Le Chevalier au Lion (Yvain) 
 
Par Chrétien de Troyes

Li boins roys Artus de Bretaigne, 
La qui proeche nous ensengne 
Que nous soions preus et courtois, 
Tint court si riche conme rois 
A chele feste qui tant couste, 
C'on doit nonmer le Penthecouste. 
Li rois fu a Cardoeil en Gales; 
Aprés mengier, parmi les sales, 
Li chevalier s'atropelerent 
La ou dames les apelerent 
Ou damoiseles ou pucheles. 
Li un recontoient nouveles, 
Li autres parloient d'Amours, 
Des angousses et des dolours 
Et des grant biens qu'en ont souvant 
Li desiple de son couvant, 
Qui lors estoient riche et gens; 
Mais il y a petit des siens, 
Qui a bien pres l'ont tuit laissie, 
S'en est Amours mout abaissie; 
Car chil qui soloient amer 
Se faisoient courtois clamer, 
Que preu et largue et honnorable; 
Mais or est tout tourné a fable, 
Car tiex y a qui riens n'en sentent, 
Dïent qu'il ayment et si mentent, 
Et chil fable, menchongne en font 
Qui s'en vantent et droit n'i ont. 
Mais pour parler de chix qui furent, 
Laissons chix qui en vie durent, 
Qu'encor vaut mix, che m'est avis, 
Un courtois mors c'uns vilains vis. 
Pour che me plais a reconter 
Chose qui faiche a escouter 
Du roy qui fu de tel tesmoing 
C'on en parole pres et loing; 
Si m'acort de tant ad Bretons 
En tant qu'i nonment des boins les nons 
Et par aux sont ramenteü 
Li boin chevalier esleü 
Qui en amor se traveillierent. 
Mais chel jour mout s'esmerveillierent 
De chil qui d'entr'euz se leva; 
Si eut de tix qui mout pesa 
Et qui mout grant parole en firent, 
Pour che que onques mais ne virent 
En haute feste en chambre entrer 
Pour dormir ne pour reposer; 
Mais chel jour ainsi li avint 
Que la roÿne le retint, 
Si demoura tant delés li 
Qu'il s'oublia et endormi. 
A l'uis de la chambre dehors 
Fu Dodinez et Sagremors, 
Li rois et mesire Gavains, 
61c.56 
Et si fu pres mesire Yvains, 
Et fu avec Calogrenans, 
Unz chevaliers mout avenans 
Qui lors out conmenchié .i. conte, 
Non de s'onnor, mais de sa honte. 
Ainsi que sen conte contoit 
Et la roÿne l'escoutoit, 
Si s'est delés le roi levee 
Et vint seule; si s'est emblee. 
Anchois que nus le puist veoir, 
Se fu laissie entr'eus queoir; 
Et dont Calogrenans sans plus 
Sali en piés contre li sus. 
Et Queuz, qui mout fu ramporneus, 
Fel et poignans et despiteus, 
Li dist: « Par Dieu, Calogrenant, 
Mout vous voi or preu et saillant, 
Et encor mout m'est bel que vous 
Estes li plus courtois de nous; 
Et bien sai que vous le quidiés, 
Tant estes vous de sens widiés. 
S'est drois que ma dame l'otrit, 
Que vous aiés plus que nous tuit 
De courtoisie et de proeche: 
Ja laissames or pour proeche, 
Espoir, que nous ne nous levames 
Ou pour che que nous ne deignames. 
En non Dieu, sire, nous feïmes, 
Mais pour che que nous ne veïmes 
Ma dame, ains que fustes levés. 
- Chertes, Kés, ja fussiés crevés, 
61d.87 
Fait la roÿne, au mien quidier, 
Se ne vous peüssiés widier 
Du venin dont vous estes plains. 
Enuieus estes et vilains 
De ramporner vos compagnons. 
- Dame, se nous ne gaagnons, 
Fait Keu, en vostre conpagnie, 
Gardés que nous n'i perdons mie. 
Je ne quit avoir cose dite 
Qui me doie estre mal escrite. 
Je vous pri, or taisiés vous ent: 
Il n'a courtoisie ne sens 
En plait d'uiseuse maintenir; 
Chest plait ne doit avant venir 
Ne ne doit plus avant monter. 
Mais faites nous avant conter 
Che qu'il avoit ains conmenchié, 
Que si ne doit avoir tenchié. » 
A cheste parole s'apont 
Calogrenans et chi respont: 
« Sire, fait il, de la tenchon 
N'i a mie grant mesproison; 
Petit m'en est, a poi le pris. 
Se vous avés vers moi mespris, 
Je n'i arai ja nul damage: 
A miex vaillant et a plus sage, 
Mesire Keus, que je ne sui, 
Avés vous souvent dit anui, 
Que bien en estes coustumiers. 
Tousjours doit puir li fumiers, 
Et tahons poindre, et malos bruire; 
62a.118 
Si doivent enuieus mesdire. 
Mais je n'en conterai huimés, 
Se ma dame m'en laisse em pais, 
Et je li pri qu'ele s'en taise, 
Que le chose mout* me desplaise 
Ne me conmant, soie merchi. 
- Dame, trestuit chil qui sont chi, 
Fait Keus, boin gré vous en saront, 
Que volentiers l'escouteront; 
Ne n'en faites or riens pour moi, 
Mais, foi que vous devés le roi, 
Le vostre seigneur et le mien, 
Quemandés li, si ferés bien. 
- Cologregnant, fait le roÿne, 
Ne vous chaille de la haïne 
Monseigneur Keu, le seneschal; 
Coustumiers est de dire mal, 
Si c'on ne l'en puet chastier. 
Quemander vous veul et proier 
Que ja n'en aiés au cuer ire 
Ne pour lui ne laissiés a dire 
Chose qui faiche a oïr, 
Se de m'amor volés joïr; 
Si conmenchiés tout derechief. 
- Chertes, dame, che m'est mout grief 
Que vous me quemandés a faire; 
Ains me laissaisse .i. des iex traire 
Que hui mais nule riens contaisse, 
Se courouchier ne vous doutaisse; 
Mais je ferai che qui vous siet, 
Conment que la chose me griet. 
62b.149 
Puis qu'i vous plaist, or entendés! 
Cuer et oroeilles me rendés, 
Car parole oïe est perdue 
S'ele n'est de cuer entendue. 
Or y a tix que che qu'il oent 
N'entendent pas, che que il oent*; 
Et chil n'en ont fors que l'oïe, 
Puis que li cuers n'i entent mie. 
As oreilles vient le parole 
Aussi conme li vens qui vole; 
Mais n'i arreste ne demore, 
Ains s'en part en mout petit d'ore 
Se li cuers n'est si escilliés 
C'a prendre soit appareilliés; 
Que chil le puet en son venir 
Prendre et enclorre et retenir. 
Les oreilles sont voie a vois 
Ou parent y entre la vois; 
Et li cuers prent dedens le ventre 
Le vois qui par l'oreille y entre. 
Et qui or me vaurra entendre, 
Cuer et oreilles me doit rendre; 
Car ne veul pas servir de songe, 
Ne de fable ne de menchonge, 
Dont maint autre vous ont servi, 
Ains conterai che que je vi. 
Il avint, pres a de .vi. ans, 
Que je, seus conme païsans, 
Aloie querant aventures, 
Armés de toutes armeüres 
Si con chevaliers devoit estre; 
62c.178 
Et trouvai un chemin a destre, 
Parmi une forest espesse. 
Mout y ot voie felenesse, 
De ronses et d'espines plaine. 
A quel ahan et a quel paine 
Tout* chele voie et chel sentier! 
A bien pres tout le jour entier 
M'en alai chevauchant ainsi 
Tant que de la forest issi, 
Et che fu en Brocheliande. 
De la forest en une lande 
Entrai et vi une breteche 
A demie lieue galesche; 
Tant i ot bien, plus n'i ot pas. 
...* 
Et vi le barre et le fossé 
Tout environ parfont et lé, 
Et seur le pont em piés estoit 
...*, 
Sor son poing .i. ostoir mué. 
Ne l'oi mie bien salué 
Quant il me vint a l'estrier prendre, 
Si me conmanda a descendre. 
Je descendi; il n'i ot el, 
Que mestier avoie d'ostel; 
Et il me dist tout maintenant, 
Plus de .vii. fois en un tenant, 
Que benoite fust la voie 
Par ou laiens venus estoie. 
Atant en la court en entrasmes, 
Le pont et le porte passames. 
Enmi le court d'un vavassour, 
Qui Dix doigne joie et honor 
62d.211 
Tant conme il fist moi chele nuit, 
Pendoit une table, je cuit, 
Ou il n'avoit ne fer ne fust 
Ne riens qui de coivre ne fust. 
Seur chele table d'un martel 
Qui delés iert en .i. postel 
Feri le vavassor trois caux. 
Chil qui ierent amont enclos 
Oÿrent le vois et le son; 
S'isirent hors de la maison 
Et vinrent en la tour aval. 
Li un tornerent au cheval, 
Que li boins vavassor tenoit; 
Et je vi que vers moi venoit 
Une puchele bele et gente. 
En li esgarder mis m'entente: 
Ele fu longue et graille et droite. 
De moi desarmer fu adroite, 
Qu'ele le fist et bien et bel; 
Puis m'afubla en court mantel 
Vert d'escallate paonnache; 
Et tuit nous guerpirent le plache, 
Que avec moi ne avec li 
Ne remainst nus; che m'abeli, 
Que plus ne queroie veoir. 
Et ele me mena seoir 
El plus bel praelet du monde, 
Tout clos de basme a la reonde. 
La le trouvai si afaitie, 
Si bien parlant et enseignie, 
De tel samblant et de tel estre 
63a.242 
Que mout m'i delitoit a estre, 
Ne janmais pour vivre estouvoir 
Ne m'en quisisse remouvoir. 
Mais tant, la nuit, me fist de guerre 
Li vavassours qu'i me vint querre 
Quant du souper fu tans et heure; 
N'i poi plus faire de demeure, 
Si fis tost son quemandement. 
Du souper vous dirai briesment 
Qu'il fu du tout a ma devise, 
Des que devant moi fu assise 
La puchele, qui s'i assist. 
Aprés souper itant me dist 
Li vavassours qu'il ne savoit 
Le terme puis que il avoit 
Herbegié chevalier errant 
Qui aventure alast querant; 
Si'n avoit il maint herbegié. 
Aprés che me proia que gié 
Par son hostel m'en revenisse 
En guerredon se je poïsse, 
Et je li dis: « Volentiers, sire », 
Que hontes fust de l'escondire. 
Mout fui bien la nuit hostelés, 
Et mes chevax fu enselés 
Si tost c'on pot le jour veoir, 
Et je l'oi mout proié le soir; 
Si fu bien faite ma priere. 
Mon boin hoste et sa fille chiere 
A Saint Esperit conmandai; 
A trestous congié demandai, 
63b.275 
Si m'en parti ains que je poi. 
L'ostel gaires eslongié n'oi 
Quant je trouvai en .i. cossars 
Tors sauvages et esparars 
Qui s'entreconbatoient tuit 
Et demenoient si grant bruit 
Que de paour me trais arriere, 
Que nule beste n'est plus fiere 
Ne plus orgueilleuse de tor. 
Uns vilains qui resambloit Mor, 
Grans et hideus a desmesure 
Et si tres laide creature 
Que nus porroit dire de bouche, 
Ychil seoit seur une çouche, 
Une grant machue en se main. 
Je m'aprochay vers le vilain 
Et vi qu'il eut grosse la teste 
Plus que ronchins ne autre beste, 
Cheveuz ot noirs et front pelé, 
S'out bien .ii. espanes de lé, 
Oreilles moussues et grans 
Aussi con a .i. oliffans, 
Les sourchis grans et le vis plat, 
Le coulle noire, nes de chat, 
Bouche fendue conme lous, 
Dens de sengler agus et rous, 
Barbe noire et grenons tortis, 
Et le menton aers au pis, 
Longue eskine, torte et bochue. 
Apoiés fu seur se machue, 
Vestus de robe si estrange 
63c.308 
Qu'il n'i avoit ne lin ne lange, 
Ains eut a son col atachiés 
Deux cuirs, de nouvel escorchiés, 
De .ii. toriaus ou de .ii. bués. 
Em piés sali li vilains lués 
Qu'il me vit vers lui aprochier. 
Je ne soi s'il me vaut touchier 
Ne ne soi qu'i voloit emprendre, 
Mais je me garni de deffendre 
Tant que je vi que il s'estut 
Em piés tous drois, si ne se mut, 
Et fu montés deseur un tronc, 
S'ot bien .xvii. piés de lonc; 
Si m'esgarda et mot ne dist, 
Nient plus c'une beste feïst; 
Et je quidai que il n'eüst 
Raison ne parler ne seüst. 
Toutesvoies tant m'enhardi 
Que je li dis: « Va, c'or me di 
Se tu es boine chose ou non! » 
Et il me dist: « Je sui uns hom. 
- Ques hom? di je. -Tes con tu vois; 
Je ne sui autres nule fois. 
- Et que fais tu ychi tous cois? 
- Si gart ches bestes par chu bois. 
- Conment? Pour saint Perre de Ronme! 
Et ne connoissent eles honme; 
Je ne cuit n'a plain n'a boscage 
Puissent garder beste sauvage. 
- Je les gart si voir et justis 
Que ja n'istront de chest pourpris. 
63d.341 
- Et tu, conment? Di m'ent le voir. 
- N'i a cheli qui s'ost mouvoir 
Des qu'eles me voient venir; 
Car quant j'en puis l'une tenir, 
Si le destraing parmi le cors, 
Ad poins que j'ai et durs et fors, 
Que les autres de paour tramblent 
Et tout environ moi s'asamblent 
Aussi con pour merchi crier; 
Ne nus ne s'i porroit fier, 
Fors moi, s'entr'eles s'estoit mis, 
Que maintenant ne fust ochis. 
Ainsi sui de mes bestes sire, 
Et tu me deveroies dire 
Ques hom tu es et que tu quiers. 
- Je sui, fait il, uns chevaliers 
Qui quier che que ne puis trouver*; 
Assés ai quis et riens ne truis. 
- Et que vaurroies tu trouver? 
- Aventures pour esprouver 
Ma proeche et mon hardement. 
Or te pri et quier et demant, 
Se tu ses, que tu me conseilles 
Ou d'aventures ou de merveilles. 
- A che, fait il, faurras tu bien: 
D'aventures ne sai je rien 
N'onques mais n'en oï parler. 
Mais se tu voloies aler 
Chi pres dusc'a une fontaine, 
N'en revenroies pas sans paine, 
Se tu ne rendoies son droit. 
64a.372 
Chi pres trouveras orendroit 
Un sentier qui la te menra. 
Tout droit la droite voie va, 
Se bien veus tes pas emploier, 
Que tost porroies desvoier: 
Il y a d'autres voies mout. 
La fontaine venras qui bout, 
S'est ele plus froide que mabres. 
Ombres li fait li plus biaus arbres 
C'onques peüst faire Nature. 
En tous tans le fueille li dure, 
Qu'il ne le pert pour nul yver. 
Et si pent .i. bachin de fer 
A une si longue chaine 
Qui dure dusqu'en la fontaine. 
Les la fontaine trouveras 
Un perron tel con tu venras, 
Mais je ne te sai dire quel, 
Que je n'en vi onques nul tel; 
Et d'autre part une chapele, 
Petite, mais ele est mout bele. 
S'au bachin veus de l'iaue prendre 
Et desus le perron espandre, 
La venras une grant tempeste 
Qu'en chest bos ne remanrra beste, 
Chevreus ne dains ne chiers ne pors, 
Nis li oisel s'en istront hors; 
Car tu venras si fort froier, 
Venter et arbres pechoier 
Et pour voir tourner et partir 
Que, se tu t'en pués departir 
64b.403 
Sans grant anui et sans pesanche, 
Trop seras de meilleur chaanche 
Que chevalier qui il* fust onques.» 
Du vilain me parti adoncques, 
Qui bien m'ot la voie moustree. 
Espoir si fu tierche passee 
Et pot estre pres de midi 
Quant l'arbre et le chapele vi. 
Bien sai de l'arbre, ch'est la fins, 
Que che estoit li plus biaus pins 
Qui onques sor tere creüst. 
Je quit c'onques si fort ne plut 
Que d'yaue y passast une goute, 
Anchois couloit par dessus toute. 
A l'arbre vi le bachin pendre, 
Du plus fin or qui fust a vendre 
Onques encore en nule foire. 
De la fontaine poés croire 
Qu'ele bouloit c'une yaue chaude. 
Li perrons fu d'une esmeraude, 
Perchié aussi con une bouz; 
S'avoit .iiii. rubins desous, 
Plus flamboians et plus vermaus 
Que n'est au matin li solaus 
Quant il appert en orient. 
Et sachiés ja a enscient, 
Ne vous en mentirai de mot. 
La merveille a veoir me plot 
De la tempeste et de l'orage, 
Dont je ne me tieng mie a sage, 
Que maintenant m'en repentisse 
64c.434 
Mout volentiers se je poïsse, 
Que j'oy le perron crevé 
De l'iaue au bachin arousé. 
Mais trop y en versai, che dout, 
Que lors je vi le chiel derout: 
De plus de quatorisme pars 
Me feri es lais li espars 
Et les nues tout pelle melle 
Jetoient noif, pluie et graille. 
Tant fu tans pesmes et fors 
Que je quidai bien estre mors 
Des fourdres qu'entor moi caoient 
Et des arbres qui depechoient. 
Saichiés que mout fui esmaiés, 
Tant que li tans fu rapaiés. 
Mais Dix tant me rasseüra 
Que li tans gaires ne dura 
Et tuit li vent se reposerent; 
Quant Dix ne plot venter n'oserent. 
Et quant je vi l'air cler et pur, 
De joie fui tout asseür, 
Que joie, s'onques le connui, 
Fait tost oublier grant anui. 
Des que li tans fu trespassés, 
Vi tant seur le pin amassés 
Oysiaus, s'est qui croire m'en veulle, 
Qu'il n'i paroit branche ne fuelle 
Que tout ne fust couvert d'oisiaus; 
S'en estoit li arbres plus biaus; 
Et trestuit li oisel chantoient 
Si que trestuit s'entracordoient; 
64d.465 
Mais divers chans chantoit chascuns, 
C'onques che que cantoit li uns 
A l'autre canter n'i oï. 
De lor joie me resjoï, 
S'escoutai tant qu'il orent fait 
Lor serviche trestout a trait. 
Ains mais n'oï si bele joie 
Ne mais ne cuit que nus hom l'oie 
Se il ne va oïr chelui 
Que tant me pleut et enbeli 
Que je me dui pour fol tenir. 
Tant y fui que j'oï venir 
Chevaliers, che me fu avis; 
Bien cuidai que il fussent dis, 
Tel noise, tel fraint demenoit 
Unz seuz chevaliers qui venoit. 
Quant je le vi tout seul venant, 
Mon cheval restrains maintenant 
N'au monter demeure ne fis; 
Et chil me vint, mal talentis, 
Plus tost c'uns drois alerions, 
Fiers par samblant conme lions. 
De si haut conme il pot crier 
Me conmencha a deffier 
Et dit: « Vassaus, mout m'avés fait, 
Sans deffianche, honte et lait. 
Deffier me deüssiés vous 
S'il eüst querele entre vous, 
Ou au mains droiture requerre 
Ains que vous me meüssiés guerre. 
Mais se puis, sire vassaus, 
65a.496 
Seur vous en remanrra li maus 
Du damage qui est parans; 
Environ moi est li garrans 
De mon bos, qui est abatus. 
Plaindre se doit qui est batus; 
Et je me plaing, si ai raison, 
Que vous m'avés de ma maison 
Jeté a foudres et a pluye. 
