheureux. 
  
LXII 
Qui voudra voir le plus precieux arbre, 
Que l'orient ou le midy avoüe, 
Vienne, où mon fleuve en ses ondes se joüe: 
Il y verra l'or, l'ivoire, et le marbre. 
Il y verra les perles, le cinabre 
Et le cristal: et dira que je loüe 
Un digne object de Florence, et Mantoue, 
De Smyrne encor', de Thebes, et Calabre. 
Encor' dira que la Touvre, et la Seine, 
Avec' la Saone arriveroient à peine 
A la moitié d'un si divin ouvrage: 
Ne cetuy là qui naguere a faict lire 
En lettres d'or gravé sur son rivage 
Le vieil honneur de l'une et l'autre lire. 
  
LXIII 
Ma plus grand' force estoit retraicte au coeur, 
Et contre Amour faisoit plus de deffence, 
Quand ce cruel, pour venger telle offence, 
Feut par mes yeulx de ma vertu vainqueur. 
Lors de ses traictz ne sentoy' la rigueur, 
Lors je n'avoy' de son feu congnoissance, 
Lors ne cuidoy' que sa haulte puissance 
Sur ma foiblesse eust aucune vigueur. 
Mais, ô le fruict de ma belle entreprise! 
Il a choisi pour gaing de ma victoire 
Au plus hault ciel la beauté, qui me tue: 
Là, fault chercher le bien que tant je prise, 
Faisant à tous par mon malheur notoire 
Que l'homme en vain contre Dieu s'evertue. 
  
LXIV 
Comme jadis l'ame de l'univers 
Enamourée en sa beaulté profonde, 
Pour façonner cete grand' forme ronde, 
Et l'enrichir de ses thesors divers, 
Courbant sur nous son temple aux yeulx ouvers, 
Separa l'air, le feu, la terre, et l'onde, 
Et pour tirer les semences du monde 
Sonda le creux des abismes couvers: 
Non autrement ô l'ame de ma vie! 
Tu feus à toy par toymesme ravie, 
Te voyant peinte en mon affection. 
Lors ton regard d'un accord plus humain 
Lia mes sens, où Amour de sa main 
Forma le rond de ta perfection. 
  
LXV 
Ces cheveux d'or, ce front de marbre, et celle 
Bouche d'oeillez, et de liz toute pleine, 
Ces doulx soupirs, cet' odorante haleine, 
Et de ces yeulx l'une et l'autre etincelle, 
Ce chant divin, qui les ames rapelle, 
Ce chaste ris, enchanteur de ma peine, 
Ce corps, ce tout, bref, cete plus qu'humeine 
Doulce beauté si cruellement belle, 
Ce port humain, cete grace gentile, 
Ce vif esprit, et ce doulx grave stile, 
Ce hault penser, cet' honneste silence, 
Ce sont les haims, les appaz, et l'amorse, 
Les traictz, les rez, qui ma debile force 
Ont captivé d'une humble violence. 
  
LXVI 
Pour mettre en vous sa plus grande beauté, 
Le ciel ouvrit ses plus riches thesors: 
Amour choisit de ses traictz les plus fors, 
Pour me tirer sa plus grand' cruauté. 
Les Astres n'ont de luire liberté, 
Quand le Soleil ses rayons met dehors: 
Où apparoist votre celeste corps, 
La beauté mesme y perdroit sa clerté. 
Si le torment de mes affections 
Croist à l'égal de voz perfections, 
Et si en vous plus qu'en moy je demeure, 
Pourquoy n'as-tu, ô fiere destinée! 
Rompu le fil de ma vie obstinée? 
Je ne croy point que de douleur on meure. 
  
LXVII 
Sus, chaulx soupirs, allez à ce froid coeur, 
Rompez ce glaz, qui ma poitrine enflamme: 
Et vous, mes yeulx, deux tesmoings de ma flamme, 
Faictes pluvoir une triste liqueur. 
Allez pensers, flechir cete rigueur, 
Engravez moy au marbre de cete ame: 
Et vous, mes vers, criez devant Madame, 
Mort, ou mercy soit fin de ma langueur. 
Dictes comment ces tenailles d'yvoire 
Pour animer l'immortel de sa gloire 
Ont arraché mon esprit de sa place, 
Et que mon coeur rien qu'elle ne respire. 
O bien heureux qui void sa belle face! 
O plus heureux qui pour elle soupire! 
  
LXVIII 
Que n'es-tu las (mon desir) de tant suyvre 
Celle qui est tant gaillarde à la fuite? 
Ne la vois-tu devant ma lente suite 
Des laqs d'amour voler franche, et delivre? 
Ce faulx espoir, dont la doulceur m'enyvre, 
Tout en un poinct m'arreste, et puis m'incite, 
Me pousse en hault, et puis me precipite, 
Me faict mourir, et puis me faict revivre. 
Ainsi courant de sommez en sommez 
Avec' Amour, je ne pense jamais, 
Fol desir mien, à te haulser la bride. 
Bien m'as-tu donq' mis en proye au danger, 
Si je ne puis à mon gré te ranger, 
Et si j'ay pris un aveugle pour guide. 
  
LXIX 
L'enfant cruel de sa main la plus forte 
M'ouvrit le flanc, qui est le plus debile, 
Plantant au roc de mon coeur immobile 
Le sainct rameau, qu'en mon ame je porte. 
Toute vertu, tout honneur, toute sorte 
De bonne grace, et de façon gentile 
Sont pour racine à la plante fertile 
Dont la haulteur jusq'au ciel me transporte. 
L'eau de mes yeulx, et la vive chaleur 
De mes soupirs en vigueur la maintiennent: 
Son pasle teinct ressemble à ma couleur. 
La, mes ecriz fueille seiche deviennent: 
Mon vain espoir y est tousjours en fleur, 
Et mes ennuiz sont les fruictz, qui en viennent. 
  
LXX 
Cent mile fois, et en cent mile lieux 
Vous rencontrant, ô ma doulce guerriere! 
Le pié tremblant me retire en arriere 
Pour avoir paix avecques voz beaulx yeulx. 
Mais je ne puis, et ne pouroient les Dieux 
Frener le cours de ma volonté fiere. 
Si je le puis, la superbe riviere 
Fera le sien monter jusques aux cieulx. 
Que te sert donq' eloingner le vainqueur, 
O toy mon oeil! si au milieu du coeur 
Je sen' le fer, dont il fault que je meure? 
Ainsi le cerf par la plaine elancé 
Evite l'arce meurtrier, qui l'a blessé, 
Mais non le traict, qui tousjours luy demeure. 
  
LXXI 
Le crespe honneur de cet or blondissant 
Sur cet argent uny de tous coutez, 
Sur deux soleilz deux petiz arcz voutez, 
Deux petiz brins de coral rougissant, 
Ce cler vermeil, ce vermeil unissant 
Oeillez et lyz freschement enfantez, 
Ces deux beaux rancz de perles, bien plantez, 
Et tout ce rond en deux pars finissant, 
Ce val d'albastre, et ces coutaux d'ivoire, 
Qui vont ainsi comme les flotz de Loire 
Au lent soupir d'un Zephire adoulci, 
C'est le moins beau des beautez de Madame, 
Mieulx engravée au marbre de mon ame, 
Que sur mon front n'en est peinct le soucy. 
  
LXXII 
Ce voile blanc, que vous m'avez donné, 
Je le compare à ma foy nette, et franche: 
L'antique foy portoit la robe blanche, 
Mon coeur tout blanc est pour vous ordonné. 
Son beau caré d'ouvrage environné, 
Seul ornement et thesor de ma manche, 
Pour vostre nom, porte l'heureuse branche 
De l'arbre sainct dont je suis couronné. 
Mile couleurs par l'aiguille y sont jointes, 
Amour a faict en mon coeur mile pointes. 
Là, sont encor' sans fruict bien mile fleurs. 
O voile heureux, combien tu es utile 
Pour essuyer l'oeil, qui en vain distile 
Du fond du coeur mile ruisseaux de pleurs! 
  
LXXIII 
Le beau cristal des sainctz yeulx de Madame 
Entre les lyz et roses degoutoit, 
Et ce pendant Amour, qui le goutoit, 
En arrousa le jardin de mon ame. 
Au soupirer, qui les marbres entame, 
Le ciel pleurant, et triste se voûtoit, 
Et le Soleil, qui pleindre l'ecoutoit, 
S'osta du chef les rayons de sa flâme. 
Les ventz brusloient d'une chaste amitié, 
L'air, qui au tour s'enflammoit de pitié, 
En fist pluvoir une triste rousée, 
Mes yeulx estoient deux fonteines de pleurs, 
La terre adonq' qui en fut arrousée, 
En fist sortir mile amoureuses fleurs. 
  
LXXIV 
Si le pinceau pouvoit montrer aux yeulx 
Ce que le ciel, les Dieux, et la Nature 
Ont peint en vous, plus vivante peinture 
Ne virent onq' de Grece les ayeulx. 
Toy donq' amant, dont l'oeil trop curieux 
Prent seulement des beautez nouriture, 
Fiche ta veue en cete protraiture, 
Dont la beauté plairoit aux plus beaux Dieux. 
Mais si la vive, et immortelle image 
Ne te deplaist, seule qui le dommage 
De maladie ou du temps ne doit craindre: 
Voy ses ecriz, oy son divin sçavoir, 
Qui mieulx au vif l'esprit te fera voir, 
Que le visage Appelle n'eust sçeu peindre. 
  
LXXV 
Nimphes, meslez vos plus vermeilles roses 
Parmy les lyz qui sont plus blanchissans, 
Et les oeillez qui sont plus rougissans, 
Parmy les fleurs plus freschement decloses. 
De tout cela, et des plus belles choses 
Que vous ayez en voz prez verdissans, 
Faictes bouquez, et chappeaux florissans, 
Or' que des champs les beautez sont encloses. 
Et toy, qui fais du monde le grand tour, 
Bien que tu n'ay's au taureau faict retour, 
En mile fleurs et mil', et mil' encore 
Peins mes ennuiz, et qu'on y puisse lire 
Le nom qu'Anjou doit sur tout autre elire, 
Pour decorer celle qui le decore. 
  
LXXVI 
Quand la fureur, qui bat les grandz coupeaux, 
Hors de mon coeur l'Olive arachera, 
Avec le chien le loup se couchera, 
Fidele garde aux timides troupeaux. 
Le ciel, qui void avec tant de flambeaux, 
Le violent de son cours cessera, 
Le feu sans chault et sans clerté sera, 
Obscur le ront des deux astres plus beaux. 
Tous animaulx changeront de sejour 
L'un avec' l'autre, et au plus cler du jour 
Ressemblera la nuit humide et sombre, 
Des prez seront semblables les couleurs, 
La mer sans eau, et les forestz sans ombre, 
Et sans odeur les roses, et les fleurs. 
  