Fait m'avés chose qui m'anuie, 
Et dehait ait qui che est bel, 
65b.506 
Qu'en men bois et en mon chastel 
M'avés ore fait tel outrage 
Que mestier ne m'eüst aÿe 
D'onmes ne d'armes ne de mur. 
Onques n'i ot honme asseür 
En forteleche qui y fust 
De dure pierre ne de fust. 
Mais sachiés bien que desormais 
N'arés de moi trieves ne pais. » 
65c.515 
A chest mot nous entrevenismes, 
Les escus enbrachiés tenimes, 
Si se couvri chascuns du sien. 
Li chevaliers ot cheval boin, 
Lanche droite et fu sans doute 
Plus grant de moi la teste toute. 
Ainsi du tout a meschief fui, 
Que je fui plus petit de lui 
Et ses chevaus plus fors du mien. 
Parmi le voir, che saichiés bien, 
M'en vois pour ma honte couvrir. 
Si grant cop con je poi ferir 
Li donnai, c'onques ne m'en fains; 
El comble de l'escu l'atains; 
Si mis trestoute ma puissanche 
Si qu'en pieches vola ma lanche; 
Et la soie remainst entiere, 
Qu'ele n'estoit mie legiere, 
Ains iert plus grosse, au mien quidier, 
Que nule lanche a chevalier, 
C'ains si grosse nule n'en vi. 
Et li chevaliers m'en feri 
Si roidement que du cheval, 
Parmi la crupe du cheval*, 
Me mist a le tere tout plat; 
Si me laissa honteus et mat, 
Que onques ne me regarda. 
Mon cheval prinst et moy laissa, 
Si se mist ariere a la voie; 
Et je, qui mon roy n'i savoie, 
Remés angousseus et pensis. 
65d.546 
Delés le fontaine m'assis 
Un petit, si me reposai. 
Le chevalier si resongnai 
Que folie faire doutaisse 
Se aprés lui tantost alaisse. 
Aprés tost ne soi qu'il devint. 
En la fin, volentés me vint 
Qu'a mon hoste couvent tenroie 
Et que par lui m'en revenroie. 
Ainsi me plot, ainsi le fis; 
Mais mes armes toutes jus mis 
Pour aler plus legierement; 
Si m'en reving honteusement. 
Quant je ving tout droit a l'ostel, 
Si trouvai mon hoste autel, 
Aussi lié et aussi joiant 
Conme j'avoie fait devant. 
Onques de riens ne m'aprechui, 
Ne de sa fille ne de lui, 
Que mout* volentiers me veïssent 
Ne que mon desonnor feïssent 
Ne qu'il avoient fait l'autre nuit. 
Grant honnor me porterent tuit, 
Les lors merchis, en la maison; 
Et disoient c'onques mais hom 
N'iert escapés, que il seüssent 
Ne qu'il oÿ dire l'eüssent, 
De la dont j'estoie venus, 
Que n'i fust prins et retenus. 
Ainsi alay, ainsi reving; 
Au revenir pour fol me ting. 
66a.577 
Ainsi vous conte conme fox 
Et* c'onques mais conter ne vox. 
- Par mon chief, dist mesire Yvains, 
Vous estes mes cousins germains, 
Si nous devons mout entramer; 
Mais de che vous puis fol clamer 
Que vous le m'avés tant chelé. 
Se je vous ay fol apelé, 
Je vous pri qu'il ne vous en poist, 
Car se je puis et il me loist, 
G'irai vostre honte vengier. 
- Bien pert qu'il est aprés mengier, 
Fist Keus, qui taire ne se pot. 
Plus a paroles en plain pot 
De vin qu'en .i. muy de chervoise. 
On dit que chat saous s'envoise. 
Aprés mengier sans remuer, 
Et puis chascuns si veut tuer, 
Et vous irés vengier Fourré! 
Sont vostre penel enbouré 
Et vos chausses de fer froÿes 
Et vos banieres desploÿes? 
Or tost, pour Dieu, mesire Yvains, 
Mouvrés vous anuit ou demains? 
Faites le nous savoir, biau sire, 
Quant vous irés a chest martire, 
Que nous vous vaurrons convoier; 
N'i ara prevost ne voier 
Qui volentiers ne vous convoit. 
Mais je vous pri, conment qu'il soit, 
N'en alés pas sans vos congiés. 
66b.608 
Et se vous anuit point songiés 
Malvais songe, si remanés! 
- Diables estes vous forsenés, 
Mesire Keus, fait la roÿne, 
Que vostre langue onques ne fine? 
La vostre langue soit honnie, 
Qui tant est esquemenie! 
Chertes, vostre langue vous fait 
Le pis que ele puet, si fait. 
Chascuns si dit, quiconques l'oit: 
« Chest* le langue qui ains ne recroit 
De mal dire; soit maloite! » 
La vostre langue si esploite 
Qu'ele vous fait partout haïr. 
Pis ne vous puet ele traïr. 
Bien sachiés, je l'apeleroie 
De traÿson s'ele estoit moie. 
Honme qu'en ne puet chastier 
Devroit on au moustier lier 
Et li clamer conme prouvés*. 
- Chertes, dame, de ses rampornes, 
Fait mesire Yvains, ne me chaut. 
Tant puet et tant set et tant vaut 
Mesire Keus en toutes cours 
Que il n'iert ja muyaus ne sours. 
Bien set encontre vilenie 
Respondre sens et courtoisie; 
Si ne fist onques autremant. 
Ja savés vous se je ment. 
Mais je n'ai cure de tenchier 
Ne de mellee conmenchier; 
66c.639 
Que chil ne fait pas le mellee 
Qui fiert la premiere colee, 
Ains le fait chil qui se revenge. 
Bien tencheroit a un estrange 
Qui ramposne son compaignon. 
Ne veul pas sambler le guaignon 
Qui se heriche et regrigne 
Quant .i. autre mastin le rekingne. » 
Queque il parloient ainsi, 
Li rois hors de sa cambre issi, 
Qu'ill i ot fait longue demeure, 
Car il dormi jusqu'a chele heure. 
Et li baron, quant il le virent, 
Tuit en piés contre li salirent 
Et il tost rasseïr les fist. 
Delés la roÿne s'assist, 
Et la roÿne maintenant 
Les nouveles Calogrenant 
Li reconte tout mot a mot, 
Que bien et bel conter li sot. 
Li rois les i oï volentiers 
Et fist trois seremens entiers, 
L'ame de Pandragon son pere 
Et la son fil et la son frere, 
Qu'il iroit veoir la fontaine, 
Ja ainz ne passeroit quinzaine, 
Et le tempeste et le merveille, 
Si que il y venra la veille 
Monseigneur saint Jehan Baptiste, 
Et si prendra la nuit son giste, 
Et dit que avec li iront 
66d.670 
Tuit chil qui aler y vaurront. 
De che que li rois devisa 
Toute la cours miex l'em prisa, 
Car mout y voloient aler 
Li baron et li bacheler. 
Mais qui qu'en soit liés et joians, 
Mesire Yvains en fu dolans, 
Qu'il en quidoit aler tous seus; 
S'en fu dolans et angousseus 
Du roi, qui aler y devoit. 
Pour che seulement li grevoit 
Qu'il savoit bien que la bataille 
Aroit mesire li rois, sans faille, 
Ains que il, si le requeroit; 
Ja veé ne li seroit; 
Ou mesire Gauvains meïsmes, 
Espoir, le demandera primes. 
Se nus de ches .ii. la requiert, 
Ja contredite ne li iert; 
Mais il ne les atendra mie, 
Qu'il soigne de lor compagnie, 
Ains s'en yra tous seus, son veul, 
Ou a sa joie ou a son duel, 
Et, qui que remaingne a sejour, 
Il y veut aler ains tierz jour, 
En Brocheliande, et querra, 
Se il puet, tant qu'il trouvera 
L'estroit sentier, le chemin fort 
Et la lande et le maison fort 
Et le soulas et le deport 
De la courtoise damoisele 
67a.702 
Qui tant est avenans et bele. 
Et le prodons sa voie a prinze, 
Qui en honeur faire s'esille, 
Tant est frans et de boine part. 
Puis venra le cors* en l'essart 
Et le grant vilain qui les garde. 
Li veoirs li demeure et tarde 
Du vilain qui tant par est lais, 
Grans et hideus et contrefais 
Et noirs a guise de ferron. 
Puis venra, s'i puet, le perron 
Et le fontaine et le bachin 
Et les oysiaus deseur le pin; 
Si fera plouvoir et venter. 
Mais il ne s'en quiert ja vanter 
Ne ja, son veul, ja ne savra 
Juques tant que il y ara 
Grant honte ou grant honeur eüe, 
Puis si soit la chose seüe. 
Mesire ist, de la court s'emble 
Si que nul honme n'i asamble, 
Mais seus vers son hostel s'en va. 
Toute sa maisnie trouva, 
Si quemande metre sa sele; 
Un sien esquier y apele 
Cui il ne cheloit nule rien: 
« Di va! fait il, aprés moi vien 
La fors et mes armes me porte! 
Je m'en ystrai par chele porte, 
Qu'il me couvient mout loins errer. 
Et mon cheval fai enseler, 
67b.735 
Si l'amaine tost aprés moy 
Et ramanras mon palefroy. 
Mais garde bien, je te conmant, 
Que nul qui de moi te demant, 
Que la nouvele ne l'en dies. 
Se tu en moi de riens te fies, 
Ja mar t'i firoies mais. 
- Sire, fait il, or en est pais, 
Que ja par moy nul ne sara. 
Alés! quar je vous sieurrai ja. » 
Mesire Yvains maintenant monte, 
Qu'il vengera, s'il puet, la honte 
Son cousin ains que il retourt. 
Li esquiers as armes keurt 
Et au cheval, si monta sus, 
Que de demourer n'i a plus. 
Lors n'i faloit ne fers ne cleus. 
Sen seigneur suit parmi les lieus 
Tant que il le vit descendu, 
Qu'il l'avoit .i. poi atendu 
Loins du chemin, en .i. destour. 
Tout son harnois et son atour 
Ot aporté, si l'atourna. 
Mesire Yvains ne sejourna 
Puis qu'armés fu, ne tant ne quant, 
Anchois erra chascun jour tant 
Par montaignes et par valees 
Et par forés longues et lees, 
Par lieus estranges et sauvages, 
Si passa maint felons passages 
Et maint perilz et maint destroit 
67c.766 
Tant qu'il vit le sentier estroit 
Plains de ronces et d'oscurtés; 
Et lors fu il asseürés 
Qu'il ne porroit mais esgarer. 
Lors conmencha fort a esrer; 
Ne li chaut mais fors que il voie 
Le pin lau la fontaine ombroie 
Et le perron et la tourmente 
Qui tonne et pluye et vente et graille*. 
La nuit out, che poés savoir, 
Tel hostel conme il dut avoir, 
Car plus de bien et plus d'onnour 
67d.778 
Trouva assés el vavassour 
C'on ne li ot conté ne dite*; 
Et en la puchele revit 
Grant bien et bonté, si qu'il dit,* 
De sens et de biauté chent tans 
Que n'ot conté Calogrenans; 
Qu'en ne puet pas dire la sonme 
De boine dame et de prodonme 
Quant il s'atourne a grant bonté. 
Ja n'iert tout dit ne tout conté, 
Que langue ne porroit retraire 
Tant d'onneur que prodons set faire. 
68a.789 
Mesire Yvains chele nuit ot 
Mout boin hostel et mout li plot. 
Et quant che vint a l'endemain, 
Si vit les tors et le vilain, 
Qui la voie li enseigna; 
Mais plus de .c. fois se seigna 
De la merveille que il ot, 
Conment Nature faire sot 
Oevre si laide et si vilaine. 
Puis erra dusque a la fontaine, 
Si vit quanques il vaut veoir. 
Sans arrester et sans seoir, 
Versa seur le perron de plain 
De l'yaue le bachin tout plain. 
De maintenant venta et plut 
Et fist tel temps que faire dut. 
Et quant Dix redonna le bel, 
Sor le pin vinrent li oysel 
Et firent joie merveillouse 
Seur la fontaine perillouse. 
Ains que la joie fust remese, 
Vinrent*, plus ardans que n'est brese, 
Li chevaliers a si grant bruit 
Con s'i cachast un cherf de ruit. 
Lors s'asanlerent et si vinrent 
Tous deuz et mout grant sanlant firent 
Qu'il s'entrehaïssent de mort. 
Chascuns ot lanche roide et fort; 
Si s'entredonnent mout grans cos, 
Que tous les escus de lors cols 
Perchent et li hauberc deslichent; 
...* 
68b.821 
Et li tronchon volent en haut. 
Li uns l'autre a l'espee assaut; 
Si ont, au caple des espees, 
Les guiges des escus copees 
Et les escus dehachiés tous, 
Et par desus et par desous, 
Si que les pieches en dependent 
N'il ne s'en keuvrent ne deffendent; 
Car si les ont haligotés 
Car* delivre seur les costés 
Et seur les bras et seur les hanches 
Assïent les espees blanches. 
Perilleusement s'entrepreuvent 
N'onques d'un estal ne se meuvent, 
Nient plus que fesissent .ii. grés. 
Ains .ii. chevaliers si engrés 
Ne furent de lor mort haster. 
Ne veulent pas lors cors gaster, 
Car au mix qu'il püent* les emploient. 
Li hiaume enbruncherent et ploient 
Et des aubers les maillent* volent, 
Si que de sanc assés se tolent; 
Car d'euz meïsmes sont si chaut 
Li hauberc que chascuns ne vaut 
A chascun gaires plus d'un froc. 
Ens el vis se fierent d'estoc, 
S'est merveilles conment tant dure 
Bataille si pesme et si dure; 
Mais andui sont de si grant cuer 
Que li uns pour l'autre, a nul fuer, 
De tere un pié ne guerpiroit 
68c.852 
Se dusques a mort ne l'enpiroit. 
Et de che firent mout que preu 
C'onques lors chevaus en nul lieu 
Ne navrerent ne n'empirierent, 
Que il ne vaurrent ne daignerent, 
Mais tous jours ad chevax se tinrent, 
Que nule fois a pié ne vinrent; 
S'en fu le bataille plus bele. 
En la fin son hiaume esquartele 
Au chevalier mesire Yvains. 
Du cop fu estourdis et vains 
Li chevaliers; si s'esmaia, 
C'onques si felon n'ensaya, 
Que il eut desous le chapel 
Le chief fendu jusqu'a chervel, 
Si que a le chervele et du sanc 
Toucha le maille du hauberc blanc, 
Dont il si grant dolour senti 
C'a poi li cuers ne le senti*. 
Si fist il puis, non mie tost, 
Car il se sent navrés a mort, 
Que riens ne li valut deffence. 
Si tost s'en fuit, quant il s'apense, 
Vers son hostel, tous eslaissiés, 
Et li perrons fu abaissiés 
Et la porte ouverte a bandon; 
Et mesire Yvains de randon, 
Quant qu'il puet, aprés esperonne. 
Si con gerfaus grue randonne, 
Qui de loins vient et tant l'aproche 
Tenir le quide mais n'i touche, 
68d.883 
Ainsi fuit chil et chil le chace 
Si pres a poi qu'il ne l'embrache, 
Et si ne s'en puet pas rataindre; 
Si est si pres que il l'ot plaindre 
De la destreche que il sent. 
Mais tousjours au fuir entent 
Et chil du cachier se tressue, 
Qu'il crient se paine avoir perdue 
Se mort ou vif ne le detient, 
Que des rampornes li souvient 
Que mesire Keus li ot dites. 
N'iert pas de la pramesse quites 
C'a son cousin avoit promises, 
Ne creüs n'iert en nule guise 
Se enseignes vraies n'en porte. 
Du perron jusques a le porte 
De son chastel l'a amené; 
Si sont ens ambedui entré. 
N'onme ne fenme ne trouverent 
Es rues par ou il alerent, 
Et vinrent ambedui d'eslais 
Jusqu'a le porte du palais. 
Le porte fu si haute et lee 
Et avoit si estroite entree 
Que .ii. chevaliers a cheval 
Sans encombrier et sans grant mal 
N'i porroient ensamble entrer 
Ne doi honme entrencontrer, 
Qu'ele estoit autresi estroite 
C'une arbalaistre il puet droite. 
La le rataint a l'uis fort fait, 
69a.914 
L'espee tenoit en agait. 
En le porte a .i. tel tourment 
Quant ele eschape leus et destent 
Si tost que riens adoise au chief, 
Ja n'i touchera tant souef. 
Ainsi dui trebucht* estoient 
Sous la porte, qui soustenoient 
Amont une porte a coulant, 
De fer esmolue et trenchant. 
Quant riens chel engien adesoit, 
Le porte d'amont estendoit; 
S'estoit pris ou detrenchiés tous 
Cui la porte ataignoit desous. 
Et tout entour a droit compas 
Estoit si estrois li trespas 
Con se che fust sentiers batus. 
El droit chemin s'est embatus 
Li chevaliers mout sagement 
Et mesire Yvain folement 
Hurte grant aleüre aprés, 
Si le vint ataignant si pres 
Qu'a la porte deriere se tint; 
Et de che mout bien li avint 
Que si fust avant estendu: 
Tout eüst esté pourfendu 
Se cheste aventure ne fust, 
Que ses chevaus marcha le fust 
Qui tenoit le porte de fer. 
Aussi con diables d'enfer, 
Destent le porte contreval, 
S'astaint le sele et le cheval 
69b.945 
Derriere et trenche tout par mi; 
Mais ne toucha, la Dieu merchi, 
Monseigneur Yvain fors que tant 
C'au res du dos li vint raiant, 
Si c'ambedeuz les esperons 
Li trencha au res des talons, 
Et il chaÿ tous esmaiés; 
Et chil qui iert a mort plaiés 
Li eschapa en tele maniere. 
Une autel porte avoit derriere 
Conme chele devant estoit. 
Li chevaliers qui s'en fuioit 
Par chele porte s'en fui 
Et le porte aprés lui chaÿ. 
Ainsi fu mesire Yvains prins. 
Mout angousseus et entreprins 
Remest dedens la sele enclos, 
Qui tout estoit chelee a clos 
Dorés, et paintes les masieres 
De boine oevre et de couleurs chieres. 
Mais de riens si grant deul n'avoit 
Con de che que il ne savoit 
Quel part chil en estoit alés. 
D'une cambrete yleuc delés 
Ouvrir vit .i. huisset estroit, 
Çou qu'il estoit en chel destroit; 
S'en issi une damoisele, 
Seule, mout avenans et bele, 
Et l'uis aprés lui refrema. 
Quant mon seigneur Yvain trouva, 
Si s'esmaia mout de premiers: 
69c.976 
« Chertes, fait ele, chevaliers, 
Je crien que mal soiés venus: 
Se vous estes chaiens veüs, 
Vous y serés tous depechiés, 
Que mesire est a mort plaiés 
Et bien sai que vous l'avés mort. 
Ma dame en maine .i. duel si fort 
Et ses gens environ li crïent 
69d.984 
Que par poi de duel ne s'ochïent; 
Si vous sevent il bien chaiens, 
Mais entr'eus est li duelz si grans 
Que il n'i püent ore entendre. 
S'il vous veulent ochirre ou pendre; 
A che ne pueent il falir 
Quant il vous venront asalir. » 
70a.991 
Et mesires Yvains respont: 
« Ja, se Dix plaist, ne m'ochirront 
Ne ja par eus pris ne serai. 
- Non, fait ele, car j'en ferai 
Avec vous ma poissanche toute. 
N'est mie prodons qui trop doute; 
Pour che quit que prodons soiés 
Que n'estes pas trop esmaiés. 
Et saichiés bien, se je pooie, 
Serviche et honnor vous feroie, 
Que vous le feïstes a moi. 