LXXVII 
O fleuve heureux, qui as sur ton rivage 
De mon amer la tant doulce racine, 
De ma douleur la seule medicine, 
Et de ma soif le desiré bruvage! 
O roc feutré d'un verd tapy sauvage! 
O de mes vers la source cabaline! 
O belles fleurs! ô liqueur cristaline! 
Plaisirs de l'oeil, qui me tient en servage. 
Je ne suis pas sur vostre aise envieux, 
Mais si j'avoy' pitoyables les Dieux, 
Puis que le ciel de mon bien vous honnore, 
Vous sentiriez aussi ma flamme vive, 
Ou comme vous, je seroy' fleuve et rive, 
Roc, source, fleur, et ruisselet encore. 
  
LXXVIII 
La Canicule, au plus chault de sa rage 
Ne faict trouver la fresche onde si belle, 
Ny l'arbrisseau si doulcement appelle 
Le voyageur au fraiz de son ombrage: 
La santé n'est de si joyeulx presage 
Au lent retour de sa clerté nouvelle, 
Que le plaisir en moy se renouvelle, 
Quand j'apperçoy l'angelique visage. 
Soit qu'en riant ses levres coralines 
Montrent deux rancz de perles cristalines, 
Soit qu'elle parle, ou danse, ou bâle, ou chante, 
Soit que sa voix divinement accorde 
Avec' le son de la parlante chorde, 
Tous mes ennuiz doulcement elle enchante. 
  
LXXIX 
Du ciel descend tout celeste pouvoir, 
Pour decorer cet'ame bien heureuse, 
Qui dessus toy ma terre plantureuse, 
Comme un Phenix faict ses aesles mouvoir. 
Le Dieu de Loire enflammé de la voir 
Ard jusq'au fond de son oncle plus creuse. 
O grand' beauté, ô puissance amoureuse, 
Qui faict aux eaux nouveau feu concevoir! 
S'elle est à rive, il semble que les fleuves 
Tardent leurs cours: s'elle erre par les bois, 
Les chesnes vieulx en prennent robes neufves. 
Le ciel courbé se mire dans ses yeulx: 
Echo respond à sa divine voix, 
Qui faict mourir les hommes, et les Dieux. 
  
LXXX 
Toy, qui courant à voile haulte, et pleine, 
Sage, ruzé, et bienheureux nocher, 
Loing du destroict, du pyrate, et rocher, 
Voles hardy où le desir te meine, 
Ne crain pourtant, oyant ma souveréne, 
Caler la voile, ou les ancres lâcher. 
Sa doulce voix ne te poura fâcher, 
Voix angelique, et non d'une Seréne. 
Si tu la vois, tu verras le soleil 
Du beau visage, à cetuy là pareil, 
Que l'Ocëan de ses longs braz enserre. 
O mile fois le bien aimé des Dieux! 
Qui sans mourir, et sans voler aux cieulx, 
Peult contempler le paradis en terre! 
  
LXXXI 
Celle qui tient l'aele de mon desir, 
Par un seul ris achemine ma trace 
Au paradis de sa divine grace, 
Divin sejour du Dieu de mon plaisir. 
Là les amours volent tout à loisir, 
Là est l'honneur, engravé sus sa face, 
Là les vertus, ornement de sa race, 
Là les beautez, qu'au ciel on peult choisir. 
Mais si d'un oeil foudroyant elle tire 
Dessus mon chef quelque traict de son ire, 
J'abisme au fond de l'eternelle nuit. 
Là n'est ma soif aux ondes perissante, 
Là mon espoir et se fuit et se suit, 
Là meurt sans fin ma peine renaissante. 
  
LXXXII 
Vous, qui aux bois, aux fleuves, aux campaignes, 
A cri, à cor, et à course hative 
Suyvez des cerfz la trace fugitive, 
Avec' Diane, et les Nymphes compaignes, 
Et toy ô Dieu! qui mon rivage baignes, 
As-tu point veu une Nymphe craintive, 
Qui va menant ma liberté captive 
Par les sommez des plus haultes montaignes? 
Helas enfans! si le sort malheureux 
Vous monstre à nu sa cruelle beauté, 
Que telle ardeur longuement ne vous tienne. 
Trop fut celuy chasseur avantureux, 
Qui de ses chiens sentit la cruauté, 
Pour avoir veu la chaste Cyntienne. 
  
LXXXIII 
Déjà la nuit en son parc amassoit 
Un grand troupeau d'etoiles vagabondes, 
Et pour entrer aux cavernes profondes 
Fuyant le jour, ses noirs chevaulx chassoit. 
Dejà le ciel aux Indes rougissoit, 
Et l'Aulbe encor' de ses tresses tant blondes 
Faisant gresler mile perlettes rondes, 
De ses thesors les prez enrichissoit. 
Quand d'occident, comme une etoile vive, 
Je vy sortir dessus ta verde rive 
O fleuve mien! une Nymphe en rient. 
Alors voyant cete nouvelle Aurore, 
Le jour honteux d'un double teint colore 
Et l'Angevin, et l'Indique orient. 
  
LXXXIV 
Seul, et pensif par la deserte plaine 
Resvant au bien qui me faict doloreux, 
Les longs baisers des collombs amoureux 
Par leur plaisir firent croitre ma peine. 
Heureux oiseaux, que vostre vie est pleine 
De grand' doulceur! ô baisers savoureux! 
O moy deux fois, et trois fois malheureux, 
Qui n'ay plaisir que d'esperance vaine! 
Voyant encor' sur les bords de mon fleuve 
Du sep lascif les longs embrassements, 
De mes vieulx maulx je fy' nouvelle epreuve. 
Suis-je donq' veuf de mes sacrez rameaux? 
O vigne heureuse! heureux enlacements! 
O bord heureux! ô bien heureux ormeaux! 
  
LXXXV 
Parmy les fleurs ce faulx Amour tendit 
Une ré d'or legerement coulante, 
Soubs les rameaux d'une divine Plante, 
Où de pié coy ce cruel m'atendit. 
Bien me sembla, que quelque voix me dît, 
Haste les paz de ta course trop lente: 
Quand une main doulcement violente 
Serrant la corde à terre m'etendit. 
Lors je fu' pris: et ne me prenoy' garde 
Qu'en mile noeuds lié je me regarde 
En la prison d'une beauté celeste. 
Là est ma foy, gëolier nuit et jour. 
O doulce chartre! ô bienheureux sejour! 
Qui m'a rendu la liberté moleste. 
  
LXXXVI 
Pres d'un boccage, au milieu d'un beau pré, 
Où d'un ruisseau la frescheur tousjours dure, 
Je te feray un autel de verdure 
De miles fleurs tout au tour diapré. 
Là je pendray en un tableau sacré 
A ton sainct nom, une riche peincture, 
Où je feray de vers une ceinture, 
De mile vers, s'ilz te viennent à gré. 
Soupire donq' de ta plus doulce haleine, 
Me decouvrant sur ce col de porphire 
Ces laqs dorez coupables de ma peine. 
Ainsi, des vens te soit donné l'empire, 
Ainsi ta Flore, ô bienheureux Zephire! 
Te soit tousjours, et tousjours plus humaine. 
  
LXXXVII 
Vent doulx souflant, vent des vens souverain, 
Qui voletant d'aeles bien empanées 
Fais respirer de souëves halenées 
Ta doulce Flore au visage serain, 
Pren de mes mains ce vase, qui est plein 
De mile fleurs avec' l'Aurore nées, 
Et mil' encor' à toy seul destinées, 
Pour t'en couvrir et le front, et le seing. 
Encependant, au thesor de ces rives 
Je pilleray ces emeraudes vives, 
Ces beaux rubiz, ces perles, et saphirs, 
Pour mettre en l'or des tresses vagabondes, 
Qui çà et là folastrent en leurs ondes, 
Grosses du vent de tes plus doulx soupirs. 
  
LXXXVIII 
Si longue foy peult meriter merci, 
J'auray le gaing de ma perte passée, 
Si mon destin toute ardeur n'a chassée 
Du beau Soleil, dont je suis eclerci. 
Amour, qui fut longuement endurci, 
Ores piteux à mon ame offensée, 
A mis les yeulx au creux de ma pensée, 
Cler à luy seul, à tout autre obscurci. 
La forest prent sa verde robe neufve, 
La terre aussi, qui naguere etoit veufve, 
Promet de fruictz une accroissance pleine. 
Or cesse donq' l'hiver de mes douleurs, 
Et vous plaisirs, naissez avec' les fleurs 
Au beau Soleil, qui mon printemps rameine. 
  
LXXXIX 
Zephire soufle, et sa Dame raméne 
Les belles fleurs, dont la terre est couverte. 
La forest neufve oit sur sa teste verte 
Progne gemir, et pleindre Philomene. 
Le ciel trompeur, qui le front rasserene, 
De ses thesors nous tient la porte ouverte, 
Et pour tirer un gaing de nostre perte, 
De nouveaux fruictz la Nature a faict pleine. 
Tous animaulx, qui cheminent et noüent, 
Qui vont glissant, et qui par l'air se joüent, 
Sentent le feu, et je suis le feu mesme. 
Vous seulement osez faire la guerre 
Contre celuy dont la puissance extreme 
Domte le ciel, l'air, la mer, et la terre. 
  
XC 
Toy, qui fis voir la lumiere incongnue 
Au chaste filz du jaloux inhumain, 
Quand tu pillas d'une trop docte main 
La proye en vain de Pluton retenue: 
L'horrible Dieu, qui tonne sur la nue, 
Meu justement pour son frere germain, 
Darda les traictz vangeurs du sort humain, 
Te foudroyant, de sa flamme congneue. 
La moy chetif! qui l'oblivieux bord, 
Malgré l'Enfer, Acheron, et son port, 
Ay depouillé de sa plus riche proye! 
Celle que j'ay faict compaigne des Dieux, 
Me bat, me poingt, me brusle, me foudroye 
Par les doulx traictz qui sortent de ses yeulx. 
  
XCI 
Rendez à l'or cete couleur, qui dore 
Ces blonds cheveux, rendez mil' autres choses: 
A l'orient tant de perles encloses, 
Et au Soleil ces beaux yeulx, que j'adore. 
Rendez ces mains au blanc yvoire encore, 
Ce seing au marbre, et ces levres aux roses, 
Ces doulx soupirs aux fleurettes decloses, 
Et ce beau teint à la vermeille Aurore. 
Rendez aussi à l'Amour tous ses traictz, 
Et à Venus ses graces, et attraictz: 
Rendez aux cieulx leur celeste harmonie. 
Rendez encor' ce doulx nom à son arbre, 
Ou aux rochers rendez ce coeur de marbre, 
Et aux lions cet' humble felonnie. 
  
XCII 
Ce bref espoir, qui ma tristesse alonge, 
Traitre à moy seul, et fidele à Madame, 
Bien mile fois a promis à mon ame 
L'heureuse fin du soucy qui la ronge. 
Mais quand je voy' sa promesse estre un songe, 
Je le maudy', je le hay', je le blâme: 
Puis tout soudain je l'invoque et reclame, 
Me repaissant de sa doulce mensonge. 
Plus d'une fois de moy je l'ay chassé: 
Mais ce cruel, qui n'est jamais lassé 
De mon malheur, à voz yeulx se va rendre. 
Là faict sa plainte: et vous, qui jours et nuitz 
Avecques luy riez de mes ennuiz, 
D'un seul regard le me faictes reprendre. 
  