Une fois, a le court le roi 
M'envoia me dame en message. 
Espoir, ne fu mie si sage, 
Si courtoise ne de tel estre 
Conme puchele devoit estre; 
Mais onques chevalier n'i ot 
Qui a moi degnast parler mot, 
Fors vous, tout seul, qui estes chi; 
Mais vous, la vostre grant merchi, 
M'i honerastes et servistes. 
Del honor que la me feïstes 
Vous rendrai chi le guerron. 
Bien sai conment vous avés non 
Et reconneü vous ai bien: 
Fil estes le roy Urïen 
Et avés non mesire Yvains. 
Or soiés seürs et chertains 
Que, se vous croire me volés, 
Ja n'i serés pris n'afolés. 
Mais chest mien anel prenderés 
70b.1022 
Et, s'i vous plaist, si'l me rendrés 
Quant je vous arai delivré. » 
Lors li a l'anel tost livré, 
Si li a dit qu'il a tel forche 
Conme a li fus desous l'escorche, 
Qui le keuvre, c'on n'en voit point; 
Mais il couvient que on l'enpoint 
Si qu'el poing soit la pierre enclose; 
Puis n'a garde de nule chose: 
Tant soit entre ses anemis, 
Ja par eux ne sera maumis 
Chil qui l'anel en son doit a, 
Que ja veoir ne le porra 
Nuz hom, tant ait les iex ouvers, 
Ne que li fus qui est couvers 
De l'escorche qui seur li naist. 
Et che a mesire Yvain plaist. 
Et quant ele li ot che dit, 
Sel mena seoir en .i. lit 
Couvert d'une keute si riche 
Que n'avoit tele li dux d'Ostriche; 
La li dist que, se il voloit, 
A mengier li aporteroit; 
Et il dist qu'i li estoit bel. 
Le damoisele, tost et isnel, 
En la cambre revient mout tost, 
S'aporta .i. capon en rost 
Et un gastel et une nape, 
Et vin qui fu de boine crape, 
Plain pot, d'un blanc hanap couvert; 
Si li a a mengier offert, 
70c.1051 
Et cuit qu'il en estoit mestiers, 
Si menga et but volentiers. 
Quant il ot mengié et beü, 
Si furent les gens esmeü, 
Car le chevalier il queroient, 
Que lor seignor vengier voloient, 
Qui la estoit en biere mis. 
Et chele li a dit : « Amis, 
Oyés qu'il vous quierent ja tuit; 
Mout y a noise et grant bruit, 
Mais, qu'il* que viengne ne qui voise, 
Ne vous mouvés ja pour la noise, 
Que vous n'i serés ja trouvés, 
Se de chest lit ne vous mouvés; 
Ja venrés plaine cheste sale 
De gent mout enuiouse et male 
Que trouver vous y quideront; 
Et si quit qu'il aporteront 
Par chi le cors pour metre en tere; 
Si vous conmencheront a cquerre 
Et desous banes et desous lis. 
Che seroit soulas et delis 
A honme qui paour n'aroit, 
Quant si avoelé se verroit; 
Qu'il seront tuit si avoelé, 
Si desconfit et si maté 
Que il errageront tuit d'ire; 
Mais je ne vous sai plus que dire, 
Que je ne veul plus demourer. 
Mais Dieu en puisse je aourer, 
Qui m'a donné le lieu et l'aisse 
70d.1082 
De faire chose qui vous plaise, 
Car mout grant talent en avoie. » 
Lors s'est tantost mis a la voie 
Et, quant ele s'en est tournee, 
Si furent les gens aunee 
Qui de deuz pars as portes vinrent 
Et bastons et espees tindrent; 
Si ot entour lui mout grant presse 
De gens felenesse et engresse; 
Et vinrent du cheval trenchié 
Devant le porte, sus le planchié. 
Lors quidierent estre bien fis, 
Quant ouvert seroient li huis, 
Que chelui dedens trouveroient 
Que il pour ochirre queroient. 
Puis si trairent amont ...* 
Par qui maintes gens furent mortes, 
Mais il n'ont a chelui du siege 
Tendu ne trebuchet ne piege, 
Ains y entrent trestuit d'un front; 
Et l'autre moitié trouvé ront 
Du cheval mort delés le soil; 
Mais c'onques entr'eux n'orent oeil 
Dont monseignor Yvain veïssent, 
Que mout volentiers ochesissent; 
Et il les veoit erragier 
Et forsener et courouchier; 
Et disoient : « Che, que puet estre? 
Que chayens n'a huis ne fenestre 
Par ent riens nule s'en alast 
Se che n'iert oysiaus qui volast 
71a.1113 
Ou escureux ou .i. chisnus 
Ou beste ausi petite ou plus, 
Que les fenestres sont ferees 
Et les portes mout bien fremees 
Lors que mesires issi hors. 
Mors ou vis est chaiens li cors, 
Que la hors ne remest il mie. 
La sele assés plus que demie 
Est cha dedens, che veons bien, 
Ne de lui ne veonmes rien 
Fors que les esperons trenchiés 
Qui li chaïrent de ses piés. 
Alons cherchier parmi ches angles, 
Si laissons ester ches jangles. 
Encor est il chaiens, je cuit, 
Ou nous sonmes decheü tuit, 
Ou tolu les nous a malfé. » 
Ainsi trestuit d'ire escaufé 
Parmi la sale le queroient 
Et parmi ches parois feroient, 
Et parmi lis et parmi bans; 
Mais des caus fu quites et frans 
Li lis ou il s'estoit couchiés, 
Qu'il n'i fu ferus ne touchiés. 
Mais assés ferirent entour 
Et mout rendirent grant estour 
Partout laiens de lors bastons, 
Conme aveule qui a tastons 
Va aucune chose querant; 
Ainsi aloient reverchant 
Desous lis et desous eschames. 
71b.1144 
Vint une des plus beles dames 
C'onques veïst riens terrienne. 
De si tres bele crestienne 
Ne fu onques plait ne parole; 
Mais de duel faire estoit si fole 
C'a poi qu'ele ne s'ochioit. 
A la feye s'escrioit 
Si haut qu'ele ne pooit plus, 
Si recheoit pasmee jus; 
Et quant ele estoit relevee, 
Aussi conme fenme desvee, 
Si conmenchoit a deschirer 
Et ses chaveus a detirer; 
Ses chaveus tire et ront ses dras, 
Et se repasme a chascun pas, 
Ne riens ne le puet conforter, 
Que son seigneur en voit porter 
Devant li, en la biere, mort, 
Dont ja ne quide avoir confort; 
Pour che crioit a haute vois. 
L'yaue benoite et le crois 
Et li chierge aloient devant 
Avec les dames d'un couvant, 
Et le prestre et li enchensier 
Et li clerc, qui sont despensier 
A faire le haute despense 
A quoi la chetive ame pense. 
Mesire Yvains oÿ les cris 
Et le duel, qui ja n'iert descris, 
Que on ne le porroit descrire, 
Ne tix ne fu escris en livre; 
71c.1175 
Et la prochessïon passa, 
Mais enmi la sale amassa 
Entour la biere .i. grans ols*, 
Car li sans touz chaus et vermaus 
Kaÿ au mort parmi la plaie; 
Et che fu provanche bien vraie 
Qu'encor iert chil laiens, sans faille, 
Qui avoit faite le bataille 
Et qui l'avoit mort et conquis. 
Lors ont partout cherquié et quis 
Et reherchié et transmué, 
Tant que tuit furent esfraé 
De l'angousse et du toueil 
Qu'il eurent pour le sanc vermeil 
Qui devant eulz fu degoutés. 
Si fu mout ferus et boutés 
Mesire Yvains, la ou il jut; 
Mais ains pour che ne se remut. 
Et les gens plus et plus devoient 
Pour les plaies qui escrevoient; 
Si se merveillent pour coi saignent, 
Qu'eles ne trovent de qui se plaignent, 
Et dist chascuns et chist et chist: 
« Entre nous est chil qui l'ochist, 
Et nous ne le trouvons me* mie: 
Ch'est merveilles et diablie. » 
Pour che tel duel par demenoit 
La dame qu'ele forsenoit 
Et crioit conme hors de sens: 
« Dix, sera il trouvés chaiens 
L'omechide, le traïtour 
71d.1206 
Qui m'a ochis mon boin seignour? 
Boin? Voire le meillor des boins! 
Voir Dix, li tors en sera tiens 
Se tu le laisses escaper. 
Autrui que toi n'en sai blasmer, 
Que tu le m'embles a veüe. 
Ains tel forche ne fu veüe 
Ne si lait tort con tu me fais, 
Que veoir mie ne me lais 
Chelui qui est si pres de moi. 
Bien puis dire, quant je nel voi, 
Qu'entre nous chi s'est chaiens mis 
Ou fantosmes ou anemis; 
S'en sui enfantosmee toute. 
Couars est il quant il me doute; 
De grant couardise li vient; 
Mout est couars, quant il me crient 
Et devant mi moustrer ne s'ose. 
Le fantosme est couarde chose. 
Pourquoi es si acouardie, 
Quant vers monseigneur fus hardie? 
Chose vaine, chose faillie, 
Que ne t'ai je en ma baillie? 
Que ne te puis ore tenir? 
Mais conment puet che avenir 
Que tu monseigneur ad ochis 
S'en traïson ne le feïs? 
Ja voir par toi conquis ne fust 
Me sire, se veü t'eüst, 
Qu'el monde son pareil n'avoit, 
Ne Dix ne hom ne l'i savoit, 
72a.1237 
N'il n'en y a mais nul de tix. 
Chertes, se tu fusses mortix, 
N'osaisses monseignor atendre, 
Qu'a li ne se pooit nus prendre. » 
Ainsi la dame se debat, 
Ainsi tout par li se combat, 
Ainsi se tourmente et confont 
Et ses gens avec li refont 
Si grant duel que gregnour ne pueent. 
Le cors emportent si l'enfueent; 
Quant ont tant quis et triboulé 
Que de querre sont tuit lassé, 
Si le laissent tuit par anui, 
Quant ne pueent veoir nului 
Qui de riens faiche a mescroire. 
Et les nonnains et li prouvoire 
Eurent ja fait tout le serviche; 
Repairié furent de l'Eglise 
Et venu seur la sepulture. 
Mais de tretout che n'avoit cure 
La damoisele de la cambre; 
De monseignor Yvain li membre; 
S'est a lui venue mout tost 
Et dist : « Biau sire, a mout grant ost 
A on seur vo teste esté. 
Mout ont par chaiens tempesté 
Et reversé tous ches cachez, 
Plus menuement que brachés 
Ne va trachant pertris ne kaille. 
Paour avés eü sans faille. 
- Par foi, fait il, vous dites voir; 
72b.1268 
Ja n'en quidai si grant avoir. 
Encore, se il pooit estre, 
Ou par pertruis ou par fenestre 
Verroie volentiers la hors 
La prochession et le cors. » 
Mais il n'avoit entencion 
N'au cors n'a la prochession, 
Qu'il vausist qu'il fussent tuit ars, 
Si li eüst cousté mil mars. 
Mil mars? Voire, par Dieu, trois mile. 
Mais pour la dame de la vile, 
Que il voloit veoir, le dist; 
Et la damoisele le mist 
A une fenestre petite. 
Quant qu'ele puet ver li s'aquite 
Del honor qu'il li avoit faite. 
Par chele fenestre agaite 
Mesire Yvains la bele dame, 
Qui dist : « Biau sire, de vostre ame 
Ait Dix merchi, si voirement 
Que onques, au mien ensient, 
Chevalier en sele ne sist 
Que de riens nule vous vausist. 
De vostre honneur, biau sire chiers, 
Ne fu onques nus chevaliers, 
Ne de la vostre courtoisie; 
Largueche estoit la vostre amie 
Et hardemens vostre compains. 
En la compagnie des sains 
Soit la vostre ame, biaus sire! » 
Lors se pasme et se dessire 
72c.1299 
Trestout quanques a mains li vient. 
A mout grant paine se detient 
Mesire Yvains, a quel que tort, 
Que les mains tenir ne li cort. 
Mais la damoisele li prie 
Et loe quemande et chastie, 
Conme gentix et deboinaire, 
Qu'il se gart de folie faire 
Et dit : « Vous estes chi mout bien. 
72d.1308 
Ne nous mouvés pour nule rien 
Tant que li deulz soit abaissiés; 
...* 
Qu'il se departiront par tens. 
Se vous contenés a mon sens, 
Si con vous devés contenir, 
Grans biens vous en porra venir. 
Si poés chi estre et seoir, 
Et la dehors les gens veoir 
Qui passeront parmi la voie, 
73a.1318 
Ne ja n'iert nus qui chi vous voie, 
Si y arés grant avantage; 
Mais gardés vous de dire outrage, 
Car qui se derroie et sourmaine 
Et d'outrage faire se paine 
Quant il n'en a ne tans ne lieu, 
Je l'appel plus mauvais que preu. 
Gardés, se vous pensés folie, 
Que pour che ne le faites mie. 
Li sages son fol penser keuvre 
Et met, s'il puet, le bien a oevre. 
Or vous gardés dont conme sages, 
Que n'i metés la teste en gages, 
Qu'en n'en prendroit ja raenchon; 
Soiés pour vous en cusenzon, 
Et de mon conseil vous souviengne; 
S'estes en pais tant que je viengne, 
Que je n'os chi plus arrester : 
Je porroie tant demourer, 
Espoir, qu'ele me meskerroit 
Pour che qu'ele ne me verroit 
Avec les autres en la presse, 
S'en prendroie male confesse. » 
Atant s'en part et chil remaint, 
Qu'il ne set conment se demaint. 
Du cors qu'il voit que on enfuet 
Li poise, quant avoir ne puet 
Aucune cose qui l'en port 
Tesmoing qu'il a conquis et mort. 
S'il n'en a tesmoing et garant 
Que moustrer puisse en aparant, 
73b.1349 
« Dont sui je honnis en travers 
Tant est Keus fel et ramporners, 
Plains de rampornes et d'anui, 
Que ja n'aroie pais a lui; 
Tousjours mais m'iroit bien jetant 
A gas et ranpornes disant, 
Aussi con il fist l'autre jour. » 
Cheles rampornes a sejour 
Li sont el cuer batant et fresches. 
Mais de son cuer et de ses breches, 
De randon, ist nouvele amours 
Qui par sa tere a fait son cours; 
S'a toute sa proie cueillie; 
Son cuer enmaine s'anemie, 
Maine la riens qu'ele plus het. 
Bien a vengié, et si ne set, 
La dame le mort son seignor; 
Venjanche en a prise gregnor 
Qu'ele prendre ne l'en peüst 
S'Amours vengie ne l'eüst, 
Qui si douchement le requiert 
Que par les iex el cuer le fiert; 
Et a cols a plus grant duree 
Que cols de lanche ne d'espee : 
Colz d'espee garist et saine 
Mout tost, desque mires y paine; 
Et la plaie a Amours empire 
Quant ele est plus pres de son mire. 
Chele playe a mesire Yvains, 
Dont il ne sera janmais sains, 
C'Amours s'est toute a lui rendue. 
73c.1380 
Si tost conme ele est espandue 
Va reverchant, et si s'en hoste; 
Ne veut avoir hostel ne hoste 
Se chestui non, et que preus fait 
Quant de mauvais lieu se retrait; 
Ne veut qu'ailleurs ait de li plait; 
Si cherche tous ches vilz ostix; 
S'est grant honte c'Amours est tix 
Et quant ele si mal se preuve 
Qu'es plus despis liex qu'ele treuve 
Se herberge tout aussi tost 
Que en tout le meilleur d'un ost. 
Mais or est ele bien venue 
Et y a tele honneur tenue, 
En tel lieu fait boin sejourner. 
Ainsi se devroit atourner 
Amours, qui si est haute chose, 
Que merveille est conment ele ose 
De honte en si vil lieu descendre. 
Cheli samble que en la chendre 
Et en la poutre espant son basme, 
Et het honnor et ayme blasme, 
Et met le chieucre avec le fief* 
Et destempre suye au miel. 
Mais or n'a ele mie fait chou, 
Ains s'est logie en franc lou, 
Dont nus ne li puet faire tort. 
Quant on ot enfouy le mort, 
S'en partirent toutes les gens; 
Clers ne chevaliers ne serjans 
Ne dame ne remest, que chele 
73d.1412 
Qui sa dolour mie ne choile. 
Mais chele remaint toute sole, 
Qui souvent se prent par la gole, 
Et tort ses poins et bat ses paumes, 
Et list en .i. sautier ses siaumes, 
Enluminees a lettres d'or. 
Et mesire Yvains est encor 
A le fenestre, ou il l'esgarde; 
Et quant il plus s'en donne garde, 
Plus l'aime et plus li abelist. 
Che qu'ele pleure et qu'ele list 
Vausist qu'ele laissié eüst 
Et qu'a li parler li pleüst. 
En chest voloir l'a Amour mis, 
Qui a la fenestre l'a pris; 
Mais de son voloir se despoire, 
Car il ne puet quidier ne croire 
Que ses voloirs puisse avenir, 
Puis dist : « Pour fol me doi tenir 
Quant je veul chou que ja n'arai; 
Son seigneur a mort li navrai 
Et je quit a li pais avoir! 
Par foi, ne cuit mie savoir, 
Qu'ele me het plus orendroit 
Que nule rien, et si a droit. 
Dont ai je dit ore que sages, 
Que fenme a plus de chent courages. 
Chelui courage qu'ele a ore, 
Espoir, changera ele encore; 
Ains le changera sans espoir; 
Si sui faus qui m'en desespoir, 
74a.1443 
Et Dix le doinst par tans cangier, 
Qu'estre mestuet en son dangier 
Touzjours mais, puis c'Amours le veut. 
Qui Amours en gré ne requeut 
Des que entour li a atrait, 
Felonnie et traïson fait; 
Et je le di, qui veut si m'oie, 
Qu'il n'en doit avoir bien ne joie. 
Mais pour che ne dirai je mie, 
Anchois amerai m'anemie, 
Que je ne le doi pas haïr, 
Car je ne veul Amours traïr. 
Che qu'ele veut doi je amer. 
Et me doit ele ami clamer? 
Oïl, voir, pour che que je l'aim. 
Et je meïsmes le claim, 
Qu'ele me het, si n'a pas tort, 
Car che qu'ele amoit li ai mort. 
Et dont sui je ses anemis? 
Nenil, chertes, mais ses amis, 
C'onques mais tant amer ne vaux. 
Grant duel ai de ses biaux chevax, 
Qui fin or passent, tant reluisent. 
D'ire m'esprennent et aguisent 
Quant je li voi rompre et trenchier; 
C'onques ne se puet estanchier 
Les larmes qui des iex li chïent. 
Toutes ches choses me dessïent! 
Atout che qu'il sont plain de lermes, 
Si que che n'est ne fins ne termes, 
Ne furent onques si bel oeil. 
74b.1474 
De che qu'ele pleure me doeil 
Ne de riens n'ai si grant destreche 
Conme de son vis qu'ele bleche, 
Que ne l'eüst pas deservi : 
C'onques si bele taille ne vi 
Ne si fres ne si coulouré; 
Et che me par a acouré. 
Et je li voi sa gorge estraindre! 
Chertes, ele ne se set faindre 
C'au pis qu'ele puet ne se faiche, 
Ne nus cristaus ne nule glache 
N'est si bele ne si polie 
Que se gorge est ne si onnie. 
Dix! Pourquoi ne se bleche mains? 
Pourquoi detort ses blanches mains 
Et fiert son pis et esgratine? 
Dont ne fust che merveilles fine 
A esgarder, s'ele fust lie, 
Quant ele est si tres bele irie? 
Oïl, voir, bien le puis jurer, 
Onques mais si desmesurer 
En biauté ne se puet Nature, 
Que trespassé y a se cure 
Ou, espoir, ele n'i ouvra onques. 
Conment puet che avenir donques? 
Dont fust si grant biauté venue? 
Ja la fist Dix, de sa main nue, 
Pour Nature faire muser. 
Tout son temps y porroit user 
S'ele le voloit contrefaire, 
Que ja n'en porroit a kief traire; 
74c.1505 
Ne Dix, s'il s'en voloit pener, 
Ne saroit, je cuit, assener 
Que janmais nule tel feïst 
Pour paine que il y meïst. » 
Ainsi mesire Yvains devise 
Cheli qui de duel se debrise, 
Ne mais ne quit qu'il avenist 
Que nus hom qui prison tenist 
Amast en si fole maniere, 
Dont il ne sera ja proiere, 
Ne autres pour li, che puet estre. 
Tant fu Yvains a la fenestre 
Qu'il en vit la dame raler 
Et que on eut fait avaler 
Ambedeuz les portes coulans. 
De che fust uns autres dolans, 
Que mix amast sa delivranche 
Qu'il ne feïst la demouranche; 
Et il met autrement a oevre; 
Ne li caut s'on les ferme ou oevre. 
Il nen s'en alast mie, chertes, 
S'eles li fussent aouvertes 
Ne se la dame li donnast 
Congié et si li pardonnast 
Le mort sen seignour boinement, 
Puis s'en alast seürement, 
C'Amours et Honte le detienent, 
Qui de deuz pars devant li vienent. 
Il est honnis se il s'en va, 
Que che ne quideroit nus ja 
Qu'il eüst ainsi esploitié; 
74d.1538 
D'autre part, a tel couvoitié 
De la bele dame veoir 
Au mains, se plus n'en puet avoir, 
Que de la prison ne li chaut : 
Morir veut ains qu'il s'en vaut. 
Mais la damoisele repaire, 
Qu'il li veut compagnie faire 
Et soulagier et deporter 
Et aprochier et aporter 
Quantqu'il vaurra a sa devise. 
De l'amour qui en li est mise, 
Le trouva trespensé et vain; 
Si li a dit : « Mesire Yvain, 
Quel siecle avés vous hui eü? 
- Tel, fait il, qui mout m'a pleü. 
- Pleü? Dites vous ore voir? 
Conment puet dont boin siecle avoir 
Qui voit c'on le quiert pour ochirre, 
Se sa mort ne veut ou desire? 
- Chertes, fait il, ma douche amie, 
Morir ne vaurroie je mie, 
Et si me plot mout toute voie 
Che que je vi, se Dix me voie, 
Et plaist et plaira tousjours mais. 
- Or laissons a ytant em pais, 
Fait ele, que bien sai entendre 
Ou cheste parole veut tendre. 
Ne sui si niche ne si fole 
Que bien n'entende une parole. 
Mais or en venés aprés moi, 
Que je prendrai prochain conroi 
75a.1569 
De vous metre hors de prison. 
Bien vous metrai a garison. » 
Et il respont : « Soiés chertaine, 
Je n'en istrai, cheste semaine, 
En larrechin ne a emblee. 
Quant la gent iert toute assamblee 
Par mi ches rues, la dehors, 
Plus volentiers m'en istrai hors 
Que je ne feroie nuitantre. » 
A chest mot, aprés lui s'en entre 
Dedenz le petite chambrete. 
La damoisele, qui fu preste, 
Fu de lui servir mout en grans, 
Si li fist creanche et despens 
De tout quanques il li couvint. 
Et quant lieu fu, bien si souvint 
De che que chil li avoit dit, 
Que mout li pleut che que il vit 
Quant par la sale le queroient 
Chil qui ochirre le quidoient. 
La damoisele estoit si bien 
De sa dame que nule rien 
A dire ne li redoutast, 
A quoi que la chose montast, 
Qu'ele estoit sa maistre et sa garde. 
Mais pour quoi fust chele couarde 
De sa dame reconforter 
Et de s'onnour amounester? 
A premiere fois a conseil 
Li dist : « Dame, mout me merveil 
Que folement vous voi ouvrer. 
75b.1602 
Dame, quidiés vous recouvrer 
Vostre seigneur pour faire duel? 
- Nenil, fait ele, mais mien veul 
Seroie je morte d'anui. 
- Pour quoi? - Pour aler aprés lui. 
- Aprés li? Dix vous en deffende 
Et aussi boin seigneur vous rende 
Si conme il en est posteïs. 
- Ains tel menchongne ne deïs, 
Qu'il ne me porroit si boin rendre. 
- Meilleur, se vous le volés prendre, 
Vous rendra il, sel prouverai. 
- Fui t'ent! Ja voir ne trouverai. 
- Si ferés, dame, s'il vous siet. 
Mais or dites, si ne vous griet, 
Vostre tere, qui deffendra 
Quant li rois Artus y venra, 
Qui doit venir l'autre semaine 
Au perron et a la fontaine? 
Vous en avés eü message 
De la damoisele sauvage 
Qui lettres vous en envoia. 
Ahi! Conment les emploia! 
Vous deüssiés or conseil prendre 
De vostre fontaine deffendre, 
Et vous ne finés de plourer! 
N'i eüssiés que demourer, 
Si vous pleüst, ma dame chiere, 
Que chertes nis une chambriere 
Ne valent tuit, bien le savés, 
Sis chevaliers que vous avés : 
75c.1633 
Jar par cheli qui miex se prise 
N'en iert escus ne lanche prinze. 
De gent malvaise avés vous mout, 
Qui sont couart et mout estout, 
Qui seur cheval monter en ost, 
Et li rois vient a si grant ost 
Qui saisira tout sans deffense. » 
La dame set mout bien et pense 
Que chele le conseille en foi; 
Mais une folie a en soi 
Que les autres fenmes y ont 
Et, a bien pres, toutes le font, 
Qui de lor folie s'escusent 
Et che qu'ele veulent refusent. 
« Fui! fait ele, ne dire mais! 
Se je t'en oy parler ja mais, 
Ja n'i ara fors que t'en fuies, 
Que tes paroles tant m'anuient. 
- Et de par Dieu, fait ele, dame, 
Bien y pert que vous estes fenme, 
Qui se coureche quant ele ot 
Nului qui bien faire li ot*. » 
Lors s'en parti, si s'en ala; 
Et le dame se rapensa 
Qu'ele avoit mout grant tort eü; 
Mout vausist bien avoir seü 
Conment ele porroit prouver 
C'on porroit chevalier trouver 
Melleur c'onques ne fu ses sire; 
Mout volentiers li orroit dire, 
Mais ele li a deffendu. 
75d.1664 
En cest voloir a atendu 
Jusques a tant que chele revint; 
Mais onques deffense n'en tint, 
Puis li redit tout maintenant : 
«Ha! dame, est che ore avenant 
Que si de duel vous ochiés? 
Pour Dieu, car vous en chastiés, 
Si laissiés seviax non pour honte : 
A si haute fenme ne monte 
Que duel si longuement maintiengne. 
De vostre honnor vous resouviengne 
Et de vostre grant gentillesce. 
Cuidiés vous que toute proesce 
Soit morte avec vostre seignor? 
Chent aussi boins et chent mellor 
En sont remés parmi le monde. 
- Se tu me mens, Dix te confonde! 
Et nepourquant .i. seul m'en nonme 
Qui ait tesmoing de si prodonme 
Conme mesires ot son aé. 
- Ja ne m'en sariés vous gré 
Et si vous en courecheriés 
Et m'en remanecheriés. 
- Non ferai, je t'en asseür. » 
Ele respont : « A boin eür, 
Qui vous puist tousjours avenir, 
Se il vous venoit a plaisir. 
Et che doinst Dix que il vous plaise! 
Je ne voi pour coi je me taise, 
Que nus ne nous ot ne escoute. 
Vous me tenrés ja tost pour sote, 
76a.1695 
Mais je dirai bien, che me samble : 
Quant .ii. chevaliers sont ensamble 
Venans armez en bataille, 
Li quiex cuidiez vous qui miex vaille, 
Quant li uns a l'autre conquis? 
Endroit de moi doin je le pris 
Au vainqueor. Et vous, que faites? 
- Il m'est avis que tu m'agaites, 
Si me veuz a parole prendre. 
- Par foy, vous poez bien entendre 
Que je m'en voiz parmi le voir, 
Et si le prins par estouvoir 
Que miex vaut cil qui conquist 
Vostre segnour que il ne fist : 
Il le conquist et cel quacha 
Par hardement enduques cha, 
Si que il enclost en sa meson. 
- Or oy, fet elle, desrason, 
La plus grant que onques fust dite. 
Fui! plaine de mal esperite. 
Fui! garce fole et aniouse. 
Ne dire jamez telle oyseuse, 
Ne devant moi jamez n'en viengnes 
Por coy de lui parole tiengnes. 
- Certes, dame, bien le savoie, 
Que ja de vous gré n'en avroie, 
Et jel vous di mout bien avant. 
Mez vous m'eüstes en convant 
Que ja yre n'en averriez 
Ne maugré ne m'en savriez. 
Mal m'avez mon convant tenu. 
76b.1724 
Or si m'est einssi avenu 
Que dit m'avez vostre plaisir; 
Si ai perdu .i. bon taisir. » 
Atant vers la chambre retourne, 
La ou mesire Yvains sejourne, 
Que elle gade* a mout grant aise; 
Mez n'i a chose qui li plaise 
Quant la dame veoir ne puet, 
Et del plait que celle li muet 
Ne s'en garde ne n'en set mot. 
Mez la dame toute nuit out 
A li meïsme grant tençon; 
Toutevoie fu en cuisenson 
De sa fontaine garantir. 
Si ce conmence a repentir 
De celi qu'elle avoit blasmee 
Et laidie et mesamee, 
Car elle est toute seure et certe 
Que por loier ne por deserte 
Ne por amor que a lui ait 
Ne l'en mist elle onques em plait. 
Et plus aime elle li que lui, 
Ne sa biauté ne son annui 
Ne li cheleroit elle mie, 
Car trop est sa loiaus amie. 
Estes vous la dame changiee: 
De celi qu'elle out ledangié 
Ne cuide jamez a nul fuer 
Que amer la doie de bon cuer, 
Et celui qu'elle out refusé 
A mout laiaument escusé 
76c.1755 
Par raison et par droit de plait, 
Que ne li avoit pas forfait. 
Si ce desraine tout ausi 
Con c'il fust venus devant li; 
Si se conmence a plaidoier : 
« Va! fet elle, puez tu noier 
Que par toi ne soit morz mesire? 
- Ce, fet il, ne pui ge desdire, 
Ainz l'otroy bien. - Di donc por coy. 
Feïs le tu por mal de moy, 
Por haïne ne por despit? 
- Ja n'aie je de mort respit 
S'onques por mal de vous le fis. 
- Dont n'as tu riens vers moi mespris 
Ne vers lui n'eüs tu nul tort, 
Que c'il peüst, il t'eüst mort. 
Por ce, mien escient, cuit gié 
Que j'ai a droit et bien jugié. » 
Ainssi par li meïsme pruesve 
Que droit, senz et raison i trueve 
Que en li haïr ne* elle nul droit, 
Si dit ce que elle vouroit; 
Par li meïsmes s'alume 
Ausint con la buche qui fume 
Tant que la flame s'i est mise, 
Que nulz ne la soufle n'atise. 
Et s'or venoit la damoiselle, 
Ja desraineroit la querelle 
Dont elle l'a tant plaidoiee, 
Si a esté bien laidengiee. 
Et elle revint par matin, 
76d.1786 
Si reconmence son latin 
La ou elle l'avoit laissié. 
...* 
Qui a mesfaite ce savoit 
De ce que laydie l'avoit. 
Mez or li voudra amender 
Et del chevalier demander 
Le non, l'estre et le lingnage; 
Si s'umelie comme sage 
Et dist : « Merci crier vous veil 
Del grant outrage et de l'orgueil 
Que je vous ai dit conme folle, 
Si remaindray a vostre escolle. 
Mes dites moy, se vous savez : 
Le chevalier dont vous m'avez 
Tenue em plait si longuement, 
Quelz hons est il et de quel gent? 
Se il est tiex qu'a moy atiengne, 
Mez que de par lui ne remaingne, 
Je le feray, ce vous otroy, 
Segneur de ma terre et de moy. 
Mes il le convenroit ci faire 
Que on ne puisse de moi retraire 
Ne dire : « C'est celle qui prist 
Celi qui songneur* ocist. » 
- En non Dieu, dame, ainssi iert il. 
Segneur avroiz le plus gentil 
...* 
Qui onques fust del lin Abel. 
- Conment a a non? - Mesire Yvain. 
- Par foy, cilz n'est mie villain, 
Ainz est mout franz, je le sa bien; 
Si est filz le roy Urien. 
77a.1819 
- Par foi, dame, vous dites voir. 
- Et quant le pourrons nous avoir? 
- Desqu'a .v. jours. - Trop demouroit, 
Que, mien veil, ja venus seroit. 
Viengne annuit ou demain, seviaus. 
- Dame, ne cuit pas c'uns oisiaus 
Pouist en .i. jour tant voler. 
Mez ge y ferai ja aler 
.I. mien garsson qui ci tost cort 
Qui va bien desque a la cort 
Le roy Artu, au mien espoir, 
Au mainz desqu'a demain assoir, 
Que juque la n'iert il trouvez. 
- Cilz termez est trop lons asez: 
Li jour sont lonc. Mez dites li 
Que demain au soir resoit ci; 
Ne nule essoigne ne retiengne 
Que demain assoir ci ne viengne, 
Et au plus tost que il ne seult. 
Car, se bien esforcier se veult, 
Fera de .ii. journees une; 
Et anquenuit luira la lune, 
Si reface de la nuit jour, 
Et je li donray au retour 
Quanque il voudra que je li doigne. 
- Sor moy laissiez ceste besongne, 
Que vous l'avroiz entre vos mayns 
...* 
Et endementres manderoiz 
Vos genz et ci demanderoiz 
Conseil del roy qui doit venir. 
Pour la coustume maintenir 
77b.1849 
De vostre fontaine deffandre 
Vous convenra tel conseil prendre; 
Et il n'i avra ja ci haut 
Qui s'ost vanter que il y aut. 
Lors pouroiz dire tout a droit 
Que marier vous convenroit. 
Uns chevaliers mout alosez 
Vous requiert et vous ne l'osés 
Prendre c'il ne vous louent tuit. 
Et ce pren ge bien en conduit. 
Tant les connois ge a malvaiz, 
Que, pour chargier autrui le fays 
Dont il seroient trop chargié, 
Vous en venront trestuit au pié 
Et si vous en mercieront, 
Que fors de grant poour seront. 
Car qui poour a de son ombre, 
C'il puet, volentiers se descombre 
D'encontre de lance ou de dart, 
Que c'est mauvaiz juz a couart. » 
Et la dame respont : « Par foy, 
Ycel veil je et ci l'otroy, 
Et je l'avoie ja penssé 
Si con vous l'avez devisé, 
Et tout ainssi le ferom nous. 
Mez por coy demourez vous? 
Alez! Ja plus ne delaiez! 
Je remaindrai avec mez genz. » 
Ainssi fina li parlemenz. 
Et celle faint qu'elle envoit querre 
Monseignor Yvain en sa terre, 
77c.1881 
Si le fet chascun jour bangnier, 
Et laver et aplennier; 
Et avec ci li apareille 
Robe d'eskallaste vermeille, 
De vair flechie a tout la croie. 
N'est riens qu'elle ne li aroie, 
Que il conviengne a li acesmer: 
Fermail d'or a son col fermer, 
Ouvré a pierres precieusses 
Qui mout font les biens gracieusez, 
Saintureste et aumosniere 
Qui fu d'une riche banniere; 
Bien l'a del tout apareillié. 
Et a sa dame conseillié 
Que revenus est son mesage, 
Si a esploitié conme sage. 
« Conment? fet elle. Quant venra 
Mesire Yvain? - Saienz est ja. 
- Saienz est il! Viengne dont tost, 
Celeement et en repost, 
Dementiers que lez moy n'est nuz. 
Gardez que n'en n'*i viengne plus, 
Car g'i avroie* mout le quart. » 
La damoisele atant s'en part; 
C'est venue a son hoste ariere, 
Mez ne montre mie en sa chiere 
La joie qu'en son cuer avoit; 
Ainz faint que sa dame savoit 
Qu'elle l'avoit laienz gardé, 
Et dist : « Mesire Yvain, pour Dé, 
Ne m'i a mez mestier celee. 
77d.1912 
De vous est tant la choze alee 
Que ma dame la choze set, 
Qui mout m'en blasme et mout m'en het 
Et mout m'en a acoisonnee; 
Maiz tel seürté m'a donnee 
Que devant li vous puis conduire 
Sanz vous de riens grever ne nuire. 
Ne vous grevera riens, ce croy, 
Fors tant, que je mentir ne doi, 
Que je feroie traïson, 
Qu'elle vous veut en sa prison. 
- Certes, fet il, je veil mout bien, 
Que ne me grevera ja rien; 
En sa prison veil je bien estre. 
- Si seroiz vous, par la main destre 
Dont je vous tieng! Or en venez, 
Mez a mon loz vous contenez 
Si simplement devant sa face 
Que male prison ne vous face. 
Ne por el ne vous esmaiez : 
Ne cuit mie que vous aiez 
Prison qui trop vous soit grieve. » 
La damoiselle ainssi l'enmaine; 
Si l'esmarri et l'aseüre, 
Et parole par couverture 
De la prison ou il ert mis, 
Que sanz prison n'est nus amis; 
Por ce a droit que prison le claime, 
Que bien est en prison qui aime. 
La damoiselle par la main 
Enmaine monsegneur Yvain 
78a.1945 
La ou il iert mout chier tenuz; 
Si crient il estre mal venuz, 
Et c'il le crient, n'est pas merveille. 
Desor une couste vermeille 
Trueverent la dame seant. 
Grant poour, ce vous acreant, 
Ot mesire Yvains a l'entree 
De la chambre, ou il * trouvee 
La dame; ne lor dit nul mot; 
Et pour ce plus grant poour ot, 
Si fu de paour esbahiz, 
Que il cuida estre traÿs, 
Et c'estut loins celle par la, 
Tant que la pucelle parla 
Et dist : « .V.c dehaiz ait fame 
Qui maine en chambre a bele dame 
Chevalier qui ne s'en aproche 
Et qui n'a ne langue, ne bouche, 
Ne son dont acointier se sache. » 
A cest mot, par le poing le sache, 
Si li dist : « En sa vous traiez, 
Chevalier, et poour n'aiez 
De ma dame, qu'elle vous morde; 
Mez querez li paiz et acorde, 
Et j'en proieray avec vous 
Que la mort Esclados le Rous, 
Qui fu ses sires, vous pardoint. » 
Mesire Yvains maintenant joint 
Les mainz, si c'est a genoulz mis 
Et li dist, conme vraiz amis : 
« Dame, ja voir ne crïeray 
78b.1976 
Merci, ainz vous mercïeray 
De quanque vous me vouroiz fere, 
Que riens ne me porroit desplere. 
- Non, sire? Et ce je vous ocy? 
- Dame, la vostre grant merci, 
Que ja ne m'en orroiz dire el. 
- Ainz maiz, dit elle, n'oÿ tel, 
Que ci vous metés a devise 
Del tout en tout en ma franchise 
Sanz ce que ne vous en efforz. 
- Dame, nule force si fors 
N'est conme celle, sanz mentir, 
Qui me conmande a consentir 
Vostre vouloir de tout en tout. 
Rienz nulle ne redout 
Que il vouz plaise a conmander, 
Et, ce je vous poie amender 
La mort dont je n'ai rienz meffait, 
Je l'amenderoie sanz plait. 