XCIII 
Ores je chante, et ores je lamente, 
Si l'un me plaist, l'autre me plaist aussi, 
Qui ne m'areste à l'effect du souci, 
Mais à l'object de ce qui me tormente. 
Soit bien, ou mal, desespoir ou attente, 
Soit que je brusle ou que je soy' transi, 
Ce m'est plaisir de demeurer ainsi: 
Egalement de tout je me contente. 
Madame donc, Amour, ma destinée, 
Ne changent point de rigueur obstinée, 
Ou hault, ou bas la Fortune me pousse. 
Soit que je vive, ou bien soit que je meure, 
Le plus heureux des hommes je demeure, 
Tant mon amer a la racine doulce. 
  
XCIV 
Quand vos beaux yeulx Amour en terre incline, 
Et voz espriz en un soupir assemble 
Avec ses mains, et puis les desassemble 
D'une voix clere, angelique, et divine, 
Alors de moy une doulce rapine 
Se faict en moy: je me pers, il me semble 
Que le penser, et le vouloir on m'emble 
Avec le coeur, du fond de la poitrine. 
Mais ce doulx bruit, dont les divins accens 
Ont occupé la porte de mes sens, 
Retient le cours de mon ame ravie. 
Voila comment sur le mestier humain 
Non les trois Soeurs, mais Amour de sa main 
Tist, et retist la toile de ma vie. 
  
XCV 
Dieu qui reçois en ton giron humide 
Les deux ruisseaux de mes yeulx larmoyans, 
Qui en tes eaux sans cesse tournoyans 
Enflent le cours de ta course liquide, 
Quand fut-ce, ô Dieu! qu'en la carriere vide 
De ton beau ciel, ces cheveux ondoyans, 
Comme tes flotz au vent s'ebanoyans, 
Deçà delà voguoient à pleine bride? 
Ce fut alors, que cent Nymphes captives 
Entre tes braz, sortirent sur leurs rives, 
Laissant le creux de ta blonde maison. 
Ce fut alors que les Dieux et l'année 
Firent sur toy, ma terre fortunée, 
Renaistre l'or de l'antique saison. 
  
XCVI 
Ny par les bois les Driades courantes, 
Ny par les champs les fiers scadrons armez, 
Ny par les flotz les grands vaisseaux ramez, 
Ny sur les fleurs les abeilles errantes, 
Ny des forestz les tresses verdoyantes, 
Ny des oiseaux les corps bien emplumez, 
Ny de la nuit les flambeaux allumez, 
Ny des rochers les traces ondoyantes, 
Ny les piliers des sainctz temples dorez, 
Ny les palais de marbre elabourez, 
Ny l'or encor', ny la perle tant clere, 
Ny tout le beau que possedent les cieulx, 
Ny le plaisir pouroit plaire à mes yeulx, 
Ne voyant point le Soleil, qui m'eclere. 
  
XCVII 
Qui a peu voir la matinale rose 
D'une liqueur celeste emmïellée, 
Quand sa rougeur de blanc entremeslée 
Sur le naïf de sa branche repose: 
Il aura veu incliner toute chose 
A sa faveur: le pié ne l'a foulée, 
La main encor' ne l'a point violée, 
Et le troupeau aprocher d'elle n'ose. 
Mais si elle est de sa tige arrachée, 
De son beau teint la frescheur dessechée 
Pert la faveur des hommes et des Dieux. 
Helas! on veult la mienne devorer: 
Et je ne puis, que de loing, l'adorer 
Par humbles vers (sans fruit) ingenieux. 
  
XCVIII 
S'il a dict vray, seiche pour moy l'ombrage 
De l'arbre sainct, ornement de mes vers, 
Mon nom sans bruit erre par l'univers, 
Pleuve sur moy du ciel toute la rage. 
S'il a dict vray, de mes soupirs l'orage, 
De cruauté les durs rochers couvers, 
De desespoir les abismes ouvers, 
Et tout peril conspire en mon naufrage. 
S'il a menti, la blanche main d'yvoire 
Ceigne mon front des fueilles que j'honnore: 
Les astres soient les bornes de ma gloire: 
Le ciel bening me decouvre sa trace: 
Voz deux beaux yeux, deux flambeaux que j'adore, 
Guident ma nef au port de vostre grace. 
  
XCIX 
O faulse vieille! ô fille de l'Envie, 
Et de l'Amour, fille qui à ton pere 
As enfanté dommage, et vitupere, 
En corrompant le miel de nostre vie! 
O gehinne! ô fleau de nostre fantasie, 
Qui jusqu'en l'ame as ton cruel' repere! 
O le seul mal du bien, que l'on espere! 
Faulse aveuglée, inique Jalousie! 
Vent pestilent, air infect qui apportes 
La mort au coeur par plus de mile portes, 
Sale harpie, oiseau de triste augure! 
Tu es le mal, qui ne craint, ô superbe! 
Emplastre, unguent, just de racine ou d'herbe, 
Vers enchanté, ou magique figure. 
  
C 
Vieille, qui prens de crainte nouriture, 
De faulx rapport et de legere foy, 
Pourquoy fais-tu, soudain que je te voy, 
Geler mon feu d'une triste froidure? 
Si tu es donq' à mes plaisirs si dure, 
Pourquoy viens-tu loger avecques moy? 
Va te noyer en ce fleuve d'emoy, 
Fleuve infernal, où le froid tousjours dure. 
Au fond d'enfer va pleurer tes ennuiz, 
Parmy l'obscur des eternelles nuitz: 
Pourquoy te plaist d'Amour le beau sejour? 
Si la clerté les ombres épouante, 
Ose-tu bien ô charongne puante! 
Empoisonner le serain de mon jour! 
  
CI 
O que l'enfer etroitement enserre 
Cet ennemy du doulx repos humain, 
De qui premier la sacrilege main 
Arracha l'or du ventre de la Terre! 
Cetuy vraiment mena premier la guerre 
Contre le ciel, ce fier, cet inhumain 
Tua son pere, et son frere germain, 
Et fut puni justement du tonnerre. 
O peste! ô monstre! ô Dieu des malefices! 
Par toy premier la cohorte des vices 
Sortit du creux de la nuit plus profonde. 
Par toy encor' s'en revola d'icy 
L'antique foy, et la justice aussi 
Avec' l'Amour, l'autre Soleil du monde. 
  
CII 
Des chiens veillants le long cry doloreux, 
Le soing du guet, et la ferrée porte 
La tour d'airein pouvoient rendre assez forte 
Contre l'assault du nocturne amoureux. 
Trop en etoit le sort avantureux 
Mesm' à celuy qui la vengence porte, 
S'il ne se fust de sa divine sorte 
Changé en or, ce metal malheureux. 
C'est ce fier là, qui egale aux campaignes 
Les durs sommez des plus haultes montaignes, 
Plus foudroyant, que n'est le traict des cieulx. 
Le fer, le feu, les grand's citez fermées, 
Les haultz ramparts, et les bandes armées 
Donnent passage à l'or audacieux. 
  
CIII 
Mais quel hiver seiche la verde souche 
Des sainctz rameaux, ombrage de ma vie? 
Quel marbre encor', marbre pasle d'envie, 
Blesmist le teint de la vermeille bouche? 
Mais quele main, quele pillarde moûche 
Ravist ses fleurs? c'est toy, fievre hardie, 
Qui fais languir par une maladie 
Moy en mon ame, et Madame en sa couche. 
O toy, que mere et maratre on appelle! 
As-tu donc faict une chose si belle 
Pour la deffaire? ô Dieu qui n'as point d'yeulx! 
Si contre moy la Nature conspire, 
Voire le ciel, la fortune, et les Dieux, 
Deffen au moins l'honneur de ton empire. 
  
CIV 
O Citherée! ô gloire paphienne! 
Mere d'Amour, vien' piteuse à la belle, 
Qui le secours de tes Graces appelle, 
Saincte, pudique, et chaste Cyprienne. 
Soutien aussi, vierge Tritonienne, 
De ton vieulx tige une branche nouvelle: 
Toy, qui sortis de la saincte cervelle, 
Sage Pallas, Minerve Athenienne. 
Oyez encor' vous les deux yeulx du monde, 
L'honneur jumeau de l'isle vagabonde, 
Le juste dueil de ce coeur gemissant. 
Ainsi la nuit tes baisers favorise, 
Chaste Diane: ainsi Parnaze prise, 
Docte Phebus, ton laurier verdissant. 
  
CV 
Esprit divin, que la troupe honnorée, 
Du double mont admire, en t'écoutant, 
Cigne nouveau, qui voles en chantant 
Du chault rivage au froid hiperborée: 
Si de ton bruit ma Lire enamourée 
Ta gloire encor' ne va point racontant, 
J'aime, j'admire, et adore pourtant 
Le hault voler de ta plume dorée. 
L'Arne superbe adore sur sa rive 
Du sainct Laurier la branche tousjours vive, 
Et ta Delie enfle ta Saone lente. 
Mon Loire aussi, demydieu par mes vers, 
Bruslé d'amour etent les braz ouvers 
Au tige heureux, qu'à ses rives je plante. 
  
CVI 
O noble esprit, des Graces allié, 
Que ta vertu, la Muse, et la Nature 
Ont par destin, et non par avanture, 
Avec le mien etroitement lié! 
O de mon coeur la seconde moitié! 
Si de ton feu quelque scintile dure, 
Soulage un peu le torment que j'endure, 
Me consolant d'excuse, ou de pitié. 
Inspire moy les tant doulces fureurs, 
Dont tu chantas celle fiere beauté, 
Qui t'aveugla à semblables erreurs. 
Ainsi d'Amour le feu puisse descendre, 
Pour amolir cet' humble cruauté, 
En l'estommac de ta froide Cassendre. 
  
CVII 
Sus, sus mon ame, ouvre l'oeil, et contemple 
L'arc triomphal de l'amour supernel, 
Qui pour laver ton peché paternel 
Porta le faix de ta perte si ample. 
Là, de pitié est le parfaict exemple: 
Sus donc mes vers, d'un vol sempiternel 
Portez mes voeux en son temple eternel, 
Le coeur fidele est de Dieu le sainct temple. 
S'il a servi pour rendre l'homme franc, 
S'il a purgé mes pechez de son sang, 
Et s'il est mort pour ma vie asseurer, 
S'il a goûté l'amer de mes douleurs, 
Prodigues yeulx, ne devez-vous pleurer 
D'avoir sans fruit dependu tant de pleurs? 
  