- Conment? fet elle. Or le me dites, 
Si soiez de l'amende cuitez, 
Ce vous de riens me meffeïstez 
Quant vous mon segnieur ocisistes. 
- Dame, fet il, vostre merci; 
Quant vostre sire m'asailli, 
Quel tort oi ge de moy deffendre? 
Qui autrui veut ocire ou prendre, 
Se cil * ocist qui ce deffent, 
Ditez ce de rienz y mespris. 
- Nenil, qui bien i garde a droit; 
Et je cuit que riens ne vaudroit 
78c.2007 
Quant fet ocire vous aroie. 
Ice mout volentiers savroie 
Dont celle force puet venir 
Qui vous conmande a consentir 
Touz mes vouloirs sanz contredit; 
Touz torz et touz meffaiz vous cuit, 
Mes seez vous, si me contez 
Conment vous estes si dontez. 
- Dame, fet il, la force vient 
De mon cuer, qui a vous se tient; 
E* cest voloir m'a mon cuer mis. 
- Et qui est le cuer, biaus amis? 
- Dame, mi oil. - Et les oilz, qui? 
- La grant biautés que en vous vi. 
- Et la biautez, qu'i a forfayt? 
- Dame, tant que amer me fait. 
- Amer? Et qui? - Vous, dame chiere. 
- Moy? - Voire voir. - En quel maniere? 
- En tel que graindre estre ne puet; 
...* 
Mon cuer, n'onques alleurs nel truiz; 
En tel qu'ailleurs pensser ne puis; 
En tel que tout a vous m'otroy; 
En tel que plus ai que moy; 
En tel que pour vous a delivre 
Veil, c'il vous plaist, mourir ou vivre. 
- Et oseriez vous emprendre 
Pour moy ma fontaine a deffendre? 
- Oïl, voir, dame, vers touz homes. 
- Sachiez dont, bien acordez sonmes. » 
Ainssint s'acordent briement. 
Et la dame out son parlement 
78d.2039 
Devant tenu a ses baronz 
Et dist : « De ci nous en alonz 
En celle sale ou mes genz sont 
Qui loué et conseillié m'ont, 
Por le besoing que il y voient, 
Qui a mari prendre m'otroient, 
Et jel feray por lor besoing. 
Si meïsmes a vous me doing, 
Qu'a segnour refuser ne doy 
Bon chevalier et filz de roy. » 
Or a la damoiselle fait 
Quanqu'elle vouloit entresait 
Et mesire Yvains est plus sire 
Que il n'osast penser ne dire; 
Et la dame avec li l'enmaine 
En la sale qui estoit plaine 
De chevaliers et d'autres genz; 
Et mesire Yvains fu ci genz 
Qu'a merveilles tout l'esgarderent, 
Et contre li tuit se leverent 
Et tuit se lievent et enclinent 
Monsegneur Yvain, dïent: 
« C'est cil que ma dame prendra; 
Dehaiz est qui li deffendra, 
Car merveille samble preudomme. 
Certes l'empereïs de Romme 
Seroit en li bien mariee. 
Car l'eüst il ja afiee 
Et elle luy de nue main, 
...* » 
Ainssint parloie tuit en renc. 
A chief de la salle en .i. banc 
79a.2071 
Ou la dame s'ala seoir, 
La ou tuit la purent voir. 
Et mesire Yvains samblant fist 
Qu'a ses piez seoir se vousist, 
Quant elle leva amont; 
De la parole li semont 
Le seneschal, que il la die, 
Si qu'elle soit de touz oïe. 
Lors commence li ceneschauz, 
Qui n'estoit ne restis ne faulz: 
« Segnors, fet il, guere nous sort: 
N'est jour que li rois ne s'atourt, 
De quanqu'il se puet haster, 
Pour venir nos terres gaster. 
Ainscoiz que quinzaine past, 
Sera toute livree a gast, 
Se bon mantenour n'i a. 
Que ma dame se mariast, 
N'a mie encore si son parc clos, 
Si le feist elle par vo loz. 
Mors est ses sires, si li poise. 
N'a or de terre qu'une toise 
Cil qui tout cest païz tenoit 
Et qui mout bien y avenoit; 
C'est grant duel que poy a vescu. 
Fame ne set porter escu 
Ne ne set de lance ferir; 
Mout amender et enduit* 
Se puet de prendre .i. bon segnour. 
Ainz maiz n'en ot mestier gregnour. 
Loez li tuit que mari prengne, 
79b.2102 
Ainz que la coustume remaigne 
Qui en cest chastel a esté 
Plus de .lx. anz a passez. » 
A cest mot dïent tuit ensamble 
Que a faire bien lor resamble. 
Et trestuit au pié li viennent, 
De son voloir en grant la tiennent; 
Si se fet prier de son bon, 
Tout autresi con mal gré sien 
Otroie ce qu'elle feïst 
Ce chascun li contredeïst, 
Et dist: « Segnieur, des qu'il vous siet, 
Ce chevalier qui lez moy siet 
M'a mout priee et mout requise; 
En m'onnor et en mon servise 
Se veut mestre et je l'en merci 
Et vous l'en merciez aussi. 
N'onquez mez, certes, nel connu, 
S'ay mout oÿ parler de lui: 
Si hauz hons est, ce sachiez bien, 
C'est filz le roy Urien. 
Sanz que il est de haut parage, 
Est il de si grant vacelage 
Et tant a courtoisie et senz 
Que deslouer ne me doit l'en. 
De monsegneur Yvain, ce cuit, 
Avez bien oÿ parler tuit; 
Et ce est il qui me requiert. 
Plus haut segnour qu'a moy n'afiert 
Avray au jour que ce sera. » 
« ...* 
Cist jour, ce vous fetes que sage, 
79c.2134 
Que en façons le mariage; 
Ca* mout est foulz qui ce demeure 
De son preu faire pas ni heure. » 
Tant li prïent qu'elle otroie 
Ce qu'elle fist toute voie, 
Que Amours a faire li conmande 
Ce dont los et conceil demande; 
Mez a plus grant honneur le prent 
Quant elle a le los de sa gent; 
Et les proieres riens n'i grievent, 
Ainz li essaucent et conseillent 
Le cuer a fere son tallent. 
Le cheval qui ne va pas lent 
S'avance quant on l'esperonne; 
Voiant touz ses baron ce donne 
La dame a monsegneur Yvain. 
Par la main d'un sien chapelain 
Pris a la dame de Landuc, 
La dame qui fu fille au duc 
...*. 
Ce jour maimes, sanz delay, 
L'espousa et firent les noces. 
Asez y ot mitres et croces, 
...* 
Ses esvesques et ses abez. 
Mout y ot gent et mout richesse, 
Et mout y ot joie et liesse, 
Plus quel conter ne vous savroie 
Quant lonc temps pensé y aroie; 
Miex m'en veil taire que poi dire. 
Or est mesire Yvains sire 
Et la* mort est tost obliés; 
Celi qui l'ocist est mariés 
79d.2167 
En sa fame et ensamble gisent, 
Et les genz aiment plus et prisent 
Li c'onque le mort ne firent. 
...* 
Qui durerent duques a la veille 
Que li roys vint a la merveille 
De la fontaine et del perron, 
Et avec li si conpangnon, 
Car trestuit cil de sa menie 
Furent en cele chevauchiee, 
C'unz trestouz ceuz n'i fu remez. 
Et si a dit mesire Keus: 
« Aÿ! Qu'est or devenuz 
Yvains quant il n'est sa venuz, 
Qui se vata* aprez mengier 
Qu'il yroit son cousin vengier? 
Bien pert que ce fu aprez vin! 
Fuiz s'en est, je le devin, 
Qu'il n'i osast venir por l'oil. 
Mout ce vanta de grant orgueil. 
Mout est hardiz qui louer s'oze 
De ce dont autre ne l'alose, 
Ne n'a temoig de sa losenge 
Ce n'est par force de loenge. 
Mout a entre mauvez et preu, 
Que li mauvayz delez le feu 
Dist de lui unes grans paroles, 
Si tient toutes les genz a foles 
Et cuide qu'on ne le congnoisse. 
Et li preuz avroit grant angoisse 
Se il ooit dire autrui 
Les proesses qui sont en luy. 
80a.2199 
Et pour ce, certez, bien m'acort 
Au malvaiz, qu'il n'a mie tort, 
Et cil se prise et cil se vante, 
Qu'il ne trueve qui pour li mente. 
Se il n'en dit, qui l'en dira? 
Tuit se taissent, ne li ira 
Et des vaillanz crie le ban 
Et les mavaiz giete a un van. » 
Ainsi mesire Keus parloit, 
Et mesire Gauvains disoit: 
« Merci, mesire Keus, merci! 
Mesire Yvains n'es ore ci, 
Ne savez quele essoigne il a. 
Onques voir tant ne s'avilla 
Que il deïst de vous villenie, 
De tant il fait cortoisie. 
- Sire, fet il, et je m'en taiz, 
Ne m'en orez parler huimaiz, 
Des que je voi qu'il vous annuie. » 
Et li roiz pour veoir la pluie 
Verssa de l'yaue plain bacin 
Sor le perron, desouz le pin; 
Et plust tantost mout fondanment. 
Ne tarda mie longuement: 
Mesire Yvains sanz nul arest 
Entra armez en la forest 
Et vint plus tost que les galos 
Sor un cheval et bel et gros, 
Fort et hardi et conbatant. 
Et mesire Keus out talent 
Qu'il demanderoit la bataille, 
80b.2230 
Car, quiex que fust la desinaille*, 
Il voloit conmencier touzjors 
Les mellees et les estourz 
Ou il y eüst grant corrouz. 
Le roy en prie devant touz 
Que ceste bataille li laist. 
« Keus, dist li roys, des qu'il vous plaist, 
Que devant touz l'avez rouvee, 
Ne vous doit pas estre vee. » 
Keus l'en merciee* puis si monte. 
Se or li puet .i. poi de honte 
Mesire Yvains, liez en sera 
Et mout volentiers l'en fera, 
Que bien le recongnoist aus armez. 
L'escu a pris par les enarmes 
Et Keus le sien, si c'entreslaissent, 
Chevauz cuerent et lances baissent 
Que il tenoient empongnez; 
.I. poy les ont alongniees 
Tant que par les camoiz les tindrent, 
Et a ce que il s'entrevindrent, 
De tex coupz mout se merveillierent 
Qu'andeus les lances peçoierent 
Et vont desques au poinz. 
Mesire Yvains cop si puissant 
Li donna que de sor la celle 
A fet Keus la tournebouele 
Et li hiaumes en terre fiert. 
Plus d'annuy fere ne li quiert 
Mesire Yvains, ainssoiz descent 
A la trerre*, le cheva* prent. 
80c.2261 
S'en fu mout a tel y ot bel, 
Ne se pot taire de dire el: 
« Ainsi, ainsi, con or gesiés, 
Vous qui les autres despisiés! 
Et nepourquant s'est il bien drois 
C'on le vous pardoinst cheste fois 
Pour che qu'ains mais ne vous avint. » 
Entre tant, devant le roi vint 
80d.2269 
Mesire Yvain, et par le frain 
Mena le cheval en la main, 
Pour che que il li voloit rendre; 
Si li dist: « Sire, faites prendre 
Chel cheval, que je mefferoie 
Se riens du vostre retenoie. 
- Et qui estes vous? fait li rois. 
Ne vous connistroie des mois 
81a.2278 
Se je nonmer ne vous ooie 
Ou desarmé ne vous veoie. 
- Che est Yvain que chi veés. » 
S'en fu Keus de honte asonmés 
Et mas et mors et desconfis, 
Qu'il dist qu'i s'en estoit fuis. 
Et li autre mout lié en sont, 
Qui de son duel grant joie font. 
Mais li rois grant joie en mena, 
Et mesire Gavain en a 
Chent tans plus grant joie que nus 
...* 
Qui a li compaignie eüst 
Qu'a chevalier que il seüst. 
Et li rois li requiert et prie, 
Se il li plaist, que il li die 
Conment il avoit esploitié, 
Car mout l'avoit grant couvoitié 
De savoir du tout de son estre 
Et conment ileuc pooit estre. 
Et il lor a trestout conté 
Le grant serviche et le bonté 
Que le damoisele li fist; 
Onques de riens n'i entreprist, 
Ne riens nule n'i oublia. 
Et aprés che le roy proia 
Que il et tuit si chevalier 
Venissent o lui herbegier, 
C'onnor et joie li feront 
Quant o lui herbegié seront. 
Et li rois dit que volentiers 
Li feront, .viii. jours, tous entiers 
81b.2309 
Joie et honnor et compagnie. 
Et mesire Yvains l'en merchie, 
Ne demouré nul point n'i sont, 
Maintenant montent, si s'en vont 
Vers le chastel le droite voie. 
Et mesire Yvains en envoie 
Devant la route .i. esquier, 
Et portoit .i. ostoir muier, 
Pour che que il ne souspreïssent 
Le dame, que ses gens feïssent 
Contre le roi ses maisons beles. 
Et quant il orent les nouveles 
Du roy qui vient, s'en ont grant joie; 
N'i a nul qui la nouvele oie 
Qui n'en soit liés et qui n'en mont. 
Et la dame tous les semont 
Et prïent* que encontre li voisent; 
...* 
Que de faire sa volenté 
Estoient trestuit apresté. 
Encontre le roy de Bretaigne 
En vont seur gens chevaus d'Espaigne, 
Si le saluent mout hautement 
Le roy Artur premierement 
Et puis sa compagnie toute: 
« Bien viengne, font il, cheste route 
Qui de si preudonmes est plaine. 
Benois soit chil qui les amaine 
Et qui si boins hostes nous donne. » 
Contre le roi le chastiaus tonne 
...*. 
Li drap de soie sont fors trait 
Et estendu a parement, 
81c.2342 
Et des tapis font pavement; 
Et refont un autre apareil, 
Que pour le calour du soleil 
Keuvres* les rues de courtines. 
Li cor et li son des buisines 
Font le chastel si resoner 
Que on n'i oïst pas tonner. 
Et la ou chantent les pucheles, 
Sonnent fleütes et freteles, 
Timbres tabletes et tabour. 
Et d'autre part font lor labour 
Li legier bacheler qui salent; 
Tretuit de joie se travaillent, 
Et a cheste joie rechoivent 
Le roy, si con faire le doivent. 
Et la dame en est fors issue, 
D'un drap emperial vestue, 
Robe d'ermine toute fresche, 
Sor son chief une calendesche 
Toute de rubins aterchie; 
Ele n'ot pas la chiere irie, 
Ains l'ot si bele et si riant 
Qu'ele estoit, au mien ensciant, 
Plus bele que nule dieuesse. 
Entour li fu la joie espesse 
Et disoient trestuit a tire: 
« Bien viengne li rois et le sire 
Des rois et des seigneurs du monde! » 
Ne puet estre c'a tous responde 
Li rois, qui voit vers li venir 
La dame a son estrief tenir. 
81d.2375 
Et che ne veut il pas atendre, 
Ains se hasta tant du descendre 
Qu'il descendi leus qu'i la vit, 
Et ele le salue et dit: 
« Bien viengne, par chent mile fois, 
Li rois mesires, et benois 
Soit mesire Gavain, ses niés. 
- Vostre gent cors et vostre chiés, 
Fait li rois, bele creature, 
Ait joie et la boine aventure. » 
Puis l'embracha parmi les flans 
Li rois, conme gentix et frans, 
Et ele lui tout a plain bras. 
Des autres parole ne fas 
Conment ele les conjoÿ, 
Mais onques hom parler n'oÿ 
De nule gent tant conjoïe, 
Tant honoree et tant servie. 
De le joie assés vous contaisse 
Se ma parole ne gastaisse. 
Mais seulement de l'acointanche 
Veul faire une briés ramembranche 
Qui fu faite a privé conseil 
Entre le lune et le soleil. 
Savés de qui je vous veul dire? 
Chil qui des chevaliers fu sire 
Et qui seur tous fu renonmés 
Doit bien estre soleil clamés. 
Pour monseigneur Gauvain le di, 
Que de lui est tout autressi 
Chevalerie enluminee 
82a.2406 
Con li solaus, la matinee, 
Espant ses rains et clarté rent 
Par tout les lieus ou il resplent. 
Et de cheli refais la lune 
Dont il ne puet estre que une, 
De grant foy et de grant aÿe. 
Et ne porroie dire mie 
Solement pour le lonc renon, 
Mais pour che que Lunete ot non. 
Le damoisele ot non Lunete 
Et fu une avenant brunete 
Tres sage et tres noble et tres cointe. 
A monseigneur Gauvain s'acointe, 
Qui mout le prise et mout l'aime, 
Et pour che s'amie le claime 
Qu'ele avoit de mort garandi 
Son conpagnon et son ami; 
Et mout li offre son serviche. 
Et ele li conte et devise 
A con grant paine ele conquist 
Sa dame, tant que ele prist 
Monseignor Yvain a mari, 
Et conment ele garandi 
Des mains a cheus qui le queroient: 
Entr'eus estoit, sil ne veoient! 
Mesire Gauvains mout en rist, 
De che qu'ele li conte, et dist: 
« Ma damoisele, je vous doing 
Et a mestier et sans besoing 
Un tel chevalier con je sui; 
Ne me cangiés ja pour nului 
82b.2437 
Se amender ne vous quidiés; 
Je sui vostres, et vous soiés 
D'ore en avant ma damoisele. 
- Vostre merchi, sire », fait ele. 
Ainsi chil doi s'entracointoient 
Et li autre ad autres juoient; 
Lors en y ot plus de soissante 
Dont chascune estoit bele et gente 
Et noble et cointe, preus et sage, 
Gente fenme, de haut parage; 
Si s'i porent mout soulagier 
Et d'acoler et de baisier 
Et de parler et de veoir 
Et de delés eles seoir, 
Ytant en orent il au mains. 
Or a feste mesire Yvains 
Du roi, qui avec li demeure; 
Et la dame tant les honneure, 
Chascuns par soi et tous ensamble, 
Que tes mos y a que che samble 
Que d'amours viengnent li atrait 
Et li samblant qu'ele lor fait. 
Et chil se pueent pour fox clamer 
Qui quident c'on les veulle amer 
Quant une dame est si courtoise 
C'a un maleüreus adoise, 
Si li fait joie et si l'acole; 
Faux est liés de bele parole, 
Si l'en a mout tost avisé. 
A grant joie ont lor tans usé 
Trestoute la semaine entiere: 
82c.2468 
Deduis de bos et de rivieres 
Y ot mout qui les vaut avoir; 
Et qui veut la tere veoir 
Que mesire Yvains ot conquise 
En la dame que il ot prinse, 
Si se pueent aler esbatre 
En .vi. lieus, en .v. ou en quatre, 
Par les chastiaus de la entour. 
Quant li rois ot fait sen sejour 
Tant qu'il n'i vaut plus arrester, 
Si fist on son oirre aprester. 
Mais il avoient la semaine 
Trestuit proiié et mis en paine, 
Du plus qu'i s'en porrent pener, 
Que il en peüssent mener 
Monseigneur Yvain avec eux. 
« Conment! Seroit che or de chix, 
Che disoit mesire Gavain, 
Qui pour lor fenmes valent mains? 
Honnis soit de sainte Marie 
Qui pour empirier se marie! 
Amender doit de bele dame 
Qui l'a a amie ou a fenme, 
Ne n'est puis drois que ele l'aint 
Que ses pres et ses los remaint. 
Chertes, encore serois iriés 
De s'amor, se vous empiriés; 
Que fenme a tost s'amor reprise, 
Ne n'a pas tort, s'ele desprise 
Chelui qui devient de l'empire 
Sire qui pour s'amour empire. 
82d.2499 
Primes en doit vostre pris croistre. 
Rompés le frain et le chavestre, 
S'irons tournoier avec vous, 
Que on ne vous apiaut jalous. 
Or ne devés vous pas songier, 
Mais le tournoiement paier 
Et emprendre a fort jouster, 
Quoi que il vous doie couster. 
Assés songe qui ne se muet! 
Chertes, venir vous en estuet 
Sans vous envoier autre ensengne. 
Gardés que en vous ne remaigne, 
Biaus conpains, vostre* compagnie, 
Qu'en moi ne faurra ele mie. 
Merveille est conment en nature 
Delaisse chou qui tant li dure. 
Bien adurchist par delaier 
Et plus est duel a ensaier 
Unz petis biens, quant il delaie, 
C'uns grans, qui tout adés ensaie. 
Joie d'onnor qui vient a tart 
Sanle la vert busche qui art 
Et dedans rent plus grant calor 
Et plus se tient en sa valour 
Et* plus se tient de alumer. 
On puet tel chose acoustumer 
Qui mout est grieve a retraire; 
Quant on le veut nel puet on faire. 
Et pour che ne le di je mie, 
Se j'avoie si bele amie 
Con vous avés, sire compains! 
83a.2530 
Foy que je doi Dieu et ses sains, 
Mout a envis le laisseroie. 
A enscient, fax en seroie. 
Mais tel conseille bien autrui, 
Qu'il ne saroit conseillier lui, 
Aussi conme li precheour 
Qui sont desloial tricheour, 
S'ensengnent et dient le bien 
Dont il ne veulent faire rien! » 
Mesire Gauvains tant li dist 
Cheste chose et tant li requist 
Qu'il creanta qu'i le diroit 
A se fenme et si s'en iroit 
S'il em pooit congié avoir; 
Or faiche folie ou savoir, 
Ne laira que congié ne prengne 
De retourner en la Bretaigne. 
La dame en a a conseil trait, 
Qui du congié pas ne sahait*, 
Si li dist: « Ma tres chiere dame, 
Vous qui estes mes cuers et m'ame, 
Mes biens, ma joie et ma santés, 
Une chose me creantés, 
Pour vostre honor et pour la moie. » 
La dame tantost li otroie, 
Qu'il ne set qu'i veut demander 
Et dist: « Biau sire, conmandés 
Me poés che que boin vous iert. » 
Maintenant congié li requiert 
Mesire Yvains de convoier 
Le roy et d'aler tournoier, 
83b.2561 
« Que on ne m'apiaut recreant. » 
Ele respont: « Jel vous creant, 
Le congié, jusc'a .i. termine. 
Mais l'amours devenra haÿne, 
Que j'ai a vous, seur en soiés, 
Chertes, se vous trespassiés 
Le terme que je vous dirai, 
Que ja ne vous en mentirai. 
Se vous mentés, j'en dirai voir. 
Se vous volés m'amour avoir 
Et de riens nule m'avés chiere, 
Pensés du revenir arriere, 
...* 
VIII. jours aprés le Saint Jehan, 
Hui en chest jour sont les ottaves. 
De m'amour serés mas et aves 
Se vous n'estes a ychel jour 
Avec moi chaiens a sejour. » 
Mesire Yvains pleure et souspire 
Si qu'a grant paine puet il mot dire: 
« Dame, chis termes est trop lons. 
Se je pooie estre o vous 
Toutes les fois que je vaurroie, 
Mout souvent avec vous seroie. 
Et je pri Dieu que, s'i li plaist, 
Ja tant demourer ne me laist. 
Mais tix cuide mout tost venir 
Qui ne set que li est avenir*. 
Et je ne sai qui m'avenra, 
Se ensonnes me retenra 
De maladie ne de prison; 
S'avés de tant fait mesprison 
83c.2593 
Que vous ne m'avés mise hors 
Seviaus l'ensonne de men cors. 
- Sire, fait ele, et je l'i met; 
Et neporquant bien vous promet 
Que, se Dix de mort vous deffent, 
Nus ensoines ne vous atent 
Tant con vous souvenra de moi. 
Mais or metés en vostre doi 
Chest mien anel, que je vous prest; 
Et de le pierre quele ele est 
Vous dirai je tout en apert: 
Prison ne tient ne sanc ne pert 
Nus amans vrais ne loiaus, 
Ne avenir ne li puet maus, 
Mais qu'il le port et chier le tiegne, 
Et de s'amie li souviengne; 
Anchois devient plus durs que fers. 
Chil vous iert escus et haubers 
Et voir ains mais a chevalier 
Ne le vau prester ne baillier, 
Mais par amors le vous doin je. » 
Or a mesire Yvains congié; 
S'ont mout plouré au congié prendre. 
Et li rois ne vaut plus atendre 
Pour riens dire c'on li seüst, 
Ains quemanda que lors eüst 
Tous ses paleffrois amenés, 
Appareilliez et enfrenés. 
Des qu'il le vaut, mout fu tost fait; 
Li paleffroi furent hors trait, 
Si n'ia mais que du monter. 
83d.2624 
Ne sai que vous doie conter, 
Conment mesire Yvains s'en part, 
Et des baisiers c'on li depart, 
Qui furent de lermes semé 
Et de douchour enbasumé. 
Et del roy, que vous conteroie, 
Conment le dame le convoie 
Et ses pucheles avec li 
Et si chevalier autressi? 
Trop i feroie grant demore. 
Le dame, pour che qu'ele plore, 
Prie li rois de remanoir 
Et de raler en son manoir; 
Tant li prie qu'a mout grant paine 
S'en retourne, ses gens en maine. 
Mesire Yvains, mout a anvis, 
S'est de sa dame departis, 
Ainsi que li cuers ne se muet. 
Li rois le cors mener en puet, 
Car del cuer n'en merra il mie, 
Qui si se tient et si se lie 
Au cuer chele qui s'en remaint 
Qu'il n'a pooir qu'il le renmaint; 
Des que li cors est sans le cuer, 
Conment puet il vivre a nul fuer? 
Et se li cors sans le cuer vit, 
Tel merveille nus hom ne vit. 
Cheste merveille est avenue 
Qu'il a la vie retenue 
Sans le cuer, qui estre y soloit, 
Que plus sieurre ne le voloit. 
84a.2655 
Li cuers a boine remananche 
Et li cors vit en esperanche 
De revenir au cuer arriere; 
S'a fait cuer d'estrange maniere, 
D'esperanche qui mout souvent 
Traïst et fausse de couvent. 
Ja, je cuit, l'eure ne sara 
Que esperanche traÿ l'ara; 
Car se il .i. seul jour trespasse 
Du terme qu'il ont a masse, 
Mout a envis trouvera mais 
A sa dame trieve ne pais. 
Et je quit que le passera, 
Car departir ne laissera 
Mesire Gauvains d'avec li. 
As tournoiemens vont ambedui 
Par tous les lieus lau on tournoie. 
Et li ans passa toutes voie, 
Ne* fist si bien mesire Yvains 
Tout l'an que mesire Gauvains 
Se penoit de lui honnerer. 
Et si le fist tant demourer 
Que tous li ans fu trespassés 
Et de l'autre an partie assés, 
Tant que a la mi aoust vint, 
Que li rois court a Chestre tint. 
Et furent la veille devant 
Revenu d'un tournoiemant 
Ou mesire Yvains ot esté; 
S'en out tout le pris aporté, 
Et dist li compains*, che me samble, 
84b.2686 
Que chil doi conpagnon ensamble 
Ne vaurrent en nul lieu descendre, 
Ains firent lor paveillon tendre 
Hors de la vile et court tinrent; 
Onques a court de roi ne vinrent, 
Anchois vint li rois a la lour, 
Car avec eux sont li mellour 
Des chevaliers et tout li plus. 
Entr'eus seoit li rois Artus, 
Et Yvains lors si conmencha 
A penser que lors ne fina, 
Que a sa dame ot congié pris, 
Ne fu tant de penser souspris 
Com de chelui, quar bien savoit 
Que couvant menti li avoit 
Et trespassés estoit li termes. 
A grant paine tenoit ses lermes, 
Mais hontes li faisoit tenir. 
Tant pensa que a lui* venir 
Une damoisele a droiture; 
Et vint mout tres grant ambleüre 
Seur un paleffroi noir bauchent; 
Devant le paveillon dessent, 
Que nus n'ala son cheval prendre, 
Ne nus ne fu a son dessendre. 
Et leus que le roy pot veoir, 
Laissa jus son mantel cheoir; 
Ainsi toute desafublee 
En est el paveillon entree 
Et tres devant le roy venue; 
Si dist que sa dame salue 
84c.2717 
Le roy et monseigneur Gauvain 
Et tous les autres, fors Yvain, 
Le desloial, le jangleour, 
Le menchongnier, le guileour, 
Qui l'a gabee et decheüe; 
Bien a sa guile apercheüe, 
Qu'i se faisoit le vrai amerres, 
S'estoit faus, soidoians et lerres. 
Ma dame a cheste raison dite, 
Qu'il n'estoit de nul mal requite 
Ne ne quidoit pas, a nul fuer, 
Qu'il li deüst embler son cuer. 
Chil n'enblent pas les cuers qui prent* 
Tix y a qui larrons les claiment, 
Qui en amor sont non veant, 
Samblant font d'amer en devant. 
Et chil sont larron ypocrite 
Et traïtour qui metent luite 
Es cuers embler dont eux ne chaut; 
Mais li amis, quel part qu'il aut, 
Le tient chier et si le raporte. 
Mais Yvain a ma dame morte, 
Qu'ele li dist qu'il li gardast 
Son cuer et si li raportast 
Anchois que fust passés li ans. 
Yvains mout fu or oublians 
Qu'il ne te puet resouvenir 
Que tu deüsses revenir 
A ma dame au bout de l'an; 
Jusques au jour de saint Jehan 
Te donna ele de respit; 
84d.2752 
Et tu l'eüs en tel despit 
Que onques puis ne t'en membra. 
Me dame paint en sa cambre a 
Tretous les iours et tout le tans, 
Quar qui aime en grant pourpens 
Est qu'il ne puet prendre boin sonme, 
Mais toute nuit tourne et retourne* 
Et les jours qui vienent et vont. 
Ses tu conme li amant font? 
Content le tans et le saison. 
N'i sui pas venue sans raison, 
Car vous ai trouvé a sejour. 
Si ne di je pas pour clamour, 
Tant t'en di bien traï nous a 
Qui a ma dame t'espousa. 
Yvain, n'a mais cure de toi 
Ma dame, ains te mande par moi 
Que janmais a li ne reviengnes 
Ne son anel plus ne detiengnes. 
Par moi, que chi en present vois, 
Te mande que tu li envois: 
Rent li, car rendre le t'estuet. » 
Yvains respondre ne li puet, 
Que sens et parole li faut; 
Et la damoisele avant saut, 
Si li osta l'anel du doi; 
Puis si conmande a Dieu le roi 
Et tous les autres, fors chelui 
Qui ele laisse en grant anui. 
Et ses anuis tousjours li croist 
Et quanque il voit li en croist. 
85a.2783 
Bien vaurroit estre en tel lieu 
Muchiés, en .i. bien secré lieu, 
Tous seus, en si sauvage terre 
Que on ne le seüst ou querre 
N'onme ne fenme n'i eüst 
Ne nuls de lui riens ne seüst 
Nient plus que s'il fust en abisme. 
Ne het tant riens con li meïsmes 
85b.2791 
Ne ne set a qui se confort 
De lui meïsmes, qu'il a mort. 
Mix ameroit vis erragier 
Que il ne s'en peüst vengier 
De lui, qui joie s'est tolue. 
D'entre les barons se remue, 
Qu'il crient entr'eux issir du sen; 
Et de che ne se gardoit l'en, 
85c.2799 
Si l'en laisserent seul aler: 
Bien sevent que de lor parler 
Ne de lor siecle n'a il soing. 
Et il va tant qu'il fu mout loing 
Des tentes et des paveillons. 
Lors li monta .i. troubeillons 
El chief, si grant que il forsenne; 
Lors se desschire et se despenne 
Et fuit par cans et par valees, 
Si laisse ses gens esgarees, 
Qu'il se merveillent ou puet estre: 
Querant le vont par trestout l'estre, 
Par les hostix ad chevaliers 
Et par haies et par vergiers; 
Si le quierent lau il n'est pas. 
Et il s'en va plus que le pas 
Tant qu'il trouva deles .i. parc 
Un garchon qui portoit .i. arc 
Et tout plain de seetes barbees 
Qui mout ierent trenchans et lees. 
S'ot tant de sens que au garchon 
Erraument toli son archon 
Et les saietes qu'il tenoit. 
Pour che mais ne li souvenoit 
De nule riens qu'il eüst faite. 
...* 
Et lors ochist et si menjue 
La venoison trestoute crue. 
Et tant conversa el boscage, 
Conme hom forsenés et sauvage, 
C'une maison a .i. hermite 
Trouva mout basse et mout petite; 
85d.2831 
Et li hermites essartoit. 
Quant vit chelui qui nus venoit, 
Bien puet savoir, sans nul redout, 
Qu'il n'avoit mie le sens tout; 
Et il li* fist, tres bien le sout; 
De la paour que il en out 
Se feri en sa maisonnete. 
...* 
Desus une fenestre estroite. 
Et chil vient la qui mout couvoite 
Le pain et si le prent, s'i mort; 
Ne quit que onques mais si fort 
Ne de si dur eüst gousté; 
N'avoit mie .xx. sols cousté 
Le sestier dont fu fais li pains; 
Que plus estoit surs que levains, 
D'orge iert pertris avec paille, 
Avec che estoit il sans faille 
Musy et ses conme une escorche. 
Mais li fains l'angousse et efforche 
Tant que le pout li sout li pains, 
C'a tous mengiers est fausse* fains 
Bien destenpree et bien confite. 
Tout manja le pain a l'ermite 
Mesire Yvains, que boin li sout, 
Et but de l'iaue froide au pout. 
Quant mengié ot si se refiert 
El bois, et chiers et bisses quiert; 
Et li boins hom mout le doutoit, 
Prie Dieu, quant aler l'en voit, 
Qu'il le deffende et qu'i le gart 
Qu'il ne viengne mais chele part. 
86a.2859 
Mais nepourquant*, conment qu'il ait, 
Que lau on li a le bien fait 
Ne reviengne mout volentiers. 
Puis ne passa .i. jour entiers, 
Tant conme il fu en chele rage, 
Que aucune beste sauvage 
Ne li aportast a son huis. 
Ycheste vie mena puis, 
Et li boins hom s'entremetoit 
De l'escorchier et si metoit 
Assés de la venison cuire; 
Et li pains et l'iaue en la buire 
Estoit tousjours seur la fenestre 
Pour l'onme forsené repaistre. 
S'avoit a mengier et a boivre 
Venison sans sel et sans poivre 
Et yaue froide de le fontaine. 
Et li boins home estoit em paine 
Des cuirs vendre d'achater pain 
D'orge ou de paille ou de grain. 
S'ot puis toute sa livrison 
Pain a plenté et venison, 
Qu'il li dura tant longuement 
C'un jor le trouverent dormant 
En la forest .ii. damoiseles 
Et une lor dame avec eles 
De qui maisnie eles estoient. 
Vers l'onme nu qu'eles veoient 
Keurt et dessent l'une des trois; 
Mais mout le regarda anchois 
Que nule riens sor li veïst 
86b.2890 
Qui reconnoistre li feïst; 
Ja l'avoit ele tant veü 
Que tost l'eüst reconneü 
Se il fust de si riche atour 
Com ele l'ot veü maint jour. 
Au reconnoistre mout tarda 
Et nepourquant bien l'esgarda 
Que en la fin li fu avis 
D'une plaie qu'il ot el vis; 
C'une tel plaie el vis avoit 
Mesire Yvains, bien le savoit, 
Qu'ele l'avoit souvent veüe. 
Par la plaie s'est percheüe 
Que che est il, de riens n'en doute; 
Mais de che se merveille toute 
Conment che li est avenu 
Qu'ainsi l'a trouvé povre et nu. 
Ne le boute ne ne l'esveille, 
Mais mout li vient a grant merveille; 
Et prent son cheval, si remonte 
Et vient ad autres, si lor conte 
S'aventure toute en plourant. 
Ne sai qu'alaisse demourant 
A conter le duel qu'ele en fist; 
Mais plourant a sa dame dist: 
« Dame, je ay Yvain trouvé, 
Le chevalier mix esprouvé 
Del monde et mix entichié; 
Mais je ne sai par quel pechié 
Est au franc honme mescheü; 
Espoir, aucun duel a eü 
86c.2921 
Qui le fait ainsi demener, 
C'on puet bien de duel forsener; 
Savoir et veoir puet on bien 
Que il n'est mie en son sens bien, 
Que ja voir ne li avenist 
Que si vilment se contenist 
Se il n'eüst le sens perdu. 
Car li eüst or Dix rendu 
Le sens au mix que il eut onques 
Et puis si li pleüst adonques 
A remanoir en vostre hostel 
En aidant chiaus de vo chastel! 
Li cuens Aliers qui vous guerroie, 
Le guerre de vous ii. verroie 
A vostre grant honnor finee 
Se Dix si boine destinee 
Li donnoit qu'il le remeïst 
En son sens; si s'entremeïst 
De vous aidier a chest besoing. » 
Le dame dist: « Or n'aiés soing, 
Que chertes, se il ne s'en fuit, 
Que la rage, si con je quit, 
Li hosterons nous de la teste, 
Toute doleur et la tempeste. 
Mais tost aler vous y couvient, 
Car d'un onguement me souvient 
Que me donna Margue la sage; 
Et si me dist que nule rage 
N'est en le teste qu'il n'en ost. » 
Vers le chastel s'en vont mout tost, 
Qui seoit pres et n'i ot pas 
86d.2952 
Plus de demie lieue au pas, 
As lieues qui el païs sont, 
Car a mesure des nos sont 
Les deuz une, les quatre deuz. 
Chil remest la dormant tous seuz, 
Et chele ala l'onguement querre. 
La dame un sien escrin desserre, 
La boiste en traist et si la charge 
A la damoisele, et trop large 
Li prie que ele n'en soit, 
Les temples et le front l'en froit, 
Que ailleurs point metre n'en besoigne. 
Seulement les temples l'en oingne, 
Et le remanant bien li guart, 
Qu'il n'a point de mal autre part 
Fors que seulement el chervel. 
Robe vaire, cote et mantel 
Li fait porter, de soie en graine. 
Chele le prent et si li maine 
En destre un paleffroi mout boin, 
Et avec che y met du soin: 
Chemises, braies deliees 
Et chausses neuves bien taillies. 
A tout ychou, ainsi s'en va; 
Encor chelui dormant trouva 
La ou ele l'avoit laissié. 
Ses chevaus met en un plaissié, 
Si les atache et lie fort, 
Et puis s'en va lau ou chil dort, 
Atout le reube et l'onguement, 
Et fait mout tres grant hardement, 
87a.2983 
Que del forsené tant s'aproche 
Que ele le manoie et touche; 
Et prent l'onguement si l'en oint 
Tant conme en la boiste en a point, 
Car sa garison tant convoite 
Que de l'oindre partout s'esploite; 
Si le met trestout en despense, 
Que ne li chaut de la deffence 
Sa dame, qu'il ne l'en souvient. 
Plus y en met qu'il n'en couvient; 
Mais bien, che li est vis, l'emploie: 
Les temples oint et tout le cors 
Que du chervel l'en issi hors 
Le rage et le melancolie. 
Mais du cors oindre fist folie, 
Qu'il ne li estoit nus mestiers. 
S'il en i eüst .v. sestiers, 
S'eüst ele autel fait, je cuit. 