CVIII 
O seigneur Dieu, qui pour l'humaine race 
As esté seul de ton pere envoyé! 
Guide les pas de ce coeur devoyé; 
L'acheminant au sentier de ta grace. 
Tu as premier du ciel ouvert la trace, 
Par toy la mort a son dard etuyé: 
Console donq' cet esprit ennuyé, 
Que la douleur de mes pechez embrasse. 
Vien, et le braz de ton secours apporte 
A ma raison, qui n'est pas assez forte, 
Vien eveiller ce mien esprit dormant. 
D'un nouveau feu brusle moy jusq'à l'ame, 
Tant que l'ardeur de ta celeste flamme 
Face oublier de l'autre le torment. 
  
CIX 
Pere du ciel, si mil' et mile fois 
Au gré du corps, qui mon desir convie, 
Or que je suis au printemps de ma vie, 
J'ay asservi et la plume, et la voix, 
Toy, qui du coeur les abismes congnois, 
Ains que l'hiver ait ma force ravie, 
Fay moy brusler d'une celeste envie, 
Pour mieux goûter la douceur de tes loix. 
Las! si tu fais comparoitre ma faulte 
Au jugement de ta majesté haulte, 
Où mes fortaictz me viendront accuser, 
Qui me pourra deffendre de ton ire? 
Mon grand peché me veult condamner, Sire, 
Mais ta bonté me peult bien excuser. 
  
CX 
Dieu, qui changeant avec' obscure mort 
Ta bienheureuse, et immortelle vie, 
Fus aux pecheurs prodigue de ta vie, 
Pour les tirer de l'eternelle mort: 
Celle pitié coupable de ta mort 
Guide les paz de ma facheuse vie, 
Tant, que par toy à plus joyeuse vie 
Je soy' conduit du travail de la mort. 
N'avise point, ô Seigneur! que ma vie 
Se soit noyée aux ondes de la mort, 
Qui me distrait d'une si doulce vie. 
Oste la palme à cet' injuste mort, 
Qui jà s'en va superbe de ma vie, 
Et morte soit tousjours pour moy la mort. 
  
CXI 
Voicy le jour, que l'eternel amant 
Fist par sa mort vivre sa bien aimée: 
Qui telle mort au coeur n'a imprimée, 
O seigneur Dieu! est plus que dyamant. 
Mais qui poura sentir ce doulx torment, 
Si l'ame n'est par l'amour enflammée? 
Soufle luy donc, pour la rendre allumée, 
L'esprit divin de ton feu vehement. 
Pleurez mes yeulx, de sa mort la memoire, 
Chantez mes vers, l'honneur de sa victoire, 
Et toy, mon coeur, fay luy son deu hommage. 
O que mon Roy est invincible, et fort! 
O qu'il a faict grand gaing de son dommage! 
Qui en mourant triomphe de la mort. 
  
CXII 
Dedans le clos des occultes Idées, 
Au grand troupeau des ames immortelles 
Le Prevoyant a choisi les plus belles, 
Pour estre à luy par luymesme guidées. 
Lors peu à peu devers le ciel guindées 
Dessus l'engin de leurs divines aeles 
Vollent au seing des beautez eternelles, 
Où elle' sont de tout vice emondées. 
Le Juste seul ses eleuz justifie, 
Les reanime en leur premiere vie, 
Et à son filz les faict quasi egaulx. 
Si donq' le ciel est leur propre heritage, 
Qui les poura frauder de leur partage 
Au poinct, qui est l'extreme de tous maulx? 
  
CXIII 
Si nostre vie est moins qu'une journée 
En l'eternel, si l'an qui faict le tour 
Chasse noz jours sans espoir de retour, 
Si perissable est toute chose née, 
Que songes-tu mon ame emprisonnée? 
Pourquoy te plaist l'obscur de nostre jour, 
Si pour voler en un plus cler sejour, 
Tu as au dos l'aele bien empanée? 
Là, est le bien que tout esprit desire, 
Là, le repos où tout le monde aspire, 
Là, est l'amour, là, le plaisir encore. 
Là, ô mon ame au plus hault ciel guidée! 
Tu y pouras recongnoistre l'Idée 
De la beauté, qu'en ce monde j'adore. 
  
CXIV 
Arriere, arriere, ô mechant Populaire! 
O que je hay ce faulx peuple ignorant! 
Doctes espris, favorisez les vers 
Que veult chanter l'humble prestre des Muses. 
Te plaise donc, ma Roine, ma Déesse, 
De ton sainct nom les immortalizer, 
Avec' celuy qui au temple d'Amour 
Baize les piez de ta divine image. 
O toy, qui tiens le vol de mon esprit, 
Aveugle oiseau, dessile un peu tes yeux, 
Pour mieulx tracer l'obscur chemin des nues. 
Et vous, mes vers, delivres et legers, 
Pour mieulx atteindre aux celestes beautez, 
Courez par l'air d'une aele inusitée. 
  
CXV 
De quel soleil, de quel divin flambeau 
Vint ton ardeur? lequel des plus haulx Dieux, 
Pour te combler du parfaict de son mieulx, 
Du Vandomois te fist l'astre nouveau? 
Quel cigne encor' des cignes le plus beau 
Te prêta l'aele? et quel vent jusq'aux cieulx 
Te balança le vol audacieux, 
Sans que la mer te fust large tombeau? 
De quel rocher vint l'eternelle source, 
De quel torrent vint la superbe course, 
De quele fleur vint le miel de tes vers? 
Montre le moy, qui te prise, et honnore, 
Pour mieulx haulser la Plante que j'adore 
Jusq'à l'egal des Lauriers tousjours verds. 
COELO MUSA BEAT 
L'antérotique de la vieille et de la jeune amye 
  
L'antérotique de la vieille et de la jeune amye 
Vieille, aussi vieille comme celle, 
Qui apres l'Unde universelle 
Du ject de la pierre fecunde 
Engendra la moitié du Monde. 
Vieille, plus sale qu'Avarice, 
Vieille, qui serois bien nourice 
A celle de Nestor le Saige. 
Vieille, qui portes au visaige 
Et aux moins laids endroictz de toy 
Des sillons à coucher le doy. 
Vieille, qui as, ô vieille Beste! 
Plus d'yeux, que de cheveux en teste. 
Vieille, à trois petiz bouz de dentz 
Tous rouillez dehors, et dedens. 
Vieille, qui as joüe, et narine 
Bordées de crasse, et farine, 
De bave la bouche, et gensive, 
Et les yeux d'ecarlate vive. 
Vieille, qui as telle couleur 
Que celle, qui par grand' douleur 
Du bien d'autruy se lamentant, 
Se va soymesmes tormentant, 
Et couchée à plat sur le ventre 
En lieu, où point le Soleil n'entre, 
Pour nourrissement de ses oeuvres 
Se paist de Serpens, et Couleuvres. 
Vieille, horrible plus que Meduse, 
Vieille, au ventre, hola ma Muse, 
Veux-tu toucher les membres ords, 
Qui point ne se montrent dehors? 
Veu que ce qui au jour se montre 
Est de si hydeuse rencontre, 
Que mesmes le Soleil se cache 
De peur d'y prendre quelque tache: 
Je te pry, ne t'y souille point, 
De peur que venant sur le point 
De la Beaulté, pour qui j'endure, 
Tu n'y aportes quelque ordure. 
Vieille doncq' plus que toy vilaine, 
Vieille, qui rends semblable halaine 
A celle du stigieux Gouphre 
Ou d'une miniere de souphre: 
Et si à ryre tu te boutes, 
Semble à ceux qui sont aux ecoutes 
Ouyr l'epoventable voix 
Du Chien Portier à trois aboyx. 
Vieille, Peur des chastes familles, 
Vieille, peste des jeunes filles, 
Que tout pere avare et antique 
Et tout matrone pudique 
Craignent trop plus, que le berger 
Du loup ne doute le danger. 
Bien infortuné devoit estre 
L'Astre, soubz qui tu vins à naitre, 
Et bien etoint fachez les Dieux, 
Quand tu naquis en ces bas lieux, 
Qui des maulx y semes encore, 
Plus que la fatale Pandore. 
O que n'ay-je de vehemence 
Autant que tu as de semence 
D'etranges vices, et divers! 
Ma Plume vomiroit un vers 
Teint au sang de ce malheureux, 
Qui de peur du Traict dangereux, 
Que la Muse alloit debendant, 
Sauva sa vie en se pendant. 
Vieille, que tous Oyzeaux funebres, 
Chaz huans, amys des tenebres, 
Avecq' maint charoingneux corbeau 
Ont ja condamnée au tumbeau. 
Que dy-je? tu ne mouras point. 
Pource que la Mort, qui tout poingt, 
Quoy qu'elle soit fiere et terrible, 
Te voyant encor'plus horrible, 
De toy approcher n'osera, 
Mais de peur tremblente sera. 
Comment? ell' cuydera ainçoys 
Que la Mort de la Mort tu soys. 
Ou bien si le Ciel pitoyable 
De ce Monstre tant incroyable 
Purge la Terre, qui tel fruict 
Voudroit onques n'avoir produit, 
Ton Ame sale, et depiteuse, 
Sortant de sa prison hydeuse, 
S'en ira blaphemer là bas, 
Prenant (comme icy) ses ebas, 
A donner peines, et encombres. 
Malheur à vous (ô pauvres Umbres!) 
Qui d'endurer serez contraintes 
Les foüetz, torches, et attaintes, 
Et la cruelle Seigneurie 
De cette quatrieme Furie. 
Quand tu vois (ô Vieille et immunde, 
Vieille, Deshonneur de ce Monde) 
Celle qui (si bien m'en souvient) 
Sur l'an quinzieme à peine vient: 
Qui envoye jusq'aux talons 
Des cheveux si crespes, et blonds, 
Qu'ilz font honte au beau Soleil mesme: 
Cheveulx dignes d'un diadesme, 
Cheveux, qui d'un fil delïé 
M'ont à eux si tresfort lïé, 
Que la Mort le seul fer sera, 
Qui ce doulx lyen brisera: 
Cheveux, dont ce petit Enfant, 
Qui sur les Dieux est triumphant, 
A faict la chorde, dont il tyre 
Traictz empennez de doulx martyre. 
Ces traictz, sont les beaux yeux ryans 
Qui ont (tant me semblent frians) 
Ce croy-je, depuis ma naissance, 
Ma mort, ma vie en leur puissance. 
L'arc, sont ces beaux sourcilz voutilz: 
Ainsi, d'Amour tous les outilz 
(Quoy qu'il s'en fache ou qu'il en hongne) 
Sont empruntez de ma Mignonne, 
Qui a bien d'avantaige encores. 
Et quoy? Ce front, qui or' et ores 
Semble le Ciel, quand il decoeuvre 
Le plus luysant de son chef d'oeuvre, 
Ou quand quelque petite nue 
Nous rend sa clarté moins congnue. 
Ce beau teint, qui notre sejour 
Embellist encor' d'un beau jour, 
Et tel, qu'on voit, lors que l'Aurore 
L'Orient de pourpre colore: 
Teint, qui fait le Ciel amoureux 
De la Terre, et moy langoureux. 
Ce nez, ce menton, cete joue, 
Ces levres, où souvent se joue 
Amour, quand il montre en rient 
Tous les Thesors de l'Orient: 
D'où sort une halaine fleurante 
Mieux qu'Arabie l'Odorante: 
D'où sort l'Angelique Parler, 
A qui ne pouroit s'egaler 
La plus ravissante douceur 
Du Luc, des ennuiz effaceur, 
Encores qu'Albert le manie: 
Mais bien ressemble l'harmonie 
Et les accords melodieux, 
Qu'on oit à la table de Dieux. 
Bref (et de peur que d'avanture 
Mon oeil, ma main, mon ecriture 
Ne s'egarent, ou perdent voyre 
Par cete valée d'ivoyre, 
Et ces petiz coutaux d'albastre) 
M'amye est un beau petit astre 
Si clair, si net, que je crain' bien, 
Que le Ciel ne l'avoue sien. 
Bien etoit l'influence heureuse 
De la belle Etoile amoureuse 
Soubz qui m'amye prist naissance, 
Et les Dieux, qui ont congnoissance 
De tout, nous feurent bien amys, 
Veu que celle au Monde ilz ont mis, 
Qui seule y a plus aporté 
D'amour, de grace, et de beauté, 
Que d'odeurs l'Arabie heureuse, 
De perles d'Inde planteureuse, 
Ou le verd Printens de fleurettes, 
Fideles temoings d'amourettes. 
Que plus aux Muses, et Charites 
M'honnorer selon les merites 
De la belle, que j'ayme tant! 
Sans cesse je l'iroy' chantant, 
Et par des vers, qui seroient telz, 
Qu'elle et moy serions immortelz. 
Quand tu vois (ô Vieille edentée!) 
Que la Beauté que j'ay chantée, 
D'un oeil folastre me sourit, 
Et notz coeurs ensemble nourit 
D'humides baysers, qui ressemblent 
Ceux qui les columbes assemblent, 
Remordant, la vindicative, 
Ma levre de sa dent lascive, 
Et d'un long soupir adoucy 
M'embrasse, et serre, tout ainsi 
Que la vigne aux cent braz epars 
Etreint l'ormeau de toutes pars: 
Lors de moy aprocher tu oses 
Pour me faire semblables choses. 
Je suy' ton Dieu plus qu'à demy, 
Tu m'appelles ton doulx amy. 
Motz qui aux oreilles me sonnent 
Si doucement, que plus m'etonnent 
Que les grenouilles, ou cygales; 
Ou que l'enroüé des cymbales 
De tous les ecouillez ensemble 
De la Vieille, qui te ressemble, 
Et court par la Montaigne idée, 
De Lyons indomptez guydée 
Pour l'amour, qui par tout le Monde, 
Comme toy, la rend furibonde: 
Si que mes moüelles, qui ardent 
Aux douces flammes que leur dardent 
Les yeux archers de ma Maitresse, 
Te voyant, vieille Enchanteresse, 
Deviennent, je ne sçay comment, 
Toutes froydes en un moment. 
Or fais-tu maintenant bien voir 
Quel est (ô Amour!) ton pouvoir. 
Certes vanter tu te peux bien 
Qu'en ciel, et terre n'y a rien 
Qui plus fort que ton feu se treuve. 
Tu en as, Vieille, fait l'epreuve, 
Qui en ta plus chaulde partie 
Es plus froyde que la Scythie, 
Ou les hautes Alpes cornues, 
De nege comme toy chenues. 
Toutefois ces regards meslez 
Aux doulx baysers emmiellez 
De deux ensemble perissans 
Echaufent tes oz languissants. 
  