Le boiste emporte, si s'en fuit, 
Si s'est vers ses chevax reposte; 
Mais la robe mie n'en oste 
Pour che que, se Dix le ravoie, 
Que il le voie enmi la voie 
Et qu'il le prengne et qu'i s'en veste. 
Derrier un grant chaisne s'arreste 
Tant que il ot dormi assés; 
Si fu garis et respassés, 
Et rot son sens et son memore. 
Mais nus se voit con .i. yvoire, 
S'a grant honte, et plus grant eüst 
Se il s'aventure seüst, 
87b.3017 
Mais n'en set plus que nu se treuve. 
Devant li voit le reube neuve, 
Si se merveille a desmesure 
Conment et par quel aventure 
Chele robe estoit la venue; 
Mais de sa char que il voit nue 
Est trespensés et esbahis, 
Et dist que mors est et traïs 
S'ainsi l'a trouvé ne veü 
Riens nule qui l'ait conneü. 
Et toutesvoies si s'en vest 
Et regarde par la forest 
S'il venroit nul honme venir. 
Lever se cuide et soustenir, 
Mais il ne puet qu'aler s'en puisse. 
Mestiers li est c'aieue truise 
Qui li aït et qui l'en maint, 
Car si l'a ses grans maus ataint 
Qu'a paines puet seur piés ester. 
Or n'i veut mais plus arrester 
Le damoisele, ains est montee 
Et par decoste lui alee, 
Aussi con s'el ne l'i seüst. 
Et chil, qui grant mestier eüst 
D'aÿde, ne li chausist quel, 
Qu'il le menast jusqu'a l'ostel 
Tant que il refust en sa forche, 
De li apeler mout s'efforche. 
Et la damoisele autresi 
Va regardant environ li 
Con s'ele ne saiche qu'il a. 
87c.3048 
Apelee, va cha et la, 
Que droit vers li ne veut aler. 
Et chil conmenche a rapeler: 
« Damoisele, de cha! de cha! » 
Et le damoisele adrecha 
Vers lui sen paleffroi amblant. 
Cuidier li fait par tel samblant 
Qu'ele de lui riens ne savoit 
N'onques mais veü ne l'avoit, 
Et sens et courtoisie fist. 
Quant devant li fu, si li dist: 
« Sire chevaliers, que volés, 
Qui a tel besoing m'apelés? 
- Ha! fait il, damoisele sage, 
Trouvés me sui en chest boscage, 
Je ne sai par quel mescheanche. 
Pour Dieu et pour vostre creanche 
Vous pri que en tous guerredons 
Me prestés ou donnés en dons 
Chel paleffroi que vous menés. 
- Volentiers, sire, mais venés 
Avec moi la ou je m'en vois. 
- Quel part es che? - Hors de chest bois, 
A un chastel de chi selonc. 
- Damoisele, or me dites donc 
Se vous avés mestier de moi. 
- Oïl, fait ele, mais je croi 
Que vous n'estes mie bien sains; 
Dusqu'a quinzaine, a tout le mains, 
Vous couvenroit a sejour estre; 
Chest cheval que je maine en destre 
87d.3079 
Prenés, s'irons jusqu'a l'ostel. » 
Et chil, qu'il ne demandoit el, 
Le prent et monte; si s'en vont 
Tant qu'il vinrent enmi le pont 
Dont l'iaue estoit roide et bruianz. 
Le damoisele rue dedans 
Le boiste qu'ele portoit wide; 
Ainsi vers la sale se cuide 
De son onguement escuser, 
Qu'ele dira que au passer 
Du pont ainsi li mescheï 
Que la boiste en l'iaue chaï: 
Pour che que dessous li chopa 
Ses paleffrois, li eschapa 
Des mains le boiste et a bien prés 
Que ele ne chaï aprés, 
Mais adont fust le perte graindre. 
Cheste menchongne veut enfraindre* 
Quant devant sa dame iert venue. 
Ensamble ont lor voie tenue 
Tant c'au chastel en sont venu; 
Si a la dame retenu 
Monseigneur Yvain liement; 
Et sa boiste et son onguement 
Demanda a sa damoisele, 
Mais che fu a conseil; et chele 
Li a sa menchongne retraite, 
Ytele con ele l'avoit faite, 
Que le voir ne li osa dire. 
S'en ot la dame mout grant ire 
Et dit: « Chi a mout laide perte, 
88a.3110 
Car de che sui seüre et cherte 
Qu'ele n'iert janmais retrouvee. 
Mais puis que la chose est alee, 
Il n'i a que du conforter. 
Tele eure quidon desider 
Son bien c'on desire son mal; 
Aussi conme de chest vassal 
Cuidoie bien et joie avoir, 
Si ai perdu de mon avoir 
Tout le meilleur et le plus chier. 
Nepourquant mout vous veul proier 
De lui servir seur toute rien. 
- A! dame, or dites vous mout bien, 
Car che seroit trop malvais jeus 
Qui d'un damage feroit deus. » 
Atant de la boiste se taisent; 
Et monseigneur Yvain aaisent 
De tout che que püent et sevent; 
Si le baignent et son chief levent, 
Et le font rere et rouongnier, 
Car on li peüst apongnier 
Le barbe a plain poing seur le faiche. 
Ne veut chose c'on ne li faiche: 
S'il veut armes, on li atourne; 
S'il veut chevax, on li sejourne, 
Grant et isnel fort et hardi. 
Tant sejourna c'a .i. mardi 
Vient au chastel li cuens Aliers 
A serjans et a chevaliers, 
Et metent fus et prennent proies. 
Et chil du chastel toutesvoies 
88b.3141 
Montent et d'armes se garnissent; 
Armé et desarmé s'en issent 
Tant que les coureours ataignent, 
Et pour eux fuir ne degnierent, 
Ains les atendent a un pas. 
Et mesire Yvains fiert el tas, 
Qui tant a esté sejournés 
Qu'en sa forche fu retournés; 
Si feri de si grant vertu 
Un chevalier deseur l'escu 
Qu'il mist en .i. mont, che me samble, 
Cheval et chevalier ensamble, 
N'onques puis chil ne se leva, 
Qu'el ventre li cuers li creva 
Et fu parmi l'eschine frais. 
Un petit s'est arriere trais 
MesireYvains et si rekeuvre; 
...* 
Et poinst pour le pas descombrer. 
Si tost c'on ne porroit nombrer 
Et un et deuz et trois et quatre. 
Qui dont li esveïst abatre 
Plus tost et plus delivrement 
Quatre chevaliers erraument! 
Et chil qui avec li estoient 
Pour lui grant hardement prenoient; 
Que tix a povre cuer et lasche, 
Quant il voit c'uns prodons entasche 
Devant lui toute une besoigne, 
Que maintenant honte et vergongne 
Li keurt sus et si giete hors 
Le povre cuer qu'il a el cors, 
88c.3173 
Si li donne avivement 
Cuer de prodonme et hardement. 
Ainsi sont chil devenu preu, 
Si tient mout bien chascuns son leu 
En la mellee et en l'estour. 
Et la dame fu en l'estour* 
De son chastel montee en haut 
Et vit le mellee et l'assaut 
Au pas desraingnier et conquerre, 
Et vit assés jesans par terre 
Des afolés et des malmis, 
Des siens et de ses anemis, 
Mais des autres plus que des sienz. 
Car li courtois, li plains de bienz, 
Mesire Yvains tout autresi 
Les faisoit venir a merchi 
Con li faucons fait les cerchelles. 
Et disoient et chil et cheles 
Qui el chastel dedens estoient, 
Qui les batailles regardoient: 
« Ahi! con vaillant sodoier! 
Con fait ses anemis ploier! 
Com roidement il les requiert! 
Tout autresi entr'eus se fiert 
Com li lions entre les dains 
Quant l'angousse et cache li fains. 
Et tuit nostre autre chevalier 
En sont plus hardi et plus fier, 
Que ja, se par lui seul ne fust, 
Lanche brisie n'i eüst 
N'espee traite pour ferir. 
88d.3204 
Mout doit on amer et chierir 
Un prodonme quant on le treuve. 
Veés or conment chil se prove, 
Veés or con se tient en ranc, 
Veés con emporte de sanc 
Se lanche et s'espee nue, 
Veés conment il les remue, 
Veés conment il les entasse, 
Com il lor vient, con il les passe! 
...* 
Mais au guenchir petit sejourne 
Et mout demeure en son retour; 
Veés, quant il vient a l'estour, 
Conme il a poi son escu chier, 
Que tout le laisse depechier; 
N'en a pitié ne tant ne quant, 
Mais il se remet mout en grant 
Des caux vengier que on li donne. 
Que de trestout le bois d'Argonne 
Qui en feroit lanches, je quit, 
N'en aroit nule encore anuit, 
C'om ne li puet tant metre el fautre 
Com il depieche et demande autre. 
Et veés conment il le fait 
De l'espee quant il la trait! 
Onques ne fist pas* Durendal 
Rollant, de Turs, si grant essart 
En Rainchevax ne en Espaigne. 
Se il eüst en sa compagne 
Auques de si boins compagnons, 
Li feux de qui nous nous plaingnons 
89a.3235 
S'en alast anuit desconfis 
Ou il remausissent honnis. » 
Et dïent de boin jour seroit nee 
Cui il aroit s'amour donnee, 
Qui si est as armes puissans 
Et seur tous autres connissans, 
Si con chierges entre chandoiles 
Et la lune entre les estoiles 
Et li solaus deseur la lune; 
Et de chascun et de chascune 
A si les cuers que tuit vaurroient, 
Pour la proeche qu'en li voient, 
Que il eüst la dame prinze, 
Si fust la tere en sa devise. 
Ainsi tuit et toutes prisoient 
Chelui dont verité disoient, 
Car chix de la a si atains 
Que il s'en fuient que ains ains; 
Mais il les cache mout de pres 
Et tuit si conpagnon aprés, 
Que les lui sont tout a seür 
Con s'i fussent enclos de mur 
Haut et espés de pierre dure. 
La chasse mout longuement dure 
Tant que chix qui fuient ataignent 
Et chil qui chassent les mehaignent 
Et leurs chevax lor esbouelent. 
Li uns par seur les murs roelent, 
Qui s'entrafolent et ochïent, 
Laidement s'entrecontralïent. 
Et li cuens tout adés s'en fuit, 
89b.3266 
Mais mesire Yvains le conduit, 
Qui de lui si grever se faint; 
Tant l'a haché que il l'ataint 
Au pié d'une haute montee, 
Et che est mout pres de l'entree 
D'un fort rechet qui estoit siens. 
Et la fu retenu li cuens 
Et que nus ne li pot aidier; 
Et sans trop longuement plaidier 
Le prinst la hors mesire Yvains, 
Que, des que il le tint as mains 
Et il furent seul per a per, 
Il n'i ot nient de l'eschaper, 
Ne du guenchir, ne du deffendre, 
Ains li plevi qu'il s'iroit rendre 
A la dame de Noroison, 
Si se metroit en sa prison, 
Si feroit pais a sa devise. 
Et quant il en ot la foy prinze, 
Si li fait son chief desarmer 
Et l'escu de son col oster, 
Et l'espee li rendi nue. 
Cheste honnor li est avenue 
Qu'il en maine le conte pris, 
Si le rent a ses anemis, 
Qu'il n'en font pas joie petite. 
Mais ains fu la nouvele dite 
Au chastel ains qu'il y venissent 
Encontre eux tuit et toutes issent, 
Et le dame devant tous vient. 
Mesire Yvains par la main tient 
89c.3297 
Son prisonnier, si li presente. 
Sa volenté et sa creanche* 
Fist dont li cuens et son creant, 
Et par foy et par seremant 
Et par pleges l'en fist seüre; 
Pleges li donna et li livre* 
Que tousjours mais pais li tenra 
Et sa perte li restorra, 
Tant qu'ele en mousterra par prueves, 
Et refera ses maisons nueves 
Que il avoit par tere mises. 
Quant ches choses furent assises 
Ainsi con a la dame sist, 
Mesire Yvains congié li quist; 
Et ele ne li donnast mie 
Se il a fenme ou a amie 
Le vausist prendre et nochoier. 
Mesire Yvains nis convoier 
Ne se vaut il laissier .i. pas, 
Ains s'en parti isnel le pas, 
Si se mist a la voie arriere, 
C'onques ne li valut proiere, 
Et laissa mout le dame irie 
Que il avoit mout faite lie. 
Et con plus lie l'avoit faite 
Plus li poise et plus li dehaite 
Quant il ne veut plus demourer; 
Or le vausist ele honerer, 
Et si feïst, s'i li pleüst, 
Seigneur de quanques ele eüst, 
Ou ele li eüst donnees 
89d.3328 
Pour son serviche grans saudees, 
Si grans con il les vausist prendre. 
Mais il ne vaut onques atendre 
Parole d'onme ne de fenme; 
Des chevaliers et de la dame 
S'est partis outre leur despois, 
Car plus retenir ne lor lois*. 
Mesire Yvains pensis chemine 
Tant qu'il vint en une gaudine 
Et lor oÿ enmi le gaut 
Un cri mout dolereus et haut. 
Si s'esdrecha leus vers le cri, 
Chele part ou il l'ot oÿ, 
Et quant il parvint chele part 
Vit .i. lion, en .i. essart, 
Et .i. serpent qui le tenoit 
Par le keue, si li ardoit 
Toutes les rains de flambe ardant. 
N'ala mie mout regardant 
Mesire Yvains chele merveille; 
A lui meïsmes se conseille 
Auquel des deuz il aidera. 
Lor dist c'au lyon aidera, 
Qu'a enuious et a felon 
Ne doit on faire se mal non, 
Et li serpens est enuious, 
Si li saut par la goule fus, 
Tant est de felonnie plains. 
Che se pense mesire Yvains 
Qu'il l'ochirra premierement; 
L'espee trait et vient avant 
90a.3359 
Et met l'escu devant se faiche, 
Que la flambe mal ne li faiche 
Que il getoit parmi la gole, 
Qui plus estoit lee d'un ole. 
Cheli* lions aprés l'assaut, 
De la bataille ne li faut; 
Mais quoi qu'il en aviengne aprés, 
Aidier li vaurra il adés, 
Que pités l'en semont et prie 
90b.3368 
Qu'il faiche secours et aÿe 
A la beste gentil et franche. 
A l'espee fourbie et blanche 
Va le felon serpent requerre; 
Si le trenche jusques en terre 
Et les .ii. moitiez retronchonne, 
Fiert et refiert, et tant l'en donne 
Que tout l'amenuse et depieche. 
Mais de le keue une pieche 
90c.3377 
Li couvint trenchier du leon, 
Pour la teste au serpent felon 
Qui engoulee li avoit; 
...* 
L'en trencha, c'onques mains n'en poit. 
Quant le leon delivré eut, 
Cuida qu'a li li couvenist 
Combatre et que sus li venist; 
Mais il ne le pensa onques. 
Oyés que fist li leons donques: 
Il fist que frans et deboinaire, 
Que il li conmencha a faire 
Samblant que a lui se rendroit, 
Et ses piés joins li estendoit, 
Puis se va vers tere fichier; 
Si s'estuet seur .ii. piés derrier 
Et puis si se ragenoulloit 
Et toute se faiche moulloit 
De lermes, par humilité. 
Mesire Yvains, par verité, 
Set que li leons l'en merchie 
Et que devant lui s'umilie 
Pour le serpent qu'il avoit mort 
Et lui delivre de la mort; 
Si li plaist mout cheste aventure. 
Pour le venin et pour l'ordure 
Du serpent, essue s'espee, 
Si l'a el fuerre reboutee, 
Puis se remet il a la voie. 
Et li leons les lui costoie, 
Que janmais ne s'en partira, 
Tousjors mais avec li sera, 
90d.3409 
Que servir et garder le veut. 
Devant a la voie s'aqueut 
Tant qu'il senti desous le vent, 
Si conme il s'en aloit devant, 
Bestes sauvages en pasture; 
Si le semonst fains et nature 
D'aler em proie et de cachier 
Pour sa vitaille pourcachier; 
Che veut nature qu'i le faiche. 
Un petit s'est mis en la trache 
Tant qu'a son seigneur a moustré 
Qu'il a senti et encontré 
Vent et flair de sauvage beste. 
Lors le regarde si s'areste, 
Car il le veut servir a gré, 
Que encontre sa volenté 
Ne vaurroit aler nule part. 
Et chil aperchoit son esgart 
Qu'il li moustre que il atent; 
Bien l'aprechoit, et bien l'entent, 
Que s'il remaint, il remanrra, 
Et, s'i li siet, que il prendra 
La venison qu'il a sentie. 
Lors le semont et si l'escrie 
Aussi conme .i. brachet feïst; 
Et li leons maintenant mist 
Le nes au vent qu'il ot senti; 
Ne ne li ot de riens menti: 
Il n'ot pas une archie alee 
Quant il vit en une valee 
Tout seul pasturant un chevroil. 
91a.3440 
Chestui avra il a son voil, 
Et il si ot au premier saut, 
Puis si en boit le sanc tout chaut. 
Quant ochis l'eut si le geta 
Seur son dos, si l'en emporta 
Tant que devant son seigneur vint, 
Qui puis en grant chierté le tint 
Pour la grant amor qu'en li ot. 
Ja fu pres de nuit, si li plot 
Que ileuc se herbegeroit 
Et du chevroil escorcheroit 
Tant conme il en vaurroit mengier. 
Lors le conmenche a escorchier; 
Le cuir li fent deseur la coste, 
De le longne .i. lardel li oste; 
Et trait le fu d'un charbon vis, 
S'a de le seche busche pris; 
Si rosti tant que tous fu cuis, 
Mais du mengier fu nus deduis, 
Que il n'i ot ne pain ne sel 
Ne nape ne coutel ne el. 
Quantqu'il menja devant lui vit 
Sen lion, onques ne s'en muit; 
Ains l'a tout adés regardé 
Tant qu'il ot pris tant du lardé 
Et tant mengié qu'il n'en pot plus. 
Du chevroil trestout le sousplus 
Menga li leons jusques ad os. 
Et il tint son chief a repos 
Toute la nuit sor son escu, 
A tel repos conme che fu; 
91b.3473 
Et li leons ot tant de sens 
Qu'il veilla et fu en espens 
Du cheval garder, qui paissoit 
L'erbe, qui petit l'encrassoit. 
Au matin s'en revont ensamble 
Et autel vie, che me samble, 
Menerent toute le quinzaine 
Tant c'aventure a le fontaine 
Deseur le pin les amena. 
La par poi ne se forsena 
Mesire Yvains, autre feïe, 
Quant le fontaine ot aprochie 
Et le perron et le chapele. 
Mil fois las et dolent se claime 
Et chiet pasmés, tant fu dolans. 
Et s'espee, qui fu coulans, 
Chiet du fuerre, si li apointe 
Ad mailles du hauberc la pointe, 
Endroit le col, pres de la joe. 
N'i a maille qu'il ne descloe, 
Et l'espee du col li trenche 
Le char desous le maille blanche, 
Tant qu'il en fist du sanc cheoir. 
Li leons cuida mort veoir 
Sen boin ami et son seigneur; 
Ains de riens nule duel gregneur 
N'oïstes conter ne retraire, 
Que il en conmencha a faire; 
Il se detort et grate et crie 
Et s'a talant que il s'ochie 
De l'espee dont est maris, 
91c.3506 
Qui a son boin seigneur ochis. 
A ses dens l'espee li oste 
Et sor un fust jesant s'acoste 
Et puis derrier .i. fust l'apuie, 
Qu'ele ne guenchisse ne fuie 
Quant il y hurtera du pis. 
Ja fust ses voloirs aconplis 
Quant chil de pamisons revint; 
Et li leons si se retint, 
Qui a la mort tout achesmés 
Couroit conme tous forsenés, 
Qu'il ne prent garde ou il se fiere. 