Vers lyriques 
  
Au lecteur 
Je n'ay (Lecteur) entremellé fort supersticieusement les vers masculins avecques 
Les feminins, comme on use en ces Vaudevilles et Chansons qui se chantent d'un 
Mesme chant, par tous les coupletz, craignant de contreindre et gehinner ma 
Diction pour l'observation de telles choses. Toutesfois affin que tu ne penses 
Que j'aye dedaigné ceste diligence, tu trouveras quelques Odes, dont les vers 
Sont disposez avecques telle religion: comme la Louange de deux Damoizelles; des 
Miseres et Calamitez humaines; le Chant du Desesperé, et les Louanges de 
Bacchus. 
  
I. Les louanges d'Anjou au fleuve de Loyre 
Ode I 
O de qui la vive course 
Prent sa bienheureuse source 
D'une argentine fonteine, 
Qui d'une fuyte loingtaine 
Te rens au seing fluctueux 
De l'Occean monstrueux, 
Loyre, hausse ton chef ores 
Bien haut, et bien haut encores, 
Et jete ton oeil divin 
Sur ce païs Angevin, 
Le plus heureux, et fertile 
Qu'autre, où ton unde distile. 
Bien d'autres Dieux que toy, Pere, 
Daignent aymer ce repaire 
A qui le Ciel feut donneur 
De toute grace, et bonheur. 
Ceres, lors que vagabunde 
Aloit querant par le monde 
Sa fille, dont possesseur 
Feut l'infernal ravisseur, 
De ses pas sacrez toucha 
Cete terre, et se coucha 
Lasse sur ton verd ryvaige, 
Qui luy donna doulx bruvaige. 
Et cetuy là, qui pour mere 
Eut la cuisse de son pere, 
Le Dieu des Indes vainqueur 
Arrousa de sa liqueur 
Les montz, les vaulx, et campaignes 
De ce terroir que tu baignes. 
Regarde, mon Fleuve, aussi 
Dedans ces forestz ici, 
Qui leurs chevelures vives 
Haussent au tour de tes ryves, 
Les Faunes aux piez soudains, 
Qui apres bisches et dains 
Et cerfz aux testes ramées 
Ont leurs forces animées. 
Regarde tes Nymphes belles 
A ces Demydieux rebelles, 
Qui à grand'course les suyvent, 
Et si près d'elles arrivent, 
Qu'elles sentent bien souvent 
De leurs haleines le vent. 
Je voy' dejà hors d'haleine 
Les pauvrettes, qui à peine 
Pouront atteindre ton cours, 
Si tu ne leur fais secours. 
Combien (pour les secourir) 
De foys t'a-lon veu courir 
Tout furieux en la plene? 
Trompant l'espoir, et la peine 
De l'avare laboureur, 
Helas! qui n'eut point d'horreur 
Blesser du soc sacrilege 
De tes Nymphes le college, 
College qui se recrée 
Dessus ta rive sacrée. 
Nymphes des jardins fertiles, 
Hamadryades gentiles, 
Toy Pryape, qui tant vaulx 
Avecq' ta lascive faulx, 
Pales, qui sur ces rivaiges 
Possedes tant beaux herbaiges, 
Que Flore va tapissant 
De mainte fleur d'eux yssant, 
Toy pasteur Amphrisien, 
Chacun de vous garde bien 
Ses richesses de l'injure 
Du chault, et de la froidure. 
Ces masses laborieuses, 
Que les mains industrieuses 
Quasi egalent aux cieux, 
Ne sont-elles pas aux Dieux? 
Qui vouldra doncq' loue, et chante 
Tout ce dont l'Inde se vante, 
Sicile la fabuleuse, 
Ou bien l'Arabie heureuse. 
Quand à moy, tant que ma Lyre 
Voudra les chansons elire 
Que je luy commenderay, 
Mon Anjou je chanteray. 
O mon Fleuve paternel, 
Quand le dormir eternel 
Fera tumber à l'envers 
Celuy qui chante ces vers, 
Et que par les braz amys 
Mon cors bien pres sera mis 
De quelque fontaine vive, 
Non gueres loing de ta rive, 
Au moins sur ma froyde cendre 
Fay quelques larmes descendre, 
Et sonne mon bruyt fameux 
A ton rivaige ecumeux. 
N'oublie le Nom de celle 
Qui toutes beautez excelle, 
Et ce qu'ay pour elle aussi 
Chanté sur ce bord icy. 
  
II. Des misères et fortunes humaines au seigneur Jan Proust 
Ode II 
Bellonne seme sang et raige 
Parmy les peuples çà et là, 
Et chasse à la Mort maint couraige 
De ce fouët tortu qu'ell' a. 
Son ame cetuy cy ottroye 
A un venin froid, et amer: 
Cetuy là est donné en proye 
Aux flotz avares de la Mer. 
Aucuns d'une main vengeresse 
Veulent par la Mort eprouver 
Si du mal, qui tant les oppresse, 
Pouront la guerison trouver. 
Quelques autres venans de naitre, 
Avant qu'ilz aillent rencontrant 
Ce qui malheureux nous fait estre, 
Sortent du monde en y entrant. 
Mercure des mains de la Parque 
Prent notz Umbres, et les conduyt 
Au bord, ou la fatale Barque 
Nous passe en l'eternelle Nuyt: 
Où Minos juge inexorable, 
Toutes excuses deboutant, 
La langue autresfois secourable 
De l'orateur n'est ecoutant. 
Le chemin est large, et facile 
Pour descendre en l'obscur sejour: 
Pluton tient de son domicile 
La porte ouverte nuyt et jour. 
Là gist l'oeuvre, là gist la peine, 
Ses pas de l'Orque retirer 
A l'etroit sentier, qui nous meine 
Où tout mortel doit aspirer. 
Le nombre est petit de ceux ores 
Qui sont les bien aymez des Dieux, 
Et ceux que la Vertu encores 
Ardente a elevez aux Cieux. 
Jupiter tient devant sa porte 
Deux tonneaux, dont il fait pluvoir 
Tout ce qui aux humains aporte 
De quoy ayse, ou tristesse avoir. 
Qui a veu en ce vieil poëte 
(Et le voyant, ne pleure lors) 
La trop tost ouverte boëte, 
Et les vertuz volants dehors? 
L'Esperance au bord arrestée 
Outre son gré demeure icy: 
Puis que seule nous est prestée, 
Gardon' qu'ell' ne s'en vole aussi. 
  
III. Les louanges d'amour au seigneur René d'Urvoy 
Ode III 
Le cler ruysselet courant, 
Murmurant 
Auprès de l'hospitale umbre, 
Plaist à ceux qui sont lassez, 
Et pressez 
De chault, de soif et d'encombre. 
Et ceux qu'Amour vient saisir, 
Leur plaisir, 
C'est parler de luy souvent. 
D'Amour soyez doncq', mes chantz, 
Par ces champs, 
Dessoubz la frescheur' du vent. 
Ces eaux cleres, et bruyantes, 
Eaux fuyantes 
D'un cours assez doulx et lent, 
Donneront quelque froideur 
A l'ardeur 
De mon feu trop violent. 
Erato, à ma chanson 
Donne son, 
Et me permetz approcher 
Pres de toy pour m'esjouyr, 
Et t'ouyr 
Du hault de ce creux rocher. 
Le Roy, le Pere des Dieux 
Tient les Cieux 
Dessoubz son obeïssance, 
Neptune la mer tempere, 
Et son frere 
Sur les enfers a puissance. 
Mais ce petit Dieu d'aymer, 
Ciel, et mer, 
Et le plus bas de la terre, 
D'un sceptre victorieux, 
Glorieux, 
Soubz son pouvoir tient, et serre. 
Sans luy, du ciel le haut temple, 
Large, et ample, 
En ruyne tumberoit, 
Avecq' chacun element, 
Tellement 
Discorde par tout seroit. 
Amour, gouverneur des villes, 
Loix civiles 
Et juste police ordonne, 
Et l'heur de Paix, qu'on va tant 
Souhaitant, 
C'est luy seul qui le nous donne. 
Les richesses de Ceres, 
Les forestz, 
Les sepz, les plantes, et fleurs 
Prennent d'Amour origine, 
Goust, racine, 
Vertu, formes, et couleurs. 
Par luy tout genre d'oyzeaux 
Sur les eaux 
Et par les boys s'entretient. 
Tout animal de servaige 
Et sauvaige 
De luy son essence tient. 
Par ce petit Dieu puissant, 
Delaissant 
Le doulx gyron de la mere, 
La vierge femme se treuve, 
Et fait preuve 
De la flamme doulce-amere. 
Que me chaut si on le blasme, 
Et sa flamme? 
Amour ne sçait abuser: 
Et ceux qui mal en reçoyvent, 
Ne le doyvent, 
Mais eux mesmes, accuser. 
Amour est tout bon et beau, 
Son flambeau 
N'enflamme les vicieux: 
Juste est, et de simple foy, 
C'est pourquoy 
Il est tout nu et sans yeux. 
Leurs victorieux charroys 
Ducz, et Roys 
Doyvent à ses sainctz autelz, 
Le poëtique ouvrïer 
Son laurier, 
Et les Dames leurs beautez. 
Puis doncq' qu'il est notre autheur, 
Sa haulteur 
Bien adorer nous devons, 
Dessus son autel sacré, 
Saichant gré 
A luy, de quoy nous vivons. 
La jeunesse (helas) nous fuyt, 
Et la suyt 
Le froid aage languissant: 
Adonques sont inutiles 
Les scintiles 
Du feu d'Amour perissant. 
  
IV. De l'inconstance des choses au Seigneur Pierre de Ronsard 
Ode IV 
Nul, tant qu'il ne meure, 
Heureux ne demeure: 
Le Sort inconstant 
Or' se hausse, et ores 
S'abaisse, et encores 
Au ciel va montant. 
La Nuyt froyde et sombre 
Couvrant d'obscure umbre 
La terre, et les cieux, 
Aussi doulx que miel 
Fait couler du ciel 
Le someil aux yeux. 
Puis le Jour luysant 
Au labeur duysant 
Sa lueur expose, 
Et d'un teint divers 
Ce grand univers 
Tapisse et compose. 
Quand l'Hyver tremblant 
Les eaux assemblant 
De glace polie, 
Des austres puissans 
De dueil gemissans 
La rage delie, 
La Terre couverte 
De sa robe verte 
Devient triste, et nue, 
Le vent furieux 
Vulturne en tous lieux 
Les forestz denue. 
Puis la saison gaye. 
A la terre essaye 
Rendre sa verdure, 
Qui ne doit durer, 
Las! mais endurer 
Une autre froidure. 
Ainsi font retour 
D'un successif tour 
Le Jour, et la Nuyt: 
Par mesme raison 
Chacune saison 
L'une l'autre suyt. 
Le pueril' aage 
Lubric, et volaige 
Au printens ressemble: 
L'été vient après, 
Puis l'autonne est près, 
Puis l'hyver qui tremble. 
O que peu durable 
(Chose miserable) 
Est l'humaine vie, 
Qui sans voyr le jour 
De ce cler sejour 
Est souvent ravie. 
Soubz le grand espace 
Du ciel, le Tens passe 
Par course subite: 
Thëatres, Colosses 
En ruines grosses 
Le tens precipite. 
Que sont devenuz 
Les murs tant congnuz 
De Troye superbe? 
Ilion est comme 
Maint palais de Romme 
Caché, dessoubz l'herbe. 
Torrentz, et ryvieres 
Bruyantes et fieres 
Courent en maintz lieux, 
Où rochers, et bois 
Sembloient autresfois 
Menasser les cieux. 
Les fieres montaignes 
Aux humbles campaignes 
On voit egalées, 
Maintz lieux foudroyez, 
Les autres noyez 
Des undes salées. 
Regnes, et empires 
En meilleurs et pires 
On a veu changer, 
Maint peuple puissant 
Ses loix delaissant 
Suyvre l'etranger. 
Superbe couraige, 
Qui ne crains oraige, 
Foudre, ny tempeste, 
A ton fier marcher 
Tu sembles toucher 
Les cieux de la teste. 
Mais ta voyle enflée 
De faveur souflée 
Metz hardiment bas: 
Le ciel variable 
Tousjours amyable 
Ne te sera pas. 
Quoy doncq'? ne sçais-tu 
Qu'un buysson batu 
Moins est du tonnerre, 
Qu'un haut chesne, ou tremble, 
Ou qu'un mont qui semble 
Depriser la terre? 
Amy, qui pour vivre 
Des ennuiz delivre, 
Que la court procure, 
T'es venu ranger 
Comme un etranger, 
En la tourbe obscure: 
Ne regrete point 
L'ambicieux poinct 
De cete faveur. 
Le ciel favorable 
D'un plus honorable 
T'a fait receveur. 
De Ronsard le nom 
Ne soit en renom 
Par le populaire: 
Amy, tu es tel, 
Que rien, qu'immortel, 
Ne te pouroit plaire. 
Laisse aux courtizants 
Les souciz cuyzans: 
Ne soys curieux 
Des biens aquerir, 
Ou de t'enquerir 
Du secret des Dieux. 
  
V. A deux Damoyzelles 
Ode V 
Il faut maintenant, ô ma Lyre! 
Sur ta meilleure corde elire 
Un chant, qui penetre les Cieux, 
Par une aussi etrange voye 
Que celles à qui je t'envoye 
Sont dignes du plus grand des Dieux. 
Dy leur que je n'ay l'artifice 
D'un peintre, ou engraveur, qui puisse 
Au vray le semblable egaler. 
Mais bien je les puy' faire vivre 
Mieux qu'en tableau, en marbre ou cuyvre, 
Qui n'ont l'usaige de parler. 
Mes vers, qui portent sur leurs esles 
Les louanges des Damoyzelles, 
Se vantent de voler un jour 
Parmy la region des nues, 
Et les beautez du ciel venues 
Sacrer au celeste sejour. 
Les beautez jusques aux Dieux montent, 
Celles que les Muses racontent. 
Les autres, qui n'ont ce bon heur, 
Les umbres solitaires suyvent: 
Mais les votres (si mes vers vivent) 
N'iront soubz terre sans honneur. 
Je chanteray que votz merites 
Vous egalent aux trois Charites, 
Qui font des chapeaux florissans 
A la joyeuse Cyprienne, 
Dansant avecq' la trope sienne 
Par les prez de loing rougissans. 
Telles sont les chastes compaignes, 
Qui parmy forestz, et campaignes, 
Fleuves, et ruysseaux murmurans, 
Suyvent la Vierge chasseresse, 
Quand d'un pié leger elle presse 
Le doz des cerfz legercourans. 
Qui a veu les lyz, et les rozes 
Avecq' la belle aube decloses, 
Celuy a veu votre beau teint: 
Dont le blanc, et vermeil ensemble 
Le pourpre coloré ressemble, 
Et du laict la blancheur eteint. 
Qui a conté les fleurs sacrées 
Des rives, campaignes, et prées, 
Dont l'air, quand il est plus rient, 
Orne les cheveux de la terre, 
Et les pierres que lon va querre 
Par tant de flotz en Orient: 
Celuy a nombré (ce me semble) 
Vos graces, et vertuz ensemble 
Avecques les traictz de votz yeux, 
Dont mil', et mile fleches darde 
Contre celuy qui vous regarde 
L'enfant qui surmonte les Dieux. 
Qui de la harpe Thracienne 
A ouy la voix ancienne, 
Des foretz l'ebahissement, 
Les votres luy fera pareilles, 
Qui font des plus rudes oreilles, 
Voyre des coeurs, ravissement. 
Voulez-vous que ma plume ecrive 
Comment dessus la verde ryve 
De Cadme la peu fine seur, 
Eloingnant sa fidele trope, 
Osa presser la blanche crope 
Du divin Thaureau ravisseur? 
Jadis soubz plume blanchissante 
Du Ciel la majesté puissante 
Remplit celle qui enfanta 
Les fors jumeaux, avecques celle 
Qu'en Ide des troys la plus belle 
Au juge bergier tant vanta. 
De la pluye jaune coulante 
Au seing d'une vierge excellente 
Naquit le chevalier volant. 
Telles sont les flammes subtiles 
Du feu, dont les vives scintiles 
Vont Dieux et hommes affolant. 
Qui est celuy qui voudroit taire 
Le filz du mari adultere? 
Le monde de monstres purgé 
De ses faictz la gloire conserve, 
Des enfers la depouille serve, 
Et le ciel sur son doz chargé. 
Qui ne congnoist bien les deux Ourses 
Fuyantes de Thetis les sourses? 
Ou qui est celuy que n'attaint 
La plainte de la belle vache, 
Qui aux tristes rives d'Inache 
De l'amy cruel se complaint? 
Fuyez doncq' les facons cruelles 
Que beauté couve soubz ses esles. 
Faites à l'Amour humbles voeutz 
Qu'à Jupiter ne vous otroye, 
Pour croistre (ô bienheureuse proye!) 
Le nombre des celestes feux. 
Par les mains du chaste Hymenée 
Chacune de vous soit menée 
Au lieu, où l'ennemy humain 
Soubz une agréable lumière 
De votz jardins la fleur premiere 
Pille d'audacieuse main. 
Ces petites undes enflées 
Des plus doulx zephires souflées 
Sans fin vont disant à leur bord: 
Heureuse la nef arrestée 
Par le mors de l'anchre jetée 
Dedans le seing d'un si beau port. 
  