Mesire Yvains en tel maniere 
Decoste le perron se pasme. 
Au revenir mout fort se blasme 
De l'an que trespassé avoit, 
Pour quoi sa dame le haoit, 
Et dit: « Que fait qu'il ne se tue, 
Cheli qui joie s'est tolue? 
Que fais je, las, qui ne m'ochis? 
Conment puis je demourer chi 
Et veoir les choses ma dame? 
En mon cors pour quoi arreste l'ame? 
Que fait ame en si dolens cors? 
S'ele s'en iert issue hors, 
Ne seroit pas en tel martire. 
Et mout blasmer et mout despire 
Me doit, voir, mout, et je li fas. 
Qui pert la joie et le soulas 
Par son meffait et par son tort 
Mout se doit bien haïr de mort. 
91d.3537 
Haïr et ochirre se doit; 
Et dont puis que nulz ne me voit, 
Pour quoi m'espreng que ne me tu? 
Dont n'ai je chest leon veü, 
Qui pour moi a si grant duel fait 
Qu'il se veut m'espee entresait 
Parmi le pis el cors bouter? 
Et je doi le mort refuser, 
Qui ai joie a duel changie? 
De moi s'est la joie estrangie. 
Mais orendroit n'en dirai plus, 
Que che ne porroit dire nus; 
S'ai demandee grant oiseuse. 
De joie fu la plus joieuse 
Chele qui m'iert asseüree; 
Mais mout m'ot petite duree. 
Et qui che pert par son meffait, 
N'est drois que boine aventure ait. » 
Quoique il ainsi se demente, 
Une chaitive, une dolente, 
Estoit en la chapele enclose 
Et vit et oÿ cheste chose 
Par le mur qui estoit crevés. 
Maintenant qu'il fu relevés 
De pamisons, si l'apela: 
« Dix, fait ele, qui est che la? 
Qui est qui se demente si? » 
Et il li respont: « Et vous, qui? 
- Je sui, fait ele, une chaitive 
La plus dolente riens qui vive. » 
Et il respont: « Tais, fole riens! 
92a.3568 
Tes deux est joie, tes maux biens 
Qui a grant joie te fait vivre. 
Plus se desvoie et plus s'enyvre 
Deux, quant il l'a, qu'a .i. autre honme; 
Unz febles hom porte la sonme, 
Par us et par acoustumanche, 
Que autres de gregnour poissanche 
Ne porteroit pour nule rien. 
- Par foi, fait ele, je sai bien 
Que ch'est parole toute voire; 
Mais pour che ne fait arme a croire 
Que vous aiés plus mal de moi, 
Et pour che mie ne le croi, 
Qu'il m'est avis que vous poés 
Aler quel part que vous volés, 
Et je sui ore emprisonnee; 
Si m'est tele saison donnee 
Que demain serai chaiens prinse 
Et livree a mortel juise. 
- Ha, Dix, fait il, par quel fourfait? 
- Sire chevaliers, ja Dix n'ait 
De l'ame de mon cors merchi 
Se je l'ai mie deservi! 
Et nepourquant je vous dirai 
Le voir, que ja n'en mentirai, 
Pour quoi je sui chi em prison: 
On m'apele de traÿson 
Se je ne truis qui m'en deffende, 
Que demain on ne m'arde ou pende. 
- Or primes, fait il, puis je dire 
Que li mien deulz et la moie ire 
92b.3601 
A le vostre doleur passee, 
Qu'estre porriés delivree 
Par qui que soit de chest peril. 
Dont ne porroit che estre? Oïl! 
Mais je ne sai encor par cui: 
Il ne sont el monde que dui 
Qui s'en osast pour moi deffendre 
Bataille a .iii. chevaliers prendre. 
- Conment? fait il, sont il dont troy? 
- Oïl, sire, en la moie foi: 
Troi sont qui traïtre me claiment. 
- Et qui sont chil qui tant vous ayment, 
Dont li uns tant hardis seroit 
Qu'a trois armes se conbatroit 
Pour vous sauver et garandir? 
- Je le vous dirai sans mentir: 
Li uns est mesire Gauvains 
Et li autres mesire Yvains, 
Pour cui demain serai a tort 
Livree a martire et a mort. 
- Pour qui? fait ...*. Qu'avés vous dit? 
- Sire, fait ele, se Dix m'aït, 
Pour le fil le roy Urien. 
- Or vous ai entendue bien! 
Ne vous n'i morrés ja sans li. 
Je meïsmes chil Yvains sui 
Pour qui vous estes en effroi; 
Et vous estes chele, je croi, 
Qui en la sale me gardastes; 
Ma vie et mon cors me sauvastes 
Entre les deuz portes coulans 
92c.3632 
La u je fui pensis et dolans 
Et angousseus et entrepris; 
Mors y eüsse esté ou pris 
Se ne fust vostre boine aÿe. 
Or me dites, ma douche amie, 
Qui sont chil qui de traïson 
Vous apelent et en prison 
Vous ont mise en chest reclus. 
- Sire, ne vous chelerai plus 
Puis qu'il vous plaist que je vous die. 
Voirs est que je ne me fains mie 
De vous aidier a boine foy. 
Par l'amonnestement de mi, 
Ma dame a seignour vous teni; 
Mon los et mon conseil creï 
Et, par le sainte Patrenostre, 
Plus pour son preu que pour le vostre 
Le cuidai faire et cuit encore, 
Itant vous en reconnois ore; 
S'onnor et vostre volenté 
Pourquis, se Dix me doinst santé. 
Mais quant che vint que vous eüstes 
L'an trespassé que vous deüstes 
Revenir a ma dame cha, 
Ma dame a moi se couroucha 
Et mout se tint a decheüe 
De che qu'ele m'avoit creüe. 
Et quant che seut li seneschaus, 
Un fel, .i. lerre, .i. desloiaus, 
Si grant envie me portoit 
Pour che que ma dame creoit 
92d.3663 
Lui plus qu'autrui de maint afaire, 
Si vit bien pour quoi pooit faire 
Entre moi et lui grant courous. 
En plaine court et voiant tous, 
Me mist sus pour vous l'oy traÿe, 
Et je n'oy conseil ne aÿe 
Fors que moi seule, qui savoie 
C'onques vers ma dame n'avoie 
Traïson faite ne pensee. 
Si respondi conme esfree 
Tout maintenant, sans conseil prendre, 
Que je m'en feroie deffendre 
Par .i. chevalier contre trois. 
Onques chil ne fu si courtois 
Que il le deignast refuser, 
Ne resortir ne esconser 
Ne me vaut, pour riens qu'avenist. 
Ainsi a parole me prinst; 
Si me couvint d'un chevalier 
Encontre trois gage baillier, 
Par respit de .xl. jours. 
Puis ai esté en mainte cours; 
A la court le roy Artur fui, 
Ne trouvai conseil de nului 
Ne ne trouvai qui me deïst 
De vous chose qui me seïst, 
Car il n'en savoient nouveles. 
- Et mesire Gauvains avecques, 
Li frans, li dous, ou estoit donques? 
A s'aÿe ne failli onques 
Damoisele desconseillie, 
93a.3694 
Que ne li fust appareillie. 
- Se je a court trouvé l'eüsse, 
Ja requerre ne li seüsse 
Riens nule qui me fust vee. 
Mais la roÿne en a menee 
Un chevalier, che me dist l'en, 
Dont li rois fist que hors du sen, 
Quant aprés li li envoia; 
Li rois, je cuit, le convoia 
Aprés le chevalier qui l'en maine; 
S'en est or entrés en grant paine 
Mesire Gauvains, qui le quiert. 
Janmais .i. jour a sejour n'iert 
Juques tant qu'i l'ara trouvee. 
Toute la verité prouvee 
Vous ai de m'aventure dite. 
Demain morrai de mort despite, 
Si serai arse sans respit 
Pour mal de vous et pour despit. 
Et il respont: « Ja Dix ne plache 
Qu'a vous pour moi nul ...* vous fache! 
Ja, que de* vive, n'i morrés. 
Demain atendre me porrés 
Apareilliés, de ma puissanche, 
De metre en vostre delivranche 
Mon cors, si conme le doi faire. 
Mais de conter ne de retraire 
Qui je sui as gens ne vous chaille! 
Que qu'aviengne de la bataille, 
Gardés que on ne me connoisse. 
- Chertes, sire, pour nul angousse 
93b.3725 
Vostre nom ne descouverroie. 
La mort anchois en soufferroie, 
Puis que vous le volés ainsi. 
Et nepourquant je vous depri 
Que ja pour moi ne revegniés. 
Ne veul pas que vous enpregniés 
Bataille si tres felenesse. 
Vostre merchi de la promesse 
Que volentiers vous la feriés, 
Mais trestous cuites en soiés, 
Car mix est que je seule muire 
Que je les veïsse deduire 
De vostre mort et de la moie. 
Que ja pour chou n'eschaperoie 
Quant il vous aroient ochis; 
S'est mix que vous remaigniés vis 
Que nous fussons mort ambedui. 
- Mout avés ore grant anui, 
Fait mesire Yvains, chiere amie. 
Espoir ou vous ne volés mie 
Estre delivre de la mort, 
Ou vous despisiés le confort 
Que je vous fais de vous aidier. 
Ne quier or plus de vous plaidier, 
Que vous avés tant fait pour moy, 
Chertes, que falir ne vous doi 
A nul besoing que vous aiés. 
Bien sai que mout vous esmaiés, 
Mais, se Dix plaist, en cui je croi, 
Il en seront honni tout troi. 
Or n'i a plus, que je m'en vois, 
93c.3756 
Ou que soit, logier en chel bois, 
Que d'ostel pres ne sui je point. 
- Sire, fait ele, Dix vous doinst 
Et boin chastel et boine nuit, 
Et de chose qui vous anuit, 
Si con je le desir, vous gart! » 
Tantost mesire Yvains s'en part, 
Et li leons tousjours aprés. 
S'ont tant erré qu'i vienent pres 
D'un fort chastel a .i. baron 
Qui clox estoit tout environ 
De mur espés et fort et haut. 
Li chastiaus ne cremoit assaut 
De mangonnel ne de perriere, 
Qu'il estoit fors de grant maniere; 
Mais hors des murs estoit si rese 
Le place qu'il n'i ot remese 
En estant borde ne maison. 
Assés en sarés le raison 
Une autre fois, quant lieu sera. 
Le plus droite voie s'en va 
Mesire Yvains vers le chastel; 
Et .vii. vallés fort et isnel 
Li sont tantost encontre alé. 
Si li ont un pont avalé. 
Mais du lion, c'avec lui voient, 
Venir durement se doutoient; 
Si li dïent que, s'i li plaist, 
Sen lion a le porte laist, 
Qu'il ne les afolt ou ochie. 
Et il respont: « N'en parlés mie, 
93d.3787 
Que ja n'i enterrai sans lui: 
Ou nous arons hostel ambedui 
Ou je remanrrai cha dehors, 
Que autant l'aime conme mon cors. 
Et nepourquant n'en doutés riens, 
Que je le garderai si bien 
Qu'estre porrés tout asseür. » 
Et chil respondent: « A boin eür! » 
Atant sont el chastel entré 
Et vont tant qu'il ont encontré 
Chevaliers et dames venans 
Et damoiseles avenans 
Qui le saluent et descendent 
Et a lui desarmer entendent; 
Si li dïent: « Bien soiés vous, 
Biau sire, venus entre nous, 
Et Dix vous y doinst demourer 
Tant que vous en puissiés tourner 
...* » 
Des le plus haut jusqu'au mener*, 
Li font joie et forment s'en painent; 
A grant joie el chastel l'en mainent. 
Et quant le joie li ont faite, 
Une dolours qui les dehaite 
Leur font tost lor joie oublier; 
Si reconmenchent a plourer 
Et crïent et si s'esgratinent. 
Ainsi mout longuement ne finent 
De joie faire et de plourer: 
Joie pour lor hoste honnerer 
Font sans chou que talent en ayent, 
Car d'une aventure s'esmaient 
94a.3819 
Qu'il atendent a l'endemain; 
S'en sont tuit seür et chertain 
Qu'il l'avront, ains que midi soit. 
Mesire Yvains s'esbahissoit 
De che qu'i si souvent changoient 
Et duel et joie demenoient. 
S'en mist le seignor a raison 
Du chastel et de la maison: 
« Pour Dix, fait il, biaus dous chiers sire, 
Yche vous plairoit il a dire 
Pour quoi tant m'avés honoré 
Et tant fait joie, et tant plouré? 
- Oïl, s'i vous vient a plaisir; 
Mais le cheler et le taisir 
Devriez mix assés voloir; 
Chose qui vous faiche doloir 
Ne vous dirai je ja, mon veul; 
Che ne porroit estre que duel. 
- A nul fuer, fait il, ne lairoie 
Que je le verité n'en oye, 
Car le desir mout a savoir, 
Quel duel que je en doie avoir. 
- Dont, fait il, le vous dirai ge. 
Mout m'a .i. gayans fait damage, 
Qui voloit que je li donnaisse 
Ma fille, qui de grant biauté passe 
Toutes les pucheles du monde. 
Li fex jaians, que Dix confonde, 
A non Arpin de la montagne; 
N'est nul jour que del ne me* prengne 
Trestout quanqu'il en puet ataindre. 
94b.3852 
Nus mix de moi ne se doit plaindre, 
Ne duel faire, ne duel mener; 
De duel devroie forsener, 
Que sis fix chevaliers avoie, 
Plus biaus el monde ne savoie; 
S'il a tous .vi., li gaians, prins; 
Voiant moi en a .ii. ochis 
Et demain ochirra les quatre, 
Se je ne truis qui s'ost combatre 
A lui, pour mes fix delivre*, 
Ou se je ne li veul livrer 
Ma fille; et dit, quant il l'avra, 
A plus vilz garçons qu'il sara 
En sa maison et a plus ors 
Le liverra pour ses depors, 
Qu'il ne la desire mais prendre. 
A demain puis chest duel atendre, 
Se Dix ou vous ne m'en conseille. 
Et pour chou n'est mie merveille, 
Biau sire chiers, se nous plourons. 
Mais pour vous, tant con nous poons, 
Nous reconfortons a le fye 
De faire contenanche lie; 
Car folz est qui prodonme atrait 
Entour lui, s'oneur ne li fait, 
Et vous me resamblés prodonme; 
Or vous ai trestoute la sonme 
Dite de nostre grant tristreche, 
N'en chastel ne en fortereche, 
Ne nous a laissié li gaians 
Fors tant con nous avons chaiens. 
94c.3883 
Vous et ensement bien veïstes 
Anuit se garde vous preïstes, 
Qu'il n'a laissié vaillant .i. oef 
Hors de ches murs qui tout sont noef; 
Ains a trestuit le bour plané; 
Quant che qui vaut en ot mené, 
Si mist el remanant le feu; 
Ainsi m'a fait maint felon jeu. » 
Mesire Yvains tout escouta 
Quanques ses hostes li conta, 
Et quant trestout escouté ot, 
Si li redist che qu'il li plot: 
« Sire, fait il, de vostre anui 
Mout iriés et mout dolens sui, 
Mais d'une chose me merveil, 
Se vous n'en avés quis conseil 
A la court le fort roi Artur. 
Nus hom n'est de si grant vertu 
Qu'a sa court ne peüst trouver 
Tel qui vaurroit bien esprouver 
Sa vertu encontre la soie. » 
Et lors li descovre et desloie 
Li riches hom que il eüst 
Boine aÿe se il seüst 
Ou trouver monseigneur Gavain. 
« Chil ne l'enpresist pas en vain, 
Que ma fenme est sa seur germaine; 
Mais la fenme le roi enmaine 
Un chevalier d'estrange tere; 
Si l'ala a le court requerre, 
Ne pour che ja ne l'en eüst 
94d.3914 
Mené, pour riens que il seüst, 
Ne fust Keus, qui l'*embriconna 
Le roy tant que il li bailla 
Le roÿne et mist en se garde. 
Chil fu faus et chele musarde 
...* 
Trop grant damage et trop grant perte; 
Et che est chose toute aperte 
Que mesire Gauvains, li preus, 
Pour sa nieche et pour ses neveus, 
Fust cha venus grant aleüre 
Se il seüst cheste aventure; 
Mais il ne set, dont tant me grieve 
Pour poi que li cuers ne m'en grieve*; 
Ains est alés aprés chelui, 
Qui Damedix doinst grant anui, 
Quant mené en a le roÿne. » 
Mesire Yvains onques ne fine 
De souspirer, quant che entent; 
De la pitié que il l'em prent 
Li respont: « Biaus sires chiers, 
Je m'en metroie volentiers 
En l'aventure et el peril 
Se li gaians et vostre fil 
Venoient demain a tel heure 
Que n'i faiche trop grant demeure, 
Que je ferai* ailleurs que chi, 
Demain a heure de midi, 
Si conme je l'ai creanté. 
- Biau sire, de la volenté 
Vous merchi je, fait li prodon, 
Chent mile fois en .i. randon. » 
95a.3947 
Et toutes les gens de l'ostel 
Li redisoient autretel. 
Atant ist d'une chambre hors 
Le puchele, gente de cors 
Et de faiche bele, plaisans. 
Mout fu simple, mate et taisans, 
C'onques ses deuz ne parvint fin, 
Vers tere vint le chief enclin; 
Et sa mere revint decoste, 
Que moustrer li voloit son hoste 
Li sires, qui les ot mandees. 
En lor mantiax envolepees 
Vinrent, pour lor lermez couvril*; 
Et il lor conmande a ouvrir 
Les mantiax et les chiés lever, 
Et dit: « Ne vous doit pas grever 
Che que je vous conmant a faire, 
Que un prodonme mout deboinaire 
Nous a Dix et boine aventure 
Chaiens tramis, qui m'aseüre 
Qu'il se conbatra au gaiant. 
Or n'en alés plus delaiant, 
C'au pié ne l'en alés chaoir. 
- Che ne me laist ja Dix veoir! 
Fait mesire Yvains maintenant. 
Voir ne seroit mie avenant 
Que au pié me venist la suer 
Monseigneur Gauvain a nul fuer 
Ne sa nieche; Dix m'en deffenge, 
C'orgueil en moi tant ne s'estenge 
Que a mon pié venir les lais. 
95b.3978 
Voir je n'oublieroie mais 
Le honte que j'en averoie. 
Mais de che boin gré lor saroie, 
Se eles se reconfortoient 
Jusqu'a demain, que eles voient 
Se Dix les vaurra conseillier. 
Moy n'en couvient il plus proier, 
Mais que li gaians si tost viengne 
Qu'ailleurs mentir ne me couviengne, 
Que pour riens je ne laisseroie 
Que demain, a midi, ne soie 
Au plus grant afaire pour voir 
Que je peüsse onques avoir. » 
Ainsi ne les veut pas du tout 
Asseürer, car en redout 
Est que li gaians ne venist 
A chele eure que il poïst 
Venir a tans a la puchele 
Qui est enclose en la capele. 
Et nepourquant tant lor pramet 
Qu'en boine esperanche les met; 
Et tuit et toutes l'en merchïent, 
Qu'en sa proeche mout se fïent 
Et mout quident qu'il soit prodon 
Pour la compagnie au leon 
Qui aussi simplement se gist 
Les lui conme unz agniaux fesist. 
Pour l'esperanche qu'en li ont 
Se confortent et joie font, 
N'onques puis duel ne demenerent. 
Quant heure fu, si l'en menerent 
95c.4009 
Couchier en une chambre bele; 
Et la damoisele et sa mere 
Furent ambdeuz a son couchier, 
Car il l'avoient ja mout chier 
Et chent mile tans chier l'eüssent 
Se la courtoisie seüssent 
Et le grant proeche de lui. 
Il et li leo