VI. Du premier jour de l'an au Seigneur Bertran Bergier 
Ode VI 
Voicy le Pere au double front, 
Le bon Janus, qui renouvelle 
Le cours de l'An, qui en un rond. 
Ameine la saison nouvelle. 
Renouvelons aussi 
Toute vieille pensée, 
Et tuons le soucy 
De Fortune insensée. 
Sus doncq', que tardons-nous encore? 
Avant que vieillars devenir, 
Chassons le soing, qui nous devore 
Trop curieux de l'advenir. 
Ce qui viendra demain 
Ja pensif ne te tienne: 
Les Dieux ont en leur main 
Ta fortune, et la mienne. 
Tu voy de nege tous couvers 
Les sommetz de la forest nue, 
Qui quasi envoye à l'envers 
Le faiz de sa teste chenue. 
La froide bize ferme 
Le gosier des oyzeaux, 
Et les poissons enferme 
Soubz le cristal des eaux. 
Veux-tu attendre les frimaz 
De l'hyver, qui dejà s'appreste, 
Pour faire de nege un amaz 
Sur ton menton, et sur ta teste? 
Que tes membres transiz 
Privez de leur verdeur, 
Et les nerfz endurciz 
Tremblent tous de froideur? 
Quand la saison amolira 
Tes braz autresfois durs et roydes, 
Adoncq' malgré toy perira 
Le feu de tes moüelles froydes, 
Que toute herbe, ou etuve, 
Tout genial repas, 
Mais tout l'Aethne et Vesuve 
Ne rechaufferoint pas. 
Mon filz, c'est assez combatu, 
(Disoit la mere au fort Gregeois,) 
Pourquoy ne te rejouys-tu 
Avecq' ces filles quelques fois? 
Les vins, l'amour consolent 
Le triste coeur de l'homme: 
Les ans legiers s'en volent, 
Et la mort nous assomme. 
Je te souhaite pour t'ebatre 
Durant ceste morte saison, 
Un plaisir, voyre trois, ou quatre, 
Que donne l'amye maison: 
Bon vin en ton celier, 
Beau feu, nuyt sans soucy, 
Un amy familier, 
Et belle amye aussi, 
Qui de son luc, qui de sa voix 
Endorme souvent tes ennuiz, 
Qui de son babil quelquesfois 
Te face moins durer les nuitz, 
Au lict follastre autant 
Que ces chevres lascives, 
Lors qu'elles vont broutant 
Sur les herbeuses rives 
  
VII. Du jour des bacchanales au Seigneur Rabestan 
Ode VII 
Quel bruyt inusité 
A mes oreilles tonne? 
Je suy' tout excité 
De l'horreur qui m'etonne: 
Mon coeur fremist, et tremble, 
Evoé, Evoé. 
J'oy' la voix (ce me semble) 
D'un cornet enroué. 
Je voy' le deux fois né, 
L'Indique Dieu, qui erre 
Le chef environné 
De verdoyant lyerre: 
Les fiers tygres soupirent 
Soubz le joug odieux, 
Et tous paisibles tirent 
Son char victorieux. 
Maint Satyre lascif 
Ryant soutient à peine 
Sur ung asne tardif 
Le chancelant Sylene. 
Triumphe à la bonne heure, 
Dieu, dont feut le butin 
Ce peuple qui demeure 
Le plus près du matin. 
Mon ame eprise au feu 
De ta liqueur tant bonne, 
Ce poëtique voeu 
Te consacre et ordonne. 
Je te salue Pere, 
Qui tout soucy deffens, 
Soubz ton regne prospere 
Fay vivre tes enfans. 
Celuy qui sceut les boys 
Et les rochers attraire, 
Qui fist les trois aboys 
Tous ebahiz se taire, 
Sceut au prix de sa teste 
Combien est perilleux 
Blamer la saincte feste 
De ton nom merveilleux. 
Sans jarretz se trouva 
Le brave roy de Thrace, 
Et ta force eprouva 
L'Echionnée race: 
Bien que tu sembles estre 
Au ryz, banquetz, et jeuz 
Plus idoyne, qu'adextre 
Aux combatz outraigeux; 
D'une horrible machoire 
Renversé par ta main, 
Feut temoing de ta gloire: 
Quand les filz de la Terre 
Ozerent s'avancer 
Pour au Ciel faire guerre, 
Et ton Pere offenser. 
Sans toy, n'ard qu'à demy 
La furieuse flamme 
De Venus, ô l'amy 
Et du cors, et de l'ame! 
Donq' à force de boyre, 
Noye, ou brusle au dedans 
La facheuse memoire 
De noz souciz mordans. 
Amy, ceste rigueur 
Au vieil Caton delaisse: 
Mais où est la vigueur 
De ta verde vieillesse? 
Le soing de tout affaire 
Que n'est-il endormy? 
Quelquesfois il faut faire 
Le fol pour son amy. 
  
VIII. Du retour du printens à Jan d'Orat 
Ode VIII 
De l'hyver la triste froydure 
Va sa rigueur adoucissant, 
Et des eaux l'ecorce tant dure 
Au doulx Zephire amolissant. 
Les oyzeaux par les boys 
Ouvrent à cete foys 
Leurs gosiers etreciz, 
Et plus soubz durs glassons 
Ne sentent les poissons 
Leurs manoirs racourciz. 
La froide humeur des montz chenuz 
Enfle deja le cours des fleuves, 
Deja les cheveux sont venuz 
Aux forestz si longuement veufves. 
La Terre au Ciel riant 
Va son teint variant 
De mainte couleur vive: 
Le Ciel (pour luy complaire) 
Orne sa face claire 
De grand' beauté nayve. 
Venus ose jà sur la brune 
Mener danses gayes, et cointes 
Aux pasles rayons de la lune, 
Ses Graces aux Nymphes bien jointes. 
Maint Satyre outraigeux, 
Par les boys umbraigeux, 
Ou du haut d'un rocher, 
(Quoy que tout brusle, et arde) 
Etonné les regarde, 
Et n'en ose approcher. 
Or' est tens que lon se couronne 
De l'arbre à Venus consacré, 
Ou que sa teste on environne 
Des fleurs qui viennent de leur gré. 
Qu'on donne au vent aussi 
Cest importun soucy, 
Qui tant nous fait la guerre: 
Que lon voyse sautant, 
Que lon voyse hurtant 
D'un pié libre la terre. 
Voicy, dejà l'eté, qui tonne, 
Chasse le peu durable ver, 
L'eté le fructueux autonne, 
L'autonne le frilleux hyver. 
Mais les lunes volaiges 
Ces celestes dommaiges 
Reparent: et nous hommes, 
Quand descendons aux lieux 
De noz ancestres vieux, 
Umbre, et poudre nous sommes. 
Pourquoy doncq' avons-nous envie 
Du soing qui les coeurs ronge, et fend? 
Le terme bref de notre vie 
Long espoir nous deffent. 
Ce que les Destinées 
Nous donnent de journées, 
Estimons que c'est gaing. 
Que scais-tu si les Dieux 
Ottroyront à tes yeux 
De voir un lendemain? 
Dy à ta lyre qu'elle enfante 
Quelque vers, dont le bruyt soit tel, 
Que ta Vienne à jamais se vante 
Du nom de Dorat immortel. 
Ce grand tour violant 
De l'an leger-volant 
Ravist et jours, et moys: 
Non les doctes ecriz, 
Qui sont de noz espris 
Les perdurables voix. 
  
IX. Chant du desesperé 
Ode IX 
La Parque si terrible 
A tous les animaulx 
Plus ne me semble horrible, 
Car le moindre des maulx, 
Qui m'ont fait si dolent, 
Est bien plus violent. 
Comme d'une fonteine 
Mes yeux sont degoutens, 
Ma face est d'eau si pleine 
Que bien tost je m'attens 
Mon coeur tant soucieux 
Distiler par les yeux. 
De mortelles tenebres 
Ilz sont déjà noirciz, 
Mes plaintes sont funebres, 
Et mes membres transiz: 
Mais je ne puy' mourir, 
Et si ne puy' guerir. 
La Fortune amyable 
Est-ce pas moins que rien? 
O que tout est muable 
En ce val terrien! 
Helas, je le congnoy', 
Qui rien tel ne craignoy'. 
Langueur me tient en lesse, 
Douleur me suyt de près, 
Regret point ne me laisse, 
Et crainte vient après: 
Bref, de jour, et de nuyt 
Toute chose me nuit. 
La verdoyant' campaigne, 
Le flory arbrisseau, 
Tumbant de la montaigne 
Le murmurant ruysseau, 
De ces plaisirs jouyr 
Ne me peut rejouyr. 
La musique sauvaige 
Du rossignol au boys 
Contriste mon couraige, 
Et me deplait la voix 
De tous joyeux oyzeaux 
Qui sont au bord des eaux. 
Le Cygne poëtique 
Lors qu'il est myeux chantant, 
Sur la ryve aquatique 
Va sa mort lamentant. 
Las! tel chant me plait bien 
Comme semblable au mien. 
La voix repercussive 
En m'oyant lamenter, 
De ma plainte excessive 
Semble se tormenter, 
Car cela que j'ay dit 
Tousjours elle redit. 
Ainsi la joye et l'ayse 
Me vient de dueil saisir, 
Et n'est, qui tant me plaise 
Comme le deplaisir, 
De la mort en effect 
L'espoir vivre me fait. 
Dieu tonnant, de ta foudre 
Viens ma mort avencer, 
Afin que soye en poudre 
Premier que de penser 
Au plaisir, que j'auroy' 
Quand ma mort je scauroy'. 
  
X. Au Seigneur Pierre de Ronsard 
Ode X 
Chante l'emprise furieuse 
Des fiers Gëans trop devoyez, 
Et par la main victorieuse 
Du Pere tonnant foudroyez: 
Ou bien les labeurs envoyez 
Par Junon Déesse inhuméne 
A l'invincible enfant d'Alcméne. 
Chante les martiaux alarmes 
D'un son heroic, et haut style: 
Chante les amoureuses larmes, 
Ou bien le champ graz et fertile, 
Ou le cler ruysseau qui distile 
Du mont pierreux, ruysseau qui baigne 
Prez, et spacieuse campaigne. 
Chante doncq' les biens de Cerés 
Et de Bacchus les jeuz mystiques: 
Chante les sacrées forés, 
Sejour des Demydieux rustiques: 
Chante tous les Dieux des antiques, 
Pluton, Neptune impetueux. 
Et les austres tempetueux. 
Bref, chante tout ce qu'ont chanté 
Homere, et Maron tant fameux, 
Pyndare, Horace tant vanté, 
Afin d'estre immortel comme eux 
En depit du dard venimeux 
De celle qui ne peut deffaire 
Ce qu'un esprit divin sçait faire. 
Ton oeuvre sera plus durable 
Qu'un Thëatre, ou un Colisée, 
Ou qu'un Mausëole admirable, 
Dont l'etophe si fort prisée 
Par le tens a été brisée, 
Ou que tout autre oeuvre excellant 
De la main de l'ouvrier volant. 
Quand à moy, puis que je n'ay beu, 
Comme toy, de l'unde sacrée, 
Et puis que songer je n'ay peu 
Sur le mont double, comme Ascrée, 
C'est bien force que me recrée 
Avec Pan, qui soubz les ormeaux 
Fait resonner les challumeaux. 
Mais toy, si desires pour vivre 
Delaisser quelque monument, 
Pourquoy aussi ne veux-tu suyvre 
Quelque haut et brave argument? 
Amy, vole plus hautement, 
Et en lieu si humble n'amuse, 
Qu'à me louër, ta docte Muse. 
Si tu m'eusses, facund Mercure, 
Volu etre un peu favorable, 
Et toy Phebus, j'eusse pris cure 
De rendre mon bruyt honorable, 
Voyre par ecrit memorable 
Un jour avec triumphe et gloire 
Marier Loyr avecques Loyre. 
  
XI. A une dame cruelle et inexorable 
Ode XI 
Muse, que tant je voys cherchant, 
Inspire moy encor' un chant, 
Un chant, qui entre en l'obstinée oreille 
De la beauté, qui n'a point sa pareille. 
Le feu en la fournaize etreint 
Ard plus que cil, qui non contreint 
Par le ciel libre en çà et là epars 
Donne sa flamme au vent de toutes pars. 
Amour jusqu'au profund de l'ame 
A dardé la cruelle flamme 
Que suy' contreint de vomir en mes vers 
D'un son tragic tout etrange et divers. 
Cruelle, tu voys de bien loing 
Ce feu, dont tu n'as point de soing, 
Comme celuy qu'on voit voler parmy 
La ville prise ou le camp ennemy. 
Tu m'as ouvert le manque flanc 
Avecques cet ivoyre blanc, 
Qui montre au bout cinq perles plus exquises 
Que d'Orient les pierres tant requises. 
Pourquoy arraches-tu le coeur 
Dont Amour par toy feut vainqueur? 
Pourquoy fais-tu, ainsi que deux tenailles, 
Sentir tes mains en mes vives entrailles? 
Les tygres (ô fiere beauté!) 
N'ont tant que toy de cruauté: 
Ny le serpent, qui se trayne soubz l'herbe, 
Ny des lyons la semence superbe. 
Pas n'avoit si grande rudesse 
La cruelle vierge Déesse, 
Qui fist aux chiens devorer le veneur 
Criant en vain: Je suy' votre seigneur. 
Qui est celuy, qui ne s'etonne 
Quand le Pere courroussé tonne? 
Dardant çà bas de foudroyante main 
Le traict vangeur de tout acte inhumain. 
Amour pourtant dedans les cieux 
Enflamme le plus grand des Dieux, 
Hommes en terre, et en l'air les oyzeaux, 
Et les poyssons jusqu'au fond de leurs eaux. 
O repaire moins souhaitable 
Que le Caucase inhospitable, 
Où le rapteur du saint feu va paissant 
L'aigle sacré d'un poumon renaissant! 
Tu me fais par ta grand' froydeur 
Sentir plus violente ardeur 
Que cetuy là, dont le doz grand et large 
Soutient d'un mont la trop pesante charge. 
Qui d'Amour blame les edictz, 
Semble ces Geans, qui jadis 
Des plus hauts montz une echelle erigerent 
Et les manoirs celestes assiegerent. 
Ne crains-tu point qu'il se courrousse? 
Ne crains-tu point que de sa trousse 
Te darde un traict enpenné de fureur, 
Pour se vanger d'un si cruel erreur? 
Ou vas-tu, Muse? si grand' ire 
Ne convient à la douce Lyre. 
Tu es trop humble, et de trop petit son, 
Pour accorder si tragique chanson. 
  
XII. De porter les miseres et la calumnie au seigneur Christofle du Breil 
Ode XII 
Rien n'est heureux de tous poinctz en ce monde. 
L'air, et le feu, le ciel, la terre, et l'unde 
Nous font la guerre, et les justes Dieux mesmes 
N'ont pardonné à leurs palaiz supremes. 
Ne voy-tu pas que les Signes des Cieux 
Sont mutilez de piez, de braz, ou d'yeux? 
N'as-tu jamais d'eclypse coutumiere 
Veu obscursir l'une et l'autre lumiere? 
O que d'ennuy sans repos nous tormente! 
Les uns par faim ont peine vehemente, 
Autres on voit en la prison mourir, 
Plusieurs aussi à la guerre courir, 
Joyeux spectacle à ce furieux Dieu 
Qui maintenant obtient le premier lieu 
Entre les Roys, les Empereurs, et Princes, 
Au grand dommaige (hélas) de leurs provinces. 
Le flot, le vent, le pyrate, et rocher 
Sont les perilz de l'avare nocher, 
Qui de son ayse, et repos s'ennuyant, 
Aux Indes court, la pauvreté fuyant. 
Cetuy par fer, par cordeau, ou poyson 
Cherche de mort voluntaire achoyson, 
Et pour trouver de ses maulx allegence, 
A pris de soy luymesmes la vengence: 
Et cetuy là, qui est myeux fortuné 
Que les premiers, avant que d'estre né 
Ensevely d'un sommeil eternel, 
Fait son tumbeau du ventre maternel. 
D'un egal pié la Mort, qui tout attrape, 
Et des petiz les humbles manoirs frape, 
Et des plus grands les tours hautes et fortes. 
Une Mort seule en mile, et mile sortes 
De maulx soudains, nouveaux, et incurables, 
Va tormentant les humains miserables. 
Le cours des ans, des siecles, et saisons, 
Les grands citez et superbes maisons 
Mises par terre, et les ruines grosses 
Des vieux Palaiz, Thëatres, et Collosses, 
Montrent à l'oeil tout ce qui est çà bas 
Etre caduq' et subject à trepas. 
O malheureux, qui batist esperance 
Sur fondement d'incertaine assurance! 
De tous etaz, de tout sexe, et tout aage 
Solicitude est le propre heritaige. 
Ell' suyt des Roys les palaiz sumptueux, 
Conventz secrez, parquetz tumultueux: 
Le laboureur la porte en sa charrue, 
Et du pasteur aux toictz elle se rue: 
L'homme de guerre aussi la porte en croupe, 
Et le marchant avare dans la poupe. 
Rien, que vertu, ne domte la fortune. 
Comme le roc, quand la mer importune 
En çà et là contre luy se courrousse, 
Rompt les gros flotz, et de soy les repousse. 
O bienheureux, qui de rien ne s'etonne, 
Et ne palist, quand le ciel iré tonne! 
O bienheureux, que les torches ardentes 
Et des troys Seurs les couleuvres pendentes 
N'excitent point! qui n'entrerompt le fruict 
De son repos, pour quelque petit bruict. 
Cet homme là pour vray jamais ne tremble, 
Bien que le ciel à la terre s'assemble: 
Et ont les Dieux sa fortresse munie 
Contre fortune, et contre calumnie. 
Le Ciel vangeur, protecteur d'Innocence, 
Donne aux pervers souvent longue licence 
De nuyre aux bons: puis contre eux irrité 
Commende au Tens, pere de verité, 
Decouvrir tout; lors la cause plus forte 
Devient soudain la plus foyble, de sorte 
Que la grandeur de la peine compense 
La tardité de la juste vengence. 
Espere, Amy, espere, dure, attens 
Cette faveur et du Ciel, et du Tens. 
Et quand le Ciel n'auroit aucun soucy 
De tout cela que nous faisons ici, 
Mais bien seroint toutes humaines choses 
Soubz le pouvoir de la fortune encloses, 
Ne vault-il myeux (veu qu'elle fait son tour) 
Avoir espoir de son heureux retour, 
Qu'estre tousjours en peur de la ruyne? 
Cet air couvert d'une obscure bruyne 
S'eclersira, ces undes courroussées 
Jusques au ciel par l'aquilon poussées 
S'apaiseront, et par l'anchre jetée 
Au port sera la navire arrestée. 
O combien doulx sera le souvenir 
Des maulx passez! Pour doncq' là parvenir, 
Endure, Amy, ces peines doloreuses, 
Et te reserve aux choses plus heureuses. 
  
XIII. De l'immortalité des poëtes au seigneur Bouju 
Ode XIII 
Sus, Muse, il faut que l'on s'eveille, 
Je veux sonner un chant divin. 
Ouvre donques ta docte oreille, 
O Bouju, l'honneur Angevin! 
Pour ecouter ce que ma Lyre accorde 
Sur sa plus haute, et mieux parlante chorde. 
Cetuy quiert par divers dangers 
L'honneur du fer victorieux: 
Cetuy là par flotz etrangers 
Le soing de l'or laborieux. 
L'un aux clameurs du palaiz s'etudie, 
L'autre le vent de la faveur mandie. 
Mais moy, que les Graces cherissent, 
Je hay' les biens, que l'on adore, 
Je hay' les honneurs, qui perissent, 
Et le soing, qui les coeurs devore: 
Rien ne me plaist, fors ce qui peut deplaire 
Au jugement du rude populaire. 
Les lauriers, prix des frontz scavans, 
M'ont ja fait compaignon des Dieux: 
Les lascifz Satyres suyvans 
Les Nymphes des rustiques lieux 
Me font aymer loing des congnuz rivaiges 
La sainte horreur de leurs antres sauvaiges. 
Par le ciel errer je m'attens 
D'une esle encor' non usitée, 
Et ne sera gueres long tens 
La terre par moy habitée. 
Plus grand qu'Envie, à ces superbes viles 
Je laisseray leurs tempestes civiles. 
Je voleray depuis l'Aurore 
Jusq'à la grand' mere des eaux, 
Et de l'Ourse à l'epaule more, 
Le plus blanc de tous les oyzeaux. 
Je ne craindray, sortant de ce beau jour, 
L'epesse nuyt du tenebreux sejour. 
De mourir ne suys en emoy 
Selon la loy du sort humain, 
Car la meilleure part de moy 
Ne craint point la fatale main: 
Craingne la Mort, la Fortune, et l'Envie, 
A qui les Dieux n'ont donné qu'une vie. 
Arriere tout funebre chant, 
Arriere tout marbre et peinture, 
Mes cendres ne vont point cherchant 
Les vains honneurs de sepulture: 
Pour n'estre errant cent ans à l'environ 
Des triestes bords de l'avare Acheron. 
Mon nom du vil peuple incongnu 
N'ira soubz terre inhonoré, 
Les Seurs du mont deux fois cornu 
M'ont de sepulchre decoré, 
Qui ne craint point les aquilons puissans, 
Ny le long cours des siecles renaissans. 
  
XIV. Epitaphe de Clement Marot 
Si de celuy le tumbeau veux sçavoir 
Qui de Maro avoit plus que le nom, 
Il te convient tous les lieux aller voir 
Ou France a mis le but de son renom: 
Qu'en terre soit, je te respons que non, 
Au moins de luy c'est la moindre partie. 
L'Ame est au lieu d'où elle etoit sortie, 
Et de ses vers, qui ont domté la mort, 
Les Seurs luy ont sepulture batie 
Jusques au ciel. Ainsi, La mort n'y mord. 
CAELO MUSA BEAT 
  
Recueil de poésie 
  
A Tresillustre Princesse Madame Marguerite Seur unique du Roy 
Madame, après avoir depuis peu de temps mis en lumière quelques petiz ouvraiges 
Poëtiques, plus pour satisfaire à l'instante priere d'aucuns miens amis, que 
Pour espoir que j'eusse d'acquerir aucune reputation entre les doctes, j'avoy 
Deliberé me retirer entierement de ce labeur, aussi peu maintenant favorizé, 
Comme il estoit anciennement entre les meilleurs espriz singulierement 
Recommandé. Je ne scay si l'infelicité de